1 ሄዋፐ ጉይያን መꬍና ጎዳይ ሙሳ፥ 2 “ኮይሮ አግናዉ ኮይሮ ጋላስ፥ ኔን መꬍና ጎዳ ዱንካንያ ቶካ። 3 ቃላ ጫቁዋ ታቦታ አ ግዶን ዎꬃ፤ ሄ ታቦታ ጋርዱዋን ካማ። 4 ጻርጴዛ ገልሳደ፥ አ ቦላ ዎꬋናዉ ኮሽያባ ኡባ ጊግሳደ አ ቦላ ዎꬃ። ያታደ ጾምፐቱዋ ዎꬅያ ባላ ሶ ገልሳደ፥ አ ቦላ ጾምፐቱዋ ኤꬃ። 5 እጻና ጩዋይያ ዎርቃ ሳጽንያ ቃላ ጫቁዋ ታቦታፐ ስንꬃና ዎꬃደ፥ ጾሳ ዱንካንያ ገልያ ጋርዱዋ ሶታ።

6 “ጹግያ ያርሹዋ ያርሽያ ሳኣ ጾሳ ዱንካንያፐ ስንꬃና ዎꬃ። 7 ሜቻ ከርያ ጾሳ ዱንካንያፐነ ያርሽያ ሳኣፐ ግዱዋን ዎꬃደ፥ አን ሃꬃ ትጋ። 8 ጾሳ ዱንካንያፐ ካረና ዩሻ አꬃደ ዳባባ ጊግሳደ ዳባባ ገልያ ሳኣን ጋርዱዋ ሶታ።

9 “ኦክያ ዛይትያ አካደ፥ ጾሳ ዱንካንያነ አ ግዶን ደእያ ኡባባ ኦካ፤ አነ አ ግዶን ጎኤትያ ሚሻ ኡባ ዱማያ፤ ያቶፐ እ ጌሻ ግዳናዋ። 10 ሄዋፐ ጉይያን ጹግያ ያርሹዋ ያርሽያ ሳኣነ አዉ ጎኤትያ ሚሻ ኡባ ኦካ፤ ያርሽያ ሳኣ ዱማያ፤ ያቶፐ እ ኡባፐ አꬍያ ጌሻ ግዳናዋ። 11 ሜቻ ከርያነ አ ኡትስያ ሚሻ ኦካደ ኡንቱንታ ዱማያ።

12 “ኔን አሮናነ አ ናና ጾሳ ዱንካንያ ገልያ ፐንገ አሃደ፥ ሃꬃን ኡንቱንታ ሜጫ። 13 ሄዋፐ ጉይያን ቄሰተꬃ ጌሻ ማዩዋ አሮና ማይዛደ፥ እ ታዉ ቄሰተꬃን ኦꬃናዳን፥ አ ኦካደ ዱማያ። 14 አ አቱማ ናናካ አሃደ ሻምጭያ ማይዛ። 15 ኡንቱንቱ ታዉ ቄሰተꬃን ኦꬃናዳን፥ ኡንቱንቱ አዉዋ ኦኬዳዋዳን፥ ኡንቱንታካ ኦካ። ኡንቱንቱ ኦካይ ኡንቱንታካ ኡንቱንቱ ስንꬃ የለታ ኡባ ቄሳቱዋ ኦꬅያዋ” ያጌዳ።

16 ሙሴ ኡባባካ ጾሳይ ባረና አዛዜዳዋዳን ኦꬄዳ።

17 ሄዋ ድራዉ፥ ግብጼፐ ኡንቱንቱ ከሴዳ ላኤንꬃ ላይꬃን፥ ኮይሮ አግናዉ ኮይሮ ጋላሳን ጾሳ ዱንካኒ ቶኬቴዳ። 18 ሙሴ ጾሳ ዱንካንያ ኤስያ ዎደ፥ ሳጽነቱዋ ኡንቱንቱ ሳኣን ሳኣን ዎꬄዳ፤ ጻጋገቱዋነ ቱሳ አꬄዳ፤ ሽካላቱዋካ ገልሴዳ። 19 ሄዋፐ ጉየ ሙሴ መꬍና ጎዳይ አዛዜዳዋዳን፥ ሀ ኤሴዳዋ ቦላን ዱንካንያ ꬎጌዳ፤ ሄ ኤሱዋ ቦላን ካሙዋ ካሜዳ።

