1 መꬍና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ ሱꬃ ጉስያዋንቱ ኩሜዳ ካታማ ቦላ ፕርዳናዉ ጊጋዲ? ያቶፐ፥ እ ኦꬄዳ ቱና ኦሱዋ ኡባ አዉ ኦዳ። 3 ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ “ኔን ዳሮ አሳ ሱꬃ ጉሴዳ ድራዉነ ኤቃዉ ጎይንያዋን ኔና ቱንሴዳ ድራዉ፥ ነ ዎዲ ዬዳ። 4 ኔን ጉሴዳ ሱꬃን ባይዛንቻ ግዳዳ፤ ነ መꬌዳ ኤቃንካ ቱናዳ። ያትና፥ ነ ፕርዳ ጋላሳይ ማታቴዳ፤ ነ ዉርሰꬃ ላይꬃይካ ጋኬዳ። ሄዋ ድራዉ፥ ታን ኔና ካዉተꬃቶ ካꬍያዋነ ሀራ ቢታቶካ ቅሊጭያዋ ከሳና። 5 ኔኖ፥ ሱንꬅ ባዬዳነ ሻቢረቴዳ ካታማትዉ፥ ማታንነ ሃኩዋን ደእያዋንቱ ኔና ቅሊጫና።

6 “ ‘ “ነ ግዶን ደእያ እስራኤልያ ካፓቱ ኡባቱ ሱꬃ ጉሳናዉ ባረንቱ ዎልቃ አይ ኬሻ ጎኤትንቶ በአ። 7 ነ ግዶን ደእያዋንቱ ባረንቱ አዉዋነ ባረንቱ አቶ ቦንችክኖ፤ ኡንቱንቱ በተቱዋካ ኡቁኔድኖ፤ አምኤቱዋነ አዉ አታ ባይና ናናቱዋ ናቂኖ። ከሳ 20:12፤ 22:21-22፤ ዛረ. 5:16፤ 24:17 8 ኡንቱንቱ ታ ጌሻ የዎቱዋ ካꬊኖነ ታ ሳምባታካ ቱንሲኖ። ዎጋ 19:30፤ 26:2 9 ነ ግዶን ደእያዋንቱፐ እቱ እቱ ሀራቱዋ ዎꬍሳናዉ ዎርዱዋ ኦዲኖ፤ ሀራቱ ደርያ ቦላ ደእያ ኤቃዉ ጎይንያ ሳአቱዋን ሚኖ፤ ቃይ ሀራቱ ኡባባን ቱንያዋንቱ ነ ግዶን ደእኖ። 10 ነ ግዶን ደእያዋንቱፐ እቱ እቱ ባረ አዉዋ ማቻትና ግሲኖ፤ ሀራቱ ቃይ ፒላይ ዬዳ ማጫ ምሽራትና ዎልቃን ጋከቲኖ። ዎጋ 18:7-20 11 ነ ግዶን ደእያዋንቱፐ እቱ እቱ ባረ ሾሩዋ ማቻትና ግሲኖ፤ ባረ ናኣ ማቻትና ግሲኖ፤ ባረ አዉዋ ናት፥ ባረ ምቻትና ዎልቃን ግሲኖ። 12 ነ ግዶን ደእያዋንቱፐ እቱ እቱ ሚሻ አኪደ፥ ሸምፑዋ ዎꬊኖ፤ ሀራቱ ባረንቱ ሚሻ ድቻዉ እሚኖነ፥ ባረንቱ ሾሩዋ ሚሻ ያሽሲደ አኪኖ። ቃይ ህንተ ታና ኡባካ ዶጌድታ። ታን ኡባ ሞድያ መꬍና ጎዳይ ሀዋ ኦዳይ። ከሳ 22:25፤ 23:8፤ ዎጋ 25:36-37፤ ዛረ. 16:19፤ 23:19

13 “ ‘ “ነ ግዶን ደእያ አሳይ በሰና ሚሻ አክያ ድራዉነ ሸምፑዋ ዎꬍያ ድራዉ፥ ታን ሀንቁዋን ታ ኩሽያ ባቃና። 14 ታን ኔና ሙርያ ጋላስ ነ ጎባተꬃይ ኔናና ደአኔ? ዎይ ነ ኩሺ ምኖ ግዳኔ? ታን መꬍና ጎዳይ ሀዋ ኦዳድ፤ ታን ኦዴዳዋ ታንካ ኦꬃና። 15 ታን ነ አሳ ካዉተꬃቱዋ ግዶንነ ሀራ ቢታቱዋ ግዶን ላላና፤ ነ ቱናተꬃካ ታን ነ ቦላፐ ꬋይሳና። 16 ሀራ ካዉተꬃቱዋ ስንꬃን ኔን ካዉሻና፤ ሽን ሄ ዎደ ታን መꬍና ጎዳ ግድያዋ ኔን ኤራና” ያጌ’ ያጋ” ያጊደ ዬዳ።

