1 መꬍና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ ነ ሶምኡዋ የሩሳላመኮ ዛራደ፥ አሳይ ጎይንያ ሳአቱዋ ቦላ ቃላ ኦዳ፤ እስራኤልያ ቢታ ቦላን ትምቢትያ ኦዳ። 3 ሀዋዳን ያጋ፤ መꬍና ጎዳይ ሀዋዳን ያጌ፤ ‘ታን ነዉ ሞርከ። ታን ታ ማሻ ሾኩዋፐ ሾዳደ፥ ጽሎ አሳነ ኢታ አሳ ኡባ ነ ግዱዋፐ ዉርሳና። 4 ጽሉዋነ ናጋራንቻ ኡባ ꬋይሳናዉ ሁጲሳፐ ገድሳ ጋካናዉ ደእያ አሳ ኡባ ቦላ ታ ማሻ ሾዳና። 5 ሄዋን ታን መꬍና ጎዳይ ታ ማሻ አ ሾኩዋፐ ሾዴዳዋነ ጉየ ዛረናዋ አሳይ ኡባይ ኤራና’ ያጌ” ያጋ።

6 ሄዋ ድራዉ፥ “አሳ ናአዉ፥ አሳይ ኡባይ ጼልሽን፥ ነ ዎዛናይ መእና ኦላ፥ ጫሞ ኡንአን ኦላ። 7 ኡንቱንቱ ኔና፥ ‘አያዉ ኦላይ?’ ጊደ ኦችያ ዎደ፥ ሀዋዳን ያጋ፤ ‘ስንꬃና ይያ ኢታ ኦዶ ኦላይ። ዎዛን ኡባይ ያሻን ሙሻና፤ ኩሽያ ኡባይ አርጋጫና፤ ኡንቱንቱ ጎባተꬃይ ኡባይ ኡንቱንቱፐ ክቻና፤ ጉልባታይ ኡባይካ ኮኮራና። ሄ ዎዲ ጋኬዳ! እ ኤለ ፖለታና! ታን ኡባ ሞድያ መꬍና ጎዳይ ሀዋ ኦዳይ’ ያጋ” ያጊደ ዬዳ።

8 መꬍና ጎዳ ቃላይ ታኮ ሀዋዳን ያጊደ ዬዳ፤ 9 “ላ አሳ ናአዉ፥ ሀዋዳን ያጋደ ትምቢትያ ኦዳ፤ ጾሳይ ሀዋዳን ያጌ፤ ‘ማሻ! ሌፈቴዳነ ቁጨቴዳ ማሻ! 10 ሹካናዉ ሌፈቴዳ። ዋልቃንꬃዳን ጶልቁ ጋናዉ ቁጨቴዳ። ታ አሳይ እመቴዳ ሴራነ ሙሩዋ ኡባ እጼዳ ድራዉ፥ ሀዋፐ ጉይያን፥ ኦንነ ናሸተና። 11 ጎኤታናዉ ማሻይ ቁጨቴዳ፤ ሌፈቲደነ ቁጨቲደ፥ ሹክያዎ እመቴዳ።

12 “ ‘ላ አሳ ናአዉ፥ ዬካነ ዝላላ! አያዉ ጎፐ፥ ሄ ማሻይ ጊገቴዳዌ ታ አሳ ቦላናነ እስራኤልያ ካፖቱዋ ኡባ ቦላና። ካፓቱካ ታ አሳና እትፐ ማሻን ሀይቃና። ሄዋ ድራዉ፥ ነ ትራ ባቃ። 13 ታን ታ አሳ ፓጫና፤ ኡንቱንቱ ናጋራ ፓጸናን እጾፐ፥ ሀ መቱ ኡባይ ኡንቱንቱ ቦላ ጋካናዋ። ታን ኡባ ሞድያ መꬍና ጎዳይ ሀዋ ኦዳይ ያጌ ያጋ።

14 “ ‘ሀእካ አሳ ናአዉ፥ ትምቢትያ ኦዳ፤ ነ ኩሽያካ ባቃ። ሄ ዎደ ማሻይ ላኡ ሄዙ ዛሪደ ሾጫና፤ ሄዌካ ዩሹዋ ኡባና ዩዪደ፥ ዳጋንꬅያ፥ ዎꬍያነ ሹክያ ማሻ። 15 ሄዌ ኡንቱንቱ ዎዛናይ ሙሻናዳንነ ኡንቱንቱፐ ዳሮቱ ꬉበታናዳን ኦꬃና። አየ አና! ማሻይ ኡባይ ገልያ ግምቢያ ፐንገቱዋን ዋልቃንꬃዳን ጶልቁ ጌ፤ ሾኩዋፐ ሾደቲደ ሹካናዉ ቁጨቴዳ። 16 ኔኖ፥ ቃራ ማሻዉ፥ ኡሸቻዉነ ሀድርሳዉ፥ ነ ስሜዳ ባጋ ኡባ ቡሳካ። 17 ታንካ ቃይ ታ ኩሽያ ባቃና፤ ታ ሀንቁካ ዶቻና።’ ታን መꬍና ጎዳይ ሀዋ ኦዳድ” ያጊደ ዬዳ።

