1 መꬍና ጎዳይ ሙሳ ሀዋዳን ያጌዳ፤ 2 “ኔን እስራኤልያ አሳዉ ሀዋዳን ያጋደ ኦዳ፤ ‘ኦንነ ቆፐናን ናጋራ ኦꬆፐነ፥ መꬍና ጎዳ አዛዞቱዋፐ እቱዋ ሀቃዋነ መንꬆፐ፥ ሀዋፐ ካሊደ ደእያ ዎጋ ናጎ።

3 “ ‘ቄስያ ካፑ ናጋራ ኦꬆፐነ ሄ ናጋራይ አሳ ባይዛንቻ ከስያዋ ግዶፐ፥ እ ባረ ኦꬄዳ ናጋራ ድራዉ፥ ትላ ቦላና ደእያ ኮሩማ መꬍና ጎዳዉ ናጋራ ያርሹዋ ኦꬂደ አሆ። 4 ሄ ኮሩማ መꬍና ጎዳ ዱንካንያ ፐንገ አꬂደ፥ ኮሩማ ሁጲያን ባረ ኩሽያ ዎꬂደ፥ መꬍና ጎዳ ስንꬃን ሹኮ። 5 ቄስያ ካፑ ኮሩማ ሱꬃፐ አማሬዳዋ አኪደ፥ መꬍና ጎዳ ዱንካንያ አፎ። 6 ባረ ኩሽያ ብራꬍያ ሱꬃን ቱሽ ቱሽ ከሲደ፥ መꬍና ጎዳ ዱንካንያ ጋርዱዋ ስንꬃን መꬍና ጎዳ ስንꬃን ላፑ ገደ ዱኮ። 7 ሄዋፐ ጉይያን፥ ቄስያ ካፑ አማሬዳ ሱꬃ አኪደ፥ መꬍና ጎዳ ዱንካንያ ግዶን መꬍና ጎዳ ስንꬃን ሳዊያ እጻና ጩውስያ ሳጽንያ ቦላ ደእያ ካጨቱዋ ቦላ ጾክሶ። አቴዳ ሱꬃ ቃይ ጾሳ ዱንካንያ ገልያ ሳኣ ባጋና ደእያ ጹግያ ያርሹዋ ያርሽያ ሳኣፐ ጋርሳ ባጋና ደእያ ሳኣን ጉሶ። 8 ናጋራ ያርሾ ሹከቴዳ ሀ ኮሩማ ሞꬉዋ ኡባ፥ ቃንꬃ አሹዋ ማዬዳ ሀንዳነ ኡንቱንታ ጋꬅ ኦይꬅያ ሞꬉዋ፥ 9 ላኡ ክላሆቱዋ፥ ኡንቱንታ ማዬዳ ሀንዳነ ጋይልያ ማታን ደእያ ሞꬍያነ ትርያ ጼራ ቦላ ደእያ ሞꬍያ ክላሆቱዋና እትፐ ከሲደ አኮ። 10 እትፐተꬃ ያርሾ ሹከቴዳ ኮሩማፐ አኬዳ ሞꬉዋዳን አኮ። ቄስያ ካፑ ጹግያ ያርሹዋ ያርሽያ ሳኣ ቦላን ጹጎ። 11 ሽን ኮሩማ ጋልባ፥ አ አሹዋ ኡባ፥ አ ሁጲያነ፥ አ ገደቱዋ፥ ቃንꬃ አሹዋ፥ ቶጭያ፥ 12 ኮሩማ አሹዋፐ አቴዳዋ ኡባ ዱንካኔዳ ሳኣፐ ካረ ከሲደ፤ ብድንꬃ ቆልያ ዎጋዳን ጌሻ ግዴዳ ሳኣ አፎ፤ ያን ምꬃ ታማን ጹጎ።

