1 መꬍና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ እስራኤልያን ሀእ ትምቢትያ ኦድያዋንቱ ቦላ ትምቢትያ ኦዳ። ባረንቱ ቆፋፐ ደንዲደ፥ ትምቢትያ ኦድያዋንታ ሀዋዳን ያጋ፤ ‘መꬍና ጎዳ ቃላ ስስተ! 3 ኡባ ሞድያ መꬍና ጎዳይ ሀዋዳን ያጌ፤ አያነ በኤናን ጮ ባረንቶ ደንድያ ቦዛ ትምቢትያ ኦድያዋንቶ አየ አና! 4 እስራኤልያ አሳዉ፥ ህንተ ትምቢትያ ኦድያዋንቱ ኮለቴዳ ካታማ ግዶን ደእያ ዎራካናቱዋ ማላ። 5 መꬍና ጎዳ ጋላስ ድርሳይ ኦላን ምን ኤቃናዳን፥ እስራኤልያ አሳይ ድርሳ ግምቢያ ዛር ግምቢ ምንሳናዉ፥ ግምቢ ኮለቴዳሳ ፑደ ብበይክኖ። 6 ኡንቱንቱ ሳጻይ ዎርዱዋ፥ ቃይ ኡንቱንቱ ሙሩኑካ ዎርዱዋ። ኡንቱንቱ መꬍና ጎዳይ ኪተናን፥ መꬍና ጎዳይ ሀዋዳን ያጌ ያጊኖ። ያቲደ ኡንቱንቱ ኦዴዳዋ ጾሳይ ፖላና ያጊደ ናጊኖ። 7 ታን ኦደናን ደእሺና፥ መꬍና ጎዳይ ሀዋዳን ያጌ ያጊደ ኦድያ ህንተ ዎርዱዋ ሳጻነ ዎርዱዋ ሙሩኑዋ በእበይክቴ?’ ” ያጌ።

8 ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ “ህንተ ዎርዶባ ሃሳዬዳ ድራዉነ ህንተ በኤዳ ሳጻይ ዎርዶ ግዶ ድራዉ፥ ኡባ ሞድያ መꬍና ጎዳይ ህንተዉ ሞርከ። 9 ታ ኩሺ፥ ዎርዶ ሳፃ በኢደ፥ ዎርዱዋ ሙሩንያዋንቱ ቦላ ፕርዳናዉ ደንዴዳ። ኡንቱንቱ ታ አሳ ዞርያ ግዶን ቆፋ ቃቻናዉ ገልክኖ፥ ዎይ እስራኤልያ አሳይ ጻፈቴዳ ማዝጎብያን ጻፈትክኖ፥ ዎይ ኡንቱንቱ እስራኤልያ ቢታካ ገልክኖ። ሄ ዎደ ታን ኡባ ሞድያ መꬍና ጎዳ ግድያዋ ህንተ ሄዋን ኤራና።

10 “ሳሩ ባይናን ደእሺና፥ ኡንቱንቱ ታ አሳ፥ ‘ሳአይ ሳራ!’ ያጊደ ዎራ ካለꬄድኖ። ቃይ አሳይ ሹቻ ጮ ኬሊደ ድርና፥ ኡንቱንቱ ቦሹንቻ ኦኪኖ። ኤር. 6:14፤ 8:11 11 ሄዋ ድራዉ፥ ሄ ቦሹንቻ ኦክያዋንታ፥ ‘ሄ ህንተ ኦኬዳ ግምቢ ኩንዳና! ዎልቃማ እራይ ቡካና፤ ቃይ ታን ጾሳይ ኦርዶ ሻቻ ዱገ የጋና፤ ኢታ ጎቲካ ደንዳና’ ያጊደ ኦድተ። 12 ሄ ግምቢ ኩንዴዳ ዎደ፥ አሳይ ህንተና፥ ህንተ አ ኦኬዳ ቦሹንቻይ አነ?” ጊደ ኦቼናን አጋኔ? ያጌ።

