1 “ ‘አይ አሳይነ ማርካዉ ጼሰቲደ ባረ በኤዳዋ ዎይ ባረ ኤሬዳዋ ጉታራን ማርካተናን እጾፐ፥ ሄዌ አዉ ናጋራ፤ ሄዋ ድራዉ እ ባረ ናጋራን ኦሸቴ።

2 “ ‘ቃይ አይ አሳይነ ኤረናን ደኢደ ቱናባ፥ ዶኣ ባኩታ ዎይ መህያ ባኩታ ዎይ ሳኣና ጎሸትያ ዶአቱዋ ባኩታ ቦቾፐ፥ ቱና ግድያዋ እ ኤሬዳ ዎድያፐ ዶሚደ ባይዛንቻ ግዴዳ።

3 “ ‘ቃይካ አይ አሳይነ ኤረናን ደኢደ፥ አሳ ቦላፐ ጎግያ ቱንስያባ አያ ግድናካ ቦቾፐ፥ ሄዌ ቱና ግድያዋ እ ኤሬዳ ዎድያፐ ዶሚደ ባይዛንቻ ግዴዳ።

4 “ ‘ዎይ ቃይ አይ አሳይነ ኢታባ ግድና ሎኦባ ኦꬃናዉ ኤለካ ጫቆፐነ ባረ ጫቄዳዋካ እ አኬከናን ꬋዮፐ፥ እ አኬኬዳ ዎድያፐ ዶሚደ ባይዛንቻ ግዴዳ።

5 “ ‘አይ አሳይነ ሀ ኦደቴዳ ባይዛቱዋፐ እቱዋ ኦꬄዳዋ ግዶፐ፥ ባረ ኦꬄዳ ናጋራ ፓጾ። 6 እ ባረ ኦꬄዳ ናጋራ ድራዉ መꬍና ጎዳዉ ባረ ዉድያ ግዶፐ ማጫ ዶርሳ ዎይ ማጫ ዴሻ ናጋራ ያርሹዋ ኦꬂደ ሺሾ። ቄሲ አኪደ፥ ሄ ብታንያ ናጋራ አቶ ጊሳናዋ።

7 “ ‘አሳይ ባረ ኦꬄዳ ናጋራዉ ያርሻናዉ፥ ዶርሳ ዎይ ዴሻ ሻማናዉ አዉ ሻሉ ግዳና ꬋዮፐ፥ ላኡ ሀራጰቱዋ፥ ዎይ ላኡ ዶጎማቱዋ፥ እቱዋ ናጋራ ያርሹዋ ኦꬂደ፥ ቃይ እቱዋ ጹግያ ያርሹዋ ኦꬂደ መꬍና ጎዳዉ አሆ። 8 እ ኡንቱንታ ቄስያዉ እሞ። ቄሲ ላኡ ሀራጰቱዋፐ እትንዉ ቆꬍያ ሙጨናን ጮ ምርቂደ፥ ናጋራ ያርሹዋ ኦꬂደ ያርሾ። 9 ያቲደ ሄ ናጋራ ያርሹዋ ሱꬃፐ አማሬዳዋ አኪደ፥ ያርሽያ ሳኣ ምይያን ጫጫፎ፤ አቴዳ ሱꬃ ያርሽያ ሳኣፐ ጋርሳ ባጋና ጉሶ፤ ሄዌ ናጋራ ያርሹዋ። 10 የንኮ ሀራጳቶ ቃይ ህጊ አዛዝያዋዳን፥ ጹግያ ያርሹዋ ኦꬂደ ጹጎ። ቄሲ ሄዋዳን ኦꬂደ፥ ብታኒ ኦꬄዳ ናጋራ አቶ ጊሳናዉ ያርሹዋ ያርሼ፤ ብታኒካ ባረ ናጋራፐ ማረታናዋ።

