1 ኑን ኦሞደቴዳ ላፑንꬃ ላይꬃን፥ እቼሻንꬃ አግናን፥ ታማንꬃ ጋላሳን፥ እስራኤልያ ጭማቱዋፐ አማሬዳዋንቱ መꬍና ጎዳ ኦቻናዉ ዪደ፥ ታ ስንꬃን ኡቴድኖ።

2 ያትና፥ መꬍና ጎዳ ቃላይ ታኮ ሀዋዳን ያጊደ ዬዳ፤ 3 “ላ አሳ ናአዉ፥ እስራኤልያ ጭማቶ ሀዋዳን ያጋደ ኦዳ፤ ‘ኡባ ሞድያ መꬍና ጎዳይ ሀዋዳን ያጌ፤ “ህንተ ዬዳዌ ታና ኦቻናሴ? ታን ኡባ ሞድያ መꬍና ጎዳይ ታ ደኡዋን ጫቃይ: ታን ህንተናን ኦሸትከ” ያጌ’ ያጋ።

4 “ኡንቱንቱ ቦላ ፕርዲቴ? ላ አሳ ናአዉ፥ ቱሙ ኡንቱንቱ ቦላ ፕርዲቴ? ሄዋ ግዶፐ፥ ኡንቱንቱ ማይዛ አዎቱዋ ቱና ኦሱዋ ኡንቱንታ ኤርሳ። 5 ኡንቱንቶ ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ “ታን እስራኤልያ ዶሬዳ ዎደ ታ ኩሽያ ደንꬃደ ጫቃድ፥ ያቆባ ዛረቶ ግብጼን ደእሺና፥ ታናተꬃ ኤርሳደ፥ ታ ኩሽያካ ደንꬃደ ጫቃደ፥ ታን መꬍና ጎዳ ህንተ ጾሳ”ከሳ 6:2-8 ጋደ ኦዳድ። 6 ታን ህንተና ግብጼፐ ከሳደ፥ ህንተዉ ዶሬዳ ቢታ፥ ማꬃይነ ኤሳይ ጎግያ ቢታ፥ ቢታ ኡባፐ አꬌዳ ሎኦ ቢታ አሀና ጋደ ጫቃድ። 7 ቃይ ታን ኡንቱንታ፤ “ህንተፐ እቱ እቱ ባረ ሲቅያ ቱና ኤቃቱዋ ድጎ፤ ግብጼ ኤቃቱዋን ቱኖፕተ። ታን መꬍና ጎዳ ህንተ ጾሳ” ያጋድ።

8 “ ‘ሽን ኡንቱንቱ ታዉ ማካሊደ፥ ታ ኦድያዋ ስሰናን እጼድኖ። ኡንቱንቱ ባረንቱ አሞቴዳ ቱና ኤቃቱዋ ድግበይክኖ፤ ግብጼ ኤቃዉካ ጎይንያዋ አግበይክኖ። ሄዋ ድራዉ፥ ኡንቱንቱ ግብጼን ደእሺና፥ ታ ሀንቁዋ ኡንቱንቱ ቦላ ጉሳናዉ፥ ታ ይሉዋካ ኡንቱንቱ ቦላ ዉርሳናዉ ቆፓድ። 9 ሽን ኡንቱንቱ ደእያ ካዉተꬃቱዋ ግዶንነ እስራኤልያ አሳ ግብጼፐ ከስያዋን፥ ታን ታናተꬃ ኤርሴዳ አሳ ስንꬃን ታ ሱንꬃይ ቱነናዳን ኦꬃድ። 10 ሄዋ ድራዉ፥ ታን ኡንቱንታ ግብጼፐ ከሳደ፥ መላ ቢታ አሃድ። 11 አዛዘትያ ኡባዉ ደኡዋ እምያ ታ ዎጋ ታን ኡንቱንቶ እማድ፤ ታ ህግያካ ኡንቱንቱ ታማርሳድ። ዎጋ 18:5 12 ቃይ ኡንቱንታ ጌሽያዌ ታና መꬍና ጎዳ ግድያዋ ኡንቱንቱ ኤራና ማላ፥ ታን ታ ሳምባታ ታፐነ ኡንቱንቱፐ ግዱዋን ማላ ኦꬃደ እማድ። ከሳ 31:13-17