13 ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ “ታን ታ ሀንቁዋን ኢታ ጎትያ የዳና፤ ቃይ ግምቢያ ድርሳ ኮላናዉ ታ ይሉዋን ኦርዶ ሻቻነ ዎልቃማ እራ ሱልያ ሀንቁዋና ኪታና። 14 ህንተ ቦሹንቻ ኦኬዳ ግምቢያ ታን መንሬꬃና፥ ቢታን ላላናነ ባሱዋ መላ አሻና። እ ኩንድያ ዎደ ህንተ አ ግዶን ሀይቃና። ሄ ዎደ ታን መꬍና ጎዳ ግድያዋ ህንተ ሄዋን ኤራና። 15 ሄዋዳን ሀኒደ፥ ታ ሀንቁ ግምቢያ ቦላነ ግምቢያ ቦሹንቻ ኦኬዳ አሳቱዋ ቦላ ዎꬋና። ታን ህንተና፥ ‘ሀእ ግምቢ ባዋ፤ ግምቢያ ቦሹንቻ ኦኬዳዋንቱካ ደእክኖ። 16 እስራኤልያን ደእያ፥ የሩሳላመባ ትምቢትያ ኦዴዳዋንቱ፥ ሳሩ ባይናን አዉ ሳሩዋ ሳፃ በኤዳዋንቱ፥ ኡንቱንቱ ደእክኖ’ ያጋይ። ታን ኡባ ሞድያ መꬍና ጎዳይ ሀዋ ኦዳይ” ያጌ ያጋ።

17 “ላ አሳ ናአዉ፥ ባረንቱ ቆፋፐ ደንዲደ፥ ትምቢትያ ኦድያ ነ አሳ ማጫ አሳቱዋኮ ሀእ ነ ሶምኡዋ ደረቃን ዛራ፤ ኡንቱንቱ ቦላ ትምቢትያ ኦዳ። 18 ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ “ሀራ አሳ ቦላን አሳዉ ዎልቃይ ደአናዳን፥ ኡንቱንቱ ኩሽያን ኡባን ሙሩኑዋባ ስኪደ ዎꬅያነ አሳ ኡባዉ ሁጵያ ሻሽያ ጊግስያ ማጫ አሳቶ፥ ህንተዉ አየ አና! ህንተ ታ አሳ ሸምፑዋ ጲሪደ ህንተ ህንተ ሸምፑዋ አሻንቴ?። 19 እት ኮጵያ ባንጋ ዎይ እት ባሶ ኡክꬃ ደማናዉ፥ ዬላይያዋ ኦꬂደ፥ ታ አሳ ስንꬃን ታና ካዉሽሲታ። ሄዋ ግያዌ ህንተ ሀይቃናዉ በሰናዋንታ ዎꬊደ፥ አታናዉ በሰናዋንታ አሺታ ግያዋ። ያቲደ ታ አሳዉ ዎርዱዋ ኦዲታ፤ ኡንቱንቱካ ህንተ ዎርዱዋ ስሲኖ” ያጌ።

20 “ ‘ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ “ህንተ ሀራ አሳ ቦላን አሳዉ ዎልቃይ ደአናዳን፥ ህንተ ኩሽያን ዎꬄዳ ሙሩኑዋ ታን ደንꬃና። ታን አ ህንተ ኩሽያፐ ዱꬃ ኦላና፤ ጲርያፐ ከስ አክያ ካፉዋዳን፥ ታን ኡንቱንታ ህንተ ዎልቃፐ አሻ አካና። 21 ታን ህንተ ቢታ ሻሽያካ ዳፋ አካደ፥ ታ አሳ መꬍናዉ ህንተ ኩሽያፐ ዎꬃ አካና። ሄ ዎደ ታን መꬍና ጎዳ ግድያዋ ህንተ ሄዋን ኤራና። 22 ታን ካዮያቤና ጽሎ አሳ ዎዛና ህንተ ዎርዱዋን ካዮዪታ፤ ናጋራንቻቱካ ባረንቱ ኢታ ኦሱዋፐ ስሚደ፥ ባረንቱ ሸምፑዋ አሸናዳን፥ ህንተ ኡንቱንታ ምንꬄድታ። 23 ሄዋ ድራዉ፥ ላኤንꬆ ዎርዶ ሳፃ በእክታ፤ ሙሩኑዋባካ ኦꬅክታ። ታን ታ አሳ ህንተ ኩሽያፐ ዎꬃ አካና። ሄ ዎደ ታን መꬍና ጎዳ ግድያዋ ህንተ ሄዋን ኤራና” ያጌ’ ያጋ” ያጊደ ዬዳ።