1 መꬍና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ የሩሳላሞ እ ቱና ኦሶቱዋ ኤርሳ። 3 ሀዋዳን ያጋ፤ ‘ኡባ ሞድያ መꬍና ጎዳይ የሩሳላሞ ሀዋዳን ያጌ፤ “ነ ማይዛይነ ነ ሼሻይ ካናነ ቢታና፤ ነ አዉ አሞረ ቢታ አሳ፤ ነ አታካ ሂተ ቢታ አሳ። 4 ነ የለታይ ጋላስ ነ ጉልአይ ቃንጸትቤና፤ ዎይ ኔና ጌሻናዉ ሃꬃን ሜጨታባካ፤ ዎይ ማጽንያን ጎርፐታደ ጫርቂያን ጻጸታባካ። 5 ሀ ጌተቴዳዋንቱፐ እቱዋነ ኦꬃናዉ ነዉ ካዮቴዳዌ ባዋ። ኔን የለቴዳ ጋላስ ካቴዳ ድራዉ፥ ደምባን ኦለታዳፐ አትና፥ ነዉ ኦንነ ቃረትቤና።

6 “ ‘ “ሄዋና ታን ካንꬃደ፥ ኔን ነ ሱꬃ ግዶን ሙርቁቃደ ዞሄትሽና በኣድ፤ ኔን ነ ሱꬃ ግዶን ግሳ ደእሺና፥ ፓጻ ደአ ያጋድ። 7 ታን ኔና ሾይቃን ደእያ ካꬃዳን ድቻድ። ኔን ድጫ አዱቃደ፥ ጋማ ጋካዳ። ነ ꬋንꬃይ ኡቴዳ፤ ነ ብናናይካ ድጬዳ፤ ሽን ኔን ጺራ ካሎ አታዳ።

8 “ ‘ “ላኤንꬁዋ ታን ሄዋና አꬋደ፥ ኔና ጼልያ ዎደ፥ ኔን ዎዶሮ ጋካደ ቦርሴዳ አሳ ግዳዳ። ያትና፥ ታ ማዩዋ ነ ቦላ የጋደ፥ ነ ካሉዋ ካማድ። ታን ነዉ ጫቃደ ኔናና ጫቁዋ ጫቀትና፥ ኔን ታኖ ግዳዳ። ታን ኡባ ሞድያ መꬍና ጎዳይ ሀዋ ኦዳይ።

9 “ ‘ “ታን ነ ቦላይ ሱꬃን ባዬዳዋ ሃꬃን ሜጫ ጌሻደ፥ ዛይትያን ኦካድ። 10 ታን ኔና ጽባብያ ቃምሽያ ማይዛድ፤ ቃይ ሎኦ ጋልባፐ ኦሰቴዳ ጫማካ ዎስሳድ፤ ቃይ ላይኑዋ ሻሽያካ ኔና ጎዝሳድ፤ ቃይ አልኦ ኩታካ ቁማይሳድ። 11 ኔና ታ አሌቁዋን አሌቃድ፤ ነ ኩሽያን ሳጋዩዋ ዎꬃድ፤ ነ ቆꬍያንካ ቆꬍያ አሌቁዋ ዎꬃድ። 12 ቃይ ነ ሲꬍያን ጉትቻ፥ ነ ሀይꬃንካ ጉትቻ፥ ነ ሁጲያንካ ሎኦ ካላቻ ዎꬃድ። 13 ኔን ዎርቃንነ ብራን አሌቀታዳ፤ ነ ማዩ ኡባይ ፓጻ ላይኑዋ፥ አልኦ ኩታነ አሌቆ ቃምሽያ። ነ ምያ ቁማይ በርተ ꬊልያ፥ ኤሳነ ዛይትያ። ኔን ሎይꬃ ዳሪ ፑላንቻ ግዳደ፥ ካታቶ ከሳናዉ ደንዳዳ። 14 ኔን ፑላንቻ ግድያ ድራዉ፥ ካዉተꬃቱዋን ኤረታዳ። አያዉ ጎፐ፥ ታን ነዉ እሜዳ ቦንቹ ኔና ሀዋዳን ፖሎ ኦꬄዳ። ታን ኡባ ሞድያ መꬍና ጎዳይ ሀዋ ኦዳይ።