13 “ ‘ሽን እስራኤልያ አሳይ ሀ መላ ቢታንካ ታ ቦላን ማካሌድኖ። አዛዘቴዳ ኡባዉ ደኡዋ እምያ ታ ዎጋዳን ሀመትበይክኖ፤ ታ ህግያካ መንꬄድኖ፤ ታ ሳምባታካ ዳሮ ቱንሴድኖ። ያትና፥ ታን መላ ቢታን ታ ሀንቁዋ ኡንቱንቱ ቦላ ጉሳደ፥ ኡንቱንታ ዉርሳናዉ ቆፓድ። 14 ሽን ታን ኡንቱንታ ግብጼፐ ከስያዎ በኤዳ ካዉተꬃቱዋ ስንꬃን ታ ሱንꬃይ ቱነናዳን፥ ኡንቱንታ ꬋይሳበይከ። 15 ቃይ ኡንቱንቶ እሜዳ ቢታ፥ ማꬃይነ ኤሳይ ጎግያ ቢታ፥ ቢታ ኡባፐ ሎእያ ቢታ ኡንቱንታ ገልሰናዳን መላ ቢታን ደእሽን ጫቃድ። ፓይ. 14:26-35 16 አያዉ ጎፐ፥ ኡንቱንቱ ኤቃዉ ጎይኒደ፥ ታ ህግያ እጼዳ ድራሳ፥ ታ ዎጋዳን ሀመትቤና ድራሳነ ታ ሳምባታካ ቱንሴዳ ድራሳ። 17 ግዶፐነ፥ ታን ኡንቱንቶ ቃረቴዳ ድራዉ፥ መላ ቢታን ኡንቱንታ ዉርሳ ꬋይሳበይከ።

18 “ ‘ኡንቱንቱ መላ ቢታን ደእሺና፥ ታን ኡንቱንቱ ናናቱዋ ሀዋዳን ያጋድ፤ “ህንተ አዎቱዋ ዎጋዳን ሀመቶፕተ፤ ኡንቱንቱ ህግያካ ናጎፕተ፤ ዎይ ኡንቱንቱ ኤቃቱዋን ቱኖፕተ። 19 ታን መꬍና ጎዳ ህንተ ጾሳ። ታ ዎጋዳን ሀመትተ፤ ታ ህግያካ ናግተ። 20 ታፐነ ህንተፐ ግዱዋን ማላ ግዳና ማላነ ታን መꬍና ጎዳ ህንተ ጾሳ ግድያዋ ህንተ ኤራና ማላ፥ ሳምባታ ሀራ ጋላሳፐ ዱማይተ” ያጋድ።

21 “ ‘ሽን ሄ ናናቱካ ታ ቦላን ማካሌድኖ፤ አዛዘትያ አሳ ኡባዉ ደኡዋ እምያ ታ ዎጋዳን ሀመትበይክኖ፤ ታ ህግያካ ኡንቱንቱ ናግበይክኖ፤ ታ ሳምባታካ ቱንሴድኖ። ያትና፥ ታን መላ ቢታን ታ ሀንቁዋ ኡንቱንቱ ቦላ ጉሳናዉ፥ ታ ይሉዋካ ኡንቱንቱ ቦላ ዉርሳናዉ ኮያድ። 22 ሽን ታን ታ ኩሽያ ሺሻ አካድ። ታን ኡንቱንታ ግብጼፐ ከስያዋ በኤዳ ካዉተꬃቱዋ ስንꬃን ታ ሱንꬃይ ቱነናዳን፥ ኡንቱንታ ꬋይሳበይከ። 23 ቃይ ኡንቱንታ ሀራ ካዉተꬃቶነ ሀራ ቢታቶ ላላናዉ መላ ቢታን ጫቃድ። ዎጋ 26:33 24 አያዉ ጎፐ፥ ኡንቱንቱ ታ ዎጋዉ አዛዘተናን እጼድኖ፤ ታ ህግያካ መንꬄድኖ፤ ታ ሳምባታ ቱንሴድኖነ ባረንቱ አዎቱዋ ኤቃ አሞቴድኖ። 25 ሄዋዳንካ፥ ቃይ ኡንቱንቶ ሎኦ ግደና ዎጋቱዋነ ደኡዋ እመና ህገቱዋ እማድ። 26 ኡንቱንቱ ባረንቱ ያርሹዋን ቱናናዳን፥ ባረንቱ ባይራ ናናቱዋ ያርሻናዳን፥ ታን ኡንቱንታ የዳ በሳድ። ታን ሄዋ ኦꬄዳዌ ኡንቱንታ ዳጋንꬃናሳነ ታን መꬍና ጎዳ ግድያዋ ኡንቱንታ ኤርሳናሳ ያጌ’ ያጋ።

