1 ጎዳይ ባረ ሀንቁዋን ሻርያፐ ጋርሳና ጽዮኖ ዎት ዎꬄዴ! እ እስራኤልያ ፑላ ሳሉዋፐ ዱገ ሳኣ ኦሌዳ። እ ባረ ሀንቁዋ ጋላሳን ባረ ጌሻ ጎልያካ ቆፕቤና። 2 ጎዳይ ይሁዳን ደእያ ኬꬃቱዋ ኡባ ቃረተናን ꬋይሴዳ። ቃይ ባረ ሀንቁዋን ሄ ቢታ ጌሱዋ ኡባ ኮሌዳ። ሄ ካዉተꬃነ አ ካፖቱዋ ሳኣን ዱገ ዎꬂደ ካዉሽሴዳ። 3 ባረ ሱልያ ሀንቁዋን እስራኤልያ ዎልቃ ኡባ መንሬꬄዳ። ሞርኪ አ ኦላናዉ ይያ ዎደ፥ ጎዳይ ባረ ኡሸቻ ኩሽያ ኡንቱንቱ ቦላፐ ድጌዳ። ባረ ዩሹዋን ደእያዋ ኡባ ምያ ላጮትያ ታማዳን፥ ያቆባ ቦላ ኤጽ ከሴዳ። 4 ሞርክያዳን እ ባረ ዎንዳፍያ ኡንቱንቱ ቦላ ዳፌዳ። ኡቁንያዋንቱዋዳን እ ባረ ኡሸቻ ኩሽያ ምንሲደ፥ ጼልና ሎእያ አሳ ኡባ ዎꬌዳ። ጽዮነ ጎለቱዋ ቦላ ባረ ሀንቁዋ ሱሉዋ ታማዳን ጉሴዳ። 5 ጎዳይ ሞርክያዳን ሀኒደ፥ እስራኤልያ ꬋይሴዳ። እ ካትያ ጎለቱዋነ ጌሶቱዋ ኡባ ኮሌዳ። ይሁዳ አሳ ቦላን ካዩዋነ ዬኩዋ ጉጄዳ።

6 እ ባረ ጌሻ ጎልያ አታክልትያ ግዶን ደእያ ዳስያዳን፥ ሾድ ኦሌዳ። ላይꬃ ግዶን ቦንችያ ባላቱነ ሳምባታቱ ሙለ ዶገታናዳን፥ መꬍና ጎዳይ ኦꬄዳ። ባረ ዎልቃማ ሀንቁዋን ካትያነ ቄስያ ካꬌዳ። 7 ጎዳይ ባረዉ ያርሹዋ ያርሽያ ሳኣ እጼዳ፤ ባረ ጌሻ ጎልያካ ባሼዳ። ካትያ ጎለቱዋ ግምቢያ ሞርከቱዋ ኩሽያን አꬂደ እሜዳ። አሳይ ላይꬃ ባላ ቦንቺደ ዋስያዋዳን፥ ሞርከቱ መꬍና ጎዳ ጎልያን ዋሴድኖ። 8 መꬍና ጎዳይ ጽዮን ግምቢያ ኮላናዉ ቃቼዳ፤ እዞ ልክያ ዎዶሩዋ ምጬዳ፤ እዞ ꬋይሰናን ደኢድ፥ ባረ ኩሽያ ዛረና። ሄዋ ድራዉ፥ ግምቢነ ጌሱ እትፐ ኩንዳናዳን ኦꬄዳ። 9 የሩሳላመ ፐንግያ ሳንቃቱ ቢታን ዱገ ሞገቴድኖ፤ ኡንቱንቱ ኩልቦቱዋካ እ መንሬꬂደ ꬋይሴዳ። እ ካቲነ ካፓቱ ኦሞደቲደ፥ ካዉተꬃቱዋ ግዶ ቤድኖ። ህግያ ታማርስያዌካ ባዋ፤ እዝ ትምቢትያ ኦድያዋንቶካ መꬍና ጎዳፐ ሳጻይ ይያዋ አጌዳ። 10 ጽዮን ጭማቱ ጮኡ ጊደ፥ ቢታን ኡት አጌድኖ፤ ባረንቱ ሁጲያን ባና ቆሊደ፥ ማቃካ ማዬድኖ። የሩሳላመ ዎዶሮቱ ሳአዉ ዱገ ሆኬድኖ።

11 ታ አይፊ አፎጽ አፎጺደ ጆሌዳ፤ ታ ዎዛናይካ ካዩዋን ሻቢረቴዳ። አያዉ ጎፐ፥ ታ አሳይ ꬋዬዳ፤ ጉꬃ ናናቱነ ዪኦ ናናቱ ካታማ ኦግያን ላባኒደ ኩንዴድኖ። 12 ኡንቱንቱ ባረንቱ አየቱዋ፥ “ቁማ እማ! ዎይንያ ኤሳ እማ!” ያጊደ ዋሲኖ። ካታማ ኦግያን ደሸቲደ ላባንያ አሳቱዋዳን ኡንቱንቱ ላባንና፥ ኡንቱንቱ አየቱዋ ክዉዋን ኡንቱንቱ ሸምፑ ከሴ።

