1 እ ታና ሀዋዳን ያጌዳ፤ “ላ አሳ ናአዉ፥ ደንዳደ ነ ገድያን ኤቃ። ነዉ ኦዳና” ያጌዳ። 2 እ ሃሳዬዳ ዎደ ጾሳ አያናይ ታ ግዶ ገሊደ፥ ታና ታ ገድያን ኤሴዳ። እ ታዉ ኦድያዋካ ስሳድ።

3 ሀዋዳን ያጌዳ፤ “ኔኖ አሳ ናአዉ፥ ታን ኔና እስራኤልያ አሳኮ፥ ታ ቦላ ማካሌዳ ማካላንቻ ካዉተꬃኮ ኪታይ፤ ኡንቱንቱነ ኡንቱንቱ አዎቱ ሀች ጋካናዉካ ታ ቦላ ማካሊደ ደኢኖ። 4 ኡንቱንቱ ዎዛና ሙመነ ዬላይ ባይናዋንታ ግድያ ድራዉ፥ ታን ኔና ኡንቱንቱኮ ኪታይ። ባደ፥ ‘ኡባ ሞድያ መꬍና ጎዳይ ሀዋዳን ያጌ’ ያጋ። 5 ኡንቱንቱ ማካላንቻ አሳ ግድያ ድራዉ፥ ኡንቱንቱ ስስናካ እጽናካ፥ ናቢ ኡንቱንቱ ግዶን ደእያዋ ኡንቱንቱ ኤራና። 6 ኔኖ አሳ ናአዉ፥ ኡንቱንቶካ ኡንቱንቱ ቃላዉካ ያዮፓ! ኮናይ ደእያነ አጉንꬃይ ነ ዩሹዋን ደእያዋ ግዶፐካ፥ ቃይ ሶጎቱዋ ግዱዋን ኔን ኡቶፐካ፥ ያዮፓ። ኡንቱንቱ ማካላንቻ አሳ ግድያ ድራዉ፥ ኡንቱንቱ ቃላዉ ያዮፓ፤ ዎይ ኡንቱንቶ ሻቢረቶፓ። 7 ኡንቱንቱ ማካላንቻ አሳ ግድያ ድራዉ፥ ስስናካ እጽናካ፥ ታ ቃላ ኡንቱንቶ ኦዳ።

8 “ሽን፥ አሳ ናአዉ፥ ታን ነዉ ኦድያዋ ስሳ! ሄ ማካላንቻቱዋዳን፥ ኔንካ ማካላንቻ ግዶፓ፤ ነ ዶና ዶያደ፥ ታን ነዉ እምያዋ ማ” ያጌዳ።

9 ሄዋፐ ጉይያን፥ ታን ጼልያ ዎደ፥ ኩሺ ታኮ ምጨት ኡቴዳዋ በኣድ፤ ሄ ኩሽያን ጻꬃ ማጻፋይ ደኤ። ሳፃ 5:1 10 እ ታ ስንꬃን ሄ ጻꬃ ማጻፋ ብሌዳ፤ ሄ ጻꬃ ማጻፋን ላኡ ባጋናካ ዬኩ፥ ካዩነ ሴላ ዋሱ ጻፈት ኡቴዳ።