1 ሄዋፐ ጉይያን፥ አያናይ ታና ደንꬂደ፥ አዋይ ዶልያ ባጋ ጼልያ መꬍና ጎዳ ጎልያ ድርሳ ፐንገ አፌዳ። ሄዋን ሄ ፐንግያ ገልያሳን ላታማነ እቼሹ አቱማ አሳይ ደኤ፤ ኡንቱንቱ ግዶን አሳ ካለꬅያ አዙራ ናኣ አዛንያነ ባናያ ናኣ ፓላጽያ በኣድ። 2 መꬍና ጎዳይ ታና ሀዋዳን ያጌዳ፤ “ላ አሳ ናአዉ፥ ሀ አቱማ አሳቱ ሀ ካታማን ኢታ ሀልቹዋ ሀልችያዋንታነ ኢታ ዞርያ ዞርያዋንታ። 3 ኡንቱንቱ ሀዋዳን ያጊኖ፤ ‘ኑን ጎልያ ዛረꬅ ኬጻና ዎዲ ሀአ ግደና። ሀ ካታማይ አሹዋ ጻሩዋ፤ ቃይ ኑን አሾ’ ያጊኖ። 4 ሄዋ ድራዉ፥ አሳ ናአዉ፥ ትምቢትያ ኦዳ! ኡንቱንቱ ቦላ ትምቢትያ ኦዳ!” ያጌዳ።

5 ሄዋፐ ጉይያን፥ መꬍና ጎዳ አያናይ ታ ቦላ ዎꬊደ፥ ታና ሀዋዳን ያጌዳ፤ “ኡንቱንታ ያጋ፤ መꬍና ጎዳይ ሀዋዳን ያጌ፤ ‘እስራኤልያ አሳዉ፥ ህንተ ሄዋዳን ጊታ፤ ታን ህንተ አያ ቆፕንቶ ኤራይ። 6 ሀ ካታማን ህንተ ዳሮ አሳ ዎꬊደ፥ ኦግያ ኡባን አሃ ኩንꬄድታ ያጌ።

7 “ ‘ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ “ህንተ ዎꬊደ ሄዋን ኦሌዳ አሃይ አሹዋ፤ ቃይ ሀ ካታማይካ አሹዋ ዶይስያ ጻሩዋ፤ ሽን ታን ህንተና ሀ ካታማፐ የደርሳደ ከሳና። 8 ህንተ ኦላዉ ያዬድታ፤ ታን ሄ ህንተ ያዬዳ ኦላ ህንተ ቦላ አሀና። ኡባ ሞድያ መꬍና ጎዳይ ሀዋ ኦዳይ። 9 ታን ህንተና ሀ ካታማፐ ከሳደ፥ አላጋቱዋ ኩሽያን አꬃ እማና፤ ታን ህንተ ቦላ ፕርዳና። 10 ህንተ ኦላን ዉራና፤ ታን ህንተና ህንተ ቢታን ፕርዳና። መꬍና ጎዳ ግድያዋ ህንተ ሄዋን ኤራና። 11 ሀ ካታማይ ህንተዉ አሹዋ ጻሩዋ ግደና፤ ህንተካ አ ግዶን አሹዋ ግድክታ። ህንተ ቦላ እስራኤልያ ቢታን ፕርዳና። 12 መꬍና ጎዳ ግድያዋ ህንተ ሄዋን ኤራና። አያዉ ጎፐ፥ ህንተ ታ አዛዙዋ ካለናን እጼድታ፤ ታ ዎጋካ ናገናን እጺደ፥ ህንተ ዩሹዋን ደእያ ካዉተꬃቱዋ ዎጋዳን ደኤድታ” ያጌ’ ያጋ” ያጌዳ።

