1 መꬍና ጎዳይ ሙሴዉ ሀዋዳን ያጌዳ፤ ፓይ. 5:5-8 2 “መꬍና ጎዳይ ኦንነ ናጋራ ኦꬂደ ባረ ሾሩዋ ዎርዶቲደ ጭሞፐ ሀዋፐ ካሊደ ደእያ ህገቱዋ እሜዳ: ሾሩዋ ማታን ሀዳራ ዎꬆባ ዎይ ኦይꬂደ ታልኤዳባ ካዶፐ፥ ዎይ አሳዋ ቦንቆፐ፥ ዎይ ባረ ሾሩዋ ቦላን ሱገꬃ ኦꬆፐ፥ 3 ዎይ ባዬዳዋ ደሚደ ታ በአበይከ ጎፐነ ዎርዱዋን ጫቆፐ፥ ሀዋንታ ማላትያዋንቱፐ እቱዋ ኦꬆፐ፥ 4 እ ሀቃዋነ ግዶ፥ ኦꬂደ፥ ሄዋን ናጋራንቻ ግዶፐ፥ ባረ ቦንቂ አኬዳዋ፥ ዎይ ኦይꬅና ካዲደ አኬዳዋ፥ ዎይ ሀዳራ እሜዳዋ ዎይ፥ ባይና ደሜዳዋ፥ 5 ዎይ ዎርዱዋን ጫቂ አኬዳዋ ኡባካ አ ጎዳዉ ዛሮ። ቃይ ባረ ናቁዋ ያርሹዋ ያርሽያ ጋላስ ባረ አኬዳዋ ቦላ ጼቱዋፐ ላታሙ ኩሽያ ጉጂደ አ ጎዳዉ እሞ። 6 ቃይካ ባረ ናቁዋ ድራዉ መꬍና ጎዳዉ ያርሽያ ያርሾ ባረ ዉድያ ግዶፐ ትላ ቦላና ደእያ እት ዶርሳ ኦርግያ ቄስያኮ አሆ። ሄ ዶርሳ ጋቲ ሱረ ቆፈቴዳዋ ግዶ። 7 ቄሲ ሄ ዶርሳ መꬍና ጎዳ ስንꬃን ያርሺደ፥ ብታንያ ናቁዋ አቶ ጊሴ፤ ብታኒካ ባረ ናቁዋ ኡባፐ ማረታናዋ” ያጌዳ።

8 መꬍና ጎዳይ ሙሴዉ ሀዋዳን ያጊደ ኦዴዳ፤ 9 “አሮናነ አ አቱማ ናናቱዋ ሀዋዳን ያጋደ አዛዛ፤ ‘ጹግያ ያርሾ ደእያ ዎጋይ ሀዋ: ጹግያ ያርሹ ቃማይ ዎንታና ጋካናዉ ያርሽያ ሳኣን ደኦ። ታማይካ ያርሽያ ሳኣን ኡባ ዎደ ኤጺደ ደኦ። 10 ቄሲ ሊኑዋፐ ዳደቴዳ ቃምሽያነ ሱርያ ማዪደ፥ ጹግያ ያርሹዋ ታማይ ም ስምና አቴዳ ብድንꬃ ደንꬂደ፥ ያርሽያ ሳ ምይያን ላሎ። 11 ሄዋፐ ጉይያን፥ ሄ ማዩዋ ቃር ዎꬅ ሀራ ማዩዋ ማዪደ፥ ሄ ብድንꬃ ዱንካኔዳ ሳኣፐ ጋጻ አፊደ፥ ህግያዳን ጌዬዳ ሳኣን ቆሎ። 12 ያርሽያ ሳኣ ቦላ ደእያ ታማይ ቶኤናን ኡባ ዎደ ኤጺደ ደኦ። ቄሲ ዎንታ ዎንታ ምꬃ አን ጉጅ ጉጂደ ዎꬆ። ጹግያ ያርሹዋካ ሄ ምꬃ ቦላ ማራን ዎꬂደ፥ እትፐተꬃ ያርሹዋ ሀንዳ አ ቦላ ጹጎ። 13 ታማይ ያርሽያ ሳኣ ቦላ ኡባ ዎደ ኤጺደ ደኦ፤ ቶአናዉ ኮሸና።

