1 መꬍና ጎዳና ጋከትያ ዱንካንያ ግዶፐ መꬍና ጎዳይ ሙሳ ጼሲደ፥ ሀዋዳን ያጊደ ሃሳዬዳ፤ 2 “እስራኤልያ አሳዉ ሀዋዳን ያጋደ ኦዳ፤ ‘ህንተፐ ኦንነ መꬍና ጎዳዉ ያርሹዋ ሺሽያ ዎደ፥ ሄ ባረ ሺሽያ ያርሹዋ ባረ መህያፐ ዎይ ባረ ዶርሳ ዎይ ዴሻ ዉድያፐ አሆ። 3 ሄ ያርሹ መህያ ዉድያፐ ጹግያ ያርሹዋ ግዶፐ፥ አቱማዋ ግዲደ፥ ትላ ቦላና ደእያዋ ግዶ። መꬍና ጎዳይ አካና ማላ፥ እ ሄ ያርሹዋ መꬍና ጎዳ ዱንካንያ ገልያ ፐንግያን ያርሾ። 4 ያርሹዋ ሺሽያ ብታኒ ጹጊደ ያርሻናዉ አሄዳ ባረ መህያ ሁጲያን ባረ ኩሽያ ዎꬆ። ሄዌ አ ናጋራ አቶ ጋናዉ ጾሳይ አኬዳ ያርሹዋ ግዳናዋ። 5 እ ኮሩማ መꬍና ጎዳ ስንꬃን ሹክና፤ አሮና ናናይ ቄሳቱ ሄ ሱꬃ አሂደ፥ መꬍና ጎዳ ዱንካንያ ገልያ ፐንግያን ደእያ ያርሽያ ሳኣ ምይያ ኡባን ጉስኖ። 6 ሄዋፐ ጉይያን፥ እ ጹግያ ያርሾ መህያ ጋልባ ቃሮ፤ አሹዋ አ ቆሙዋን ቆሙዋን ከሶ። 7 ቄስያ አሮና ናናይ ያርሽያ ሳኣ ቦላን ታማ ኤꬂደ፥ ምꬃ ዎꬅኖ። 8 ሄዋፐ ጉይያን፥ አሮና ናናይ ቄሳቱ ሄ ከሴዳ አሹዋ ሁጲያነ ሞꬉዋ ጉጂደ፥ ያርሽያ ሳኣ ቦላን ታማን ደእያ ምꬃ ቦላን ማሪደ ዎꬅኖ። 9 ሽን ሄ ብታኒ ቃንꬃ አሹዋነ ገደቱዋ ሃꬃን ሜጮ። ያቲደ ቄሲ ሄዋ ኡባካ አሂደ፥ ያርሽያ ሳኣ ቦላ ጹጎ፤ ሄዌ መꬍና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ግዳናዋ።

10 “ ‘ጹግያ ያርሾ እ እምያ እሙ ዶርሳ ዉድያፐ ዎይ ዴሻ ዉድያፐ አከትያዋ ግዶፐ፥ አቱማዋ ግዲደ፥ ትላ ቦላና ደእያዋ ግዶ። 11 ሄ መህያ ያርሽያ ሳኣፐ ሁጲሳ ባጋና መꬍና ጎዳ ስንꬃን ሹኮ። አሮና ናናይ ቄሳቱ አ ሱꬃ አኪደ፥ ያርሽያ ሳኣ ምይያ ኡባ ቦላን ጉስኖ። 12 ሄዋፐ ጉይያን፥ ሄ ብታኒ አ ቆሙዋን ቆሙዋን ከሴዳ አሹዋ ኡባ ቄሲ አኪደ፥ ሁጲያነ ሞꬉዋ ጉጂደ፥ ያርሽያ ሳኣ ቦላን ታማን ደእያ ምꬃ ቦላን ዎꬆ። 13 ሽን ቃንꬃ አሹዋነ ገደቱዋ ሃꬃን ሜጮ፤ ያቲደ ቄሲ ሄዋ ኡባ አሂደ ያርሽያ ሳኣ ቦላን ጹጎ፤ ሄዌ መꬍና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ግዳናዋ።

14 “ ‘መꬍና ጎዳዉ ያርሽያ ጹግያ ያርሹ ካፉዋ ግዶፐ፥ ሀራጵያ ማራ፥ ዎይ ዶጎሙዋ አሆ። 15 ቄሲ ሄዋ አኪደ፥ ቆꬍያ ምርቆ፤ ያቲደ ያርሽያ ሳኣ ቦላን ደእያ ታማን ጹጎ። አ ሱꬃይ ያርሽያ ሳኣ ቦላፐ ምይያና ዱገ ጎግ ጭንጎ፤ 16 ኡሎ ግዱዋ ባለቱዋና ከሲደ፥ ያርሽያ ሳኣፐ አዋይ ዶልያ ባጋና፥ ብድንꬃ ቆልያ ሳኣን ኦሎ። 17 እ ሄ ካፉዋ ቀፈቱዋ ኦይቂደ ጳልቆ፥ ሽን ኡባና ዳኮፖ። ሄዋፐ ጉይያን፥ ቄሲ ያርሽያ ሳኣ ቦላን ደእያ ታማን ዎꬂደ ጹጎ፤ ሄዌ መꬍና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ግዳናዋ።