15 “ ‘ “ሽን ኔን ነ ፑላን አማነታዳ፤ ሀራቱዋን ኤረቴዳዋፐ ደንዴዳዋን ሻርሙጻ ግዳዳ፤ ኦግያና አꬍያ ኡባዉ ኔና አꬃ እማዳ። 16 ነ ማዩዋፐ አማሬዳዋ አካደ፥ ጎይንያ ሳኣ መꬋደ አሌቂሳዳ፤ ያታደ ያን ሻርሙጻዳ። ሄዋ ማላ ሀኖታይ ሀዋፐ ካሰ ሀንቤና፤ ሀዋፐ ስንꬃናዉካ ሀናናዉ በሰና። 17 ነዉ እሜዳ ዎርቃፐነ ብራፐ ኦሰቴዳ ሎኦ አሌቁዋ፥ አቱማ ምስለቱዋ ኦꬃደ መꬋዳ፤ ያታደ ኡንቱንቱና ሻርሙጻዳ። 18 ታን እሜዳ አሌቆ ማዩዋ ሄ ምስለቱዋ ማይዛዳ። ቃይ ታ ዛይትያነ ታ እጻና ኡንቱንቶ ሺሻዳ። 19 ቃይ ታን ነዉ እሜዳ ቁማ፥ በርተ ꬊልያ፥ ዛይትያነ ኤሳ ኡንቱንቱ ስንꬃን ሳዉዋ ቶሹኩ ግያ ያርሹዋ ኦꬃደ ሺሻዳ። ሀዌካ ሀኔዳ። ታን ኡባ ሞድያ መꬍና ጎዳይ ሀዋ ኦዳይ።

20 “ ‘ “ቃይካ፥ ኔን ታዉ የሌዳ አቱማ ናናቱዋነ ማጫ ናናቱዋ አፋደ፥ ኤቃቱ ማና ማላ ቁማ ኦꬃደ ያርሻዳ። ኔን ሻርሙጻ ከሴዳዌ ነዉ ጉጼዴ? 21 ኔን ታ ናናቱዋ ሹካደ፥ ኤቃዉ ታማን ያርሻዳ። 22 ኔን ቱናተꬃንነ ነ ሻርሙጻን ኡባን ደኣደ፥ ካሰ ነ ያላጋተꬃ ላይꬃ፥ ጺራ ካሎ ነ ሱꬃን ሙርቁቃደ፥ ዞሄቴዳ ዎድያ ዶጋዳ።

23 “ ‘ “አየ አና! ነዉ አየ አና! ታን ኡባ ሞድያ መꬍና ጎዳይ ሀዋ ኦዳይ። ሀ ነ ኢታተꬃ ኡባ ቦላ ቃይ፥ 24 ዳባባ ኡባን ꬎቃ ሳኣ ግምባደ ኤቃዉ ጎይንያ ሳአቱዋ ነዉ ጊግሳዳ። 25 ኦገ ዶናን ኡባን ሻርሙጽያ ሳአቱዋ ኬጻዳ፥ ነ ፑላ ቱንሳዳ፤ ኦግያና ካንꬅያ ኡባዉ ነ አሳተꬃ አꬃ እማደ፥ ሻርሙጹዋ ዳርሳዳ። 26 ኔን አሞ ጻላላን ኩሜዳ፥ ነ ሾሮ ግብጼቱዋና ሻርሙጻዳ፤ ነ ሻርሙጹዋ ዳሩዋንካ ታና ሀንቀꬃዳ። 27 ሄዋ ድራዉ፥ ታን ታ ኩሽያ ነ ቦላ የዳድ፤ ኔና ጋክያ ነ ሻኩዋካ ጉꬃድ። ታን ኔና ነ ፖኮ ሀኖታን ዬላትያ፥ ኮዮዋ ኦꬃናዳን ነ ሞርከቱዋ ፕልስጼማ ማጫ አሳቱዋ ሸንያዉ አꬃደ እማድ። 28 ኔን አለና አሳ ግድያ ድራዉ፥ አሶረ ቢታ አሳናካ ሻርሙጻዳ። ሄ ኡባንካ ሀዌ ታዉ ግዳና ጋባካ። 29 ሄዋፐ ቃይ፥ ዛልእያን አቄዳ ባብሎነቱዋናካ ሻርሙጽያዋ ዳርሳዳ፤ ሄዋንካ ግዳናዋ ጋባካ።