13 “ ‘እስራኤልያ ማባራይ ኡባይ ቆፐናን ናጋራ ኦꬆፐነ፥ መꬍና ጎዳ አዛዞቱዋፐ እቱዋ ሀቃዋነ መንꬆፐ፥ ኡንቱንቱ ባይዛንቻ ግዲደ ፓይደታና። 14 ኡንቱንቱ ኦꬄዳ ናጋራይ ኤረትያ ዎደ፥ ናጋራ ያርሾ ሀንያ ኮሩማ ጾሳ ዱንካንያ ስንꬃ አህኖ። 15 ሄ ማባራ ጭማቱ መꬍና ጎዳ ስንꬃን ባረንቱ ኩሽያ ኮሩማ ሁጲያ ቦላን ዎꬂደ፥ ሄ ኮሩማ መꬍና ጎዳ ስንꬃን ሹክኖ። 16 ሄዋፐ ጉይያን፥ ቄስያ ካፑ ኮሩማ ሱꬃፐ ጉꬃ አኪደ፥ ጾሳ ዱንካንያ ግዶ ገሎ፤ 17 እ ባረ ኩሽያ ብራꬍያ ሱꬃን ቱሽ ቱሽ ከሲደ፥ ጋርዱዋ ስንꬃ ባጋና መꬍና ጎዳ ስንꬃን ላፑ ገደ ዱኮ። 18 ቃይ አማሬዳ ሱꬃ አኪደ፥ መꬍና ጎዳ ዱንካንያ ግዶን ስንꬃን እጻና ጩውስያ ሳጽንያ ቦላ ደእያ ካጨቱዋ ቦላ ጾክሶ። አቴዳ ሱꬃ ቃይ መꬍና ጎዳ ዱንካንያ ገልያሳ ባጋና ደእያ ጹግያ ያርሹዋ ያርሽያ ሳኣፐ ጋርሳ ባጋና ደእያ ሳኣን ጉሶ። 19 ሞꬉዋ ኡባ አኪደ፥ ያርሽያ ሳኣ ቦላን ጹጎ። 20 ናጋራ ያርሾ ሹከቴዳ ኮሩማ ኦꬄዳዋዳን ሀ ኮሩማካ ኦꬆ። ሄዋዳን ኦꬂደ፥ ቄሲ ናጋራ አቶ ጊስያ ዎጋ ፖላና፤ አሳይካ ናጋራፐ ማረታናዋ። 21 ሄዋፐ ጉይያን፥ ኮሩማ ዱንካኔዳ ሳኣፐ ካረ ከሲደ፥ ካሰ ኮሩማ ጹጌዳዋዳን አካ ጹጎ፤ ሀዌ ማባራ ናጋራዉ ያርሽያ ያርሹዋ።

22 “ ‘አሳ ካለꬅያ ሱንꬃቱዋፐ እቱ ቆፐናን ናጋራ ኦꬆፐነ መꬍና ጎዳይ አ ጾሳይ አ አዛዜዳ አዛዙዋፐ እቱዋ ሀቃዋነ መንꬆፐ፥ ሄ ኡራይ ባይዛንቻ። 23 እ ባረ ኦꬄዳ ናጋራ ኤሬዳዋፐ ጉይያን፥ ትላ ቦላና ደእያ እት ዴሻ ኦርግያ አሆ። 24 ሄ ዴሻ ኦርግያ ሁጲያን ባረ ኩሽያ ዎꬂደ ጹግያ ያርሹ መꬍና ጎዳ ስንꬃን ሹከትያ ሳኣን ሹኮ፤ ሄዌ ናጋራ ያርሹዋ። 25 ቄስያ ካፑ ናጋራ ያርሹዋ ሱꬃ ግዶ ባረ ኩሽያ ብራꬍያ ቱሽ ቱሽ ከሲደ፥ ጹግያ ያርሹዋ ያርሽያ ሳኣ ቦላ ደእያ ካጨቱዋ ቦላ ጾክሶ፤ አቴዳ ሱꬃ ቃይ ጹግያ ያርሹዋ ያርሽያ ሳኣፐ ጋርሳ ባጋና ደእያ ሳኣን ጉሶ። 26 ሞꬉዋ ኡባ እትፐተꬃ ያርሹዋ ሞꬉዋ ያርሽያዋዳን ያርሽያ ሳኣ ቦላን ያርሾ። ሀዋዳን ኦꬂደ፥ ቄሲ ብታንያ ናጋራ አቶ ጊሴ፤ ብታኒካ ባረ ናጋራፐ ማረታናዋ።

