1 እስራኤልያ ጭማቱዋፐ አማሬዳዋንቱ ታኮ ዪደ፥ ታ ስንꬃን ኡቴድኖ። 2 ያትና መꬍና ጎዳ ቃላይ ታኮ ሀዋዳን ያጊደ ዬዳ፤ 3 “ላ አሳ ናአዉ፥ ሀ አሳቱ ባረንቱ ዎዛናን ኤቃ ኤሴድኖ፤ ቃይ ኡንቱንቱ ናጋራይ ኡንቱንቶ ꬉቢያ ሹቻ ማላ ግዴዳ። ያትና፥ ታን ኡንቱንቱ ታና ኦቻናዳን ኦꬆየ? 4 ሄዋ ድራዉ፥ ኔን ኡንቱንቶ ሀዋዳን ያጋደ ኦዳ፤ ‘ኡባ ሞድያ መꬍና ጎዳይ ሀዋዳን ያጌ፤ “እስራኤልያ አሳፐ ኦንነ ኤቃ ባረ ዎዛናን ዎꬆፐ፥ አ ናጋራይ አዉ ꬉቢያ ሹቻ ማላ ግዶፐ፥ ቃይ ትምቢትያ ኦድያዋኮ እ ቦፐ፥ ታን መꬍና ጎዳይ ታ ሁጲያን አ ኤቃቱዋ ጮራተꬃዳን አዉ ዛራና። 5 ሄ ኤቃቱ ኡባቱ እስራኤልያ አሳ ታፐ ዎራ ዛሬድኖ፤ ሽን ሀእ ታን ኡንቱንቶ እምያ ዛሩዋን ኡንቱንቱ ዎዛና ታኮ ዛራና” ያጌ’ ያጋ።

6 “ሄዋ ድራዉ፥ እስራኤልያ አሳዉ ሀዋዳን ያጋደ ኦዳ፤ ‘ኡባ ሞድያ መꬍና ጎዳይ ሀዋዳን ያጌ፤ “ናጋራ ፓጽተ! ህንተ ኤቃፐ ስምተ! ህንተ ቱና ኦሱዋ ኡባፐካ ስምተ!

7 “ ‘ “እስራኤልያ አሳ ግድና፥ ዎይ እስራኤልያ ቢታን ደእያ አላጋ አሳ ግድናካ፥ ታፐ ሻከቲደ፥ ባረ ዎዛናን ኤቃ ዎꬆፐ፥ አ ናጋራይ አዉ ꬉቢያ ሹቻ ማላ ግዶፐ፥ ቃይ እ ታ ዞርያ ኦቻናዉ ትምቢትያ ኦድያዋኮ ቦፐ፥ ታን መꬍና ጎዳይ ታ ሁጲያን አዉ ዛሩዋ እማና። 8 ታን ሄ ኡራና ኤቀታና፤ ታን አ ሌምሶነ ማላታ ኦꬃና፤ ታን አ ታ አሳ ግዶፐ ꬋይሳና። ሄ ዎደ ታን መꬍና ጎዳ ግድያዋ ህንተ ሄዋን ኤራና።

9 “ ‘ “ትምቢትያ ኦድያዌ ጭመቲደ፥ ትምቢትያ ኦዶፐ፥ ሄ ትምቢትያ ኦድያዋ ጭሜዳዌ ታና መꬍና ጎዳ። ታን አ ቦላ ታ ኩሽያ የዳደ፥ ታ አሳ ግዶፐ አ ꬋይሳና። 10 ኡንቱንቱ ላኡካ ባረንቱ ናጋራ ናጋራ ሙሩዋ ቶካና፤ ትምቢትያ ኦድያዋ ሙሩነ ትምቢትያ ኦችያዋ ሙሩካ እት ማላ ግዳናዋ። 11 ሄዋ ድራዉ፥ እስራኤልያ አሳቱ ታፐ ዎራ ቢክኖ፤ ባረንቱ ናጋራን ኡባን ባረንታ ቱንስክኖ። ኡንቱንቱ ታ አሳ ግዳና፤ ታንካ ኡንቱንቱ ጾሳ ግዳና። ሄ ዎደ ታን ኡባ ሞድያ መꬍና ጎዳይ ሀዋ ኦዳይ” ያጌ’ ያጋ” ያጊደ ዬዳ።

