1 ጾሳ ሀንቁዋ ጋትማን መቱዋ በኤዳ አሳይ ታና። 2 እ ታና ላግ ከሲደ፥ ፖኡ ባይና ꬉማዉ አፌዳ። 3 እ ዛር ዛሪደካ ጋላሳ ሙልያ ታና ሾጫናዉ ባረ ኩሽያ ታ ቦላን ደንꬄዳ። 4 እ ታ ጋልባነ ታ አሹዋ ኤጭሴዳ፤ ታ መቀꬃካ መንꬄዳ። 5 እ ታና ድሬዳ፤ መቱዋንነ ዳቡራን እ ታና ዶዴዳ። 6 በን አይደንቶ ሀይቄዳ አሳዳን፥ ታና ꬉማ ግዶን ዎꬄዳ። 7 ታን ከሰናዳን፥ ታ ዩሹዋ ድሬዳ፤ ዴጾ ሳንሳላታንካ ታና ቃቼዳ። 8 ታን አ ጼሳድ፤ አኮ ዋስናካ፥ እ ታ ዎሳ ስሰናን እጼዳ። 9 ታ ኦግያን ማሰቴዳ ሹቻ ዎꬂደ ጎርዴዳ፤ ታ ኦግያካ ጌላዬዳ።

10 እ ታዉ ሙግያ ባባንꬃ ማላ፥ ዎይ ቆሰቲደ ናግያ ጋሙዋ ማላ ግዴዳ። 11 እ ታና ታ ኦግያፐ ከስ ኦሊደ፥ ዱሰረꬄዳ። ያቲደ ታና አሳይ ባይና ሳን የግ ባሼዳ።

12 ባረ ዎንዳፍያ ዳፊደ፥ ታና ዱካናዉ ማሌዳ። 13 እ ባረ ዎንዳፍያ ዳፊደ፥ ታ ዎዛና አይፍያ ጫዴዳ። 14 ታን አሳ ኡባዉ ሚቻነ ጋላሳ ኩመንꬃ ቦሪደ የጽያዋ ግዳድ። 15 እ ታና ጫሙዋን ኩንꬄዳ፤ ቃይ ጎዳረ ኡꬃዳን ጫምያ ጹኣ ኡሺደ፥ ታና ካልሴዳ።

16 እ ታ አቻ አንጩዋን መንꬄዳ፤ ባና ግዶን እ ታና የꬌዳ። 17 ሳሩ ታፐ ሃኬዳ፤ ታን እንጀ ደኡዋ ዶጋድ። 18 ሄዋ ድራዉ፥ ታን፥ “ታ ዎልቃይ ታፐ ክቼዳ፤ ታን መꬍና ጎዳን ህዶታ ዎꬄዳዌ ኡባይካ ꬋዬዳ” ያጋድ። 19 ታ መቱዋነ ታን ቶይላካትያዋ ሀሳይና፥ ደኡ ታና ጫሜዳ። 20 ሄዌ ታን ኡባካ ዶገናባነ ታ ሸምፑካ ካዮትያዋ።

21 ግዶፐነ፥ ታን ሀ እትባ ታ ዎዛናን ቆፕያ ዎደ፥ ታዉ ስንꬃናዉ ህዶታይ ደኤ። 22 ሄዌነ፥ መꬍና ጎዳ አገና ሲቁዋፐ ደንዴዳዋን ኑን ꬋይቦኮ። አ ቃረታይካ ሙለ ዉር ኤረና፤ 23 ኡንቱንቱ ዎንታ ዎንታ ኦራꬃ። ኔን ሎይꬃ አማነትያዋ። 24 ታን ታዉ፥ “መꬍና ጎዳይ ታና ጋኬዳ ሳማ፤ ሄዋ ድራዉ፥ ታን አን ህዶታ ዎꬃይ” ያጋድ።

25 ባረንቱ ህዶታ አን ዎꬅያዋንቶነ አ ኮይያዋንቶ መꬍና ጎዳይ ሎኦ። 26 ሄዋ ድራዉ፥ አሳይ መꬍና ጎዳይ አሽያ አሹዋ ዳንዳያን ናጎፐ ሎአ። 27 ቃይ አሳይ ባረ ያላጋተꬃን ደኢድ፥ ዳንዳያ ታማሮፐ ሎአ።

28 መꬍና ጎዳይ መቱዋ አህያ ዎደ፥ እ ጮኡ ጊደ፥ ባረካ ኡት አጎ። 29 እ ባረ ሶምኡዋ ቢታ ጋꬂደ ሀይዞ። ኦን ኤሪ፥ አዉ ስንꬃናዉ ህዶታይ ደአነንቶነ። 30 እ ባረ ሻይያ ባቂያዎ በሶ፤ ባረ ሞርከቱ ሸቂያ ሸቃካ ካሎ።

31 አያዉ ጎፐ፥ ጎዳይ አሳ መꬍናዉ ኦለና፤ 32 እት ዎደ ካዩዋ አሆፐነ፥ እ ባረ አገና ሲቁዋ ዳሩዋዳን ቃረቴ። 33 አያዉ ጎፐ፥ እ አሳ ቱጋይያዋንነ መቶይያዋን ናሸተና።

34 አ አሳ ካለꬅያዋንቱ ቃሸቴዳዋንታ ባረንቱ ገድያፐ ጋርሳ ባጋና የꬌድኖ፤ 35 ቃይ ኡባፐ ꬎቂያ ጾሳ ስንꬃን አሳዉ ደእያ ማታ ድጊኖ፤ 36 ቃይካ ችሎታን ፕርዳ ጌላዪኖ። ኡንቱንቱ ጎዳይ ሄዋ ኡባ በኤና ጊደ ቆፒኖየ?

