1 ሀታማንꬃ ላይꬃን፥

ኦይደንꬅያ አግናን፥ እቼሸንꬅያ ጋላሳን፥ ታን ካባራ ሻፋን ኦሞደት ቤዳዋንቱ ግዶን ደእሽን፥ ሳሎቱ ዶየትና፥ ጾሳ ሳፃ በኣድ። ሳፃ 19:11 2 ካቲ ዮኣኪን ኦሞደቶደፐ እቼሻንꬅያ ላይꬃን፥ ሄ አግናፐ እቼሸንꬅያ ጋላሳን፥ 2 ካታ. 24:10-16፤ 2 ኦዱዋ 36:9-10 3 ባብሎነ ቢታን ካባራ ሻፋ ማታን ደእያ ታኮ፥ ቡዛ ናኣ፥ ቄስያ ህዝቄላኮ መꬍና ጎዳ ቃላይ ዬዳ፤ ሄዋን መꬍና ጎዳ ኩሺ ታና ሞዴዳ።

4 ታን ጼልያ ዎደ፥ ጎቲ ሁጲሳና ይያዋ በኣድ፤ ዎልቃማ ፖኡ ዎልቃማ ሻርያ ዶድ ዎꬄዳ፤ ሄ ሻርያ ግዱዋን ዋልቃንꬃይ ፖዡ ጌ። ዋልቃንꬃዉ ግዶ ዎዛናይ ጶልያ ናስያ ማላቴ። 5 ሄዋ ግዶን ኦይዱ ፓጻ መታቱ ደኢኖ። ኡንቱንቱ አሳ ማላቲኖ፤ ሳፃ 4:6 6 ሽን ኡንቱንቶ እቶ እቶ ኦይዱ ኦይዱ ሶምኡነ ኦይዱ ኦይዱ ቀፊ ደኤ። 7 ኡንቱንቱ ገዲ ስት ጌዳዋ፤ ኡንቱንቱ ገድያ ያቻይ ማራ ገድያ ማላነ ቁጪደ ጌሼዳ ናስያ ብራታዳን ጶሌ። 8 ኡንቱንቱ ቀፍያፐ ጋርሳና ኦይዱ ባጋናካ አሳ ኩሽያ ማላትያ ኩሺ ደኤ። ሄ ኦይዳቶካ ዴሙነ ቀፊ ደኤ። 9 ኡንቱንቱ ቀፊ እቱ እቱዋ ቦቼ፤ ኡንቱንቱ ኡባይካ ያነ ሃነ ስመናን ስት ጊደ ስንꬃዉ ቢኖ። 10 ኡንቱንቶ እቶ እቶ ስንꬃ ባጋና አሳ ሶምኢ ደኤ፤ ኡሸቻ ባጋና ጋሙዋ ሶምኢ ደኤ፤ ቃይ ሀድርሳ ባጋና ቦራ ሶምኢ ደኤ፤ ቃይ ጉየ ባጋና አርጋንꬃ ሶምኢ ደኤ፤ ህዝ. 10:14፤ ሳፃ 4:7 11 ኡንቱንቱ ሶምኢ ሄዋ ማላቴ። ኡንቱንቱ ቀፊ ቦላዉ ምጨት ኡቴዳ፤ ኡንቱንቱ እቶ እቶ ላኡ ቀፊ ላኡ ባጋናካ ህንኮ መታ ቀፍያ ቦቼ፤ ቃይ ላኡ ቀፊ ኡንቱንቱ ቦላ ቦላ ካሜ። 12 ኡንቱንቱ ኡባይካ ስት ጊደ ስንꬃዉ ቤድኖ፤ ያነ ሃነ ስመናን፥ ጾሳ አያናይ ብያሳ ሀቃነ ቢኖ። 13 ሀ ፓጻ ደእያ መታቱ ግዶን እት ኤጽያ ታማ ቦንቁዋ ማላትያዌነ ስንꬃዉነ ጉየ ቃጽያ፥ ኤጽያ ጾምፕያ ማላትያዌ ደኤ፤ ሄ ታማይ ጶሌነ አ ግዶፐካ ዋልቃንꬃይ ከሴ። 14 ሀ ፓጻ መታቱ ዋልቃንꬃዳን፥ ስንꬃዉነ ጉየ ኤሌል ስመረቲኖ።