30 “ ‘ “ኔን ሀ ዬላይ ባይና ሻርሙጻቲዳን ሀንያና፥ ነ አይባ ላፋ አሴ! ታን ኡባ ሞድያ መꬍና ጎዳይ ሀዋ ኦዳይ። 31 ኔን ኦግያ ዶናን ሻርሙጽያ ሳአቱዋ ነዉ ኬጻዳነ ዳባባ ኡባን ኤቃዉ ጎይንያ ሳአቱዋ ጊግሳዳ። ሽን ሀራ ሻርሙጻቱዋዳን፥ ሻርሙጻቱ አክያ ሚሻካ አካባካ።

32 “ ‘ “ሀነ ሀ ሻርሙጻ ማጫ ምሽራቴ፥ ኔን ነ አስና ጭማደ፥ አላጋቱዋና ግሳዳ! 33 አቱማ አሳይ ሻርሙጻቶ ሚሻ ጭጌ፤ ሽን ኔን ኔናና ግስያዋንቶ እሞታ እማሳ፤ ኡንቱንቱ ኡባ ሳፐ ኔኮ ያናዳን፥ ማጋንጻ ኡንቱንቶ እማሳ። 34 ሄዋን ነ ሻርሙጻተꬃይ ሀራ ማጫ አሳቱዋፐ ዱማ፤ ኔናና ሻርሙጻናዉ ኔና ካልያዌ እቱነ ባዋ። ሀራይ ነዉ ጭገናን፥ ያ ጭጋደ ሻርሙጽያዋን፥ ሀራቱዋፐ ኔን ዱማ” ያጌ።

35 “ ‘ሄዋ ድራዉ፥ ሀኔ ሻርሙጻቴ፥ መꬍና ጎዳ ቃላ ስሳ! 36 ኡባ ሞድያ መꬍና ጎዳይ ሀዋዳን ያጌ፤ “ኔን ነ ሻርሙጻተꬃ አሙዋን ነ ላገꬃቶ ነ ቦላ ቃሬዳ ድራዉ፥ ነ ቱና ኤቃቱዋ ኡባ ድራዉነ ነ ናናቱዋ ሱꬃ ኔን ኡንቱንቶ ጉሴዳ ድራዉ፥ 37 ኔን ኡንቱንቱን ናሸቴዳ ነ ላገꬃቱዋ ኡባ፥ ኔን ሲቅያዋንታነ ኔን እጽያዋንታ ታን ነዉ ሞርከ ኦꬃደ ሺሻና። ታን ኡንቱንታ ነ ቦላ ኡባ ሳና ሺሻደ፥ ኡንቱንቱ ስንꬃን ኔና ሙልጹ ኦꬃደ ቃራና፤ ኡንቱንቱ ነ ካሉዋ በአና። 38 ታን ሻርሙጼዳ ማጫ አሳቱዋ ቦላነ ሱꬃ ጉሴዳ ማጫ አሳቱዋ ቦላ ፕርድያዋዳን፥ ነ ቦላ ፕርዳና፤ ታን ታ ሀንቁዋንነ ታ ምሹዋን ነ ቦላ ሀይቁዋ አሀና። 39 ታን ኔና ነ ላገꬃቶ አꬃ እማና፤ ኡንቱንቱ ነ ሻርሙጽያ ሳአቱዋነ ኤቃዉ ጎይንያ ሳአቱዋ ኮል ꬋይሳና። ኡንቱንቱ ነ ማዩዋ ሙልጹ ኦꬅ ቃሪደ፥ ነ ሎኦ አሌቁዋካ ዎꬅ አኪደ፥ ኔና ካሎ ጺራ አሻና። 40 ኡንቱንቱ ኔና ሹቻን ጫድ ዎꬍያነ ባረንቱ ማሻን ቃንጸሬꬅያ ጉይተ አሳ ነ ቦላ ኡንቱንቱ አሀና። 41 ኡንቱንቱ ነ ጎልያ ጹጊደ፥ ዳሮ ማጫ አሳ ስንꬃን ነ ቦላ ፕርዳና። ታን ነ ሻርሙጻተꬃ አግሳና፤ ኔንካ ነ ላገꬃቶ ላኤንꬆ ያ ሚሻ ጭጋካ። 42 ሄዋዳን ኦꬅና፥ ታን ነ ቦላ ሀንቀቴዳ ሀንቁ ዛርባና፤ ታን ነ ሀኖታን ምሸቴዳ ምሹካ ሄዋን አꬋና። ታን ሄዋን ዎፑ ጋደ፥ ላኤንꬆ ሀንቀትከ።

