1 ቄሳቱ ጾሳ ዱንካንያን ኦꬅያ ዎደ ጎኤትያ ማዩዋ፥ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐ ዳዴድኖ። አሮነ ማይያ ጌሻ ቄሳተꬃ ማዩዋካ መꬍና ጎዳይ ሙሳ አዛዜዳዋዳን ኦꬄድኖ።

2 እ ኤፉድያ፥ ዎርቃፐ፥ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐነ ሊቆ ሊኑዋፐ ዳዴዳ። 3 ኡንቱንቱ ዎርቃ ቆጺደ፥ ሌእያ ዬቻዳ፥ አፐ ቃራር ቃራሪደ፥ ቃጭና ከሴድኖ። ያቲደ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናነ ሊቆ ሊኑዋ ጋꬂደ፥ ኩሽያ ሂላንቻቱ ዳዴድኖ። 4 ላኡ ባጋይ ጋከቲደ እቱዋ ግዳና ማላ፥ ላኡ ሀሽያ ቦላ ጋꬂደ ኦይꬅያ ጫርቂያ ጊግሴድኖ። 5 መꬍና ጎዳይ ሙሳ አዛዜዳዋዳን፥ ሂላይ አሌቂሲደ ዳዴዳ ዳንጩካ ኤፉድያና እታ ግዲደ፥ ዎርቃፐ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐነ ሊቆ ሊኑዋፐ ዳደቴዳ።

6 ኡንቱንቱ ማርግድያ ጌተትያ ላኡ ሹቻቱዋ ጊግሲደ፥ ዎርቃፐ መꬌዳ ሹቻ ኦይቂያዋ ቦላ ማራና ዎꬄድኖ። ማታፋ ቦላ ሱንꬃ ዎጪደ ጻፍያዋዳን፥ ሄ ሹቻቱዋ ቦላ ታማነ ላኡ እስራኤልያ ናናቱዋ ሱንꬃ ዎጪደ ጻፌድኖ። 7 ጾሳይ ሙሳ አዛዜዳዋዳን፥ ታማነ ላኡ እስራኤልያ ዘረꬃ ሀሳይያዋ ግዳና ማላ፥ ሀ ሹቻቱዋ ኤፉድያና ኦይꬄዳ ሀሽያ ጫርቂያን ዎꬄዳ።

8 እ ትራን ዎꬅያዋ ኩሽያ ሂላንቻን ኦስሴዳ። ሄ ትራን ዎꬅያዋ ኤፉድያ ዎርቃፐ ዳዴዳዋዳን፥ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐነ ሊቆ ሊኑዋፐ ዳድሴዳ። 9 አዉ ኦይዱ ጋጻይ ደኤ፤ ጌሳይነ ጎምፓይ እት እት ታካ፤ ግዴዳዋ ዳኮዬድኖ። 10 ሄዋፐ ጉይያን አ ቦላ ኦይዱ ማራን አልኦ ሹቻቱዋ ዎꬄድኖ፤ ኮይሮ ማራን ዎꬄዳ ሹቻይ፥ ሳርድዮና፥ ቶጳዝዮንያነ ጶልያ እንቁዋ፤ 11 ላኤንꬆ ማራን ባሉራ፥ ሳምፔርያነ አልማዝያ ጌተትያ አልኦ ሹቻቱዋ፤ 12 ሄዘንꬆ ማራን ያክንትያ፥ ከልቀዶንያነ አመተስጽኖስያ፤ 13 ኦይደንꬆ ማራን ብራል፥ ማርግድያነ ያስጲድያ። ሄዋንታ ኡባ ዎርቃፐ ኦሰቴዳ ሹቻ ኦይቂያዋ ቦላ ዎꬄድኖ። 14 እስራኤልያ ናናቱዋ ሱንꬃ ፓይዱዋዳን፥ ሹቻቱዋ ፓይዱካ ታማነ ላኡዋ፤ እቱ እቱ ማታፋዳን ዎጨቲደ፥ ታማነ ላኡ ዛራቱዋ ሱንꬃይ ሄ ሹቻቱዋን ጻፈቴዳ።

