1 መꬍና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ እት አትፐ የለቴዳ ላኡ ማጫ አሳቱ ደኢኖ። 3 ኡንቱንቱ ግብጼን ደኢድ፥ ባረንቱ ያላጋተꬃፐካ ዶሚደ፥ ሻርሙጻ ግዴድኖ። ሄ ቢታን ኡንቱንቱ ꬋንꬃን አቱማ አሳይ ካኤዳ፤ ኡንቱንቱ ዎዶሮተꬃይካ አከቴዳ። 4 ኡንቱንቱፐ ባይራት ሱንꬃይ ኦሆሎ *ኦሆሎ፦ ሀ ሱንꬃ ብለꬃይ እብራዌꬁዋን፥ “እ ጌሻ ጎልያ” ግያዋ። ቃይ እ ምቻት ቴፋት ሱንꬃይ ኦሆልቦ †ኦሆልቦ፦ ሀ ሱንꬃ ብለꬃይ እብራዌꬁዋን፥ “ታ ጌሻ ጎሊ እዝና” ግያዋ። ኡንቱንቱ ላኡዋካ ታን አክና፥ ታዉ አቱማነ ማጫ ናናቱዋ የሌድኖ። ኦሆላ ሳማራቶ፤ ኦሆልባ ቃይ የሩሳላሞ።

5 “ኦሆላ ታዉ ማቻቶ ግዳደ ደኣደካ ሻርሙጻዱ፤ እዛ ባረ ላገꬃት አሶረ ዎታዳራቱዋ አሙዋን ጹገታደ ካላዱ። 6 ኡንቱንቱ ሳሉዋ ማላትያ ማዩዋ ማዬዳ ኦላንቻቱዋ፥ ቢታ ሞድያዋንታነ ኦላ ጋዳዋቱዋ፤ ኡንቱንቱ ኡባይካ ማልሳሳ፥ ያላጋ አቱማ አሳቱዋነ ፓራ ቶግያ ፓራ አሳቱዋ። 7 እዛ ባረና ሻርሙጻ ኦꬃደ፥ ኡባፐ ሎእያ አሶረ አቱማ አሳቶ እማዱ። እ ሻርሙጻተꬃይ አሶረ ቢታ ኤቃቶ ጎይናደ፥ ቱናናዳን እዞ ኦꬄዳ። 8 አ ግብጼን ዶሜዳ ሻርሙጻተꬃ ሀእካ አጋ በይኩ፤ እ ያላጋተꬃፐ ዶሚደ፥ አቱማ አሳቱ እ ꬋንꬃ ካኢኖነ ኢናና ሻርሙጺኖ።

9 “ሄዋ ድራዉ፥ እዛ ምንሳደ አሙዋን ሲቅያ አሶረ ቢታ ላገꬃቶ ታን እዞ አꬃደ እማድ። 10 ኡንቱንቱ እዞ ቃሪደ ካሎዬድኖ፤ እዝ አቱማነ ማጫ ናናቱዋ ኦሞድ ኦይቄድኖ፤ እዞካ ማሻን ዎꬌድኖ። ባረና ጋኬዳ ፕርዳ ጋሱዋን፥ ማጫ አሳቱዋ ግዶን ቅሊጭያዋ ግዳዱ።

11 “እ ምቻታ ኦሆልባ ሀዋ በኣዱ፤ እዛ ባረ አሙዋንነ ባረ ሻርሙጻን ባረ ምቻትፐ ቱና ዳራዱ። 12 አካ ቃይ አሶረ ቢታ ሞድያዋንታ፥ ኦላ ጋዳዋቱዋ፥ ሎኦ ማዩዋ ማዬዳ ኦላንቻቱዋነ ፓራ ቶግያ ፓራ አሳቱዋ፥ ኡባቱካ አሞይያ፥ ያላጋ አሳቱዋ ምንሳደ ሲቃዱ። 13 አካ ባረና ቱንሴዳዋ በኣዱ፤ ኡንቱንቱ ላኡካ እት ኦግያ ቢኖ።

