1 መꬍና ጎዳ ቃላይ ታኮ ሀዋዳን ያጊደ ዬዳ፤ 2 “እስራኤልያ ቢታባ ህንተ፥ ‘አዎቱ ጋምኤ ዎይንያ ሚና፥ ናናቱዋ አቻይ ዝልኤዳ’ ጊደ ህንተ ሌምስያዌ አዬ?ኤር. 31:29 3 ታን ኡባ ሞድያ መꬍና ጎዳይ ታ ደኡዋን ጫቃይ: ሀዋፐ ስንꬃዉ ህንተ እስራኤልያ ቢታን ሀ ሌምሱዋ ሌምስክታ። 4 አሳ ኡባ ሸምፑ ታዋ፤ አዉዋ ሸምፑካ ናኣ ሸምፑካ ታዋ። ናጋራ ኦꬅያ ሸምፑ እ ባረዉ ሀይቃና።

5 “እት አሳይ ጽሎ ግዶፐ፥ ቱሙ ፕርዳነ ሱረተꬃ ኦꬆፐ፥ 6 እ ደርያ ቦላ ደእያ ኤቃዉ ጎይንያ ሳአቱዋን ማና ꬋዮፐ፥ እ እስራኤልያ አሳ ኤቃዉ ጎይናና ꬋዮፐ፥ ባረ ሾሩዋ ማጫ አሳ ቱንሳና ꬋዮፐ፥ ቃይ ፒላይ ዬዳ ማጫሳና ግሳና ꬋዮፐ፥ 7 ኦናነ ኡቁናና ꬋዮፐ፥ አጮ ኦይቄዳዋ ጉየ ዛሮፐ፥ እት ኡራነ ቦንቃና ꬋዮፐ፥ ባረዉ ደእያዋፐ ኮሻቴዳ አሳ ምዞፐ፥ ካሎቴዳዋ ማይዞፐ፥ 8 እ ዎꬍያ አካናዉ ድቻዉ ታልአና ꬋዮፐ፥ ባረ ኩሽያ ባላፐ ሺሽ አኮፐ፥ አሳ ግዶን ቱሙዋ ፕርዶፐ፥ 9 ታ ህግያን ሄመቶፐ፥ ታ ዎጋካ አማነቲደ ናጎፐ፥ ያቶፐ፥ እ ጽሎ አሳ፥ እ ቱሙ ፓጻ ደአና። ታን ኡባ ሞድያ መꬍና ጎዳይ ሀዋ ኦዳይ። ዎጋ 18:5

10 “ሀ ብታንያዉ ሸምፑዋ ዎꬍያ፥ ዎይ ሀዋፐ ካሊደ ደእያዋንቱፐ ሀቃዋ ግድናካ ኦꬅያ እት ኢታ ናአይ ደኦፐ፥ 11 ባረ አዉ ኦꬅቤናዋ ኡባባ ኦꬄ። እ ደርያ ቦላ ደእያ ኤቃዉ ጎይንያ ሳአቱዋን ሜ፤ እ ባረ ሾሩዋ ማጫ አሳ ቱንሴ፤ 12 እ ህዬሳነ ማንቁዋ ኡቁኔ፤ እ አሳባ ቦንቄ፤ አጮ ኦይቄዳዋ ዛረና፤ ኤቃዉካ ጎይኔ፤ ቱናባካ ኦꬄ፤ 13 እ ድቻዉ ታልኢደ፥ ዎꬍያ አኬ። ሄዋ ማላ አሳይ ፓጻ ደአኔ? ቱይት፥ እ ፓጻ ደኤና! እ ሄዋ ማላ ቱናባ ኦꬄዳ ድራዉ፥ እ ቱማ ሀይቃና፤ አ ሱꬃ አጩካ አ ቦላና ግዳናዋ።

14 “ሀ ኢታ ብታንያዉ ናአይ ደኦፐ ሄ ናአይ ባረ አዉ ኦꬅያ ሀ ናጋራ ኡባ በኢደ፥ እ ሄዋ ማላባ ኦꬃና ꬋዮፐ፥ 15 እ ደርያ ቦላ ኤቃዉ ጎይንያ ሳአቱዋን ማና ꬋዮፐ፥ እስራኤልያ አሳ ኤቃዉ ጎይናና ꬋዮፐ፥ እ ባረ ሾሩዋ ማጫ አሳ ቱንሳና ꬋዮፐ፥ 16 እ ኦናነ ኡቁናና ꬋዮፐ፥ አጮ ኦይቄዳዋ ጉየ ዛሮፐ፥ እ አሳዋ ቦንቃና ꬋዮፐ፥ ባረዉ ደእያዋፐ ኮሻቴዳዋንታ ምዞፐ፥ ካሎቴዳዋንታካ ማይዞፐ፥ 17 እ ባላፐ ኩሽያ ሺሽ አኮፐ፥ ዎꬍያ አካናዉ ድቻዉ ታልአና ꬋዮፐ፥ እ ታ ህግያ ናጎፐ፥ ታ ዎጋንካ ሀመቶፐ፥ ያቶፐ፥ እ ፓጻ ደአናፐ አትና፥ ባረ አዉዋ ናጋራን ሀይቀና። 18 ሽን አ አዉ አሳ ማታ ቦንችቤና ድራዉ፥ ባረ እሻቱዋካ ዎልቃን ቦንቄዳ ድራዉነ ባረ አሳ ግዶን ኢታ ኦꬄዳ ድራዉ፥ ባረ ናጋራን ሀይቃና።

