1 ሙሴ እስራኤልያ አሳ ሽቁዋ ኡባ ሺሺደ ሀዋዳን ያጌዳ፤ “ህንተንቱ ኦꬃና ማላ፥ መꬍና ጎዳይ አዛዜዳዌ ሀዋ: 2 ሳምንታ ግዶን ኡሱፑን ጋላሳ ኪታ ኪተትተ፤ ሽን ላፑንꬃ ጋላሳይ ህንተንቶ ጌሻ ጋላሳ፤ መꬍና ጎዳዉካ ሸምፖ ሳምባታ። ሄ ጋላሳን አይ ኦሶነ ኦꬅያ ኡራይ ኦንነ ሀይቃናዉ በሴ። ከሳ 20:8-11፤ 23:12፤ 31:15፤ 34:21፤ ዎጋ 23:3፤ ዛረ. 5:12-14 3 ሳምባታ ጋላሳን ህንተንቱ ሶን ሶን ታማ ኤꬆፕተ” ያጌዳ።

4 ሙሴ እስራኤልያ ማባራዉ ሙልያዉ ሀዋዳን ያጌዳ፤ “መꬍና ጎዳይ ሀዋዳን ያጊደ አዛዜዳ: 5 ህንተንቶ ደእያዋፐ መꬍና ጎዳዉ እምያዋ አህተ፤ መꬍና ጎዳዉ እምያዋ አሀናዉ ኮይያ ኦንነ ዎርቃ፥ ብራ፥ ናሃስያ፥ 6 ሳሉዋ ማላትያ ቃጭና፥ ኦቻ ቴራ ማላትያ ቃጭና፥ ሾሎላ ዞኦ ቃጭናነ ሊቆ ሱፍያ፥ ዴሻ ጋልባ፥ 7 ዶርሳ ኮልያ ጋልባ ዞኦ ቃላምያን የግ ከሴዳዋ፥ ቁምእያ፥ ኦዶሩዋ፥ 8 ጾምፕያዉ ዎጋራ ዛይትያ፥ ኦከትያ ዛይትያነ እጻና ሳዌꬅያ ቅማምያ፤ 9 ኤፉድያንነ ትራን ዎꬅያዋን የግያ ማርግድያ ጌተትያ ሹቻቱዋነ ሀራ ጶልያ አልኦ ሹቻቱዋ አሆ።

10 “ህንተንቱ ግዶን ደእያ ኩሽያ ሂላ ኤራንቻ ኡባቱ ዪደ፥ መꬍና ጎዳይ አዛዜዳ ኡባ ኦꬅኖ: 11 መꬍና ጎዳ ዱንካንያ፥ አ ካምያ ዱንካንያነ አ ካምያዋ፥ ኦይቂያዋ፥ ጻጋገቱዋ፥ ሽካላቱዋ፥ ቱሳቱዋነ ኡንቱንቱ ኤቂያ ሉኮቱዋ፥ 12 ታቦታነ አ ቶክያ ካሱዋ፥ አቶ ግያ ሳኣ ቁምእያዋነ ታቦታ ገንꬅያ ጋርዱዋ፤ 13 ጻርጴዛነ አ ቶክያ ካሱዋ፥ አ ሚሻቱዋ ኡባነ ጾሳ ስንꬃን ዎꬅያ ጌሻ ኡክꬃ፤ 14 ጾምፕያ ዎꬅያ ባላነ አን ማራና ደእያ ጾምፐቱዋ፥ ሚሻቱዋ፥ ጾምፕያ ዛይትያ፥ 15 እጻና ጩዋይያ ሳጽንያነ አ ቶክያ ካሱዋ፥ ኦከትያ ዛይትያነ ሳዊያ እጻና፥ ጾሳ ዱንካንያ ፐንግያ ጋርዱዋ፤ 16 ጹግያ ያርሹዋ ያርሽያ ሳኣነ አ ናሃስያ ዛዝርያ፥ አ ቶክያ ካሶቱዋነ አ ሚሻቱዋ ኡባ፥ ናሃስያፐ ኦሰቴዳ ሜቻ ከርያነ አ ዎꬅያዋ፤ 17 ሶይ ዳባባ ጎዳ ጋርዳቱዋ፥ ቱሳቱዋነ ኡንቱንቱ ገደቱዋ፥ ዳባባ ሶ ግዶ ገልያ ፐንግያ ጋርዱዋ፤ 18 ጾሳ ዱንካንያ ꬎግያ ሽካላቱዋ፥ ዳባባ ግዶ ꬎገቱዋ ኡንቱንቱ ዎዶሮቱዋ፤ 19 ጌሻ ሳኣን ኦꬂደ ጎኤታናዉ ዳደቴዳ ማዮቱዋ፥ ቄሲ አሮነ ማይያ ጌሻ ማዩዋ አ ናናይ ቄሰተꬃ ኪታ ኦꬂደ ማይያ ማዩዋ መꬍኖ” ያጌዳ።