18 መꬍና ጎዳ ቃላይ ታኮ ሀዋዳን ያጊደ ዬዳ፤ 19 “ላ አሳ ናአዉ፥ ባብሎነ ካትያ ማሻይ ይያ ላኡ ኦገቱዋን ማላ ዎꬃ። ላኡ ኦገቱካ እት ቢታፐ ደንዲኖ። ላኡ ኦገቱ ጋከትያ ዳንꬁዋን ካታማኮ አፍያ ሳኣን ማላ ግድያ ቱሳ ኤሳ። 20 እት ኦግያን ደእያ ማላይ ራባ ግያ አሞናቱዋ ካታማ ብያሳ ማሌ፤ ህንኩ ቃይ ይሁዳን ግምበቴዳ የሩሳላመ ካታማ ብያሳ ማሌ። 21 ባብሎነ ካቲ ኦገቱ ጋከትያ ዳንꬁዋን፥ ማላ ቱሳቱዋ ማታን ኤቄ። እ ሀቃ ኦግያ ባነንቶ ኤራናዉ፥ ዎንዳፍያ ማሻቱዋ ሳማ የጋና፤ ባረ ኤቃቱዋና ዞረታና፤ መህያ ማራጭያካ ጼላና። 22 ድርሳ ግምበቱዋ ፐንግያ ላልያ ዱሩማ አሀና ማላ፥ ዎꬋናዉ አዛዙዋ አꬃና ማላ፥ ጬቁዋ ጬቀታና ማላ፥ ድርሳ ግምበቱዋ ፐንግያ ላልያ ዱሩማቱዋ ካታማ ፐንግያን ኤሳና ማላነ ቢታ ኬላና ማላ፥ ግምቢያና ጋꬂደ ሚጻ ጊግሳና ማላ፥ የሩሳላመ ሳማይ አ ኡሸቻ ኩሽያን ዎꬌዳ። 23 የሩሳላመ አሳይ ባብሎነ ካትያና ጫቀቴዳ ድራዉ፥ ሀዌ ባረንቱ ቦላ ጋኬ ጊደ ቆፕበይክኖ። ሽን ባብሎነ ካቲ ኡንቱንታ ኡንቱንቱ ናጋራ ሀሳይሲደ፥ ኦሞዶ አፋና።

24 “ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ ‘ህንተ ናጋራይ ቆንጬዳ፤ ህንተ ባይዛንቻ አሳ ግድያዋ አሳይ ኡባይ ኤሬ፤ ህንተ ኦሱ ህንተ ናጋራንቻ ግድያዋ በሴ። ሄዋ ድራዉ፥ ህንተ ባይዙ ሀሳየታና፤ ህንተካ ህንተ ሞርክያዉ አꬊደ እመታና’ ያጌ።

25 “ኔኖ ኢታነ ቱና ግዴዳ እስራኤልያ ካፖ፥ ነ ዉርሰꬃ ፕርዳ ጋላሳይ ጋኬዳ። 26 ኡባ ሞድያ መꬍና ጎዳይ ሀዋዳን ያጌ፤ ‘ነ ሁጲያፐ ካላቻ ደንꬃ፤ ነ ሁጲያን ጻጼዳዋካ ቃራ። ሀዋፐ ስንꬃናዉ ካሰዋዳን ሀናናዌ ባዋ፤ ዝቂ ጌዳዌ ꬎቁ ጋና፤ ꬎቁ ጌዳዌካ ዝቂ ጋና። 27 ባሻ! ባሻ! ታን ሀ ካታማ ባይዛና! ፕርድያ ማታይ ደእያዌ ያና ጋካናዉ፥ ሀ ካታማይ ላኤንꬆ ኬጸተና። እ ይያ ዎደ ታን አዉ አꬃደ እማና’ ያጌ።

28 “ላ አሳ ናአዉ፥ ሀዋዳን ያጋደ ትምቢትያ ኦዳ፤ ‘እስራኤልያ ቦርያ አሞናቶ ኡባ ሞድያ መꬍና ጎዳይ ሀዋዳን ያጌ፤ “ማሻ! ማሻይ ዎꬋናዉ ሾኩዋፐ ሾደቴዳ፤ ኤር. 49:1-6፤ ህዝ. 25:1-7፤ አሞጻ 1:13-15፤ ሶፎ. 2:8-11 ዉርሳናዉነ ዋልቃንꬃዳን ጶልቁ ጋናዉ ቁጨቴዳ። 29 ህንተ በእያ ሳጻይ ዎርዱዋ፤ ህንተ ኦድያ ትምቢቲካ ዎርዱዋ። ህንተ ኢታነ ቱና አሳ፤ ህንተ ዉርሰꬃ ፕርዳ ጋላሳይ ጋኬዳ። ህንተ ቆꬍያን ማሻይ ዎꬋና ሀኔ። 30 ማሻ ሾኩዋን ዛርተ። ህንተ መቴዳ ሳኣን፥ ህንተ የለቴዳ ቢታን ታን ህንተ ቦላ ፕርዳና። 31 ታ ሀንቁዋ ህንተ ቦላ ጉሳና፤ ታ ሀንቁዋ ታማይ ህንተ ቦላ ኤጽ ከሳና። ህንተና ባይዝያዋን ሎሄዳ፥ መቀꬅ ባይና አሳቶ አꬃ እማና። 32 ህንተ ታማዉ ኤꬅያ ምꬃ ግዳና፤ ህንተ ሱꬃይ ህንተ ቢታን ጉካና፤ ህንተ ላኤንꬆ ሀሳየትክታ። ታን መꬍና ጎዳይ ሀዋ ኦዳድ” ያጌ’ ያጋ” ያጊደ ዬዳ።