1 “ሄዋ ድራዉ፥ ባጻልኤል፥ ኦሆልኣብነ መꬍና ጎዳ ዱንካንያ ኬጻና ማላነ ኦሶ ግድያ ኤራ መꬍና ጎዳይ እምና፥ ሉጼዳ አሳይ ኡባይ መꬍና ጎዳይ አዛዜዳዋዳን ኡባባ ኦꬃና” ያጌዳ።

2 ሄዋፐ ጉይያን ሙሴ ባሳልኤላ፥ ኦሆልኣባነ መꬍና ጎዳይ ዱማ ኤራ እሜዳዋንቱ ኦሱዋ ኦꬃናዉ ያና ኮይያ ኡባ ጼሲደ ሺሼዳ። 3 እስራኤልያ አሳይ ጾሳ ዱንካንያ ኦꬃናዉነ ኦሶ ግድያ እሞታ ኡባ ሙሴፐ አኬድኖ። ቃይ አሳይ ባረ ሸንያን ጮ እምያ እሞታ ዎንታ ዎንታ ጉጅ ጉጂደ አህያዋ አግቤና። 4 ያትና ጾሳ ዱንካንያ ኦꬅያ ኤራይ ኩሜዳ አሳይ ኡባይ ባረንቱ ኦሱዋ አግ ባሺደ፥ 5 ሙሳ ሀዋዳን ያጌድኖ፤ “አሳይ መꬍና ጎዳይ አዛዜዳ ኦሶ ኮሽያዋፐ ሎይꬅ ዳርያዋ አሂደ ደኤ” ያጌድኖ።

6 ሙሴ ዱንካኔዳ ሳኣን ደእያ አሳዉ ሀዋዳን ያጊደ አዛዜዳ፤ “ላኤንꬆ አይ አቱማ አሳይካ አይ ማጫ አሳይካ ጾሳ ዱንካንያ ኦሶ እምያዋ እማናዉ አሆፖ” ያግና፥ አሳይ አህያዋ አግ ባሼዳ። 7 አያዉ ጎፐ፥ ኡንቱንቱ አሄዳ እሞታይ ኦሱዋ ኡባ ኦꬃናዉ ግዲደ ፓላሄ።

8 ኦሱዋ ኦꬅያዋንቱ ግዶፐ ሂላ ዳርያዋንቱ ኡባቱ ሊቆ ሊኑዋፐነ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐ ዳደቴዳ ታሙ ጋርዱቱዋፐ ጾሳ ዱንካንያ ጊግሴድኖ። ሄ ጋርዳቱዋን እት ሂላይ ክሩበቱዋ ምስልያ ዳዴዳ። 9 ጋርዶቱ ኡባይ እት ልከ ግዲደ፥ ጌሳይ ላታማነ ሆስፑን ዋꬋ፤ ጎምፓይ ኦይዱ ዋꬋ። 10 እቼሹ ጋርዳቱዋ እትፐ ጋꬂደ ስኬድኖ፤ ቃይ የንኮ አቴዳ እቼሹ ጋርዳቱዋካ ኡንቱንቱዋዳን ኦꬄድኖ። 11 እትፐ ጋꬂደ ስኬዳ ጋርዱቱዋፐ እት ጋርዱዋ ዉርሰꬃ ጋጻን ሳሉዋ ማላትያ ጫርቂያፐ ማጫራ መꬌድኖ። ቃይ እትፐ ጋከት ስከቴዳ የንኮ ጋርዱዋንካ ሄዋዳን ኦꬄድኖ። 12 ኡንቱንቱ እትፐ ጋከቴዳ እት ጋርዱዋ ቦላ እሻታሙ ማጫራ፥ ቃይ እትፐ ጋከቴዳ የንኮ ጋርዱዋ ቦላካ እሻታሙ ማጫራ መꬌድኖ። ሄ ማጫራቱ ኡባይካ እቱ እቶ ማራን ደኢኖ። 13 ሄዋፐ ጉይያን፥ ዎርቃፐ እሻታሙ ኦይቂያዋ መꬌድኖ። ዱንካኒ እቱዋ ግዳና ማላ፥ ሄ ጋርዳቱዋ ጋጻ ጋጻ ሄ ኦይቂያዋንቱን ኦይꬄድኖ።

14 ጾሳ ዱንካንያ ቦላና ካምያ ዱንካንያዉ ታማነ እት ጋርዳቱዋ ዴሻ አጎዛፐ ዳዴድኖ። 15 ታማነ እት ጋርዳቱካ እት ልከ፤ እት እት ጋርዱዋ ጌሳይ ሀታሙ ዋꬋ፥ ጎምፓይ ኦይዱ ዋꬋ። 16 እቼሹ ጋርዳቱዋ እት ባጋና፥ ኡሱፑን ጋርዳቱዋ ቃይ የንኮ ባጋና ጋꬂደ ስኬድኖ። 17 ሄዋፐ ጉይያን ጋꬅ ስኬዳ ጋርዳቱዋፐ እት ጋርዱዋ ጋጻን እሻታሙ ማጫራ መꬌድኖ። ቃይካ ጋꬅ ስኬዳ የንኮ ጋርዳቱዋፐ ዉርሰꬃ ጋርዱዋ ጋጻን እሻታሙ ማጫራ መꬌድኖ። 18 ላኡ ባጋና ደእያ ጋርዳቱዋ ጋꬂደ እት ዱንካነ ኦꬃናዉ ናሃስያፐ እሻታሙ ኦይቂያዋ መꬌድኖ። 19 ሄዋፐ ጉይያን ዱንካንያ ካማናዉ ዶርሳ ኦርግያ ጋልባ ዞኦ ቃላምያን የግ ከሴዳዋ ጊግሴድኖ፤ ቃይ አ ቦላና ካማናዉ ቁምእያ ጊግሴድኖ።