20 ያቲደ ታሙ አዛዛቱ ጻፈቴዳ ማርካተꬃ ቃላ አፊደ፥ ታቦታ ግዶን ዎꬄዳ፤ ቶክያ ካሱዋ ታቦታን አꬄዳ፤ አቶ ግያ ሳኣ ቁምእያ ታቦታ ቦላ ዎꬄዳ። 21 ሄዋፐ ጉይያን ታቦታ ጾሳ ዱንካንያ ገልሴዳ፤ ገንꬅያ ጋርዱዋ ሶቲደ፥ መꬍና ጎዳይ አዛዜዳዋዳን ቃላ ጫቁዋ ታቦታ ካሜዳ።

22 መꬍና ጎዳይ ሙሳ አዛዜዳዋዳን፥ ሙሴ ጻርጴዛ መꬍና ጎዳ ዱንካንያን ገልሲደ፥ ጋርዱዋፐ ካረና ሁጲሳ ባጋና ዎꬄዳ። 23 አ ቦላ መꬍና ጎዳ ስንꬃን ዎꬅያ ጌሻ ኡክꬃ ጊግሴዳ።

24 መꬍና ጎዳይ ሙሳ አዛዜዳዋዳን፥ ጾምፕያ ዎꬅያ ባላ ጾሳ ዱንካንያ ግዶ ገልሲደ፥ ጻርጴዛ ሄፍንꬃና፥ ጾሳ ዱንካንያዉ ገድሳ ባጋና ዎꬄዳ፤ 25 ቃይ ጾምፐቱዋ መꬍና ጎዳ ስንꬃን ኦይꬄዳ።

26 መꬍና ጎዳይ አዛዜዳዋዳን፥ እጻና ጩዋይያ ዎርቃ ሳጽንያ ጾሳ ዱንካንያ ግዶን ጋርዱዋ ስንꬃ ባጋና ዎꬄዳ፤ 27 አ ቦላ ሳዊያ እጻና ጩዋዬዳ። 28 ሄዋፐ ጉይያን ጾሳ ዱንካንያ ፐንግያን ጋርዱዋ ሶቴዳ።

29 ጹግያ ያርሹዋ ያርሽያ ሳኣ ጾሳ ዱንካንያ ገልያ ፐንግያ ምይያን ዎꬄዳ፤ አ ቦላ ጹግያ ያርሹዋነ ካꬃ ያርሹዋ መꬍና ጎዳይ አዛዜዳዋዳን ያርሼዳ።

30 ጾሳይ ሙሳ አዛዜዳዋዳን፥ ሜቻ ከርያ ጾሳ ዱንካንያፐነ ያርሽያ ሳኣፐ ግዱዋን ዎꬄዳ። ያቲደ ሜጨታናዉ ሃꬃ አን ትጌዳ። 31 ሙሴ፥ አሮነነ አ ናናይ ባረንቱ ኩሽያነ ገድያ አን ሜጨቲኖ። 32 መꬍና ጎዳይ ሙሳ አዛዜዳዋዳን፥ ኡንቱንቱ ጾሳ ዱንካንያ ገሌዳ ዎደ ዎይ ያርሽያ ሳኣኮ ሺቄዳ ዎደ አዉደነ ሜጨቲኖ።

33 ጾሳ ዱንካንያነ ያርሽያ ሳኣ ዩሽ አꬂደ ዳባባ ከሴዳ፤ ሄ ዳባባ ፐንግያን ጋርዱዋ ሶቴዳ። ሄዋዳን ኦꬂደ፥ ሙሴ ኦሱዋ ፖሌዳ።

34 ሄዋፐ ጉይያን ሻሪ ጾሳ ዱንካንያ ካሜዳ፤ መꬍና ጎዳ ቦንቹካ አ ኩሜዳ። 1 ካታ. 8:10-11፤ ኢሳ. 6:4፤ ህዝ. 43:4-5፤ ሳፃ 15:8 35 ሻሪ ጾሳ ዱንካንያ ቦላ ኡቴዳ ድራዉነ መꬍና ጎዳ ቦንቹ አ ግዶን ኩሜዳ ድራዉ፥ ሙሴ አ ግዶ ገላናዉ ዳንዳይቤና።

36 እስራኤላቱ ባረንቱ ኦግያ ኡባን፥ ሄ ሻሪ ጾሳ ዱንካንያፐ ደንድያ ዎደ አዉደነ አ ካሊደ ሀመታ ዶምኖ። 37 ሽን ሄ ሻሪ ደንዳና ꬋዮፐ፥ እ ደንድያ ጋላሳይ ጋካናዉ ኡንቱንቱካ ቃጽክኖ። 38 ኡንቱንቱ ኦግያ ኡባን መꬍና ጎዳ ሻሪ እስራኤልያ አሳይ ኡባይ በእሽን፥ ጋላስ ጋላስ ጾሳ ዱንካንያ ካሜነ ቃማ ቃማ ቃይ ታማይ ሄ ሻርያ ግዶን ኤጼ።