27 “ ‘ሄ ማባራ አሳፐ እቱ ቆፐናን ናጋራ ኦꬆፐነ መꬍና ጎዳ አዛዙዋፐ እቱዋ ሀቃዋነ መንꬆፐ፥ ሄ ኡራይ ባይዛንቻ ግዲደ ፓይደቴ። ፓይ. 15:27-28 28 እ ባረ ኦꬄዳ ናጋራይ አዉ ኤረቴዳዋፐ ጉይያን፥ ትላ ቦላና ደእያ ማጫ ዴሻቶ ባረ ናጋራዉ አሆ። 29 ባረ ኩሽያ ናጋራ ያርሹዋ ኦꬂደ ሹክያ ዴሻት ሁጲያን ዎꬆ፤ ያቲደ ጹግያ ያርሹዋ ያርሽያ ሳኣን ናጋራ ያርሹዋ ኦꬂደ ሹኮ። 30 ሄዋፐ ጉይያን፥ ቄስያ ካፑ ሄ ዴሻት ሱꬃፐ ባረ ኩሽያ ብራꬍያን አኪደ፥ ጹግያ ያርሹዋ ያርሽያ ሳኣ ቦላ ደእያ ካጨቱዋ ቦላ ጾክሶ፤ አቴዳ ሱꬃ ኡባ ያርሽያ ሳኣፐ ጋርሳ ባጋና ደእያ ሳኣን ጉሶ። 31 ሞꬉዋ ኡባ እትፐተꬃ ያርሾ ሹኬዳ መህያፐ ከስያዋዳን፥ ሄ ዴሻት ሞꬉዋካ ቆሪደ ከስ አኪደ፥ ያርሽያ ሳኣ ቦላ ዎꬂደ፥ መꬍና ጎዳዉ ሳዉዋ ቶሹኩ ግያ ያርሹዋ ግዳና ማላ ጹጎ። ሄዋዳን ኦꬂደ፥ ቄሲ ሄ ብታንያ ናጋራ አቶ ጊሴ፤ ብታኒካ ባረ ናጋራፐ ማረቴ።

32 “ ‘ሄ ብታኒ ባረ ናጋራ ያርሾ ዶርሳ ሺሻናዉ ኮዮፐ፥ ትላ ቦላና ደእያ ማጫውኖ አሆ። 33 እ ባረ ኩሽያ ሄ ዶርሳት ሁጲያን ዎꬂደ ጹግያ ያርሾ ሹክያ መሂ ሹከትያ ሳኣን እዞ ሹኮ። 34 ሄዋፐ ጉይያን፥ ቄሲ ናጋራ ያርሹዋ ግዴዳ ሄ ዶርሳት ሱꬃን ባረ ብራꬍያ ቱሽ ቱሽ ከሲደ፥ ጹግያ ያርሹዋ ያርሽያ ሳኣ ቦላ ደእያ ካጨቱዋ ቦላ ጾክሶ፤ አቴዳ ሱꬃ ቃይ ያርሽያ ሳኣፐ ጋርሳ ባጋና ደእያ ሳኣን ጉሶ። 35 እትፐተꬃ ያርሾ ሹከቴዳ ሞꬉዋ ቃሪደ ከስያዋዳን፥ ሄ ዶርሳት ሞꬉዋካ ቃሪደ ከሶ። ያቲደ፥ ያርሽያ ሳኣ ቦላ መꬍና ጎዳዉ ታማን ጹግያ ያርሹዋ ቦላ ዎꬂደ ጹጎ። ሀዋዳን ኦꬂደ፥ ቄሲ ሄ ብታንያ ናጋራ አቶ ጊሴ። ብታኒካ ባረ ናጋራፐ ማረታናዋ።