1 ታን ጼልያ ዎደ ሳምፔርያ ግያ እንቁዋፐ ኦሰቴዳ ካዉተꬃ አራታ ማላትያ ክሩበቱዋ ሁጲያፐ ቦላ ባጋና ደእያ ምጨቴዳ ሳሉዋ ጉፋንꬁዋ ማላትያዋን ደእያዋ በኣድ። ህዝ. 1:26፤ ሳፃ 4:2 2 ሊኑዋ ማዬዳ ብታንያ መꬍና ጎዳይ ሀዋዳን ያጌዳ፤ “ክሩበቱዋፐ ጋርሳ ባጋና ይንግርያዋን ግዱዋና አꬋ ባ፤ ሄዋፐ ጺጹንꬃ ቦንቁዋ ነ ኩሽያን ኮጰታ አካደ፥ ካታማ ቦላ ላላ” ያጌዳ። ሳፃ 8:5

ታን ጼልሽን፥ ታማ አካናዉ ገሌዳ። 3 ብታኒ ገልያ ዎደ፥ ክሩበቱ ጌሻ ጎልያፐ ገድሳ ባጋና ኤቄድኖ፤ ግዶ ዳባባካ ሻሪ ኩሜዳ። 4 መꬍና ጎዳ ቦንቹ ክሩበቱዋ ቦላፐ ደንዲደ፥ ጌሻ ጎልያ ፐንግያ ጉባንያኮ ቢደ ኤቄዳ። ሻሪ ጌሻ ጎልያ ኩሜዳ፤ ዳባባይካ መꬍና ጎዳ ቦንቹዋ ጶለꬃን ኩሜዳ። 5 ክሩበቱዋ ቀፍያ ጊረꬃይ ኡባ ሞድያ ጾሳይ ሃሳዮደ ስሰትያ ኮሻዳን፥ ካረ ዳባባን ስሰቴ።

6 ሊኑዋ ማዬዳ ብታንያ መꬍና ጎዳይ፥ “ክሩበቱዋ ጋርሳ ባጋ ይንግርያዋ ግዶፐ ታማ አካ” ያጊደ አዛዝና፥ እ ገሊደ እት ይንግረትያዋ ምይያን ኤቄዳ። 7 ክሩበቱዋፐ እቱ ባረንቱ ግዶን ደእያ ታማኮ ባረ ኩሽያ የዲደ፥ አፐ ጉꬃ አኪደ፥ ላይኑዋ ማዬዳ ብታንያ ኩሽያን ዎꬅና፥ እካ አኪደ ከሴዳ። 8 ክሩበቱዋ ቀፍያፐ ጋርሳ ባጋና አሳ ኩሽያ ማላትያዌ ደኤ።

9 ታን ጼልያ ዎደ፥ ክሩበቱዋ ምየ ባጋ ኦይዱ ይንግሮቱ ደኢኖ፤ እት ክሩብያ ምይያን እት እት ይንግሪ ደእያዋ በኣድ፤ ሄ ይንግረꬃቱ እንቁዋዳን ጶሊኖ። 10 ኡንቱንቱ ኦይዱካ እቱ እቱዋ ማላቲኖ፤ እት እርዙ ላኡ እርዙዋ ግዲደ መቴዳ፤ እቱ እቱዋ ግዱዋና ካንꬅ ኡቴዳ። ህዝ. 1:15-21 11 ክሩበቱ ብያ ዎደ፥ ኦይዱ ባጋዉካ ያነ ሃነ ስመናን ቢኖ፤ እት ይንግረꬃይ ቤዳ ጌዱዋ የንኮ ይንግረትያዋንቱ ያነ ሃነ ስመናን ኦይዱዋፐ እቱዋ ሁጲ ስሞ ሳኣ ስት ጊደ ቢኖ። 12 ኡንቱንቱ ኩመንꬃ ቦላን፥ ሄዌነ ኡንቱንቱ ዞኩዋን፥ ኡንቱንቱ ኩሽያን፥ ኡንቱንቱ ቀፍያንነ ኡንቱንቱ ኦይዱ ይንግረትያዋንቱን አይፊ ኩሜዳ። ሳፃ 4:8 13 ታን ስስሽን፥ ይንግረትያዋንቱ ኤሌልያ ይንግረትያዋንታ ጌተት ጼሰቴድኖ። 14 እት እት ክሩብያዉ ኦይዱ ሶምኢ ደኤ። እት ሶምኢ ክሩብያ ሶምኡዋ፥ ላኤንꬁ አሳ ሶምኡዋ፥ ሄዘንꬁ ጋሙዋ ሶምኡዋነ፥ ኦይደንꬁ አርጋንꬃ ሶምኡዋ። ህዝ. 1:10፤ ሳፃ 4:7

15 ሄዋፐ ጉይያን፥ ክሩበቱ ፑደ ደንዴድኖ። ሀዋንቱ ታን ካባራ ሻፋ ማታን በኤዳ ፓጻ ደእያ መታቱዋ። 16 ቃይ ክሩበቱ ብያ ዎደ፥ ኡንቱንቱ ምየ ባጋን ደእያ እርዞቱካ ቡሉሊኖ፤ ቃይ ክሩበቱ ቢታፐ ፑደ ደንዳናዉ ባረንቱ ቀፍያ ምጭያ ዎደካ ይንግረትያዋንቱ ኡንቱንቱ ምይያፐ ሻከትክኖ። 17 ኡንቱንቱ ኤቂያ ዎደ፥ ይንግረꬃቱካ ኤቂኖ፤ ቃይ ኡንቱንቱ ቢታፐ ፑደ ደንድያ ዎደ፥ ኡንቱንቱካ ደንዲኖ። ሄዌካ ፓጻ ደእያ መታቱ አያናቱ ኡንቱንቱን ደእያ ድራሳ።

18 ሄዋፐ ጉይያን፥ መꬍና ጎዳ ቦንቹ ጌሻ ጎልያ ፐንግያፐ ደንዲደ፥ ክሩበቱዋፐ ቦላ ባጋን ኤቄዳ። 19 ታን ጼልሽን፥ ክሩበቱ ባረንቱ ቀፍያ ምጪደ፥ ይንግረትያዋናካ እትፐ ቢታፐ ፑደ ደንዴድኖ። ኡንቱንቱ መꬍና ጎዳ ጎልያ አዋይ ዶልያ ባጋን ደእያ ድርሳ ፐንግያና ኤቄድኖ፤ እስራኤልያ ጾሳ ቦንቹካ ኡንቱንቱፐ ቦላ ባጋና ደኤ።

20 ሀዋንቱ ካባራ ሻፋን ታን እስራኤልያ ጾሳፐ ጋርሳ ባጋና በኤዳ ፓጻ መታቱዋ፤ ቃይ ኡንቱንቱ ክሩበቱዋ ግድያዋ ታን ኤራድ። 21 ኡንቱንቶ ኡባዉካ ኦይዱ ኦይዱ ሶምኦቱነ፥ ኦይዱ ኦይዱ ቀፈቱ ደኢኖ፤ ኡንቱንቱ ቀፈቱዋፐ ጋርሳ ባጋና አሳ ኩሸቱዋ ማላትያዌ ደኤ። 22 ኡንቱንቱ ሶምኦቱ ካባራ ሻፋ ማታን ታን በኤዳ ሶምኦቱዋ ማላቲኖ። ኡንቱንቱ ኡባይካ ስት ጊደ፥ ስንꬃዉ ቢኖ።