1 ባጻልኤል ኦዶሩዋ ምꬃፐ ታቦታ ጊግሴዳ። ሄ ታቦታይ አዱሳተꬃይ ላኡ ዋꬋነ ባጋ አዱቄ፤ ጎምፓይ እት ዋꬋነ ባጋ አኬ፤ ጌሳይካ እት ዋꬋነ ባጋ ꬎቄ። 2 ሄ ታቦታ ጊግሲደ፥ ሶያነ ካርያ ዋላካይ ባይና ዎርቃን ሼሼዳ፤ ዩሹዋካ ዎርቃ ትገꬃን ዩሽ አꬄዳ። 3 ቃይ ኦይዱ ዎርቃ ሳጋየቱዋ ትጊደ፥ ታቦታዉ ኦይዱ ገደቱዋን፥ እት ባጋና ላኡ ሳጋየቱዋ፥ ቃይ የንኮ ባጋና ላኡ ሳጋየቱዋ አꬄዳ። 4 ያቲደ ኦዶሮቱዋፐ ካሱዋ ከሲደ ኡንቱንታካ ዎርቃን ሼሼዳ። 5 ታቦታ ቶካናዉ፥ ታቦታ ምይያን ደእያ ሳጋየቱዋን ካሱዋ አꬄዳ።

6 ዋላካይ ባይና ዎርቃፐ ላኡ ዋꬋነ ባጋ አዱቂያ፥ እት ዋꬋነ ባጋ አክያ አቶ ግያ ሳኣ ቁምእያ መꬌዳ። 7 ቁምእያዉ ዉርሰꬃ ላኡ ባጋ ጋጻን ላኡ ክሩቤላቱዋ ቆጸቴዳ ዎርቃፐ መꬌዳ። 8 እት ክሩብያ እት ባጋ ጋጻን፥ ላኤንꬆ ክሩብያ የንኮ ባጋ ጋጻን፥ ላኡዋካ ቁምእያና ጋꬅ ኦይꬂደ መꬌዳ። 9 ክሩበቱ ባረንቱ ቀፍያ ደንꬂደ፥ አቶ ግያ ሳኣ ካምያ ቁምእያ ባረንቱ ቀፍያን ኩዋይ ዎꬄድኖ፤ ቃይ እቱ እቱዋኮ ስም ኡቲደ፥ ቁምእያ ጼሊኖ።

10 ቃይ አዱሳተꬃይ ላኡ ዋꬋ፥ ጎምፓይ እት ዋꬋ፥ ጌሳይካ እት ዋꬋነ ባጋ ግዴዳ ጻርጴዛ ኦዶሩዋፐ መꬌዳ። 11 ዋላካይ ባይና ዎርቃን ሼሼዳ። ዩሹዋካ ዎርቃ ትገꬃ ዩሽ አꬄዳ። 12 ሄዋዳንካ፥ ጎምፓይ ታካ ግዴዳ ሻሽያ አ ቦላ ዩሽ አꬄዳ። ያቲደ አ ቦላ ዎርቃ ትገꬃ ዩሼዳ። 13 ኦይዱ ዎርቃ ሳጋየቱዋ መꬊደ ኦይዱ ገደቱ መቴዳ ኦይዱ ጋጻቱዋና ኦይꬄዳ። 14 ጻርጴዛ ቶካናዉ ካሱዋ አꬅያ ሳጋየቱ ጻርጴዛዉ ሻሽያ ጋጻን ሺቂደ መቴድኖ። 15 ጻራጴዛ ቶክያ ካሶቱዋካ ኦዶሩዋፐ ከሲደ፥ ዎርቃን ሼሼዳ። 16 ሄዋዳንካ፥ ጻርጴዛ ቦላ ዎꬅያ ዱማ ዱማ ሚሻቱዋ ዋላካይ ባይና ዎርቃፐ መꬌዳ፤ ሄዋንቱካ ሳነቱዋነ ጭልፓቱዋ፥ ቃይ ኡሻ ያርሹዋ ትግያ ከረቱዋነ ጹአቱዋ።