15 ትራን ዎꬅያዎ ዎዶሩዋዳን ዶቀቴዳ ሳንሳላታ ዋላካይ ባይና ዎርቃፐ መꬌድኖ። 16 ላኡ ዎርቃፐ መꬌዳ ሹቻ ኦይቂያዋንታ ኦꬄድኖ፤ ያቲደ ላኡ ዎርቃ ምግዳቱዋ መꬌዳዋንታ፥ ትራን ዎꬅያዎ ቆሞ ጋጻ ጋጻቱዋና ጋꬂደ ኦይሰꬄድኖ። 17 ሄ ላኡ ዎርቃ ሳንሳላታቱዋ ትራን ዎꬅያዎ ጋጻቱዋን ደእያ ምግዶቱዋና ጋꬅ ኦይꬄድኖ። 18 ሄ ሳንሳላታቶ ህንኮ ባጋ ጼራ ቃይ ኤፉድያዉ ስንꬃ ባጋና፥ ሀሽያ ጫርቂያን ደእያ ሹቻ ኦይቂያዋንቱና ጋꬅ ቃቼድኖ። 19 ቃይካ ላኡ ዎርቃ ምግዳቱዋ መꬊደ፥ ኤፉድያፐ ካሊደ ደእያ ትራን ዎꬅያዎ ሶይ ባጋና ደእያ ላኡ ጋጻቱዋ ጼራን አꬄድኖ። 20 ሄዋዳንካ፥ ዎርቃፐ ሀራ ላኡ ምግዳቱዋ መꬊደ፥ ኤፉድያዉ ስንꬃ ባጋና፥ ሀሽያ ጫርቂያፐ ጋርሳ ባጋና ኤፉድያ ጼሳን ቃችያዋፐ ቆሞና፥ ስኩ ጋከቴዳ ሳኣ ማታን ካረና ኡንቱንታ ኦይꬄድኖ። 21 መꬍና ጎዳይ ሙሳ አዛዜዳዋዳን፥ ትራን ዎꬅያዋን ደእያ ምግዳቱዋ ኤፉድያን ደእያ ምግዳቱዋና ጋꬂደ፥ ሳሉዋ ማላትያ ባቀꬃን ቃችና ትራን ዎꬅያዌ ጼሳፐ ቆሞና ደእያ ድራዉ፥ ቃሹ ሾልኤና።

22 ኤፉድያፐ ጋርሳና ማይያ አዱሳ ማዩዋ እ ሳሉዋ ማላትያ ጫርቂያፐ ጊግሴዳ፤ ሄዌ ሸማይንያ ኦሱዋ። 23 ሄ አዱሳ ማዮ ቆꬍያ አꬅያ ሳኣ መꬌድኖ፤ ሄ ሳአይ ፔተናዳን፥ ዩሽ አꬂደ ጉጅ ጉጅ ስኬድኖ። 24 ኡንቱንቱ አዱሳ ማዩዋ ዱገ ባጋ ማጫራ ዩሹዋን ሳሉዋ ማላትያ፥ ኦቻ ቴራ ማላትያነ ሾሎላ ዞኦ ዶቀቴዳ ሮማንያ ቴራ ምስለቱዋ መꬌድኖ። 25 ኡንቱንቱ ቃይ ዎርቃፐ ዳላቱዋ መꬊደ፥ አዱሳ ማዮ ዱገ ባጋ ጋጻ ዩሽ አꬂደ፥ ሮማንያ ምስለቱዋ ግዱዋን፥ ዋላካን አꬄድኖ። 26 አሮነ ሄ ማዮ ዱገ ባጋ ማጫራ ዩሽ አꬂደ፥ ዳላነ ሮማንያ ቴራ ምስልያ ዋላኪደ አꬄድኖ። ሄዌ መꬍና ጎዳይ ሙሳ አዛዜዳዋዳን፥ ኡንቱንቱ ጾሳ ዱንካንያ ኦሱዋ ኦꬂደ ማያናሳ።

27 ኡንቱንቱ አሮናዉነ አ ናናዉ ሼማይንያ ሊኑዋፐ አዱሳ ሻምጭያ ጊግሴድኖ። 28 ቃይ አሮነ ሁጲያን ጻጽያ ሻሽያ፥ አ ናናዉ ቆበቱዋነ ጋርሳና ማይያ ማዮቱዋ ሊቆ ሊኑዋፐ ዳዲደ ጊግሴድኖ። 29 ኡንቱንቱ መꬍና ጎዳይ ሙሳ አዛዜዳዋዳን ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐነ ሊቆ ሊኑዋፐ ዳዲደ፥ ኩሽያ ሂላን አሌቂሲደ፥ ዳንጩዋ ጊግሴድኖ።

