1 “ኔኖ አሳ ናአዉ፥ ቃራ ማሻ አካደ፥ ነ ሁጲያነ ነ ቡቻ ሁጲያ ጊግስያዋንቱ ምላጭያዳን አን ሜዳ። ያታደ ሚዛናን ልካደ፥ ነ ብናና ሄዙ ከሳደ ሻካ። 2 ኔን ዶድያ ዎዲ ዉርያ ዎደ፥ ነ ሻኬዳ ብናናዉ እት ኩሽያ የሩሳላመ ካታማ ምስልያዉ ግዱዋን ታማን ጹጋ። ላኤንꬆ ኩሽያ ካታማ ዩሹዋን ኡባን ማሻን ቃንጸሬꬃ። ሄዘንꬆ ኩሽያ ቃይ ጫርኮ ላላ፤ አያዉ ጎፐ፥ ታን ኡንቱንታ ማሻን የደርሳና። 3 ቃይ ሄዋፐ ጉꬃ ብናና አካደ፥ ነ ማዩዋ ጼራን ቃቻ። 4 ሄ ኔን ቃቼዳዋፐ ጉꬃ አካደ፥ ታማን ኦላደ ጹጋ። ሄዋን ዶሜዳ ታማይ እስራኤልያ አሳ ኡባ ጋካናዋ” ያጌዳ።

5 ኡባ ሞድያ መꬍና ጎዳይ ሀዋዳን ያጌ፤ “ሀዌ የሩሳላመ ካታማ፤ ታን ቢታቱዋ እዝ ዩሹዋን ዎꬃደ፥ ካዉተꬃቱዋ ኡባዉ ግዶ ጉልአን እዞ ዎꬃድ። 6 ሽን እዛ ባረ ኢታ ኦሱዋን፥ ባረ ዩሹዋን ደእያ ቢታቱዋፐነ ካዉተꬃቱዋፐ ያ ኢታደ፥ ታ ህግያነ ታ ዎጋ ናገናን እጻዱ፤ ቱሙካ እዛ ታ ህግያዉ ማካላዱ፤ ታ ዎጋካ ካለናን እጻዱ” ያጌ።

7 ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ “ህንተንቱ ህንተ ዩሹዋ ካዉተꬃፐ አꬂደ መቱዋ መꬌድታ፤ ታ አዛዙዋ ካለናንነ ታ ዎጋ ናገናን እጼድታ። ሀራይ አቶ ሽን ህንተንቱ ዩሹዋን ደእያ ካዉተꬃቱዋ ዎጋካ ናግበይክታ” ያጌ።

8 ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ “ኔኖ፥ የሩሳላመ፥ ታን ነዉ ሞርከ፤ ሀራ ካዉተꬃቱ ኡባይ በእሽና፥ ነ ቦላ ታ ፕርዳ አሀና። 9 ኔን ታን እጽያ ኤቃ ጎይና ኡባ ኦꬄዳ ድራዉ፥ ታን ሀዋፐ ካሰ ሀንቤናዋ፥ ቃይ ሀዋፐ ስንꬃዉካ ሀነና ፕርዳ ነ ቦላ አሀና። 10 ሄዋፐ ደንዴዳዋን፥ ህንተ ግዶን አዎቱ ባረንቱ ናናቱዋ ማና፤ ቃይ ናናቱካ ባረንቱ አዎቱዋ ማና። ታን ህንተ ቦላ ፕርዳ አሀና፤ ህንተፐ አቴዳዋንታካ ኦይዱ ጫርኩዋ ሚዛና ኡባዉ ላላና። ስቁዋ 4:10

11 “ሄዋ ድራዉ፥ ታን ኡባ ሞድያ መꬍና ጎዳይ ታ ደኡዋን ጫቃይ: ህንተ ህንተ ሸነይያ ኤቃቱዋንነ ቱና ኦሶቱዋን ታ ጌሻ ጎልያ ቱንሴዳ ድራዉ፥ ታንካ ህንተና ቡꬃ ꬋይሳና። ህንተዉ ቃረትከነ ህንተፐ እቱዋነ አሽከ። 12 ነ አሳፐ እት ኩሺ ካታማ ግዶን ኢታ ሀርግያን ዎይ ኮሻን ሀይቃና፤ ላኤንꬆ ኩሺ ካታማፐ ካረና ኦላን ዉራና፤ ቃይ ሄዘንꬆ ኩሽያ ታን ኦይዱ ጫርኩዋ ሚዛናዉ ኡባዉ ላላደ፥ ኡንቱንታ ማሻን የደርሳና።

13 “ታ ይሉ ዉራና፤ ታን ኡንቱንቱ ቦላ ሀንቀቴዳ ሀንቁካ ኤቃና፤ ያቶፐ ታ ሀንቁ ዶቻና። ታን ኡንቱንቱ ቦላን ሀንቀቴዳ ሀንቁዋ ዉርስያ ዎደ፥ ታን መꬍና ጎዳይ ቃናትያን ሃሳዬዳዋ ኡንቱንቱ ኤራና።

14 “ህንተንቱ ዩሹዋን ደእያ ካዉተꬃቱዋ ግዶንነ ህንተ ማታና አꬍያ ኡባ ስንꬃን ታን ህንተና ባዙዋነ ቅሊጭያዋ ኦꬃና። 15 ታን ህንተና ታ ሀንቁዋን፥ ታ ይሉዋንነ ቃረታይ ባይና ሴራን ፕርድያ ዎደ፥ ህንተ ህንተ ዩሹዋን ደእያ ካዉተꬃቶ ቅሊጮነ ሸቃዉ፥ ህንተና በኤዳ አሳዉ ናገትያባነ ዳጋምያባ ግዳና። ታን መꬍና ጎዳይ ሀዋ ኦዳድ። 16 ታን ህንተ ቦላ ዎꬍያነ ꬋይስያ ኮሻ ዎንዳፍያ ዱክያ ዎደ፥ ህንተና ꬋይሳናዉ ዱካና። ህንተዉ ኮሻ ያ ያ ዳርሳና፤ የሩሳላመ ካታማ ካꬃይ ገለናዳን፥ ታን ድጋና። 17 ታን ኮሻነ ባዞ ዶኣ ህንተ ቦላ የድና፥ ኡንቱንቱ ህንተ ናናቱዋ ꬋይሳና። ታን ኢታ ሀርግያ፥ ሱꬃ ጉስያዋነ ኦላ ህንተ ቦላ አሀና። መꬍና ጎዳይ ሀዋ ኦዳድ” ያጌ። ሳፃ 6:8