14 “እዛ ባረ ሻርሙጻተꬃ ያ ዳርሳዱ፤ እዛ አቱማ አሳቱዋ ምስሊ ጎዳ ቦላን ዎጨት መቴዳዋ፥ ዞኦ ቃላምያን ኦከት ኡቴዳዋ በኣዱ። 15 ኡንቱንቱ ባረንቱ ጼሳን ዝናርያ ዳንጬዳዋንታነ ባረንቱ ሁጲያንካ ሎእያ ጫርቂያ ጻጼዳዋንታ። ኡንቱንቱ ኡባይካ ካላዳዋናቱዋ ቢታፐ ዬዳ ባብሎነ ካፖቱዋ ማላቲኖ። 16 እዛ ኡንቱንቱ ምስለቱዋ በኦሳናካ ዳሮ አሙዋ ጹገታደ፥ ኡንቱንታ ጼሳናዉ ባብሎነ ቢታ አሳ ኪታዱ። 17 ያትና፥ ባብሎነቱ ኢኮ ዪደ፥ ኢናና ሻርሙጺደ፥ እዞ ቱንሴድኖ። ቱኔዳዋፐ ጉይያን፥ እዛ ኡንቱንታካ ሸነታደ፥ ዎራ ስማዱ። 18 እዛ ባረ ሻርሙጻተꬃ ቆንጭያን ኦꬄዳ ዎደነ ባረ ካሉዋ ቃራ በሴዳ ዎደ፥ ታን እ ምቻትፐ ዎራ ስሜዳዋዳን፥ ኢፐካ ሸነታደ ዎራ ስማድ። 19 ሽን እዛ ግብጼን ሻርሙጻ ግዳደ ደእያ፥ ባረ ያላጋተꬃ ዎድያ ሀሳያደ፥ ባረ ሻርሙጻ ካሰዋፐ ያ ዳርሳዱ። 20 ኡንቱንቱ አቱማተꬃይ ሀርያዋ ማላ፥ ኡንቱንቱፐ ከስያ ዘረꬃይካ ፓራዋ ማላ ግዴዳ ባረ ላገꬃቱዋ አሙዋን ካላዱ። 21 (ኔኖ፥ ኦሆልቤ፥ ነ ያላጋተꬃ ዎደ፥ አቱማዋንቱ ነ ꬋንꬃን ካእሽና፥ ነ ዎዶሮተꬃካ አክሽና፥ ኔን ፖሌዳ ሻርሙጻተꬃ ዛራደካ ሀእ ኦꬃናዉ አሞታሳ።)

22 “ሄዋ ድራዉ፥ ኦሆልቤ፥ ኡባ ሞድያ መꬍና ጎዳይ ሀዋዳን ያጌ፤ ‘ታን ነ ላገꬃቱዋ፥ ሄ ኔን ሸነታደ ዎራ ስሜዳዋንታ ነ ቦላ ደንꬃና፤ ታን ኡንቱንታ ነ ቦላ ኡባ ሳና አሀና። 23 ኡንቱንቱካ ባብሎነቱዋነ ካላዳዌቱዋ ኡባ፥ ፓቆዳ፥ ሾአነ ቆኣና አቱማ አሳቱዋ፥ አሶረቱዋ ኡባ፥ አሞይያ ያላጋ አሳቱዋ፥ ቢታ ሞድያዋንታ፥ ኦላ ጋዳዋቱዋ፥ ኦላንቻቱዋ፥ ካፓቱዋነ ፓራ ቶግያ ፓራ አሳቱዋ። 24 ኡንቱንቱ ኦላ ፓራ ጋረቱዋና፥ ጫና ጋረቱዋናነ ዳሮ ኦላንቻቱዋና ሁጲሳ ባጋፐ ህንተ ቦላ ያና። ኡንቱንቱ ዎጋ ጎንዳልያነ ቄር ጎንዳልያ ኦይቂደ፥ ብራታ ቆብያ ዎꬂደ፥ ነ ዩሹዋን ሳልፓና። ታን ኔና ኡንቱንቱን ፕርድሳና፤ ኡንቱንቱካ ኔና ባረንቱ ዎጋዳን ፕርዳና። 25 ሀንቁዋ ነ ቦላ የዳና፤ ኡንቱንቱካ ኔናና ሀንቁዋ ሱሉዋን ጋከታና። ኡንቱንቱ ነ ሲꬍያነ ነ ሀይꬃ ቃንጻና፤ ኔፐ አቴዳዋንቱካ ማሻን ቡሳከታና። ኡንቱንቱ ነ አቱማ ናናቱዋነ ነ ማጫ ናናቱዋ ኦይቃና፤ ኔፐ አቴዳዋንታካ ታማን ጹጋና። 26 ኡንቱንቱ ነ ማዩዋ ኡባ ኔፐ ቃር አካና፤ ነ አሌቆ ኡባካ ኔፐ ከስ አካና። 27 ሄዋዳን ኦꬃደ፥ ኔን ግብጼፐ አሄዳ ሻርሙጻተꬃ ቃቃነ ነ ሻርሙጻተꬃ ኡባ ታን ኔና አግሳና። ኔን ላኤንꬆ ግብጼቱዋ ኤቃ ምስለቱዋ ꬎቁ ጋደ ጼለናዳን፥ ዎይ ኡንቱንታ ሀሳየናዳን፥ ታን ኔና ኦꬃና’ ያጌ።