30 ኡንቱንቱ ጌሻ አለቁዋ ምስልያ ዋላካይ ባይና ዎርቃፐ መꬊደ፥ ማታፋ ቦላ ዎጭያዋዳን፥ አ ቦላ፥ “መꬍና ጎዳዉ ጌሻ ግዲደ ዱማቴዳ” ያግያዋ ዎጪደ ጻፌድኖ። 31 ሄዋፐ ጉይያን ሁጲያን ሻሽያፐ ጻደን ቃቻናዳን፥ መꬍና ጎዳይ ሙሳ አዛዜዳዋዳን ሳሉዋ ማላትያ ባቀꬃ አን አꬂደ ቃቼድኖ።

32 ጾሳ ዱንካንያ ኪታይ ኡባይ ፖለቴዳ። እስራኤላቱ ኡባባካ መꬍና ጎዳይ ሙሳ አዛዜዳዋዳን ኦꬄድኖ። 33 ሄዋፐ ጉይያን ኡንቱንቱ ጾሳ ዱንካንያ ሙሴኮ አሄድኖ፤ ሄዌካ: ዱንካንያነ አ ሚሻ ኡባ፥ ጋꬅ ኦይꬅያዋ፥ ጻጋገቱዋ፥ ሽካላቱዋነ፥ ቱሳቱ ኤቂያ ሳጽነቱዋ፥ 34 ቦላ ካማደ ዶርሳ ኦርግያ ጋልባ ዞኦ ቃላምያን የግ ከሴዳዋ፥ ሀራ ጋልባፐ መꬌዳ ቁምእያ፥ ታቦታ ገንꬅያ ጋርዱዋ፥ 35 ቃላ ጫቁዋ ታቦታ፥ አ ቶክያ ካሶቱዋነ አቶ ግያ ሳኣ ቁምእያ፥ 36 ጻርጴዛነ አ ሚሻ ኡባ ጾሳ ስንꬃን ዎꬅያ ጌሻ ኡክꬃ፥ 37 ዋላካይ ባይና ዎርቃፐ ኦሰቴዳ ጾምፕያ ዎꬅያ ባላነ አን ማራን ደእያ ጾምፐቱዋ፥ ኡንቱንቱ ሚሻቱዋ ኡባነ ጾምፕያ ዛይትያ፥ 38 እጻና ጩዋይያ ዎርቃ ሳጽንያ፥ ኦከትያ ዛይትያ፥ ሳዊያ እጻና፥ ጾሳ ዱንካንያ ፐንግያ ጋርዱዋ፥ 39 ናሃስያፐ ኦꬄዳ ያርሽያ ሳኣ፥ አ ናሃስያ ዛዝሪያና፥ አ ቶክያ ካሱዋ፥ አ ሚሻቱዋ ኡባ፥ ሜቻ ከርያነ አ ዎꬅያዋ፥ 40 ዳባባ ገንꬅያ ጋርዳቱዋ፥ አ ቱሳቱዋ፥ ኡንቱንቱ ኤቂያ ሳጽነቱዋ፥ ዳባባ ገልያ ፐንገቱዋ ጋርዱዋ፥ ዳባባ ዎዶሮቱዋነ ሽካላቱዋ፥ ጾሳ ዱንካንያ መꬋናዉ ኮሽያ ሚሻቱዋ ኡባ፤ 41 ቄሳቱ ጌሻ ሳኣን ኦꬂደ ጎኤታናዉ ዳደቴዳ ማዮቱዋ፥ አሮነ ጌሻ ማዩዋነ አ ናናይ ቄሳተꬃ ኦꬂደ ማይያ ማዮቱዋ።

42 እስራኤላቱ ኦሱዋ ኡባካ መꬍና ጎዳይ ሙሳ አዛዜዳዋዳን ኡባባ ኦꬄድኖ። 43 ሙሴ ኦሱዋ ኡባ ጾሞስ ጼሊደ፥ ኡንቱንቱ መꬍና ጎዳይ አዛዜዳዋዳን ኦꬄዳዋ በኤዳ። ሄዋ ድራዉ፥ ሙሴ ኡንቱንታ አንጄዳ።