3
1 ቃይ እ ታዉ ሀዋዳን ያጌዳ፤ “ላ አሳ ናአዉ፥ ሄ ነ ስንꬃን ደእያዋ ማ፤ ሀ ጻꬃ ማጻፋ ማ። ባደ፥ እስራኤልያ አሳዉ ኦዳ” ያጌዳ። ሳፃ 10:9-10 2 ታን ሀንጋድ፤ ታን ማናዳን፥ ጻꬃ ማጻፋ እ ታና ባርሴዳ። 3 ታና፥ “ላ አሳ ናአዉ፥ ሀ ታን ኔና ባርስያ ጻꬃ ማጻፋ ማ፤ ነ ኡሉዋ አን ኩንꬃ” ያጌዳ። ታን ምያ ዎደ፥ ታ ዶናን ኤሳዳን ማልኤዳ።
4 ሄዋፐ ስሚደ፥ እ ታና ሀዋዳን ያጌዳ፤ “ኔኖ አሳ ናአዉ፥ ሀእ እስራኤልያ አሳኮ ባ፤ ታ ቃላ ኡንቱንቶ ኦዳ። 5 ኔን ኪተቴዳዌ እስራኤልያ አሳሳፐ አትና፥ ዶናይ ኤረተናነ ቃላይ ገለና ሃሳያይ አኬከተና አሳኮ ግደና። 6 ቃይ ታንካ ኔና ኡንቱንቱ ቃላይ ገለና፥ ኡንቱንቱ ሃሳያይካ ኤረተና ኡንቱንቱ ቃላ ኔን ኤራናዉ ዳንዳየና ዳሮ አሳኮ ኪታበይከ አላጋ ቢታ ቃላ ዴጹዋ ሃሳይያ ዳሮ አሳኮ ኪታበይከ። ቱሙ ታን ኔና ሄዋንቱኮ ኪታድታንቶ፥ ኡንቱንቱ ኔን ግያዋ ስሳና ሽን! 7 እስራኤልያ አሳይ ታን ኦድያዋ ስሳናዉ ኮየና ድራዉ፥ ኡንቱንቱ ኔን ኦድያዋካ ስስክኖ። አያዉ ጎፐ፥ ኩመንꬃ እስራኤልያ አሳይ ሞርጊ ዞዛነ ዬላይ ባይናዋንታ ግድያ ድራዉ፥ ነ ኦድያዋ ስስክኖ። 8 ሽን ታን ኔናካ ኡንቱንቱዋዳን ዎዛና ምኖነ ዬላይ ባይናዋ ኦꬃና። 9 ታን ኔና ያሻይ ባይና አሳ ኦꬃና፤ ዛላፐካ አꬎ ምኖ ከሳና። ኡንቱንቱ ማካላንቻ አሳ ግዶፐካ፥ ኡንቱንቶ ያዮፓ፤ ዎይ ኡንቱንቶ ዳጋሞፓ” ያጌዳ።
10 ቃይ እ ታና ሀዋዳን ያጌዳ፤ “ላ አሳ ናአዉ፥ ታን ነዉ ኦድያ ቃላ ኡባ ምንሳደ ሀይዛነ ነ ዎዛናን ዎꬃ። 11 ሀእ ደንዳ ባደ፥ ኦሞዱዋን ደእያ ነ አሳዉ ኦዳ። ኡንቱንቱ ስስና እጽናካ ኡንቱንቶ፥ ‘ኡባ ሞድያ መꬍና ጎዳይ ሀዋዳን ያጌ’ ያጋደ ኦዳ” ያጌዳ።
12 ሄዋፐ ጉይያን፥ ታና አያናይ ፑደ ደንꬄዳ፤ “መꬍና ጎዳ ቦንቹ ደኢያሳፐ ደንድያ ዎደ” ታፐ ጉየና፥ ወልቃማ ኮሻ ስሳድ። 13 ቃይ ፓጻ መታቱ ቀፊ እቱ እቱዋና ሾጨትያ ኮሻይ፥ ኡንቱንቱ ምይያን ደእያ ይንግርያዋ ኮሻና ጋከቲደ፥ ጉጉንꬃ ኮሻዳን ሀንያ ኮሻ ስሳድ። 14 ሄዋፐ ጉይያን፥ አያናይ ታና ፑደ ደንꬂደ፥ ሀራ ሳኣ አፌዳ። ያትና፥ ታን መꬍና ጎዳ ዎልቃይ ታና ሞድ ደእሽን፥ ታ አያናን ጫመታደነ ይሎታደ ባድ። 15 ከባራ ሻፋ ማታን፥ ተል-አቢባን ኦሞደቴዳዋንቱኮ ጋካድ። ታን ሄዋን ዳጋማደ፥ ኡንቱንቱና ላፑን ጋላሳ ጋምኣድ።