27 “ሄዋ ድራዉ፥ አሳ ናአዉ፥ እስራኤልያ አሳዉ ሀዋዳን ያጋደ ኦዳ፤ ‘ኡባ ሞድያ መꬍና ጎዳይ ሀዋዳን ያጌ፤ ህንተ አዎቱካ ታናን አማነተናን እጺደ፥ ሄ የዎቱዋን ታና ቦሬድኖ። 28 ኡንቱንቶ እማናዉ ታ ኩሽያ ደንꬃ ጫቄዳ ቢታ ኡንቱንታ አሄዳ ዎደ፥ ኡንቱንቱካ ꬎቃ ደርያ ኡባነ እርጻ ምꬃ ኡባ በኤድኖ። ኡንቱንቱን ኡባን ባረንቱ ያርሹዋ ያርሼድኖ። ባረንቱ ጩዋይያ እጻናንነ ባረንቱ ጉስያ ኡሻ ያርሹዋን ታና ሀንቀꬄድኖ። 29 ያትና፥ ታን ኡንቱንታ፥ ሀዌ ህንተ ብያ ꬎቃ ሳአይ አዬ? ያጋደ ኦቻድ። ሀች ጋካናዉ ሄ ሳአይ ባማ ጌተቴ፤ ሄዋ ጉሳይካ ጎይንያ ꬎቃ ሳኣ ጉሳ’ ” ያጌ ያጋ።

30 ሄዋ ድራዉ፥ እስራኤልያ አሳዉ ሀዋዳን ያጋደ ኦዳ፤ “ኡባ ሞድያ ጾሳይ ሀዋዳን ያጌ፤ ‘ህንተ ማይዛ አዎቱ ኦꬄዳ ናጋራ ኡባ ኦꬂደ፥ አያዉ ህንተና ቱንሲቴ? ኡንቱንቱ ቱና ኤቃ ጎይናናዉ አሞቲደ አያዉ ካሊቴ? 31 ሀችካ ሄዋ ማላ እሙዋ ሺሽያ ዎደነ ህንተ አቱማ ናናቱዋ ታማን ጹጊደ ያርሽያ ዎደ፥ ህንተ ኤቃን ኡባን ህንተና ቱንሲታ። ህንተኖ፥ እስራኤልያ አሳቶ፥ ታን ህንተናን ኦሸቶ? ታን ኡባ ሞድያ መꬍና ጎዳይ ታ ደኡዋን ጫቃይ: ታን ህንተናን ኦሸትከ። 32 ህንተ፥ “ኑን ምꬃዉነ ሹቻዉ ጎይንያ ሀራ ካዉተꬃቱዋ ማላነ ጾሳ አማነና አሳ ማላ ግዳና” ያጊደ ቆፒታ። ሽን ህንተ ቆፋይ ኡባካ ሀነና።

33 “ ‘ታን ኡባ ሞድያ መꬍና ጎዳይ ታ ደኡዋን ጫቃይ: ታን ታ ምኖ ቀስያን፥ ታ ሙራናዉ ደንꬄዳ ኩሽያንነ ታ ጉሴዳ ሀንቁዋን ህንተ ቦላ ካተታና። 34 ካዉተꬃቱዋ ግዶፐ ታን ህንተና ከሳና፤ ህንተ ላለቴዳ ቢታ ኡባፐ ታ ምኖ ቀስያን፥ ታ ምጨቴዳ ኩሽያንነ ታ ጉሴዳ ሀንቁዋን ታን ህንተና ሺሻና። 35 ታን ህንተና ካዉተꬃቱዋ መላ ቢታ ግያ ባዙዋ አሀና፤ ህንተና ታ ስንꬃን ኤሳደ፥ ህንተ ቦላ ፕርዳና። 36 ግብጼ ቢታ ባዙዋን ህንተ ማይዛ አዎቱዋ ቦላ ፕርዴዳዋዳን፥ ሄዋዳንካ ህንተ ቦላ ፕርዳና። ታን ኡባ ሞድያ መꬍና ጎዳይ ሀዋ ኦዳይ። 37 ታን ህንተና ታ ካዉተꬃ ጻምኣ ጋርሳን ዎꬃና፤ ታ ጫቁዋ ህንተ ናጋናዳን፥ ታን ህንተና ኦꬃና። 38 ማካላንቻቱዋነ ናጋራንቻቱዋ ታን ህንተ ግዶፐ ድጋና፤ ሀእ ኡንቱንቱ ደእያ እማꬃተꬃ ቢታፐ ታን ኡንቱንታ ከሳና፤ ሽን ኡንቱንቱ እስራኤልያ ቢታ ገለናዳን ድጋና። ሄ ዎደ ታን መꬍና ጎዳ ግድያዋ ህንተ ሄዋን ኤራና’ ያጌ።