19 “ሽን ህንተ፥ ‘ናአይ ባረ አዉዋ ናጋራን አያዉ ሙረተኔ ያጊታ። ናአይ ቱሙ ፕርዳነ ሱረተꬃ ኦꬂደ፥ ታ ህግያ ምንሲደ ናጎፐ፥ እ ቱሙ ፓጻ ደአና። 20 ናጋራ ኦꬅያ ሸምፑ እ ባረዉ ሀይቃና። ናአይ አዉዋ ናጋራን ሙረተና፤ ሄዋዳንካ፥ አዉ ናኣ ናጋራን ሙረታና። ጽሎ አሳ ጽሎተꬃይ ሄ አዉዋሳ ግዳናዋ፤ ኢታ አሳ ኢታተꬃይካ ሄ አዉዋሳ ግዳናዋ። ዛረ. 24:16

21 “ ‘ሽን ናጋራንቻይ ባረ ኦꬄዳ ናጋራ ኡባፐ ስሚደ፥ ታ አዛዙዋ ናጎፐነ ቱሙ ፕርዳነ ሱረተꬃ ኦꬆፐ፥ እ ቱሙ ፓጻ ደአናፐ አትና ሀይቀና። 22 እ ኦꬄዳ ናጋራፐ እቱነ ቆፈተና። ባረ ኦꬄዳ ጽሎ ኦሱዋ ድራዉ፥ እ ፓጻ ደአና። 23 ናጋራንቻይ ባረ ኦግያፐ ስሚደ፥ ፓጻ ደእያዋን ናሸታይፐ አትና፥ ታን ኡባ ሞድያ መꬍና ጎዳይ አ ሀይቁዋን ናሸትከ።

24 “ ‘ሽን ጽሎ አሳይ ባረ ጽሎተꬃፐ ጉየ ስሚደ፥ ናጋራንቻ አሳይ ኦꬅያ ናጋራነ ቱና ኦሱዋ ኦꬆፐ፥ እ ፓጻ ደአኔ? ቱይት፥ እ ኦꬄዳ ጽሎ ኦሱዋፐ እቱነ ቆፈተና፤ እ አማነተናን እጼዳ ድራዉነ እ ኦꬄዳ ናጋራ ኡባ ድራዉ፥ እ ሀይቃና።

25 “ ‘ሽን ህንተ፥ ጾሳ ኦጊ ሱረ ግደና’ ያጊታ። ህንተኖ፥ እስራኤልያ አሳቶ፥ ሀእ ስስተ! ሱረ ግደናዌ ታ ኦጌ? ሱረ ግደናዌ ህንተ ኦግያ ግደኔ? 26 ጽሎ አሳይ ባረ ጽሎተꬃፐ ጉየ ስሚደ፥ ናጋራ ኦꬅያ ዎደ፥ ባረ ናጋራን ሀይቄ። እ ባረ ኦꬄዳ ናጋራ ድራዉ ደኡዋን ደኤና። 27 ሽን ኢታ አሳይ ባረ ኢታተꬃፐ ጉየ ስሚደ፥ ቱሙ ፕርዳነ ሱረተꬃ ኦꬅያ ዎደ፥ እ ባረ ሸምፑዋ አሻና። 28 እ ባረ ኦꬄዳ ናጋራ ኡባ አኬኪደ ስሜዳ ድራዉ፥ እ ቱሙ ፓጻ ደአናፐ አትና ሀይቀና። 29 ሽን እስራኤልያ አሳቱ፥ ጾሳ ኦጊ ሱረ ግደና ያጌድኖ። ህንተኖ፥ እስራኤልያ አሳቶ፥ ሱረ ግደናዌ ታ ኦጌ? ሱረ ግደናዌ ህንተ ኦግያ ግደኔ?

30 “ሄዋ ድራዉ፥ ህንተኖ፥ እስራኤልያ አሳቶ፥ ታን ህንተና ኡባካ ህንተ ኦግያዳን ኦግያዳን ፕርዳና። ናጋራይ ህንተ ꬋዮ ጋሶ ግደናዳን ፓጽተ፤ ህንተ ባይዙዋ ኡባፐካ ስምተ። ታን ኡባ ሞድያ መꬍና ጎዳይ ሀዋ ኦዳይ። 31 ህንተ ናቄዳ ናቁዋ ኡባ ህንተፐ ሃሲደ፥ ኦራꬃ ዎዛናነ ኦራꬃ አያና አክተ። ህንተኖ እስራኤልያ አሳቶ፥ አያዉ ሀይቂቴ? 32 ታን እት አሳ ሀይቁዋንነ ናሸትከ። ሄዋ ድራዉ፥ ህንተ ናጋራ ፓጽ ስሚደ፥ ፓጻ ደእተ! ታን ኡባ ሞድያ መꬍና ጎዳይ ሀዋ ኦዳይ” ያጌዳ።