17 ሄዋፐ ጉይያን፥ መꬍና ጎዳ ቃላይ ታኮ ሀዋዳን ያጊደ ዬዳ፤ 18 “ላ አሳ ናአዉ፥ እስራኤልያ አሳይ አይነ ፓና ብራታ ሽኣ ማላ፤ ኡንቱንቱ ኡባይካ ብራ ሙሽሲደ ጌሽያ ዎደ፥ ሽኣ ግዲደ አትያ ናሃስያ፥ ቆርቆሩዋ፥ ብራታነ እርሳስያ ማላ። 19 ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ ‘ህንተ ኡባይካ ብራታ ሽኣ ማላ ግዴዳ ድራዉ፥ ታን ህንተና ኡባካ የሩሳላመ ግዶ ሺሻና። 20 አሳይ ብራ፥ ናስያ፥ ብራታ፥ እርሳስያነ ቆርቆሩዋ ታማ ጮጭያኮ ሺሺደ ዎምፒናን ፑኒደ ሙሽስያዋዳን፥ ታን ታ ሀንቁዋንነ ታ ይሉዋን ህንተና ሺሻደ፥ ካታማ ግዶን ሙሽሳና። 21 ታን ህንተና ሺሻደ፥ ታ ሀንቁዋ ታማ ህንተ ቦላ ዎምፒና ፑንና፥ ህንተ ሄዋን ሙሻና። 22 ብራይ ጮጭያን ሙሽያዋዳን፥ ህንተ የሩሳላመን ሙሻና። ሄ ዎደ ታን መꬍና ጎዳይ ታ ሀንቁዋ ህንተ ቦላ ጉሴዳዋ ህንተ ኤራና’ ያጌ” ያጊደ ዬዳ።

23 መꬍና ጎዳ ቃላይ ታኮ ዛሪደካ ሀዋዳን ያጊደ ዬዳ፤ 24 “ላ አሳ ናአዉ፥ ኡንቱንቱ ቢታይ ቱኔዳ ድራዉ፥ ታ ሀንቁዋን እራይ ቡከናዳን ድጋደ፥ ታን እስራኤልያ አሳ ሙሩዋ ዶሞዋ ኡንቱንቶ ኦዳ። 25 ኡንቱንቱ ካፓቱ ባረ ዎꬌዳዋ ጉዲደ መንሬꬅያ ጋሙዋ ማላ፤ ኡንቱንቱ አሳ ዎꬊኖ፤ አልኦ ሚሻ ግድና፥ ሀራ ዱረታ ግድና፥ ኡባ ባረንቶ አኪኖ፤ ኡንቱንቱ ሄ ቢታን ዳሮ ማጫ አሳ አምኤ ከሴድኖ። 26 ቄሳቱ ታ ህግያ መንꬄድኖ፤ ታ ጌሻባካ ቱንሴድኖ። ጌሻነ ቱና ሻክክኖ፤ ቃይ ቱናፐነ ቱና ግደናዋፐ ግዱዋን ደእያ ዱማተꬃ ታማርስክኖ፤ ታ ሳምባታዉ ጋትያ እምበይክኖ። ሄዋፐ ደንዴዳዋን፥ ታን እስራኤልያ አሳ ግዶን ቦንቼታበይከ። ዎጋ 10:10 27 አ ግዶን ደእያ ካፓቱ ባረንቱ ዎꬌዳዋ ዱሰረꬅያ ኦኮሮቱዋ ማላ፤ ኡንቱንቱ ባረንቶ በሰና ዱረተꬃ ደማናዉ ሸምፑዋ ዎꬊኖ። 28 የሩሳላመ ካታማን ትምቢትያ ኦድያዋንቱ ጎዳ ቦሹንቻ ኦክያ አሳዳን፥ ዎርዱዋ ሳፃ በእያዋንነ ዎርዱዋ ትምቢትያ ኦድያዋን፥ ኡንቱንቱ ናጋራ ገንꬂኖ። መꬍና ጎዳይ ኦደናን ደእሺና፥ ‘ኡባ ሞድያ መꬍና ጎዳይ ሀዋዳን ያጌ’ ያጊኖ። 29 ሄ ቢታ አሳቱ ቦንቂኖ፤ ዛራፍኖ፤ ህዬሳቱዋነ መቶታንቻቱዋ ኡቁኒኖ፤ ኡንቱንቱ በተቱዋካ ኡንኤꬂደ ሱረ ፕርዳ ጌላዪኖ።

30 “ታን ቢታ ꬋይሰናዳን፥ ድርሳ ግምቢያ ኬጽያ፥ ኮለቴዳ ድርሳ ፐንግያ ባጋና ኤቂደ ናግያ እት አሳ ኮያድ፤ ሽን ኦናነ ደማበይከ። 31 ሄዋ ድራዉ፥ ታ ሀንቁዋ ኡንቱንቱ ቦላ ጉሳና፤ ታን ታ ሀንቁዋ ታማን ኡንቱንታ ꬋይሳና፤ ታን ኡንቱንቱ ኦꬄዳ ኦሱዋ ኡንቱንቱ ቦላ ዛራና። ኡባ ሞድያ መꬍና ጎዳይ ሀዋ ኦዳይ” ያጊደ ዬዳ።