1 “ኔኖ አሳ ናአዉ፥ ኡርቃፐ መꬌዳ ጹብያ አካደ፥ ነ ስንꬃን ዎꬃ፤ ያታደ የሩሳላመ ካታማ ምስልያ አ ቦላ መꬋ። 2 አ ዶዳ፤ ድርሳ ኦንነ ከስ አከናዳ ድራ፥ ካታማ ግምቢያ ዩሹዋን ቢታ ዶራ፤ ኦላንቻቱ ኤቂያሳ ጊግሳ፤ ግምቢያ ላልያ ኦላ ሚሻ ዩሹዋን ጊግሳ። 3 ቃይ ብራታ ባሽያ አካደ፥ ብራታ ጎዳዳን ኔፐነ ካታማፐ ግዱዋን ኤሳ። ነ ሶምኡዋካ ሀንቁዋን አኮ ዛራ። ሄ ካታማይ ዶደታና፤ ቃይ ዶዴዳዌካ ኔና። ሀዌ እስራኤልያ አሳዉ ማላ ግዳናዋ።

4 “ሄዋፐ ጉይያን፥ እስራኤልያ አሳዉ ሙሩዋ ማላ ግዳና ማላ ነ ሀድርሳ ምይያን ግሳ። ኔን ነ ሀድርሳ ምይያን ግሴዳ ጋላሳቱዋ ፓይዱዋ ኬሻ እስራኤልያ አሳ ኡንቱንቱ ዋን ሙረታነንቶ በሳሳ። 5 ቃይ ኔን ግሳደ እስራኤሊ ዎት ሙረታነንቶ በሳናዳን 390 ጋላሳ ነዉ እማድ። ሄ እት እት ጋላሳይ ኡንቱንቱ ሙረትያ እት እት ላይꬃና ቃራ።

6 “ሄ ጋላሳ ነ ዉርሴዳዋፐ ጉይያን፥ ቃይ ዛራደ ነ ኡሸቻ ምይያን ይሁዳ አሳይ ዎት ሙረታነንቶ በሳናዉ ግሳ፤ እት እት ጋላሳይ እት እት ላይꬃ ሙሩዋና ቃራ ግድያ ድራዉ፥ ሄዋዳን ኡንቱንቱ ኦꬄዳ ናጋራ ሙሩዋ ኦይታሙ ጋላሳ ኔን ግሳናዳን፥ ታን ነዉ እማድ። 7 ነ ሶምኡዋ የሩሳላመ ዶደꬃኮ ሀንቁዋን ዛራደ፥ ነ ኩሽያ ደንꬃ ማንዳደ፥ የሩሳላመ ቦላ ትምቢትያ ኦዳ። 8 ሄ ዶደꬃን ኔን ጋምእያ ጋላሳይ ዉራናዉ፥ እት ምይያፐ ሀራ ምይያዉ አꬋ ዎናዳን፥ ታን ኔና ዎዶሩዋን ቃቻና።

9 “ሀእ ኔን፥ ዛርጋነ ባንጋ፥ ባኤላነ ምስርያ፥ ማልዱዋነ ሞርገ ምꬃ አካደ፥ ካꬃ ዎꬅያ እት ባꬃን ቆላደ፥ አፐ ነዉ ቁማ ካꬃደ፤ ሄዋ ኔን ምይያን ግስያ 390 ጋላሳ ማና። 10 ሀች ሀች ኔን ምያ ኡክꬃ ልካ፤ እካ 230 ግራምያ ዴጽያዋ ግዶ፤ ሄዋ አ ዎድያን ዎድያን ማ። 11 ቃይ ኔን ሀች ሀች ኡሽያ ሃꬃካ ልካ፤ እካ ላኡ ቡርጩኮ ግዶ፤ ሄዋ አ ዎድያን ዎድያን ኡሻ። 12 ሄ ዋላኬዳ ካꬃ ባንጋ ኡክꬃ ኡክያዋዳን ኡካ፤ አሳይ ጼልሽን፥ አሳ ዎራ ሼሻ መላ ኤꬃደ ኡካ፤ ያታደ ማ። 13 ሄዌ እስራኤልያ አሳይ ታን ኡንቱንታ ላልያ ካዉተꬃቱዋ ግዶን ደኢድ፥ ቱኔዳ ቁማ ማናዎ ማላታ” ያጌዳ መꬍና ጎዳይ።

14 ያትና፥ ታን ዛራደ ሀዋዳን ያጋድ፤ “ሀይ! ኡባ ሞድያ መꬍና ጎዳዉ፥ ሄዌ ሀኖፖ! ታን ታና ቱንሳ ኤርከ። ታ ናአተꬃፐ ዶማደ ሀች ጋካናዉ፥ ባኩታ ዎይ ባዞ ዶአይ ፑዚደ ዎꬌዳዋ ማ ኤርከ፤ ቱኔዳ አሹ ታ ዶናኮ ሺቅ ኤረና” ያጋድ።

15 እ ዛሪደ፥ ታና ሀዋዳን ያጌዳ፤ “ዳሮ ሎአ፥ ያቶፐ፥ አሳ ዎራ ሼሻ መላን ኡክያዋ አጋደ፥ ሚዛ ኦሻ ከዊያን ነ ኡክꬃ ኡካሳ” ያጌዳ።

16 እ ቃይካ ሀዋዳን ያጌዳ፤ “ኔኖ አሳ ናአዉ፥ በአ፤ የሩሳላመ ካታማ ካꬅ ገለናዳን፥ ታን ድጋና ሀናይ። አሳይ ካꬃ ህርጊደ፥ ማኪደ ማና፤ ቃይ ሃꬃካ ያዪደ፥ ልኪደ ኡሻና። 17 ሄዎ ኡንቱንቶ ደእያ ካꬃይነ ሃꬃይ ዉራና፤ ኡንቱንቱ እቱ እቱዋ፥ ‘ፖራ!’ ጊደ ጼላና፤ ኡንቱንቱ ባረንቱ ናጋራ ሙሩዋን ግልቃና።