43 “ ‘ “ኔን ነ ያላጋተꬃ ላይꬃ ዶጋደ፥ ሀ ኢታ ኦሱዋ ኡባን ታና ሀንቀꬃዳ። ሄዋ ድራዉ፥ ቱሙዋፐ ነ ኦꬄዳዋ ኡባ ታን ነ ቦላን ዛራና። ኔን ነ ቱና ኦሶቱዋ ኡባ ቦላ ሻርሙጻተꬃ አያዉ ጉጃዲ? ታን ኡባ ሞድያ መꬍና ጎዳይ ሀዋ ኦዳይ።

44 “ ‘ “ሀነ የሩሳላመ፥ አሳይ ነ ቦላ፥ ናታካ አት ማላ ጊደ ሌምሱዋ ኦዳና። 45 ቱሙ ኔን ባረ አስናነ ባረ ናናቱዋ ሸነቴዳ ነ አት ማላ፤ ቃይ ባረንቱ አስና አስናነ ባረንቱ ናናቱዋ ናናቱዋ ሸነቴዳ ነ ምቼቱዋ ማላ። ነ አታ ሂተ ቢታ አሳ፤ ነ አዉ ቃይ አሞረ ቢታ አሳ። 46 ነ ባይራ ምቻታ ባረ ማጫ ናናቱዋና ኔፐ ሁጲሳ ባጋና ደእያ ሳማርያ፤ ቃይ ኔፐ ቴፋ ምቻታ ባረ ማጫ ናናቱዋና ኔፐ ገድሳ ባጋና ደእያ ሳዶሞ። 47 ኔን ኡንቱንቱ ኦግያ ካሌዳዌነ ኡንቱንቱ ቱና ኦሶቱዋ ኦꬄዳዌ ኔና አልቤና። ሽን ኔን ጉꬃ ዎድያን ኦꬄዳ ኦሱ ኡንቱንቱዋፐ ኢታ ዳሬ።

48 “ ‘ “ታን ኡባ ሞድያ መꬍና ጎዳይ ታ ደኡዋን ጫቃይ: ኔንነ ነ ማጫ ናናቱ ኦꬄዳዋዳን፥ ነ ምቻታ ሶዶማነ እ ማጫ ናናቱ ኦꬅበይክኖ። 49 ነ ምቻታ ሶዶማ ኦꬄዳ ናጋራይ ሀዋ: አነ እ ማጫ ናናቱ ኦቶራንቻ፥ ካሌዳዋንታነ እሻሉዋን ደእያዋንታ ግዶፐነ፥ ኡንቱንቱ ናቀቴዳዋንታነ ህዬሳ ማድበይክኖ። 50 ኡንቱንቱ ኦቶራንቻ ግዲደ፥ ታ ስንꬃን ቱና ኦሶቱዋ ኦꬄድኖ። ሄዋ ድራዉ፥ ህንተ በኤዳዋዳን፥ ታን ኡንቱንታ ꬋይሳድ።

