1 አቤት መꬍና ጎዳዉ፥ ኑ ቦላ ጋኬዳዋ ኡባ ሀሳያ፤ ኑና ጼላ፤ ኑ ካዉሻካ በአ! 2 ኑ ላታ ቢታይ አላጋቶ፥ ኑ ጎሊካ በተቶ እመቴዳ። 3 ኑን አዉ ሀይቄዳ ናናቱዋ ግዴዶ፤ ኑ አየቱካ አምኤ ማጫ አሳ ግዴድኖ። 4 ኑ ኡሽያ ሃꬃዉ ሚሻ ጭጌቶ፤ ኤꬅያ ምꬃካ ሻም አኬቶ። 5 ኑና የደርስያዋንቱ ኑ ግንድያ ጻጱዋ ጋኬድኖ። ኑን ዳቡሬዶ፥ ሽን ሸምፓናዉ ዳንዳይበይኮ። 6 ኑን ቁማ ካላና ጊደ፥ ግብጼ አሳቶነ አሶረ አሳቶ ኩሽያ እሜዶ። 7 ናጋራ ኦꬄዳዋንቱ ኑ ማይዛ አዎቱዋ፤ ሽን ኡንቱንቱ ሀእ ደእክኖ። ኡንቱንቱ አካናዉ በስያ ሙሩዋ አክያዋንቱ ኑና።

8 አይለቱ ኑና ሞድያዋንታ ግዴድኖ፤ ኡንቱንቱ ኩሽያፐካ ኑና ዎꬅ አክያዌ እቱነ ባዋ። 9 ማሻን ዎꬍያዋንቱ ባዙዋን ደእያ ድራዉ፥ ኑን ኑ ሸምፑዋ ሸነኮ ጊደ፥ ኑ ቁማ ደሜዶ። 10 ኮሻይ ሱሌዳ ጋሱዋን ሀርግና፥ ኑ ጋልባይ ታማ ጮጭያዳን ምቼ። 11 ጽዮነን ማጫ አሳቱዋ፥ ይሁዳ ካታማቱዋንካ ዎዶሮቱዋ ዎልቃን ኦይቂደ ባይዜድኖ። 12 ካፓቱዋ አፊደ ካቄድኖ፤ ጭማቱካ ቦንቼትበይክኖ። 13 ያላጋ አቱማ አሳቱ ዎጻን ጋጬድኖ፤ አቱማ ናናቱካ ዴጾ ምꬃ ቶኪደ ጋንድጋሬድኖ። 14 ጭማ አሳቱ ካታማ ፐንገን ፕርዳናዉ ኡትያዋ አጌድኖ፤ ያላጋ አቱማ አሳቱ የꬃ የጽያዋ አጌድኖ። 15 ኑ ዎዛናፐ ናሸቻይ ብ ክቼዳ፤ ኑ ዱሩሳይካ ዬኮ ላመቴዳ፤ 16 ካላቻይ ኑ ሁጲያፐ ኩንድ ክቼዳ። ኑን ናጋራ ኦꬄዳ ድራዉ፥ ኑዉ አየ አና! 17 ሄዋ ድራዉ፥ ኑ ዎዛናይ ዳቡሬዳ፤ ኑ አይፊካ ጋልጄዳ። 18 አያዉ ጎፐ፥ ጽዮነ ደሪ መላ ግዴዳ፤ ዎራካናቱካ አን ስመረቲኖ።

19 ሽን አቤት መꬍና ጎዳዉ፥ ኔን መꬍናዉ ካዉታሳ፤ ነ ካዉተꬃ አራታይካ የለታ ኡባ ጋካናዉ ደኤ። 20 ኔን ኑና አያዉ ኡባ ዎደ ዶጋይ? ቃይ ሀዋ ኬሻ አዱሳ ዎድያ ኑና አያዉ አጋይ? 21 አቤት መꬍና ጎዳዉ፥ ኑና ኔኮ ዛራ፤ ኑንካ ስማና! ኑ ዎድያካ በንዋዳን ዛራደ ኦራꬃ! 22 ኔን ኑና ኡባ ሙለ አጋዲየ? ነ ሀንቆካ ዛዋይ ባዌየ?