13 ታን ትምቢትያ ኦድሽን፥ ባናያ ናኣ ፓላጼ ሀይቄዳ፤ ታን ዱገ ጉፋናደ፥ ታ ቃላ ꬎቁ ኦꬃደ፥ ሀዋዳን ያጋደ ዋሳድ፤ “አቤት ኡባ ሞድያ መꬍና ጎዳዉ፥ እስራኤልያፐ አቴዳዋንታ ኡባና ዉርሳና ሀናይዬ?” ያጋድ።

14 ሄዋፐ ጉይያን መꬍና ጎዳ ቃላይ ታኮ ሀዋዳን ያጊደ ዬዳ፤ 15 “ላ አሳ ናአዉ፥ የሩሳላመን ደእያ እስራኤልያ አሳይ ነ እሻቱዋባነ ነ ዳቦቱዋባ፥ ኦሞዱዋን ደእያ እስራኤላቱዋባ ‘ኡንቱንቱ መꬍና ጎዳፐ ሃኬድኖ፤ ሀ ቢታይካ ኑዉ ላታ ግዲደ እመቴዳ’ ያጊደ ሃሳዪኖ።

16 “ሄዋ ድራዉ፥ ኔን ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ “ኡንቱንታ ሃኮ ካዉተꬃቱዋ ግዶ የዶፐካ፥ ቃይ ቢታቱዋን ላሎፐካ፥ ቤዳ ቢታቱዋን ጉꬃ ዎድያዉ ታን ኡንቱንቱና ግዳና” ያጌ’ ያጋ።

17 “ሄዋ ድራዉ፥ ኔን ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ “ታን ህንተና ካዉተꬃቱዋፐነ ህንተ ላለቴዳ ቢታቱዋፐ ሺሻና፤ ቃይ እስራኤልያ ቢታ ታን ዛራደ ህንተዉ እማና” ያጌ’ ያጋ።

18 “ኡንቱንቱ ጉየ ስሚደ ዪደ፥ ሸነይያ ምስልያነ ቱና ኤቃ ቢታፐ ꬋይሳና። 19 ታንካ ኡንቱንቶ እት ዎዛና እማና፤ ቃይ ኦራꬃ አያናካ ኡንቱንቱ ግዶን ዎꬃና። ኡንቱንቱፐ ሹቻ ዎዛና ድጋደ፥ አሹዋ ዎዛና ኡንቱንቶ እማና። ህዝ. 36:26-28 20 ሄ ዎድያን ኡንቱንቱ ታ ህግያ ካላና፤ ታ አዛዙዋካ ናጋና። ኡንቱንቱ ታ አሳ ግዳና፤ ታንካ ኡንቱንቱ ጾሳ ግዳና። 21 ሽን ሄ ሸነይያ ምስልያዉነ ቱና ኤቃዉ ጎይናናዉ ዶሴዳዋንታ ግዶፐ፥ ታን ኡንቱንቱ ኦሱዋዳን ኡንቱንቶ ኦꬃና። ታን ኡባ ሞድያ መꬍና ጎዳይ ሀዋ ኦዳይ” ያጊደ ዬዳ።

22 ሄዋፐ ጉይያን፥ ኡንቱንቱ ምይያን ይንግረትያዋንቱ ደእያ ክሩበቱ፥ ባረንቱ ቀፍያ ምጬድኖ፤ እስራኤልያ ጾሳ ቦንቹካ ኡንቱንቱፐ ቦላና ደኤ። ህዝ. 43:2-5 23 መꬍና ጎዳ ቦንቹ ካታማ ግዶፐ ደንዲደ፥ አዋይ ዶልያ ባጋ ደርያ ቦላ ኤቄዳ። 24 ጾሳ አያናይ ታዉ እሜዳ ሳጻን አያናይ ታና ቢታፐ ፑደ ደንꬂደ፥ ባብሎነን ኦሞደቴዳዋንቱኮ አፌዳ። ሄዋፐ ጉይያን፥ ሳጻይ ታፐ ሻከቴዳ። 25 ታንካ መꬍና ጎዳይ ታና በሴዳዋ ኡባ ኦሞዱዋን ደእያዋንቶ ኦዳድ።