1 መꬍና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ እስራኤልያ አሳ ቃንእሽያ ቃንእሻ፤ ኡንቱንቶ ሌምሱዋን ኦዳ። 3 ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ “ዱማ ዱማ ማላና ደእያ ባለቱነ ዎልቃማ ዎልቃማ ቀፈቱ ደእያ እት አርጋንꬃይ ደኤ። ሄ አርጋንꬃይ ሊባኖሳ ዪደ ዝጋ ጼራ ኦይቄዳ። 4 ሄ ዝጋ ልጩዋ መንꬄዳ፤ ሄ መንꬄዳ ልጩዋ አኪደ፥ ዛልኢ ዳርያ ቢታ፥ ዛልአንቻቱዋ ካታማ አፌዳ።

5 “ ‘ “እ እስራኤልያ ቢታፐ ዘረꬃ አፊደ፥ ቱኤ ቢታን፥ ዳሮ ሃꬃይ ደኢያሳ ማታን ቶኬዳ። 6 ፑደ አጬዳ ቱራይ ዳሪ አዱቀናን ዳሼዳ። አ ዳሻይ አርጋንꬃኮ ስሚደ ዳሼዳ፤ ሽን አ ጻጱ ቢታ ግዶ ገሌዳ። ሄ ቱራይ ማራ የሌዳ፤ ሀይꬃካ ከሴዳ።

7 “ ‘ “ሄዋዳንካ፥ ጮራ ቀፈቱነ ዎልቃማ ዎልቃማ ባለቱ ደእያ ሀራ እት አርጋንꬃይ ደኤ። ሃꬃ ደማና ጊደ፥ ሄ ቱራይ ባረ ቶከቴዳ ሳፐ ሄ አርጋንꬃይ ደኢያሳኮ፥ ባረ ጻጱዋነ ባረ ዳሻ የዴዳ። 8 ሽን ኮይሮ አርጋንꬃይ ቶከቴዳዌ አጫናዉ፥ አይፋናዉነ ሎይꬅ ሎኦ ዎይንያ ግዳናዉ ዳንዳይያሳን፥ ቱኤ ቢታን፥ ዳሮ ሃꬃይ ደኢያሳና” ያጌ’ ያጋ።

9 “ኡንቱንቶ ኔን ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ “ሄ ቱራይ ድጫኔ? ኮይሮ አ ቶኬዳ አርጋንꬃይ አ ሾደኔ? አ አይፈቱዋ ቆቆፊደ፥ አ እርጻ ሀይꬃቱዋ መልሰኔ? አ ሄ ሳኣፐ ጻጱዋና ፑደ ሾዳናዉ ዎልቃማ ዎልቃ፥ ዎይ ዳሮ አሳ ኮሸና። 10 አ ሾዲደ፥ ሀራ ሳኣን ቶክንቶ፥ እ ድጫኔ? አዋይ ዶልያ ባጋ ባዞ ጫርኩ ሾጭና፥ ባረ ቶከቴዳሳን ኡባና መለኔ?” ያጌ’ ያጋ” ያጊደ ዬዳ።

11 ሄዋፐ ጉይያን፥ መꬍና ጎዳ ቃላይ ታኮ ሀዋዳን ያጊደ ዬዳ፤ 12 “ሀ ማካላንቻ አሳዉ ሀዋዳን ያጋ፤ ‘ሄ ሌምሱዋ ብለꬃይ አየንቶ ኤርክቴ? ሄዌ አዬ ጎፐ፥ ባብሎነ ካቲ የሩሳላመ ዪደ፥ ኡንቱንቱ ካትያነ ኡንቱንቱ ካፖቱዋ ኦሞዲደ፥ ባብሎነ አፌዳ። 2 ካታ. 24:15-20፤ 2 ኦዱዋ 36:10-13 13 ቃይ ካትያ ጎልያ አሳፐካ እቱዋ አኪደ፥ አናና እትፐ ጫቂደ ጫቀቴዳ፤ ያቲደ አሳ ግዶን ኤረቴዳዋንታ ኦሞዲደ አፌዳ። 14 ሄዋ ኦꬄዳዌ ኡንቱንቱ ካዉተꬃይ ዎልቃ ꬋዪደ፥ ላኤንꬆ ደንደናዳን፥ ባረንቱ ጫቁዋ ጻላላ ናጊደ ደአናዳና። 15 ሽን ይሁዳ ካቲ ማካል ደንዲደ፥ ፓራቱዋነ ዳሮ ኦላንቻቱዋ የዳናዳን፥ ግብጼ ኪቴዳ። አዉ ሄዌ ሀናንዴሻ? ሀዋ ማላባ ኦꬄዳዌ እ ባረዉ ከስ አካንዴ? ቃይ ጫቁዋ አꬊደ፥ እ ባረዉ ከስ አካንዴ?