ህዝቄል ዎችያ አሳ ግዴዳ
(ህዝ. 33:1-9)
16 ላፑንꬃ ጋላሳ ዉርሰꬃን መꬍና ጎዳ ቃላይ ታኮ ሀዋዳን ያጊደ ዬዳ፤ 17 “ኔኖ አሳ ናአዉ፥ ታን ኔና እስራኤልያ አሳዉ ዎችያዋ ኦꬃድ። ታ ዶናፐ ከስያ ቃላ ስሴዳ ፓይዱዋ ኡባን፥ ኡንቱንቱካ ናገታናዳን ሴራ። 18 ታን ናጋራንቻ፥ ‘ቱሙዋ ኔን ሀይቃና’ ያግያ ዎደ፥ ኔን ባደ አ ሴራና ꬋዮፐ፥ አ ሸምፑካ አታና ማላ፥ እ ባረ ናጋራ ኦግያፐ ስማናዳን ኔን አ፥ ‘ኔና የኤ!’ ጋና ꬋዮፐ፥ ሄ ናጋራንቻይ ባረ ናጋራን ሀይቃና፤ ሽን አ ሱꬃ ታን ኔፐ ጭገታና። 19 ሽን ኔን ናጋራንቻ ሴርና፥ እ ባረ ናጋራፐ ዎይ ባረ ኢታ ኦግያፐ ስመናን እጾፐ፥ እ ባረ ናጋራን ሀይቃና፤ ሽን ኔን ነ ሁጲያ አሻና።
20 “ቃይ ጽሎ አሳይ ባረ ጽሎተꬃፐ ጉየ ስሚደ፥ ኢታ ኦꬅያ ዎደ፥ ታን አ ስንꬃን ꬉብያ ዎꬅና፥ እ ሀይቃና። እ ስማናዳን ኔን አ፥ ‘ኔና የኤ!’ ጋቤና ድራዉ፥ እ ባረ ናጋራን ሀይቃና፤ እ ካሰ ኦꬄዳ ጽሎ ኦሱ ዛሪደ ቆፈተና፤ ሽን ታን አ ሱꬃካ ኔፐ ጭገታና። 21 ቃይ ኔን ጽሎ አሳይ ናጋራ ኦናዳን ሴርና፥ እካ ናጋራፐ ባረና ናጎፐ፥ ቱማ እ ፓጻ ደአና። አያዉ ጎፐ፥ እ ኔን ሴሬዳዋ ስሴዳ፤ ኔንካ ነ ሁጲያ አሻና” ያጊደ ዬዳ።
ህዝቄላ ጾሳይ ዱድሴዳ
22 ሄ ሳኣን መꬍና ጎዳ ዎልቃይ ታና ሞዴዳ፤ ቃይ እ ታና፥ “ደንዳ፤ ዛንጋራ ባ። ነዉ ያን ኦዳና” ያጌዳ። 23 ታን ደንዳደ፥ ዛንጋራ ባድ። ሄ ሳኣን ካሰ ካባራ ሻፋ ማታን ታን በኤዳዋዳን፥ ሄዋን መꬍና ጎዳ ቦንቹ ኤቄዳዋ በኣድ፤ ታን ታ ሶምኡዋ ቢታ ጋꬃደ ጉፋናድ።
24 ሄዋፐ ጉይያን፥ አያናይ ታ ግዶ ገሊደ፥ ታና ታ ገድያን ኤሲደ፥ ታና ሀዋዳን ያጌዳ፤ “ባ፤ ነ ጎለ ባደ፥ ነ ቦላ ካርያ ጎርዳደ ኡታሻ። 25 ኔኖ አሳ ናአዉ፥ ኔን ዎዶሩዋን ቃሸታና፤ ኔን አሳኮ ከሳናዉ ዳንዳያካ። 26 ቃይ ኔን ዱደ ግዳናዳንነ ኡንቱንታ ሴረናዳን፥ ታን ነ እንጻርሳ ነ ኮክያና ጋꬃ ኦይꬃና። አያዉ ጎፐ፥ ኡንቱንቱ ማካላንቻ አሳ። 27 ሽን ታን ነዉ ኦድያ ዎደ፥ ታን ነ ዶና ዶይና፥ ኔንካ ኡንቱንቶ፥ ‘ኡባ ሞድያ መꬍና ጎዳይ ሀዋዳን ያጌ’ ያጋና። ስስያ ኦንነ ስሶ፤ ስሰናን እጽያ ኦንነ እጾ። አያዉ ጎፐ፥ ኡንቱንቱ ማካላንቻ አሳ።