15 ሀ ኦይዱ መታቱዋ ታን ጼልሽን፥ ኡንቱንቱ ምየ ባጋ ሳኣን ደእያ ይንግረትያዋንታ በኣድ፤ እት እት መታ ምየ ባጋን እት እት ይንግረትያዌ ደኤ። ህዝ. 10:9-13 16 ሀ ይንግረትያዋንቱ አልኦ ሹቻዳን ጶሊኖ፤ ኡንቱንቱ ኦይዱካ መꬋንነ ማላን እቱ እቱዋ ማላቲኖ። እት ይንግረꬃይ ላኡ ይንግረꬃ ግዲደ መቴዳ፤ እቱ እቱዋ ግዱዋና ካንꬅ አꬎዋ ማላቴ። 17 ኡንቱንቱ ብያ ዎደ ባረንቱ ስንꬃ ዛር ዎꬄዳ ኦይዱ ባጋፐ እቱዋኮ ሀቃዋ ግዶፐነ ቢኖ፤ ሀ መታቱ ብያ ዎደ ይንግረትያዌ ዎራ ስመና። 18 ዎጋነ ያሽያ ኦይዱ ይንግረꬃቱ ደኢኖ፤ ሄ ይንግረꬃቱዋ ጋጻ ዩሹዋ ኡባን ጼልያ አይፊ ኩሜዳ። ሳፃ 4:8

19 ሀ መታቱ ብያ ዎደ፥ ኡንቱንቱ ምይያን ሀ ይንግረꬃቱ ጎንዶረቲኖ፤ ሄ መታቱ ቢታፐ ፑደ ደንድያ ዎደ፥ ሀ ይንግረꬃቱካ ደንዲኖ። 20 ደኡዋ አያናይ ብያ ሀቃነ ሀ ይንግረꬃቱካ ደንዲደ ቢኖ፤ አያዉ ጎፐ፥ ሀ ደኡዋ አያናይ ይንግረꬃቱዋ ግዶን ደእያ ድራሳ። 21 ሀ መታቱ ብያ ዎደ፥ ይንግረꬃቱካ ቢኖ፤ መታቱ ኤቂያ ዎደ፥ ይንግረꬃቱካ ኤቂኖ፤ ቃይ መታቱ ቢታፐ ፑደ ደንድያ ዎደ፥ ይንግረꬃቱ ኡንቱንቱና እትፐ ደንዲኖ። አያዉ ጎፐ፥ ደኡዋ አያናይ ይንግረꬃቱዋ ግዶን ደኤ።

22 ሀ ፓጻ መታቱዋ ሁጲያፐ ቦላ ባጋና ማስቶትያዳን ጶሊደ አይፍያ ጫድያ ምጨቴዳ ሳሉዋ ጉፋንꬁዋ ማላትያባይ ደኤ። ሳፃ 4:6 23 ሄ ጉፋንꬁዋፐ ጋርሳ ባጋና ኡንቱንቱ ቀፊ ስት ጊደ፥ እቱዋዌ እቱዋኮ ምጨት ኡቴዳ፤ ቃይ ኡንቱንቱ ኡባዉካ ኡንቱንቱ ቦላ ካምያ ላኡ ላኡ ቀፊ ደኤ። 24 ሀ መታቱ ፓልያ ዎደ፥ ኡንቱንቱ ቀፍያ ጊረꬃይ ሃꬃ ኩንꬁዋ ጉንꬃዳን፥ ቃይ ኡባ ዳንዳይያ ጾሳ ኮሻዳንነ ጮራ ኦላንቻቱዋ ጫቡዋዳን ሀንያዋ ስሳድ። ኡንቱንቱ ፓሉዋ አግያ ዎደ፥ ባረንቱ ቀፍያ ሺሽ አኪኖ። ሳፃ 1:15፤ 19:6

25 ኡንቱንቱ ባረንቱ ቀፍያ ሺሽ አኪደ፥ ሄ ሳኣን ኤቂደእሽን፥ ኡንቱንቱ ሁጲያፐ ቦላ ባጋና ደእያ ሄ ጉፋንꬁዋ ማላትያዋ ቦላ ባጋፐ ኮሻይ ዬዳ። 26 ሄ ጉፋንꬁዋ ማላትያዋፐ ቦላ ባጋና ሳምፔርያ ግያ እንቁዋፐ መቴዳ ካዉተꬃ አራታ ማላትያዌ ደኤ፤ ሄ ካዉተꬃ አራታ ማላትያዋ ቦላ አሳ ማላትያዌ ኡቴዳ። ህዝ. 10:1፤ ሳፃ 4:2-3 27 ታን አ በእያ ዎደ፥ አ ጼሳ ማላትያሳፐ ቦላ ባጋይ ታማን ቦንቄዳ ናስያ ብራታዳን ጶሌ፤ ቃይ ጼሳፐ ጋርሳ ባጋይ ታማ ማላቴ፤ አ ዩሹዋን ጶልያ ፖኡ ደኤ። ህዝ. 8:2 28 አ ዩሹዋን ጶልያ ፖኡ እራ ጋላስ ሻርያን ኤቄዳ ዙሉዋ ማላቴ።

ሀዌ መꬍና ጎዳ ቦንቹዋ ቆንጨꬃ ማላቴ። ሄዋ በኤዳ ዎደ፥ ቢታን ዱገ ጉፋናደ፥ እቱ ሃሳይያ ኮሻ ስሳድ።