1 ጶልያ ዎርቃይ ባረ ማላ ዋኒደ ታሴዴ። ጌሻ ዎርቃይ ዋኒደ ማላ ꬋዬደ። ጌሻ ጎሊ ኬጸቴዳ ሹቻይ ካታማቱዋ ኦግያ ኡባ ዶናን ላለት ኡቴዳ። 2 ካሰ ቦንቼቴዳ ዎርቃ ላገ ግዴዳ ጽዮነ ናናቱ ሀእ ኩሽያ ሂላይ ኡርቃፐ መꬌዳ ሚሻ ማላ ግዴድኖ።

3 ሀራይ አቶ ዎራካናቱዋነ ባረ ማራ ꬋንꬃዉ፤ ሽን ታ አሳይ ባዙዋን ደእያ ሶጎንያዳን፥ ባረ ናናቶ መቀꬃ ኢቴዳ። 4 ሳሙዋ ጋሱዋን ꬋምያ ናናቱዋ እንጻርሳይ ኮክያና ኦይቀቴዳ፤ ናናቱ ቁማ ዎሴድኖ፤ ሽን ኡንቱንቶ እምያዌ እቱነ ባዋ። 5 ካሰ ማልእያ ቁማ ጻላላ ሜዳዋንቱ ሀእ ኦግያ ዶናን ኮሻን ዉሪኖ፤ ቃይ ካሰ እሻሉዋን ድጬዳዋንቱ ሀእ ብድንꬃ ቦላ ዛቁሌድኖ።

6 ታ አሳ ናጋራይ ኦ ኩሺነ ቦቼናንነ ቆፐናን አꬍ ዎꬌዳ ሶዶማ ካታማ አሳ ናጋራፐካ ዳሬዳ ዶመꬃ 19:24 7 ይሁዳ ካፓቱ ካሰ ሻቻፐ አꬌዳ ጌሻነ ማꬃፐ አꬌዳ ቦꬃ። ኡንቱንቱ ቦላይ ዞኦ እንቁዋፐ አꬌዳ አርሳ፤ ኡንቱንቱ ማላይካ ሳምፔርያ ግያ አልኦ እንቁዋ ማላ። 8 ሽን ሀእ ኡንቱንቱ ሶምኢ ሻላፐ አꬊደ ካረጼዳ፤ አሳይ ኦግያን በኢደ ኡንቱንታ ኤረና። ኡንቱንቱ ጋልባይካ ኡንቱንቱ መቀꬃና ኦይቀቲደ፥ ምꬃዳን መሌዳ።

9 ምያባ ꬋዪደ፥ ሎዱ ጊደ፥ ኮሻን ሀይቄዳዋንቱፐ ኦላን ሀይቄዳዋንቱ ኬካ። 10 ታ አሳ ቦላን ዬዳ ባየꬃ ጋሱዋን፥ ቃረትያ አየቱ ባረንቱ የሌዳ ናናቱዋ ዶይሲደ፥ ባረንቶ ቁማ ከሲደ ሜድኖ። ዛረ. 28:57፤ ህዝ. 5:10 11 መꬍና ጎዳ ሀንቁዋ ጹአይ ኩሜዳ፤ እ ባረ ሱልያ ሀንቁዋ ትጌዳ። የሩሳላመ ካታማ ባሱዋና ሜዳ ታማ ኤꬅ ከሴዳ።

12 ሀ ሳኣን ደእያ ካተቱዋፐ ዎይ ካዉተꬃቱዋ ግዶን ደእያ አሳፐ ኦንነ ሞርኪ የሩሳላመ ፐንግያና ገላና ጊደ አማንቤና። 13 ሽን ሀዌ ሀኔዳዌ አ ናበቱነ አ ቄሳቱ ኦꬄዳ ናጋራ ድራሳ፤ ቃይ ኡንቱንቱ ጽሎቱዋ ሱꬃ አ ግዶን ጉሴዳ ድራሳ። 14 ኡንቱንቱ ቆቀ አሳዳን፥ ኦግያን ታታፊኖ፤ ቃይ ኡንቱንቱ ሱꬃን ቱኔዳ ድራዉ፥ ኡንቱንቱ ማዩዋ ኦንነ ቦቻናዉ ኮየና። 15 ሄዋ ድራዉ፥ አሳይ ኡንቱንታ፥ “ክችተ! ህንተ ቱና! ክችተ! ኑና ቦቾፕተ!” ያጊደ ኡንቱንቱ ቦላ ዋሴዳ።

ያትና፥ ኡንቱንቱ ባቃቲደ ቶይላካቴዳ ዎደ፥ ካዉተꬃቱዋ ግዶን ደእያ አሳይ ኡንቱንታ፥ “ህንተ ኑናና ሀዋን ደአናዉ ዳንዳይክታ” ያጌድኖ። 16 መꬍና ጎዳይ ባረ ሁጲያን ኡንቱንታ ላሌዳ፤ እ ኡንቱንቶ ላኤንꬆ ቆፐና። ኡንቱንቱ ቄሳቱ ካ ቦንቼትበይክኖ፤ ኡንቱንቱ ጭማቱካ ናሸትበይክኖ።

17 ኑ አይፊ ማዱዋ ደማናዉ ጼሊደ፥ ጮ መላ ዳቡሬዳ። ኑና አሻናዉ ዳንዳየና ካዉተꬃቱዋ፥ ኡንቱንቱ ያና ጊደ ዎቼዶ።

18 አሳቱ ኑ ቃታማ ካልያ ድራዉ፥ ኑ ካታማ ኦግያን ሄመታናዉ ዳንዳይበይኮ። ኑ ዉርሰꬃይ ማታቴዳ፤ ኑ ላይꬃይ ዉሬዳ፤ ኑ ꬋይያ ዎዲካ ጋኬዳ። 19 ኑና የደርስያዋንቱ ሳሉዋና ፓልያ አርጋንꬃፐካ አꬊደ ኤሌሊኖ። ኡንቱንቱ ኑና ደርያ ሁጲያና የደርሴድኖ፤ ቃይ ባዙዋን ዙጊደ፥ ኑና ናጌድኖ።

20 መꬍና ጎዳይ ኦኬዳ ካትያ፥ ኑን ሲꬍያና ሸምፕያ ኑ ሸምፑዋ፥ ኡንቱንቱ ባረንቱ ጲርያን ኦይቄድኖ። ኑን አ ኩዋ ጋርሳን ኡቲደ፥ ካዉተꬃቱዋ ግዶን ደአና ጊደ ቆፔዶ።

21 ህንተኖ፥ ኡጻ ቢታን ደእያ ኤዶማ አሳቶ፥ ናሸትተነ ፖጩ ጊተ። ሽን ሀንቁዋ ጹአይ ህንተኮካ ጋካናዋ፤ ህንተካ ማꬆቲደ፥ ካሎ አታና።

22 ህንተኖ፥ ጽዮነ አሳቶ፥ ህንተ ባይዙዋ ሙሩ ፖለቴዳ። ሀዋፐ ስንꬃን እ ህንተና ኦሞዱዋን ዎና።

ሽን ኤዶማ አሳቶ፥ ህንተ ባይዙዋ እ ሙራና፤ ህንተ ናጋራካ ቆንጭሳና።