1 ኦዶሩዋፐ ጹግያ ያርሹዋ ያርሽያ ሳኣ ኬጼዳ። ሄ ያርሽያ ሳአዉ ጌሳይ ሄዙ ዋꬋ፥ ጎምፓይነ አዱሳተꬃይ እት ልከ፥ እቼሹ እቼሹ ዋꬋ ግዲደ፥ ኦይዱ ጋጻና ደእያዋ ኦꬄድኖ። 2 ኦይዱ ጋጻቱዋ ዉርሰꬃ ጋጻን ጋጻን እት እት ካጭያ መꬌዳ። ሄ ካጨቱ ያርሽያ ሳኣና እትፐ ኦይቀቲደ ኦሰቴድኖ። ያትና ያርሽያ ሳኣ ናሃስያ ብራታን ሼሼዳ። 3 አን ጎኤትያ ኡባ ሚሻቱዋ፥ ባልደቱዋ፥ አካፋቱዋ፥ ብድንꬃ ሺሽያ ኩይጻሮቱዋ፥ አሹዋ ኦይቂያ ዛምቤልያነ ታማ ጮጨቱዋ ኡባ ናሃስያ ብራታፐ መꬌዳ። 4 ያቲደ ናሃስያ ብራታፐ ዛዝርያ ያርሽያ ሳአዉ ጊግሲደ ያርሽያ ሳአዉ ዱገ ግዶ ባጋን ደእያ ሻሽያ ቦላ ዎꬄዳ። 5 ናሃስያ ብራታፐ መꬌዳ ዛዝርያዉ ኦይዱ ጋጻን ካሱዋ አꬃናዉ ኦይዱ ሳጋየቱዋ መꬌዳ። 6 ኦዶሩዋፐ ያርሽያ ሳአዉ ካሱዋ ከሲደ፥ ናሃስያ ብራታን ሼሼዳ። 7 ያርሽያ ሳኣ ቶክያ ዎደ ማዳና ማላ፥ ሀ ካሱዋ ላኡ ምይያና ደእያ ሳጋየቱዋን አꬄዳ። ያርሽያ ሳኣ ግዱዋ ኮፋ ከሲደ፥ ጻዉላፐ መꬌዳ።

8 ናሃስያ ብራታፐ ሜቻ ከርያነ አ ዎꬅያዋ መꬌዳ፤ ሄ ብራታይ ጋከꬃ ዱንካንያ ፐንግያን ኦꬅያ ማጫ አሳቱ አሄዳ ሄረጋፐ አከቴዳ።

9 ሄዋፐ ጉይያን ዳባባ ጊግሴዳ። ዳባባዉ ገድሳ ባጋ አዱሳተꬃዉ ጼቱ ዋꬋ ኦꬂደ፥ ሊቆ ሊኑዋፐ ዳደቴዳ ጋርዳቱዋ ጊግሴዳ። 10 አዉ ናሃስያ ብራታፐ ላታሙ ቱሳቱዋነ ቱሳቱ ኤቂያ ናሃስያ ሉካቱዋ ኦꬄዳ፤ ኡንቱንቱ ሁጲያን ቃይ ብራፐ መቴዳ ካቂያዋንታነ ቱሳቱዋ ሁጲያን ቃችያዋንታ ኦꬄዳ። 11 ዳባባዉ ሁጲሳ ባጋ አዱሳተꬃይ ጼቱ ዋꬋ አዱሳ፤ ቃይ ላታሙ ቱሳቱነ ሄ ቱሳቶ ላታሙ ናሃስያ ገደቱ ደኢኖ። ያቲደ ብራፐ መቴዳ ካቂያዋንቱነ ቱሳቱዋ ሁጲያን ቃችያዋንቱ ደኢኖ። 12 አዋይ ዉልያ ባጋ ዳባባ ጎምፓይ እሻታሙ ዋꬋ አካ ግዲደ፥ ታሙ ቱሳቱነ ቱሳቶ ታሙ ገደቱ ደእያ ጋርዳቱዋ ጊግሴዳ፤ ሄ ቱሳቱዋ ሁጲያን ብራፐ መቴዳ ካቂያዋንታነ ቱሳቱዋ ሁጲያን ቃችያዋንታ ኦꬄዳ። 13 ቃይ አዋይ ዶልያ ባጋ ዳባባ ጎምፓይ እሻታሙ ዋꬋ አካ። 14 ዳባባ ገልያ ሳኣፐ እት ባጋና ታማነ እቼሹ ዋꬋ አዱቂያ ጋርዶቱ፥ ሄዙ ቱሳቱነ ቱሳቶ ሄዙ ገደቱ ደኢኖ። 15 ሄዋዳንካ፥ ዳባባ ገልያ ሳኣፐ ህንኮ ባጋና፥ ታማነ እቼሹ ዋꬋ አዱቂያ ጋርዶቱ፥ ኡንቱንቶ ሄዙ ቱሳቱነ ቱሳቶ ሄዙ ገደቱ ደኢኖ። 16 ዳባባ ዩሹዋን ደእያ ጋርዶቱ ኡባይ ሊቆ ሊኑዋፐ ዳደቴዳዋንታ። 17 ሄ ቱሳቱዋ ገደቱ ናሃስያፐ፥ ካቂያዋንቱነ ቱሳቱዋ ሁጲያን ቃችያዋንቱ ብራፐ ኦሰቴድኖ፤ ኡንቱንቱ ሁጲ ብራን ሼሸቴዳ። ሄዋ ድራዉ፥ ዳባባ ዩሹዋን ደእያ ቱሳቱዋ ኡባ ሁጲያን ብራፐ ኦሰቴዳ ቃችያዋንቱ ደኢኖ። 18 ዳባባ ገልያ ሳኣን ካቂያ ጋርዱ ሳሉዋ ማላትያ ኦቻ ቴራ ማላትያነ ሾሎላ ዞኦ ቃጭናፐነ ሊቆ ሊኑዋፐ ዳድያዋ ጽልፕያን አሌቂስያዋን ጊግሴዳዋ። አዉ አዱሳተꬃይ ላታሙ ዋꬋ፤ ጌሳይ ዳባባ ጋርዳቱዋ ልከ፥ እቼሹ ዋꬋ። 19 ናሃስያ ብራታፐ ኦሰቴዳ ኦይዱ ቱሳቱነ ቱሳቶ ኦይዱ ገደቱ ደኢኖ። ኡንቱንቱ ካቂያዋንቱነ ቱሳቱዋ ሁጲያን ቃችያዋንቱ ብራፐ መቴድኖ፤ ኡንቱንቱ ሁጰቱካ ብራን ሼሸቴድኖ። 20 ጾሳ ዱንካንያ ሽካላቱ ኡባይነ አ ዩሹዋን ደእያ ዳባባ ሽካላቱ ኡባይ ናሃስያ ብራታፐ መቴዳዋንታ።