13 ኔኖ፥ የሩሳላመ፥ ታን ነባ አይ ጋናዉ ዳንዳያይታ? ዎይ ቃይ ነ ቆሁዋ ታን አያና ልካናዉ ዳንዳያይታ? ኔኖ፥ ዶሰቴዳ ጽዮኔ፥ ቃይ ታን ኔና ዎታ ምንꬃናዉ ዳንዳያይታ? ነ ማዱꬃይ አባ ኬሻ ጪማ። ያትና፥ ኔና ኦን ፓꬃናዉ ዳንዳዪ? 14 ነ ትምቢትያ ኦድያዋንቱ ነዉ ዎርዶነ ፓና ሳፃ በኤድኖ፤ ኡንቱንቱ ኔን ኦሞዶ ቤና ማላ፥ ነ ናጋራ ቆንጭሲደ ኦድበይክኖ። ኡንቱንቱ ባለꬅያ ዎርዶ ሳፃ ነዉ በኤድኖ።

15 ነ ማታና አꬍያ ኡባይ ባረ ብራꬍያ ነ ቦላን ዱኬ። ቃይ፥ “ቢታን ሳኣን ኡባፐ አꬋአደ ሎእያ ካታማታ ሀኒ? ኩመንꬃ ቢታዉ ናሸቻ ጌተቴዳ ካታማታ ሀኒ?” ያጊደ ኔና ቅሊጬድኖ፤ ባረንቱ ሁጲያካ ቃꬂኖ። 16 ነ ሞርከቱ ኡባይ ባረንቱ ዶና ነ ቦላ ዶዬድኖ፤ ቅሊጪድነ ይሉዋን ባረንቱ አቻ ጋርጪደ፥ “ኑን እዞ ꬋይሴዶ! ኑን ናጌዳ ጋላሳይካ ሀዋ፤ ሀእ ጋኪደ በኤዳ!” ያጊኖ። 17 መꬍና ጎዳይ ባረ ሀልቼዳዋ ኦꬄዳ፤ በን ዎደ እ አዋዬዳ ባረ ቃላካ ፖሌዳ። የሩሳላምዉ ቃረተናን እዞ ኮሌዳ። እ ሞርከቱዋካ ናሸቼዳ፤ እዞ ኡቁኔዳዋንቱ ዎልቃካ ꬎቁ ꬎቁ ኦꬄዳ።

18 ኔኖ፥ ጽዮኔ፥ ጎዳኮ ነ ድርሳ ግምቢ ዋሶ! ነ አፎꬃይካ ቃማነ ጋላስ ሻፋዳን ጎጎ! ኔን ኔና ሸምፕሶፓ፤ ነ አይፍያዉካ ሸምፑዋ እሞፓ! 19 ደንዳ፤ ቃማ ደንዳደ ዋሳ። ጎዳ ስንꬃን ነ ዎዛና ሃꬃዳን ጉሳ። ኦግያ ዶናን ኡባን ኮሻቲደ፥ ላባኔዳ ነ ናናቱዋ ሸምፖ ነ ኩሽያ አኮ ፑደ ደንꬃደ ዎሳ!

20 አቤት መꬍና ጎዳዉ፥ በአ! ኔን ኦ ቦላ ካሰ ሀዋዳን ኦꬃድንቶ፥ አነ ቆፓ። አየቱ ባረንቱ ክዉዋን እሻልሲደ ድቼዳ ባረንቱ ናናቱዋ ሚኖ ጋይ? ቃይ ቄሳቱ ነ ናበቱ ጎዳ ጌሻ ጎልያ ግዶን ሀይቂኖ ጋይ?

21 ጭማይነ ናናይ ካታማ ግዶ ኦግያ ባናን ግሴዳ፤ ታ ዎዶሮቱነ ታ ዎዳላቱ ማሻን ዉሬድኖ። ኔን ነ ሀንቁዋ ጋላስ ኡንቱንታ ዎꬋዳ፤ ኡንቱንቶ ቃረተናን ኡንቱንታ ሲፋዳ።

22 ግብራ ጋላሳዉ አሳ ጼስያዋዳን፥ ኔን ታና ዳጋንꬅያዋንታ ኡባ ሳፐ ጼሳዳ። መꬍና ጎዳ ሀንቁዋ ጋላሳን ከስ አክ ፓጻ አቴዳዌ እቱነ ባዋ። ታን ታ ክዉዋን እሻልሳደ ድቼዳ ናናቱዋ ኡባ ሞርኪ ዎꬍ ꬋይሴዳ።