11 “ ‘ሽን እት ኡራዉ ላኡ ዎጋ ዶጎማቱዋ ዎይ ላኡ ሀራጰቱዋ አሀናዉ ሻሉ ግዳና ꬋዮፐ፥ ላኡ ኪሎ ግራመ ሊቆ ꬊልያ ባረ ናጋራዉ ሺሽያ ያርሹዋ ኦꬂደ አሆ። ሄ ꬊሊ ናጋራ ያርሹዋ ግድያ ድራዉ፥ ዎጋራ ዛይቲ ዎይ እጻናይ አን ጉጀቶፖ። 12 እ ሄዋ አሂደ ቄስያዉ እሞ፤ ቄሲ ሄ ꬊልያፐ እት ኩሽያ ኩንꬅ አኪደ፥ መꬍና ጎዳዉ ሺሽያ ሀራ ያርሹዋ ቦላ ዎꬂደ፥ ሀሳይስያዋ ኦꬂደ ያርሽያሳን ደእያ ታማን ጹጎ፤ ሄዌ ናጋራ ያርሹዋ። 13 ሀ ጌተቴዳዋንቱፐ ሀቃዋንነ ግዶ ብታኒ ኦꬄዳ ናጋራዉ ቄሲ ሀዋዳን ኦꬂደ፥ ብታኒ ኦꬄዳ ናጋራ አቶ ጊሴ፤ ብታኒካ ባረ ናጋራፐ ማረታናዋ። ካꬃ ያርሹዋዳንካ አቴዳዋ ቄሲ አኮ ያጋደ ኦዳ’ ” ያጌዳ።

14 መꬍና ጎዳይ ሙሴዉ ሀዋዳን ያጊደ ኦዴዳ፤ 15 “ኦንነ መꬍና ጎዳዉ ጌሽ ዎꬄዳ ሚሻቱዋ ቦላ አማነተናን ꬋዮፐ ቃይ ኤረናን ናጋራ ኦꬆፐ፥ ባረ ናቆ ባረ ዉድያ ግዶፐ ትላ ቦላና ደእያ እት ዶርሳ ኦርግያ መꬍና ጎዳዉ አሆ። አ ጋቲካ መꬍና ጎዳ ዱንካንያን ኤረትያ ሚዛናን ዎꬅና ኤረቶ፤ ሄዌ ናቁዋ ያርሹዋ። 16 መꬍና ጎዳዉ ዱማይ ዎꬄዳ ሚሻቱዋ ቦላ እ ናጋራ ኦꬄዳ ድራዉ፥ እ ሄ ሚሻቱዋ ጋትያ ጭጎ፤ ካሰ ጋትያ ቦላ ጼቱዋፐ ላታሙ ኩሽያ ጉጂደ ቄስያዉ እሞ። ቄሲ ሄ ናቁዋ ያርሾ አሄዳ ዶርሳ ያርሺደ፥ ብታንያ ናጋራ አቶ ጊሴ፤ ብታኒካ ባረ ናቁዋፐ ማረታናዋ።

17 “አይ አሳይነ ኤረናን ደኢደ፥ መꬍና ጎዳይ፥ ‘ኦꬆፓ’ ጊደ አዛዜዳዋፐ እቱዋ ኦꬂደ ናጋራን ገሎፐ፥ እ ኤራና ꬋዮፐ ባይዛንቻ ግድያ ድራዉ፥ ባረ ናጋራን ኦሸቴ። 18 እ ባረ ዉድያፐ ትላ ቦላና ደእያ እት ዶርሳ ኦርግያ ናቁዋ ያርሾ ቄስያኮ አሆ። ሄ ዶርሳይ ናቆ ጭግያ ጋትያ ከስያዋ ግዶ፤ ያቶፐ ቄሲ ሄ ዶርሳ ያርሺደ፥ ብታንያ ናቁዋ አቶ ጊሴ፤ ብታኒካ ባረ ናቁዋፐ ማረቴ። 19 ሄዌ ናቁዋ ያርሹዋ። እ ቱሙካ መꬍና ጎዳ ናቄዳ” ያጌዳ።