1 “ ‘እት አሳይ እትፐተꬃ ያርሾ ባረ ዉድያፐ ማጫዋ ግድና አቱማዋ ግድና እት መህያ ሺሽያ ዎደ፥ ሄ መሂ ትላ ቦላና ደእያዋ መꬍና ጎዳ ስንꬃን ሺሾ። 2 ያርሻናዉ አሄዳ መህያ ሁጲያን ባረ ኩሽያ ዎꬂደ፥ ጾሳ ዱንካንያ ፐንግያን ሹኮ። ሄዋፐ ጉይያን፥ ቄሳቱ አሮና ናናይ ሱꬃ ያርሽያ ሳኣ ምይያ ኡባ ቦላን ጉሶ። 3 እትፐተꬃ ያርሹዋፐ ታማን ጹግያ ያርሹዋ ኦꬂደ መꬍና ጎዳዉ ሺሾ፤ ሄዌካ ቃንꬃ አሹዋ ማዬዳ ሀንዳ ኡባይነ አናና ጋꬅያ ሀንዳይ፥ 4 ላኡ ክላሆቱዋ፥ ኡንቱንቱ ቦላ ደእያ ሀንዳ፥ ጋይልያ ማታን ደእያ ሀንዳነ ትርያ ጼራ ቦላ ደእያ ሀንዳ ክላሆቱዋና ጋꬂደ አኬ። 5 አሮና አቱማ ናናይ ሄዋ ሀራ ጹግያ ያርሹዋና ያርሽያ ሳኣ ቦላ ደእያ ምꬃ ቦላ ዎꬂደ ጹግኖ፤ ሄዌ መꬍና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ግዳናዋ።

6 “ ‘መꬍና ጎዳዉ እትፐተꬃ ያርሹዋ ሺሽያ ኡራይ ዶርሳ ግድና ዴሻ፥ ማጫዋ ግድና አቱማዋ ትላ ቦላና ደእያዋ ሺሾ። 7 እት ኡራይ ዶርሳ ማራ ያርሽያዋ ግዶፐ፥ መꬍና ጎዳ ስንꬃን ሺሾ፤ 8 ባረ ኩሽያ አ ሁጲያን ዎꬂደ፥ ዱንካንያ ስንꬃን ሹኮ። ሄዋፐ ጉይያን፥ አሮና አቱማ ናናይ ሱꬃ ኦይቂደ፥ ያርሽያ ሳኣ ምይያ ኡባ ቦላን ጉስኖ። 9 እትፐተꬃ ያርሹዋፐ ታማን ጹግያ ያርሹዋ ኦꬂደ፥ መꬍና ጎዳዉ ሺሾ፤ ሄዌካ፥ ዚዝያፐ ቃንጼዳ ናስያ፥ ኡሎ ግዶ አሹዋ ማዬዳ ሞꬍያነ ሀዋንታ ጋꬅ ኦይꬅያ ሞꬍያ ኡባ፥ 10 ላኡ ክላሆቱዋ፥ ኡንቱንቱ ቦላ ደእያ ሀንዳነ ጋይልያ ማታን ደእያ ሞꬍያ፥ ትርያ ጼራ ቦላ ደእያ ሞꬍያ ክላሆቱዋና ጋꬂደ አኬ። 11 ቄሲ ሄ ቁማ ያርሹዋ መꬍና ጎዳዉ ታማን ጹግያ ያርሽያ ሳኣ ቦላ ዎꬂደ ጹጎ።

12 “ ‘አ ያርሹ ዴሻ ግዶፐ፥ እ ሄዋ መꬍና ጎዳ ስንꬃን ሺሾ። 13 ያቲደ አ ሁጲያን ባረ ኩሽያ ዎꬂደ፥ ጾሳ ዱንካንያ ስንꬃን ሹኮ። ሄዋፐ ጉይያን፥ አሮና አቱማ ናናይ ሱꬃ ኦይቂደ፥ ያርሽያ ሳኣ ዩሹዋን ኡባን ጉሲኖ። 14 እ ሄ ያርሽያዋፐ አኪደ፥ ታማን ጹግያ ያርሹዋ ኦꬂደ መꬍና ጎዳዉ ሺሾ፤ ሄዌካ ቃንꬃ አሹዋ ማዬዳ ሀንዳ ኡባነ ሄ ሀንዳ ጋꬅ ኦይꬅያ ሀራ ሀንዳ፥ 15 ላኡ ክላሆቱዋ፥ ኡንቱንቱ ቦላ ደእያ ሀንዳነ ጋይልያ ማታን ደእያ ሞꬍያነ ትርያ ጼራ ቦላ ደእያ ሞꬍያ ክላሆቱዋና ጋꬂደ አኬ። 16 ቄሲ ሄ ቁማ ታማን ጹግያ፥ ሳዉዋ ቶሹኩ ግያ ያርሹዋ ኦꬂደ ያርሽያ ሳኣ ቦላ ጹጎ። ሀንዳ ኡባይ መꬍና ጎዳሳ።

17 “ ‘ሀንዳነ ሱꬃ ህንተ ደእያ ሳኣን ሀቃንነ ሞፕተ። ሀዌ ህንተንቶነ ህንተ የለታዉ መꬍናዉ ናገትያ ዎጋ’ ያጋደ ኦዳ” ያጌዳ።