16 “ ‘ታን ኡባ ሞድያ መꬍና ጎዳይ ታ ደኡዋን ጫቃይ: ባረና ካተዬዳ ካትያና ማየቴዳ ቃላ ድራዉነ ጫቁዋ ካꬌዳ ድራዉ፥ ሄ ካትያ ቢታን፥ ባብሎነን እ ሀይቃና። 17 ባብሎነ ኦላንቻቱ ዳሮ አሳ ዎꬋናዉ ግምቢያ ማታን ቢታ ድድቂደ ጊግሶፐነ ድሮፐካ፥ ግብጼ ካቲ ባረ ኦላንቻቱዋናነ ባረ ዳሮ አሳና ዪናካ፥ አይነ ማደና። 18 እ ጫቁዋ ካꬌዳ፤ ጫቁዋ መንꬄዳ። እ ባረ ኩሽያካ እሚደ፥ ባረ ጌዳዋ ፖልቤና። ሄዋ ድራዉ፥ አዉ ከስ አክያ ሳአይ ባዋ።

19 “ ‘ሄዋ ድራዉ፥ ታን ኡባ ሞድያ መꬍና ጎዳይ ታ ደኡዋን ጫቃይ፤ እ ካꬌዳ ታ ጫቁዋነ እ መንꬄዳ ታ ጫቁዋ ታን አ ሁጲያ ቦላ ዛራደ አሀና። 20 ታን ታ ጲርያ አ ቦላ የጋና፥ እ ታ ጲርያን ኦይቀታና። እ ታዉ አማነተናን እጼዳ ድራዉ፥ ታን አ ባብሎነ አፋደ፥ ሄዋን አ ቦላ ፕርዳና። 21 ዶረቴዳ አ ኦላንቻቱ ኡባይ ማሻን ሀይቃና፤ ፓጻ አቴዳዋንቱ ዱማ ዱማ ሳኣ ላለታና። ሄ ዎደ ሀዋ ሃሳዬዳዌ ታና መꬍና ጎዳ ግድያዋ ህንተ ኤራና።

22 “ ‘ኡባ ሞድያ መꬍና ጎዳይ ሀዋዳን ያጌ፤ “ታን ታ ሁጲያዉ አዱሳ ዝጋ ጼራ ልጩዋፐ ጹንቃ አካደ፥ ꬎቃነ አዱሳ ደርያ ሁጲያን ቶካና። 23 ታን አ እስራኤልያ ደርያ ሁጲያን ቶካና፤ ሄዋን ማራ የሊደ፥ አይፍያካ አይፋናነ ሎኦ ዝጋ ግዳናዋ። ካፎ ዛሪ ኡባይ አን ኬጻና፤ ኡንቱንቱ አ ቃንካ ኩዋን ሸምፓና። 24 ꬎቃ ምꬃ ዝቂ ኦꬅያዌ፥ ዝቃ ምꬃ ꬎቁ ኦꬅያዌ፥ እርጻ ምꬃ መልስያዌነ መላ ምꬃካ አጭስያዌ፥ ታን መꬍና ጎዳ ግድያዋ ባዞ ምꬃ ኡባይ ኤራና። ታን መꬍና ጎዳይ ሀዋ ኦዳድ፤ ታን ኦዴዳዋ ታንካ ኦꬃና” ያጌ’ ያጋ” ያጊደ ዬዳ።