1 ኑን ኦሞደቴዳ ኡሱፑንꬃ ላይꬃን፥ ኡሱፑንꬃ አግናን፥ እቼሻንꬃ ጋላሳን፥ ታን ታ ሶን ኡት ደእሽን፥ ይሁዳ ጭማቱካ ታ ስንꬃን ኡት ደእሽን፥ ኡባ ሞድያ መꬍና ጎዳ ዎልቃይ ታና ሞዴዳ። 2 ታን ትሽ ኡዳደ ጼልያ ዎደ፥ አሳ ማላትያዋ በኣድ፤ አዉ ጼሳፐ ጋርሳ ባጋ ማላትያ ሳአይ ታማ ማላቴ፤ ቃይ ጼሳፐ ቦላ ባጋ ማላትያ ሳአይ ጶልያ ናስያ ብራታ ማላቴ። ህዝ. 1:27 3 እ ኩሽያ ማላትያዋ ታኮ የዲደ፥ ታ ሁጲያ ብናና ኦይቄዳ። አያናይ ታና ሳኣፐነ ሳሉዋፐ ግዶ ፑደ ደንꬂደ፥ ጾሳ ሳጻን ታና የሩሳላመ አፌዳ። ሁጲሳ ባጋና ጌሻ ጎልያ ግዶ ዳባባ ገልያ ፐንግያና ገልሲደ፥ ጾሳ ቃናትያ ደንꬅያ ኤቃይ ኤቄዳዋ በሴዳ። 4 ካሰ ታን ካባራ ሻፋ ማታን ሳጻን በኤዳዋዳን፥ እስራኤልያ ጾሳ ቦንቹዋ ሄዋን በኣድ። ህዝ. 1:28

5 ሄዋን እ ታዉ ሀዋዳን ያጌዳ፤ “ኔኖ አሳ ናአዉ፥ ሁጲሳ ባጋ ጼላ” ያጌዳ። ታን ጼልያ ዎደ፥ ጾሳ ቃናትያ ደንꬅያ ኤቃ ምስልያ ስንꬃን ደእያ ያርሽያ ሳ ማታን ደእያዋ በኣድ። 6 ቃይካ እ ታዉ ሀዋዳን ያጌዳ፤ “ኔኖ አሳ ናአዉ፥ ኡንቱንቱ ኦꬅያዋ በአይ? ታና ታ ጌሻ ጎልያፐ ሃሳናዉ እስራኤልያ አሳይ ኦꬅያ ዎልቃማ እጸትያ ኤቃ ጎይኑዋባ በአይ? ሄዋፐካ አꬍያ ኢትያ ኤቃ ጾሳቱዋ ጎይና ኔን ብሮ በአና” ያጌዳ።

7 ሄዋፐ ጉይያን፥ ታና ጌሻ ጎልያ ዳባባ ፐንገ አሄዳ፤ ሄኮ ታን ጼልያ ዎደ፥ ጎዳን ጾኢ ደእያዋ በኣድ። 8 እ ታና፥ “ላ አሳ ናአዉ፥ ጎዳ ቦካ” ያጌዳ፤ ታን ቦክያ ዎደ፥ እት ፐንጊ ሄዋን ደእያዋ በኣድ። 9 ቃይ እ ታና፥ “ገላ፤ ኡንቱንቱ ሀዋን ኦꬅያ ኢታነ ሸነይያ ኤቃ ጾሳቱዋ ጎይኑዋ በአ” ያጌዳ። 10 ታን ግዶ ገላደ ጼልያ ዎደ፥ ጎዳ ቦላን ዩይ አꬊደ ቢታና ጎሸትያ መታቱ ምስሊ፥ ጌሻ ግደና ዶአቱዋ ምስሊ ኡባይነ እስራኤልያ አሳ ኤቃቱዋ ኡባ ምስሊ ኩሜዳዋ በኣድ። 11 ኡንቱንቱፐ ስንꬃ ባጋና እስራኤልያ አሳፐ ላፑን ታሙ ጭማቱ ኤቄድኖ፤ ቃይ ሻፋና ናኣ ያዛኒካ ኡንቱንቱ ግዶን ኤቄዳ። ኡባይካ እጻና ጩዋይያዋ ባረንቱ ኩሽያን ኦይቄድኖ፤ እጻና ጩዋይካ ቱሉ ጌ።

12 ቃይ እ ታና ሀዋዳን ያጌዳ፤ “ላ አሳ ናአዉ፥ ሀዋ እስራኤልያ አሳ ጭማቱ ኡባይካ ꬉማን ባረንቱ ኤቃ ምስልያ ጎልያን ኡንቱንቱ ኦꬅያዋ በአይ? አያዉ ጎፐ፥ ኡንቱንቱ፥ መꬍና ጎዳይ ኑና በኤና፤ መꬍና ጎዳይ ሀ ቢታ አጌዳ ያጊኖ” ያጌዳ። 13 ቃይካ እ ታና፥ “ሄዋፐካ አꬍያ እጸቴዳ ኤቃ ጎይኑዋ ኔን ብሮ በአና” ያጌዳ።

14 ሄዋፐ ጉይያን፥ እ ታና ጌሻ ጎልያ ሁጲሳ ባጋ ፐንግያኮ አፍና፥ ሄዋን ታሙዛ ግያ ባረንቱ ጾሳዉ ኡቲደ ዬክያ ማጫ አሳቱዋ በኣድ። 15 እ ታና፥ “ኔኖ አሳ ናአዉ፥ ሀዋ በአይ? ሄዋፐ አꬍያ እጸቴዳ ኤቃ ጎይና ኔን ብሮ በአና” ያጌዳ።

16 ሄዋፐ ጉይያን፥ እ ታና መꬍና ጎዳ ጎልያ ግዶ ዳባባ አፌዳ፤ ሄዋን ጌሻ ጎልያ ፐንገን ባራንዳፐነ ያርሽያ ሳፐ ግዱዋን ላታማነ እቼሹ አቱማ አሳ ግድያዋ በኣድ። ኡንቱንቱ ባረንቱ ዞክያ መꬍና ጎዳ ጌሻ ጎልያኮ፥ ባረንቱ ሶምኡዋ አዋይ ዶልያ ባጋ ዛሪደ፥ አዋይ ዶልያ ባጋና አዋዉ ጎይኒኖ።

17 እ ታና ሀዋዳን ያጌዳ፤ “ኔኖ አሳ ናአዉ፥ ሀዋ በኣድ? ይሁዳ አሳዉ ሀ እጸቴዳ ኤቃ ጎይኑዋ ሀዋን ኦꬅያዌ ኡባይ ላፋባ ግዴዴ? ኡንቱንቱ ቢታ ማካላ ኦሱዋን ኩንꬂደ፥ ዛር ዛሪደ ታና ሀንቀትሳናዉ በሲ? በአ፥ ኡንቱንቱ ባረንቱ ዳንዳዬዳ ኬናን ታና ኢሲደ ጫሺኖ። 18 ሄዋ ድራዉ፥ ታን ኡንቱንቱና ሀንቁዋን ጋከታና። ታን ኡንቱንቶ ቃረትከነ ኡንቱንቱፐ እቱዋነ አሽከ። ኡንቱንቱ ባረንቱ ኮሻ ꬎቁ ኦꬂደ፥ ታ ሀይꬃን ዋስናካ፥ ታን ኡንቱንቶ ስስከ” ያጌዳ።