12 መꬍና ጎዳ ቃላይ ታኮ ሀዋዳን ያጊደ ዬዳ፤ 13 “ላ አሳ ናአዉ፥ እት ቢታ አሳይ ናጋራ ኦꬂደ፥ ታዉ አማነተናን እጾፐ፥ ታን ታ ኩሽያ የዳደ፥ ኡንቱንቶ ቁማ ꬋይሳደ፥ ኮሻ አሀና፤ ሄ ቢታ አሳነ መህያ ዎꬋና። 14 ሀራይ አቶ ሀ ሄዙ አሳቱ፥ ኖሄ፥ ዳኔልነ ኢዮብ ሄ ቢታን ደእንቶካ፥ ኡንቱንቱ ባረንቱ ጽሎተꬃን ባረንቱ ሸምፑዋ ጻላላ አሻና። ታን ኡባ ሞድያ መꬍና ጎዳይ ሀዋ ኦዳይ።

15 “ዎይ ታን ኡንቱንቱ ቢታ ቦላን ባዙዋ ዶአቱዋ የድና፥ ሄ ዶአቱ አን ደእያ አሳ ꬋይስና፥ ሄ ዶአቱዋ ጋሱዋን ኦንነ ግዱዋና አናዳን፥ ሄ ቢታይ ኦና ግዶፐ፥ 16 ታን ኡባ ሞድያ ጾሳይ ታ ደኡዋን ጫቃይ: ሀራይ አቶ፥ ሀ ሄዙ አሳቱ ሄ ቢታን ደእንቶካ፥ ኡንቱንቱ ባረንቱ አቱማነ ባረንቱ ማጫ ናናቱዋ አሻናዉ ዳንዳይክኖ። ኡንቱንቱ ጻላላይ አታናዋ፤ ሽን ቢታይ ኦና ግዳናዋ። ታን ኡባ ሞድያ መꬍና ጎዳይ ሀዋ ኦዳይ።

17 “ዎይ ታን ሄ ቢታ ቦላን ማሻ አሃደ፥ ሀ ቢታና ማሻይ አꬎ ጋደ፥ አን አሳነ መህያ ዎꬎፐ፥ 18 ታን ኡባ ሞድያ መꬍና ጎዳይ ታ ደኡዋን ጫቃይ: ሀ ሄዙ አሳቱ ሄ ቢታን ደእንቶካ፥ ባረንቱ አቱማነ ባረንቱ ማጫ ናናቱዋ አሻናዉ ዳንዳይክኖ። ኡንቱንቱ ጻላላይ አታናዋ። ታን ጾሳይ ሀዋ ኦዳይ።

19 “ዎይ ታን ሄ ቢታ ቦላን ኢታ ሀርግያ የዳደ፥ ታ ሀንቁዋን አሳይ ሱꬃ ጉሳና ማላ ኦꬆፐ፥ አን ደእያ አሳነ መህያ ዎꬎፐ፥ 20 ታን ኡባ ሞድያ መꬍና ጎዳይ ታ ደኡዋን ጫቃይ: ሀራይ አቶ፥ ኖሄ፥ ዳኔልነ ኢዮብ ሄ ቢታን ደእንቶካ፥ ኡንቱንቱ ባረንቱ ጽሎተꬃን ባረንቱ ሸምፑዋ ጻላላ አሻናፐ አትና፥ ባረንቱ አቱማነ ባረንቱ ማጫ ናናቱዋካ አሽክኖ። ታን ኡባ ሞድያ ጾሳይ ሀዋ ኦዳይ” ያጊደ ዬዳ።

21 ኡባ ሞድያ መꬍና ጎዳይ ሀዋዳን ያጌ፤ “ታን አሳነ መህያ ዎꬋናዉ የሩሳላመ ቦላ ታ ኦይዱ ኢታ ሙሮቱዋ፥ ማሻ፥ ኮሻ፥ ባዞ ዶኣነ ኢታ ሀርግያ የድያ ዎደ፥ እ አይ ኬሻ አꬎ ኢታባ ግዳንዴሻ!ሳፃ 6:8 22 ግዶ ሽን አቲደ ከሴዳ አማሬዳ አሳቱ ደአና፤ አቱማነ ማጫ ናናቱዋካ ያፐ ከሳና። ኡንቱንቱ ህንተኮ ይያ ዎደ፥ ኡንቱንቱ ሀኖታነ ኡንቱንቱ ኦሱዋ ህንተ በኢደ፥ ታን የሩሳላመ ቦላ አሄዳ ባሻይ ኡባይ በስያዋ ግድያዋ አኬካና። 23 ህንተ ኡንቱንቱ ሀኖታነ ኡንቱንቱ ኦሱዋ በኢደ፥ ታን ኡንቱንቱ ቦላ ጮ ፕርዳቤናዋ ኤራና። ታን ኡባ ሞድያ መꬍና ጎዳ ሀዋ ኦዳይ” ያጌ።