1 ሄዋፐ ጉይያን፥ ꬎቃ ኮሻን፥ ታን ስስሽን፥ “ሀዋንቱ፥ ካታማቶ ሙራናዉ ኪተቴዳዋንቱ፥ ኡባይካ ባረንቱ ዎꬍያ ኦላ ሚሻ ባረንቱ ኩሽያን ኩሽያን ኦይቂደ፥ ሃ ዪኖ” ያጌዳ። 2 ሄዋፐ፥ ሁጲሳ ጼልያ ቆሞ ባጋ ፐንግያና ዎꬍያ ኦላ ሚሻ ኦይቂደ፥ ይያ ኡሱፑን አሳቱዋ በኣድ። ኡንቱንቱና እትፐ ሊኑዋፐ ዳደቴዳ ማዩዋ ማዪደ፥ ባረ ምይያን ጻፍያዋ ኮሮጁዋን ኦይቄዳ እት ብታኒ ደኤ። ኡንቱንቱ ግዶ ገሊደ፥ ናሃስያፐ ኦሰቴዳ ያርሽያ ሳ ማታን ኤቄድኖ።

3 እስራኤልያ ጾሳ ቦንቹ ካሰ ባረ ደእያ ክሩበቱዋፐ ደንዲደ፥ ጌሻ ጎልያ ፐንግያ ጉባንያኮ ቢደ ኤቄዳ። ሄዋን መꬍና ጎዳይ ላይኑዋ ማዪደ፥ ባረ ምይያን ጻፍያዋ ኮሩጁዋን ኦይቄዳ ብታንያ ጼሴዳ። 4 አ ሀዋዳን ያጌዳ፤ “የሩሳላመ ካታማ ግዱዋ ባደ፥ ያን ኦሰትያ እጸቴዳ ኤቃ ጎይኑዋ ድራዉ፥ ኦሊድነ ካዮቲደ ደእያ አሳ ሶምኡዋን ማላ ዎꬃ” ያጌዳ። ሳፃ 7:3፤ 9:4፤ 14:1

5 ታን ስስሽን፥ እ ሀራቱዋካ ሀዋዳን ያጌዳ፤ “አ ጌዶ ካሊደ፥ ካታማ ግዱዋ አꬊደ ዎꬍተ! እቱዋነ አሾፕተ፤ ኦስነ ቃረቶፕተ። 6 ጭማቱዋ፥ ዎዳላቱዋነ ዎዶሮቱዋ፥ ማጫ አሳቱዋነ ናናቱዋ ኡባካ ሹክተ፤ ሽን ሶምኡዋን ማላይ ደእያ አሳ ኦናነ ቦቾፕተ። ዎꬉዋ ታ ጌሻ ጎልያን ዶምተ” ያጌዳ። ኡንቱንታ ዎꬉዋ ጌሻ ጎልያ ስንꬃን ኤቄዳ ጭማቱዋን ዶሜድኖ። 7 ሄዋፐ ጉይያን፥ እ ኡንቱንታ ሀዋዳን ያጌዳ፤ “ጌሻ ጎልያ ቱንስተ፤ ዳባባቱዋካ አሃን ኩንꬅተ፤ ከስተ” ያጌዳ። ኡንቱንቱ ከሲደ፥ ካታማ ግዶን ኡባን ዎꬉዋ ዶሜድኖ።

8 ኡንቱንቱ ዎꬍ ደእሽን፥ ታን ታረካ አታደ፥ ታ ሶምኡዋ ቢታ ጋꬃ ጉፋናደ፥ ታ ቃላ ꬎቁ ኦꬃደ፥ “አቤት ኡባ ሞድያ መꬍና ጎዳዉ፥ ሀ ኔን የሩሳላመ ቦላን ጉስያ ነ ሀንቁዋን፥ እስራኤልያፐ አቴዳ ሙልያካ ዉርሳየ?” ያጋድ።

9 እ ዛሪደ፥ ታዉ ሀዋዳን ያጌዳ፤ “እስራኤልያነ ይሁዳ ናጋራይ ሎይꬅ ዳሬዳ፤ ቢታ ኡባይ ሱꬃን ኩሜዳ፤ ቃይ ካታማ ኡባን ሱረ ፕርዳይ ባዋ። አያዉ ጎፐ፥ ‘አሳይ፥ መꬍና ጎዳይ ሀ ቢታ አጌዳ፤ መꬍና ጎዳይ በኤና’ ያጊኖ። 10 ሄዋ ድራዉ፥ ታን ኡንቱንቶ ቃረትከነ ኡንቱንቱፐ እቱዋነ አሽከ። ታን ኡንቱንቶ ኡንቱንቱ ኦግያዳ ኦꬃና” ያጌዳ።

11 ሄዋፐ ጉይያን፥ ላይኑዋ ማዪደ፥ ባረ ምይያን ጻፍያዋ ኮሮጁዋን ኦይቄዳ ብታኒ ጉየ ስሚደ፥ “ኔን ታና አዛዜዳዋዳን ኦꬃድ” ያጌዳ።