51 “ ‘ “ሳማራታ ኔን ኦꬄዳ ናጋራዉ ባጋካ ኦꬃበይኩ፤ ኔን ኡንቱንቱዋፐ አꬌዳ ቱና ኦሶቱዋ ኦꬃዳ። ያታደ ሄ ነ ኦꬄዳ ቱና ኦሶቱዋ ኡባ ጋሱዋን፥ ነ ምቼቱ ጽሉዋ ማላታናዳን ኦꬃዳ። 52 ኔን ነ ምቼቱዋ ሱረ አሳ ከሴዳ ድራዉ፥ ካዉሻ ማያ። አያዉ ጎፐ፥ ነ ናጋራይ ኡንቱንቱዋፐ አꬍ ኢትና፥ ሄዋን ኡንቱንቱ ኔፐ ጽሎ ማላቴድኖ። ሄዋ ድራዉ፥ ዬላታደ፥ ካዉሻ ማያ።

53 “ ‘ “ግዶፐነ፥ ሳዶሞነ እ ማጫ ናናቱዋ፥ ቃይ ሳማርያነ እ ማጫ ናናቱዋ ታን ዛራደ እሻልስያ ዎደ፥ ኔናካ እሻልሳና። 54 ነባን ኔን ሎይꬃ ዬላታና፤ ኔን ካዉሼዳዋን፥ ነ ምቼቱ ኔፐ ኬክያዋ ኤሪደ ምነታና። 55 ነ ምቼቱ፥ ሶዶማ ባረ ማጫ ናናቱዋና፥ ቃይ ሳማራታካ ባረ ማጫ ናናቱዋና ባረንቱ ካሰ እሻሎ ስማና፤ ኔንካ ነ ማጫ ናናቱዋና ህንተ ካሰ እሻሎ ስማና። 56 ነ ኢታተꬃይ ቆንጫናፐ ካሰ፥ ነ ኦቶሩዋ ዎደ፥ ኔን ሀራይ አቶ፥ ነ ምቻት ሳዶም ቦላ ቅሊጫበይኪ? 57 ግዶፐነ፥ ሀእ ኔን ኤዶማ ማጫ ናናቱነ አ ሾሮ ኡባይ፥ ቃይ ፕልስጼማ ማጫ ናናቱነ ነ ዩሹዋን ደእያ፥ ኔና እጽያ ኡባይ ቅꬍያባ ከሳዳ። 58 ነ ሻርሙጻተꬃንነ ነ ቱና ኦሶቱዋ ጋሱዋን ሙረታና። ታን መꬍና ጎዳይ ሀዋ ኦዳይ” ያጌ።

59 “ ‘ኡባ ሞድያ መꬍና ጎዳይ ሀዋዳን ያጌ፤ “ኔን ቃላ ጫቁዋ ካꬎ ድራዉነ ህዶታ ቃላ ኮሌዳ ድራዉ፥ ኔን ኦꬄዳ ኦሱዋዳን፥ ታን ነዉ ኦꬃና። 60 ግዶፐነ፥ ታን ነ ያላጋተꬃ ዎድያን ኔናና ጫቀቴዳ ቃላ ጫቁዋ ሀሳያና፤ ቃይ መꬍና ጫቁዋካ ኔናና ጫቀታናዋ። 61 ሄዋፐ ጉይያን፥ ታን ነ ባይራነ ነ ቴፋ ምቼቱዋ ኔኮ አህያ ዎደ፥ ኔን ነ ሄመታ ሀሳያደ ዬላታና። ታን ኡንቱንታ ነዉ ማጫ ናናቱዋ ኦꬃደ እማና፤ ሽን ሄዌ ታን ኔናና ጫቀቴዳ ጫቁዋዳን ግደና። 62 ሄዎ ታን ታ ጫቁዋ ኔናና ዎꬃና። ታን መꬍና ጎዳ ግድያዋ ኔን ሄዋን ኤራና። 63 ታን ኔን ኦꬄዳ ናጋራ ኡባ አቶ ያግያ ዎደ፥ ኔን ነ ኦꬄዳዋ ሀሳያደ፥ ዬላዉ ነ ዶና ኦይቃና። ታን ኡባ ሞድያ መꬍና ጎዳይ ሀዋ ኦዳይ” ያጌ’ ያጋ” ያጊደ ዬዳ።