21 ጾሳ ዱንካንያዉ፥ ሄዌካ ቃላ ጫቁዋ ዱንካንያዉ፥ ጎኤቴዳ ሚሻቱዋ ሌዋቱ ፓይዴድኖ። ሄ ሚሻቱዋ ቄስያ አሮና ናኣ እታማራ ካፖተꬃ ጋርሳን ደእያ ሌዋቱ ማዝጋባን ጻፋናዳን ሙሴ አዛዜዳ።

22 ይሁዳ ዛረ ግዴዳ ሆራ ናኣ ናኣ፥ ኡራ ናኣ፥ ባጻልኤል መꬍና ጎዳይ ሙሳ አዛዜዳ ኡባ ኦꬄዳ። 23 ዳና ዛረ ግዴዳ አህሳማካ ናኣ ኦሆልኣብ አናና ደኤ፤ እ ኩሽያ ሂላንቻነ ኦꬅያባዉ ኮይሮ ሀልቹዋ ከስያዋ፤ ቃይ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናንነ ሊቆ ሊኑዋን ዳዲደ፥ ጽልፕያን አሌቂስያ አሳ።

24 ጾሳ ዱንካንያ ኦሶ ጾሳዉ እመቴዳ ዎርቃይ ጾሳ ዱንካንያን ኤረትያ ሚዛናን ዎꬅና፥ እት ሻአ ኪሎ ግራምያ ዴጼዳ። 25 ፓይዱዋን ደእያ ማባራ አሳፐ ቤቴዳ ብራይ ጾሳ ዱንካንያን ኤረትያ ሚዛናን ዎꬅና፥ 3,430 ኪሎ ግራምያ ዴጼዳ። ከሳ 30:11-16 26 አሳ ፓይድያ ዎደ ፓይደቴዳ አቱማ አሳይ ኡባይ ሁጲያን ሁጲያን ጾሳ ዱንካንያን ኤረትያ ሚዛናን ዎꬅና፥ ኡሱፑን ግራመ ኬሻ እሜዳ። ፓይደቴዳ አሳይ ላታሙ ላይꬃ ኩሜዳዌነ ላታሙዋፐ ቦላና ደእያዌ ኡባይ 603,550.ማቶሳ 17:24 27 ጾሳ ዱንካንያ ጋርዱዋ ኤሴዳ ጼቱ ፖꬃይ ገልያ ሉኮቱ 3,400 ኪሎ ግራመ ብራን ኦሰቴድኖ። ሄዌካ እት እት ገድያዉ ሀታማነ ኦይዱ ኪሎ ግራመ ብራ። 28 አቴዳ ሀታሙ ኪሎ ግራመ ትግያ ብራ ቱሳቱዋን ካቂያዋንታ መꬋናዉ፥ ቱሳቱዋ ሁጲያን ሼሻናዉነ ኡንቱንቱ ሁጲያን ቃችያዋንታ መꬋናዉ ጎኤቴድኖ። 29 ሄዋዳንካ፥ አሳይ ጾሳዉ አሄዳ ናሃስያ ብራታይ 2,425 ኪሎ ግራመ። 30 ሄ ናሃስያ ብራታፐ ጾሳ ዱንካንያ ገልያ ሳኣን ኤቂያ ቱሳቱዋ ገደቱ፥ ናሃስያ ያርሽያ ሳኣ ግያ ያርሽያ ሳአይ፥ አ ግዶን ሂጼዳ ናሃስያ ዛዝሪነ አ ግዶን ጎኤትያ ዱማ ዱማ ሚሻ ኡባይ መቴ። 31 ሄዋዳንካ፥ ቃይ ዳባባ ዩሹዋን ደእያ ድርሳነ ገልያ ሳኣ ፐንጊ ኤቄዳ ገደቱ፥ ቃይ ጾሳ ዱንካኒነ አ ዩሹዋን ደእያ ዳባባ ድርሳይ ꬎገቴዳ ሽካላቱ ኡባይ ሄ ናሃስያ ብራታፐ መቴድኖ።