1 “ ‘ኦንነ ካꬃ ያርሹዋ መꬍና ጎዳዉ ሺሽያ ዎደ፥ ሄ ያርሹ ሊቆ ꬊልያ ግዶ፤ አ ቦላ ዎጋራ ዛይትያነ እጻና ጉጆ። 2 ሄዋ እ አሮና ናናቱዋኮ ቄሳቱዋኮ አሆ፤ ቄሳቱ ሄ ሊቆ ꬊልያፐነ ዛይትያፐ እት ኩሽያ ኩንꬅ አኪደ፥ እጻና ኡባና አክ፥ ሀሳይስያዋ ኦꬂደ፥ ያርሽያ ሳኣ ቦላ ታማን ጹጎ። ሄዌ መꬍና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ግዳናዋ። 3 ካꬃ ያርሹዋፐ አቴዳዌ አሮናሳነ አ ናናቱዋሳ። ሄዌ መꬍና ጎዳዉ ታማን ጹገትያ ጌሻ ያርሹዋ ኡባፐ እቱዋ ግዴዳ ጌሻ ያርሹዋ።

4 “ ‘ያርሾ ሺሽያ ኡክꬃይ ጮጭያን ካኤዳዋ ግዶፐ፥ ዛይትያን ሙናቄዳ ሊቆ ꬊልያፐ ኡከቴዳ እርሹ የገትቤና ኮምፖ፥ ዎይ ዛይትያን ኦከቴዳ፥ እርሹ የገትቤና ሌኦ ኡክꬃ ግዶ።

5 “ ‘ያርሾ ሺሽያ ኡክꬃይ ባሽያን ኡከቴዳዋ ግዶፐ፥ ዛይትያን ሙናቄዳ፥ እርሹ ባይና፥ ሊቆ ꬊልያፐ ጊጌዳዋ ግዶ። 6 አ መንꬂደ አ ቦላ ዛይትያ ትጎ፤ ሄዋ ካꬃ ያርሹዋ ኦꬂደ ሺሾ።

7 “ ‘ነ ያርሾ ሺሽያ ካꬃ ያርሹ ድስትያን ካኤዳዋ ግዶፐ፥ ዛይትያን ሙናቄዳ ሊቆ ꬊልያፐ ካኤዳዋ ግዶ። 8 ሀዋዳን ጊግሴዳ ካꬃ ያርሹዋ መꬍና ጎዳዉ አሀ፤ ቄስያዉ እማ። ቄሲ ሄዋ አኪደ ያርሽያ ሳኣ ሺሾ። 9 ቄሲ ሄ ካꬃ ያርሹዋፐ አኪደ፥ ሀሳይስያዋ ኦꬂደ፥ ያርሽያ ሳኣ ቦላን ጹግያ ያርሹዋዳን ታማን ጹጎ፤ ሄዌ መꬍና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ግዳናዋ። 10 ካꬃ ያርሹዋፐ አቴዳዌ አሮነሳነ አ ናናቱዋሳ። ሄዌ መꬍና ጎዳዉ ታማን ጹጌዳ፥ ጌሻ ያርሹዋ ኡባፐ እቱዋ ግዴዳ ጌሻ ያርሹዋ።

11 “ ‘ጾሳዉ ህንተ አህያ አይ ካꬃ ያርሹነ እርሹዋና ደእያዋ ግዶፖ፤ አያዉ ጎፐ ኔን እርሹዋ ዎይ ኤሳ እልሉዋ ጾሳዉ ታማን ጹጋደ ያርሻናዉ ኮሸና። 12 ህንተ ላይꬃን ላይꬃን ጫከትያ ካꬃፐ ጼራ ከሲደ፥ ጾሳዉ አሀናዉ ዳንዳዪታ፤ ሽን ሄዋ ሳዉዋ ቶሹኩ ግያ ያርሹዋ ኦꬂደ፥ ጾሳዉ ያርሽያ ሳኣ ቦላን ጹገተና። 13 ኔን ሺሽያ ካꬃ ያርሹዋ ኡባን ማጽንያ የጋ፤ አያዉ ጎፐ፥ ነ ጾሳ ቃላ ጫቁዋ ማጽንያ አጎፓ። ሄዋ ድራዉ ነ ካꬃ ያርሹዋ ኡባ ማጽንያን ማልኤꬃ። 14 ኔን ኮይሮ ካꬃፐ ጼራ ከሳደ መꬍና ጎዳዉ አህያ ዎደ፥ ሄ ካꬃይ ጺጸቲደ ሀርጸቴዳ ትሻ ካꬃ ግዳናዉ ኮሼ። 15 አ ቦላ ዛይትያ ትጋ፤ እጻናካ አን ዎꬃ፤ ሄዌ ካꬃ ያርሹዋ። 16 ቄሲ ሄ ዛይቲ ትገቴዳ ሀርጸቴዳ ካꬃፐ ሻኩዋ አኪደ፥ እጻና ኡባናካ ሀሳይስያዋ ኦꬂደ ታማን መꬍና ጎዳዉ ጹጎ።