20 ጾሳ ዱንካንያ ጻጋግያዋንታ ስት ጌዳ ኦዶሮቱዋፐ ከሴድኖ። 21 እት እት ጻጋግያዉ ጌሳይ ታሙ ዋꬋ፤ ጎምፓይ እት ዋꬋነ ባጋ። 22 እት እት ጻጋግያዉ እቱዋ እቱዋና ጋꬅ ኦይꬅያ ላኡ ፖꬃቱዋ መꬌድኖ። ጾሳ ዱንካንያ ጻጋገቱዋ ኡባካ ሄዋዳን ኦꬄድኖ። 23 ጾሳ ዱንካንያዉ ገድሳ ባጋና ላታሙ ጻጋገቱዋ መꬌድኖ። 24 እት እት ጻጋግያዉ ላኡ ገደቱዋ፥ ኡባና ኦይታሙ ፖꬃይ ገልያ ሉካቱዋ ብራፐ ጊግሴድኖ። 25 ጾሳ ዱንካንያዉ ሁጲሳ ባጋና ላታሙ ጻጋገቱዋ መꬌድኖ። 26 እት እት ጻጋግያዉ ላኡ ፖꬃይ ገልያ ሉካቱዋ፥ ኡባና ኦይታሙ ፖꬃይ ገልያ ሉካቱዋ ብራፐ ጊግሴድኖ። 27 ጾሳ ዱንካንያዉ ጉየ ጋጻን አዋይ ዉልያ ባጋና ኡሱፑን ጻጋገቱዋ መꬌድኖ። 28 ጾሳ ዱንካንያ ጉየ ጋጻን ደእያ ጋጻቶ ላኡ ጻጋገቱዋ ጊግሴድኖ። 29 ሀ ላኡ ጋጻቱዋን ደእያ ጻጋገቱዋ ጻጱዋፐ ጼራ ጋካናዉ ዳቡላ ግድ ቢደ፥ ጼራን እት ሳጋይያን ገል ኦይቀቴድኖ። ኡንቱንቱ ላአቱካ ሄዋዳን ሀኔድኖ። 30 ሄዋ ድራዉ፥ እት እት ጻጋግያዉ ጋርሳና ላኡ ላኡ ገደቱ ደኢኖ፤ ኡባና ሆስፑን ጻጋገቱነ ብራፐ ኦሰቴዳ ታማነ ኡሱፑን ገደቱ ደኢኖ።

31 ቃይ ኡንቱንቱ ኦዶሮቱዋፐ ሽካላቱዋ ከሴድኖ፤ ጾሳ ዱንካንያዉ እት ባጋ ምይያን ደእያ ጻጋገቶ እቼሹ ሽካላቱዋ፥ 32 ቃይ የንኮ ባጋ ምይያን ደእያ ጻጋገቶ እቼሹ ሽካላቱዋ ጊግሴድኖ። ሄዋዳንካ፥ ጾሳ ዱንካንያዉ ጉየ አዋይ ዉልያ ባጋና ዉርሰꬃ ጋጻን ደእያ ጻጋገቶ እቼሹ ሽካላቱዋ መꬌድኖ። 33 ግዶ ሽካሊ ጻጋገቶ ግዶ ሄራና፥ ሀ ጋጻፐ ያ ጋጻ ጋካናዉ ፕን ከሳናዳን ኦꬄድኖ። 34 ጻጋገቱዋ ዎርቃን ሼሺደ፥ ሽካላቱ አꬍያ ሳጋየቱዋ ዎርቃፐ መꬌድኖ፤ ቃይ ሽካላቱዋካ ዎርቃን ሼሼድኖ።

35 ሳሉዋ ማላትያ፥ ኦቻ ቴራ ማላትያነ፥ ሾሎላ ዞኦ ቃጭናፐነ ሊቆ ሊኑዋፐ እት ጋርዱዋ ኦꬄድኖ። ሄ አ ቦላ እት ሂላይ ክሩበቱዋ ምስልያ ስኬዳ። 36 ጋርዱዋ ኦይዱ ቱሳቱዋ ኦዶሩዋፐ ጊግሲደ፥ ዎርቃን ሼሼድኖ። ያቲደ ዎርቃ ካቂያዋንታ ኡንቱንቶ ጊግሴድኖ። ቃይ ቱሳቱዋ ኤስያ ኦይዱ ገደቱዋ ብራፐ መꬌድኖ። 37 ጾሳ ዱንካንያ ገልያ ፐንግያዉ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐነ ሊቆ ሊኑዋፐ ዳደቴዳዋ፥ ጽልፕያ አሌቅስያዋን ጋርዱዋ ጊግሴድኖ። 38 ቃይ ኡንቱንታ ካቂያ እቼሹ ቱሳቱዋ፥ ካቂያ ባላና ደእያዋንታ መꬌድኖ። ቱሳቱ ጉምቦቱዋነ ቃችያዋንታ ዎርቃን ሼሼድኖ። ቃይ ኡንቱንቱ ፖꬃይ ገልያ ሉኮቱዋ እቼሻቱዋካ ናሃስያፐ መꬌድኖ።