20 ሄዋፐ ጉይያን እስራኤልያ ማባራይ ኡባይ ሙሴ ስንꬃፐ ከሴዳ። 21 እማናዉ ኮዬዳዋንቱነ ኡንቱንቱ ዎዛናይ ኡንቱንታ እማ እማ ጌዳዋንቱ ኡባይ ዬድኖ፤ መꬍና ጎዳ ዱንካንያዉ፥ አ ግዶን ኦꬅያ ኦሱዋ ኡባዉነ ጌሻ ማዮ ኮሽያዋ ኡባ አሄድኖ። 22 እማና ኮዬዳ አቱማዋ ኡባይነ ማጫዌ ኡባይ ዪደ፥ ዎርቃፐ መꬌዳ አሌቂያዋንታ፥ ሀይꬃ ጉድቻቱዋ፥ ምግዳቱዋ፥ ሀራ ዎርቃ አሌቂያዋንታ አሂደ መꬍና ጎዳዉ እሞታ ኦꬂደ እሜድኖ። 23 ሳሉዋ ማላትያ ቃጭናይ፥ ኦቻ ቴራ ማላትያ ቃጭናይ፥ ሾሎላ ዞኦ ቃጭናይ፥ ዎይ ሊኑዋ ጌተትያ ሊቆ ቃጭናይ፥ ዎይ ዴሻ አጎዛ፥ ዶርሳ ኦርግያ ጋልባ ዞኦ ቃላምያን የግ ከሴዳዌ፥ ዎይ ማንቻላይ ደእያ አሳይ ኡባይ አሄዳ። 24 ብራ ዎይ ናሃስያ እማናዉ ዳንዳይያ ኡባይ ባረንቱ እሙዋ መꬍና ጎዳዉ እሜድኖ፤ ቃይ ኦዶሩ ደእያ አሳይ ኡባይ ዱማ ዱማ ኦሶ ኦዶሩዋ አሄዳ።

25 ኩሽያ ሂላ ኤርያ ማጫ አሳይ ኡባይ ባረንቱ ኩሽያን ሱቄዳ ሳሉዋ ማላትያ ቃጭና፥ ኦቻ ቴራ ማላትያ ቃጭና፥ ሾሎላ ዞኦ ቃጭናነ ሊቆ ሊኑዋ አሄድኖ። 26 ቃይካ እሙዋ እማናዉ ኮዬዳ ማጫ አሳይ ኡባይ ዴሻ አጎዛ ዳዴድኖ። 27 ካፓቱ ኤፉድያንነ ትራን ዎꬅያዋን ዎꬅያ ማርግድያነ ሀራ ቦንቼቴዳ ሹቻቱዋ አሄድኖ። 28 ኡንቱንቱ ቃይካ ጾምፕያዉ፥ ሳዊያ እጻናዉነ ኦካናዉ ሀንያ ዎጋራ ዛይትያነ ቅማምያ አሄድኖ። 29 እስራኤላቱ አሳይ ኡባይ፥ አቱማዌነ ማጫዌ፥ ኡንቱንቱ ኦꬃናዳን መꬍና ጎዳይ ሙሴ ባጋና አዛዜዳ ኦሶ ሀንያ እሙዋ ኡባ ባረንቱ ሸንያን መꬍና ጎዳዉ አሄድኖ።

30 ሙሴ እስራኤልያ አሳ ሀዋዳን ያጌዳ፤ “በእተ፤ መꬍና ጎዳይ ይሁዳ ዛርያፐ ሁራ ናኣ ናኣ፥ ኡራ ናኣ፥ ባጻልኤላ ዶሬዳ። 31 መꬍና ጎዳይ አ ጾሳ አያናን፥ ሂላን፥ አኬካንነ ኦሱዋ ኡባ ኦꬅያ ኤራን ኩንꬄዳ። 32 ሄዌካ ሂላን ኪታ ሀልቹዋ ከሲደ፥ ዎርቃፐ፥ ብራፐነ ናሃስያፐ ዱማ ዱማባ እ ኡዳናሳ። 33 ሄዋዳንካ፥ አልኦ ሹቻ ማሲደ ጊግሳናሳ፤ ምꬃ ማሳናሳነ ኡባ ቆሞ ኦሱዋ ሂላን ኦꬃናሳ። 34 ሄዋ ቦላካ ቃይ አስነ ዳና ዛርያ አህሳማካ ናኣ ኦሆልኣባዉ፥ ሀራ አሳ ታማርስያ ኤራ እሜዳ። 35 ኡንቱንቱ ኡባ ቆሞ ኦሱዋ ኦꬃናዳን፥ ሂላን ኦꬅያዋንታ፥ ኦሱዋ ሀልቹዋ ከስያዋንታ፥ ሳሉዋ ማላትያ ቃጭናን፥ ኦቻ ቴራ ማላትያ ቃጭናን፥ ሾሎላ ዞኦ ቃጭናንነ ሊኑዋ ቃጭናን አሌቁዋ ዳድያዋንታነ ሸማይነቱዋ ግዳናዳን፥ ጾሳይ ኡንቱንቱ ኤራተꬃን ኩንꬄዳ። ኡንቱንቱ ኡባይካ ኡባ ቆሞ ኦሱዋ ሉጺደ ኤርያ ኤራንቻ ግዴድኖ።