17 ሄዋፐ ጉይያን እ ጾምፕያ ዎꬅያ ባላ ቆጸቴዳ ዋላካይ ባይና ዎርቃፐ መꬌዳ፤ ሄ ባላ ኤስያ ገድያካ፥ ግዶ ቶማካ ቆጼዳ ዎርቃፐ መꬌዳ። አ ኩኩሞቱዋ፥ አ ልጮቱዋን አ ጪሻቱዋ ኡባ አናና እትፐ ጾምፒደ መꬌዳ። 18 ምይያና ኡሱፑን ማራቱዋ መꬌዳ፤ ማራቱዋ ሄዛቱዋ እት ባጋና፥ ቃይ ሄዛቱዋ የንኮ ባጋና ከሴዳ። 19 ኡሱፑን ማራቶካ ሁጲያን ሁጲያን ሄዙ ሄዙ ኩኩሙነ ጪሻቱ ደእያ ላዉዝያ ጪሻ ማላትያ ዋንጫ መꬌዳ፤ 20 ጾምፕያ ዎꬅያ ባላዉ ግዶ ቶማይ፥ ኩኩሞቱዋ ጪሻቱ ደእያ ጪሻ ማላትያ ኦይዱ ዋንጫን አሌቀት ኡቴዳ። 21 ላኡ ላኡ እትፐ ዋꬃን ደእያ ሄዙ ማራቱዋፐ ጋርሳና እት እት ኩኩማይ መት ኡቴዳ ኡባይካ ኡሱፑን ኩኩሞ። 22 ኩኩማቱነ ማራቱ ኡባይ ጾምፕያ ዎꬅያ ባላና እትፐ ኦይቀት እቱዋ ግዲደ፥ ዋላካይ ባይና ዎርቃፐ ቆጸቲደ መቴድኖ።

23 እ ቃይ ጾምፕያ ዎꬅያ ባላዉ ላፑን ጾምፐቱዋ፥ ጾምፕያ ቶይስያ ቃጰቱዋነ ኡንቱንታ ዎꬅያዋንታ ዋላካይ ባይና ዎርቃፐ መꬌዳ። 24 ጾምፕያ ዎꬅያ ባላነ አን ጎኤትያ ሚሻ ኡባ መꬋናዉ ሀታማነ እቼሹ ኪሎ ግራመ ግዴዳ ዋላካይ ባይና ዎርቃ ዉርሴዳ።

25 ቃይ እጻና ጩውስያ ሳኣ ኦዶሩዋፐ መꬌዳ። አዉ ኦይዱ ጋጻይ ደኤ፤ አዱሳተꬃይ እት ዋꬋ፤ ጎምፓይ እት ዋꬋ፥ ጌሳይ ላኡ ዋꬋ። አ ካጨቱካ አናና እቱዋ ግዲደ ኦይቀት መቴዳዋንታ። 26 አዉ ቦላ ዶና፥ ኦይዱ ባጋ ኡባነ አ ካጨቱዋ ዋላካይ ባይና ዎርቃን ሼሺደ፥ አ ዩሹዋካ ዎርቃ ትገꬃ ዩሽ አꬄዳ። 27 ሄ ዎርቃ ትገꬃፐ ጋርሳና እጻና ጩውስያ ሳጽንያ ዎርቃፐ ላኡ ሳጋየቱዋ መꬌዳ፤ ያቲደ ያ ባጋናነ ሀ ባጋና ላኡዋ ላኡዋ ኦይꬄዳ። ሄዋንቱ ቶክያ ዎደ ካሱዋ አꬃናዉ ማዳናዳና። 28 ካሶቱዋ ኦዶሩዋፐ ከሲደ፥ ኡንቱንታ ዎርቃን ሼሼዳ።

29 ቃይ ጌሻ ኦከትያ ዛይትያነ ሳዉዋ ቶሽኩ ግያ ሎኦ እጻና ሽቱዋ ኦꬅያ ኤራን ጊግሴዳ። ከሳ 30:22-38