37 ጎዳይ አዛዝቤናዋ አዛዚደ፥ ፖልሳናዉ ዳንዳይያዌ ኦኔ? 38 ኢታባ ግድና ሎኦባ ግድናካ፥ ሃሳዪደ ፖልያዌ ኡባፐ ꬎቂያ ጾሳ ግደኔየ? 39 ያትና፥ ኑን አሳ ግድያዋንቱ ኑ ናጋራ ድራዉ፥ እ ኑና ሙርያ ዎደ፥ አያዉ ዙዙሜቶ?

40 ሄዋ አጊደ፥ አነ ኑ ኦግያ ፓጮይተነ ቆሮይተ፤ መꬍና ጎዳኮካ አነ ስሞይተ። 41 አነ ኑ ዎዛናነ ኑ ኩሽያ ሳሉዋን ደእያ ጾሳኮ ደንꬂደ፥ ሀዋዳን ያጎይተ፤ 42 “ኑን ኔና ናቄዶ፤ ነዉ ማካሌዶ፤ ኔንካ ኑዉ አቶ ጋባካ። 43 ነ ሀንቁዋን ኑና የደርሳዳ፤ ቃይ ኔን ኑዉ ቃረተናን ኑና ሲፋዳ። 44 ኑ ዎሳይ ኔኮ አናዳን፥ ነ ሁጲያ ሻርያን ካማዳ። 45 አሳ ግዶን ኑና ፕቶነ ቡራ ኦꬃዳ። 46 ኑ ሞርከቱ ኡባይ ኑ ቦላን ሃሳዬድኖ። 47 ኑን ዳጋሜዶነ ግትያን ገሌዶ፤ ባዬዶነ ꬋዬዶ” ያጌቶ።

48 ታ አሳይ መቱዋን ꬋዬዳ ድራዉ፥ ታ አይፊ ሻፋዳን አፎꬃ ጎጌ። 49 ታ አይፊ ሙለ ዎደ አገናን አፎꬃ ትጌ። 50 መꬍና ጎዳይ ሳሉዋፐ ዱገ ጼሊደ በአና ጋካናዉ ሄዌ ሀኔ። 51 ታ ካታማን ደእያ ማጫ አሳቱዋ ኡባ ቦላን ጋኬዳዋ ታ አይፊ በኤዳ ዎደ፥ ታ ዎዛናይ ካዮቴዳ።

52 ጮ ታና ሞርክያዋንቱ ታና ካፉዋ ሻንካትያዋዳን ሻንካቴድኖ። 53 ኡንቱንቱ ታና ፓጻ ደእሺና ኦላን የጊደ፥ ኦላ ዶና ሹቻን ጎርዴድኖ። 54 ሃꬃይ ኩሚደ፥ ታ ሁጲያና ጎግያ ዎደ፥ ታን ꬋያድ ጋደ ቆፓድ።

55 አቤት መꬍና ጎዳዉ፥ ታን ጪማ ኦላ ግዶን ደኣደ ነ ሱንꬃ ጼሳድ። 56 ታ ዋሱዋ ስሳናዳን ታን ኔና ዎስያ ዎደ፥ ኔን ታዉ ስሳዳ። 57 ታን ኔና ጼሴዳ ዎደ፥ ታኮ ሺቃደ፥ “ያዮፓ” ያጋዳ። 58 አቤት ጎዳዉ፥ ኔን ታ ሞቱዋ ሞተታደ፥ ታና ዎዛዳ። 59 አቤት መꬍና ጎዳዉ፥ ኔን ታ ቱጋ በኣዳ። ሄዋ ድራዉ፥ ታ ሞቱዋ ኔን ፕርዳ። 60 ኡንቱንቱ ሀሉዋ ከሳናዉ ታ ቦላን ማቀትያ ማቁዋ ኡባ በኣዳ። 61 አቤት መꬍና ጎዳዉ፥ ኡንቱንቱ ታና ሸቂያ ሸቃነ ታ ቦላን ማቀትያ ማቁዋ ኡባ ስሳዳ። 62 ቃይ ታ ሞርከቱ ጋላሳ ኩመንꬃ ታ ቦላን ዙዙምያዋነ ሳሱክያዋ ስሳዳ። 63 በአ፥ ኡንቱንቱ ኡቲድነ ኤቂደ፥ ታና ቦር ቦሪደ የጺኖ።

64 አቤት መꬍና ጎዳዉ፥ ኡንቱንቱ ኦꬄዳ ኦሶ በስያ ጋትያ ኡንቱንቶ ጭጋ! 65 ኡንቱንቱ ዎዛና ዳምሳ! ነ ሸቃይ ኡንቱንታ ጋኮ! 66 አቤት መꬍና ጎዳዉ፥ ኔን ኡንቱንታ ነ ሀንቁዋን የደርሳ፥ ሳሎቱዋፐ ጋርሳና ኡንቱንቱ ደኢያሳፐ ኡንቱንታ ꬋይሳ!