14 “ ‘ካꬃ ያርሾ እመቴዳ ዎጋይ ሀዋ: አሮና አቱማ ናና ግድያ ቄሳቱ ያርሽያ ሳኣፐ ስንꬃ ባጋና መꬍና ጎዳ ስንꬃን ሺሽኖ። 15 ቄሲ ሎኦ ꬊልያፐ ኮጵያዋነ ዛይትያ አኪደ፥ ካꬃ ያርሹዋ ቦላ ደእያ እጻና ኡባካ ደንꬂደ፥ መꬍና ጎዳዉ ሳዉዋ ቶሹኩ ግያ ያርሹዋ ኦꬂደ፥ ሀሳይስያዋ ግዳናዳን ያርሽያ ሳኣ ቦላ ጹጎ። 16 ሄዋፐ አቴዳዋ አሮንነ አ አቱማ ናናይ ሚኖ፤ ሄዋ ኡንቱንቱ እርሹ የገትቤና ኡክꬃ ኦꬅ ኡኪደ፥ ዱንካንያ ዳባባ ግዶን ደእያ ጌሻ ሳኣን ሚኖ። 17 ሄ ኡክꬃይ እርሹዋ የገናን ኡከቶ። ሄዋ ታዉ ታማን ጹግያ ያርሹዋፐ ኡንቱንታ ጋክያዋ ታን ኡንቱንቶ እማድ። ናጋራ ያርሹዋዳንነ ናቁዋ ያርሹዋዳን እካ ሎይꬂደ ጌሻ። 18 መꬍና ጎዳዉ ታማን ጹግያ ያርሹዋፐ ኡንቱንታ ጋክያዋ ግድያ ድራዉ፥ ይያ ላይꬃቱዋንካ አሮና ዛረ ግድያ አቱማዋንቱ ኡባይ ሄዋ ሚኖ። ሄ ያርሹዋ ቦችያ አያይነ ጌሻ ግዳና’ ያጋ” ያጌዳ።

19 መꬍና ጎዳይ ቃይካ ሙሴዉ ሀዋዳን ያጊደ ኦዴዳ፤ 20 “አሮንነ አ አቱማ ናናቱዋፐ ቄሳተꬃ ካፖተꬃዉ ኦከትያ ጋላስ ላኡ ኪሎ ግራመ ግድያ ሎኦ ꬊልያ ካꬃ ያርሹዋ ኦꬂደ መꬍና ጎዳዉ አህኖ። ሄዋፐ ባጋ ዎንታ፥ ባጋ ኦማርስ ያርሽኖ። 21 ሄ ꬊሊ ዛይትያን ሙናቀት ሎኦ ዋላከቲደ ባሽያን ኡከቶ፤ ቡንቻደ፥ ሳዉዋ ቶሹኩ ግያ ካꬃ ያርሹዋ ኦꬃደ መꬍና ጎዳዉ ሺሻ። 22 ቃይ አሮና አቱማ ናናቱዋፐ አ ቄሰተꬃ ካፖተꬃ ኦሶ ኦከትያ ኡባይካ ሄ ዎጋ ኦꬅኖ። ሄዌ መꬍና ጎዳዉ ኡባ ገደ ያርሽያ ያርሹዋ ግዲደ ኡባና ጹገቶ። 23 ቄሲ ሺሽያ ካꬃ ያርሹዋፐ ጉየ አተናን ዉር ጹገቶ፤ አፐ አያይነ ሜተቶፖ” ያጌዳ።

24 መꬍና ጎዳይ ሙሴዉ ሀዋዳን ያጊደ ኦዴዳ፤ 25 “አሮናሳነ አ አቱማ ናናቶ፥ ሀዋዳን ያጋ፤ ‘ናጋራ ያርሹዋ ዎጋይ ሀዋ: መꬍና ጎዳዉ ጹግያ ያርሾ ሺሽያ መሂ ሹከትያ ሳኣን ናጋራ ያርሾ ሺሽያ መሂካ ሄዋን ጾሳ ስንꬃን ሹከቶ፤ እካ ጌሻ ያርሹዋ ኡባፐ እቱዋ ግዴዳ ጌሻ ያርሹዋ። 26 ሄ ያርሹዋ ያርሽያ ቄሲ ዱንካንያ ዳባባ ግዶን ደእያ ጌሻ ሳኣን ሞ። 27 ሄ አሹዋ ቦችያ አያይነ ጌሻ ግዳናዋ፤ ቃይ ሹክሺን አይ ማዩዋ ቦላነ ሱꬃይ ꬋጨቶፐ፥ ሄ ማዩ ጌሻ ሳኣን ሜጨቶ። 28 አሹ ዶይሰቴዳ ኡርቃ ሚሻይ መኦ፤ ማዳብያ ብራታ ድስትያን ዶይሴዳዋ ግዶፐ፥ ሄ ድስትያ ቃጪደ ሃꬃን ሾክ ድጋናዉ ኮሼ። 29 ቄሳቱዋ ዛርያፐ አቱማ አሳ ግዴዳ ኦንነ ሄ አሹዋ ሞ፤ ሄ አሹ ጌሻ ኡባፐ እቱዋ ግዴዳ ሎይꬅ ጌሻ። 30 ግዶ ሽን ጌሻ ሳኣን ናጋራ አቶ ጊሳናዉ አ ሱꬃ አኪደ፥ ዱንካንያ ግዶ ገልሴዳ አይ መህያ አሹዋነ ማናዉ ኮሸና፤ እ ታማን ጹገታናዉ ኮሼ።