39 “ኡባ ሞድያ መꬍና ጎዳይ ሀዋዳን ያጌ፤ ‘ህንተኖ፥ እስራኤልያ አሳቶ፥ ህንተ ሀእ ታን ኦድያዋ ስሰናን እጾፐ፥ ቢደ ኡባይካ ህንተ ኤቃዉ ጎይንተ። ሽን ሄዋፐ ጉይያን፥ ህንተ እሙዋንነ ህንተ ኤቃን ታ ጌሻ ሱንꬃ ቱንስክታ። 40 ታ ጌሻ ደርያን፥ ꬎቁ ጌዳ እስራኤልያ ደርያ ቦላን ህንተ እስራኤልያ አሳይ ኩመንꬃይ ታዉ፥ ኡባ ሞድያ መꬍና ጎዳዉ ሄ ቢታን ጎይናና። ታንካ ህንተና ሞካ አካና፤ ህንተ ያርሹዋ፥ ህንተ ዶረቴዳ እሙዋነ ህንተ ጌሻ እሙዋ ታን ህንተፐ ኮያይ። 41 ህንተ ላለቴዳ ካዉተꬃቱዋ ግዶፐ ታን ህንተና አህያ ዎደነ ሀራ ቢታቱዋፐ ታን ህንተና ሺሽያ ዎደ፥ ሳዉዋ ቶሹኩ ግያ ያርሹዋ አክያዋዳን፥ ታን ህንተና አካና። ካዉተꬃቱ ጼልሽን፥ ታን ህንተ ግዶን ጌሻ ግድያዋ ኤርሳና። 42 ታን ካሰ ህንተ ማይዛ አዋቶ እማና ጋደ ጫቄዳ እስራኤልያ ቢታ ህንተና ዛራደ አሄዳ ዎደ፥ ታን መꬍና ጎዳ ግድያዋ ህንተ ኤራና። 43 ህንተ ህንተ ኢታ ሀመታነ ህንተ ቱና ኦሱዋ ህንተ ሄ ሳኣን ሀሳያና፤ ህንተ ኦꬄዳ ኢታ ኦሱዋ ኡባ ህንተ ሸነታና። 44 ህንተኖ፥ እስራኤልያ አሳቶ፥ ታን ህንተ ኢታ ሀመታዳንነ ህንተ ቱና ኦሱዋዳን ግደናን፥ ታ ሱንꬃ ድራዉ ታን ኦꬅያ ዎደ፥ ታን ጾሳ ግድያዋ ህንተ ኤራና። ታን ኡባ ሞድያ መꬍና ጎዳይ ሀዋ ኦዳይ ያጌ’ ያጋ” ያጊደ ዬዳ።

45 መꬍና ጎዳ ቃላይ ታኮ ሀዋዳን ያጊደ ዬዳ፤ 46 “ላ አሳ ናአዉ፥ ገድሳ ባጋ ስማደ ጼላ፤ ገድሳ ባጋዉ ኦዳ፤ ገድሳ ዎራ ቦላ ትምቢትያ ኦዳ። 47 ገድሳ ዎራዉ ሀዋዳን ያጋ፤ መꬍና ጎዳ ቃላ ስሳ! ኡባ ሞድያ መꬍና ጎዳይ ሀዋዳን ያጌ፤ ‘ታን ነ ግዶን ታማ ኦይꬃና፤ ሄ ታማይ ነ እርጻ ምꬃካ ነ መላ ምꬃካ ኡባ ማና። ሄ ኤጽያ ታማይ ቶኤና፤ ገድሳፐ ቢደ፥ ሁጲሳ ጋካናዉ ደእያ አሳ ሶምኡዋ ኡባ ሄ ላጩ ላባና። 48 ታን መꬍና ጎዳይ ኦይꬄዳ ታማ ግድያዋ አሳይ ኡባይ በአና። ሄ ታማይ ቶኤና ያጌ’ ያጋ” ያጊደ ዬዳ።

49 ታን ዛራደ፥ “ሀእ ኡባ ሞድያ መꬍና ጎዳዉ፥ ሀዋ ታ ኦዳናዉ ታና አዛዞፓ። ኡንቱንቱ ታና፥ ‘እ ኡባቶ ሌምሱዋ ኦዴ ግደኔ?’ ያጊደ ሃሳዪኖ” ያጋድ።