28 “ኡባ ሞድያ መꬍና ጎዳይ ሀዋዳን ያጌ፤ ‘ታን ኔና ኔን እጽያዋንቶ፥ ኔን ሸነታደ፥ ኡንቱንቱፐ ዎራ ስሜዳዋንቶ አꬃደ እማና። 29 ኡንቱንቱ ኔና እጻናነ ኔን ዳቡራደ ደሜዳዋ ቦንቂ ድጊደ፥ ኔና ካሎ ጺራ አሻና። ነ ሻርሙጻተꬃ ፖኩ ቆንጫናዳን ኦꬃና። ነ ዚታይነ ነ ሻርሙጻተꬃ አሙ፥ 30 ሀዋ ነ ቦላ አሄዳ። አያዉ ጎፐ፥ ኔን ካዉተꬃቱዋና ሻርሙጻዳ፤ ኡንቱንቱ ኤቃቱዋን ኔና ቱንሳዳ። 31 ነ ምቻታ ቤዳ ኦግያ ኔንካ ባዳ። ሄዋ ድራዉ፥ ኔናካ ታን እ ጹኣ ኡሻና’ ያጌ።

32 “ኡባ ሞድያ መꬍና ጎዳይ ሀዋዳን ያጌ፤ ‘ኔን ነ ምቻት ጹኣፐ ኡሻና፤ ሄ ጹአይካ ዎልቃማነ ጭንአ። እ ትግና፥ ዳሩዋ አክያ ድራዉ፥ ነ ቦላ ቅꬍያነ ሚቻ አሀና። 33 ኔን ማꬁዋ ጆላናነ ካዮታና። ሄዌ ሄ ነ ምቻት ሳማርያ ጹአይ ዳጋማነ ባየꬃ ጹኣ። 34 ነ አ ጭንግርሳደ ኡሻና፤ ጹኣካ መንꬃና፤ መንꬄዳ ኮንአንካ ነ ꬋንꬃ ጋራና። ኡባ ሞድያ መꬍና ጎዳይ ሀዋ ኦዳይ’ ያጌ።

35 “ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ ‘ኔን ታና ዶጌዳ ድራዉነ ታዉ ዞክያ ዛሬዳ ድራዉ፥ ኔን ነ አሙዋነ ነ ሻርሙጹዋ ጋትያ አካና’ ያጌ” ያጊደ ዬዳ።

36 መꬍና ጎዳይ ታና ሀዋዳን ያጌዳ፤ “ላ አሳ ናአዉ፥ ኦሆል ቦላነ ኦሆልብ ቦላ ፕርዲቴ? ፕርዶፐ፥ ኡንቱንቱ ኦꬄዳ ቱና ኦሱዋ ኡንቱንቶ ኦዳ። 37 ኡንቱንቱ ላኡካ ሻርሙጼድኖነ ሸምፑዋ ዎꬌድኖ። ኡንቱንቱ ባረንቱ ኤቃዉ ጎይኔድኖ። ሀራይ አትና፥ ኡንቱንቱ ታዉ የሌዳ ባረንቱ አቱማ ናናቱዋካ ባረንቱ ኤቃቶ ቁማ ኦꬂደ ያርሼድኖ። 38 ሄዋፐካ ሀራባ ኡንቱንቱ ታ ቦላ ኦꬄድኖ፤ ኡንቱንቱ ታ ጌሻ ጎልያ ቱንሴድኖ፤ ኤቃቶ ያርሼዳ ጋላስ ታ ሳምባታካ ሻሬድኖ። 39 ኡንቱንቱ ባረንቱ ናናቱዋ ኤቃቶ ያርሼዳ ጋላስ፥ ሄ ጋላስ ኡንቱንቱ ታ ጌሻ ጎልያ ገሊደ ቱንሴድኖ። ኡንቱንቱ ታ ጎልያን ኦꬄዳዌ ሀዋ።

40 “ሄዋዳንካ ቃይ፥ ኡንቱንቱ ሃኮ ሳፐ አቱማ አሳቱ ያናዳን፥ አሳ ኪቴድኖ፤ ኡንቱንቱካ ዬድኖ። ህንተ ላኡ ምቼቱ ህንተ ቦላ ሜጨቴድታ፤ ህንተ አይፍያካ ቃላምያ ኦኬድታ፤ አሌቁዋካ ዎꬄድታ። 41 ጻርጴዛይ ስንꬃን ደእያ ሎኦ አርሳ ቦላ ኡቴድታ፤ ህንተ ሄ ጻርጴዛ ቦላን ታ እጻናነ ታ ዎጋራ ዛይትያ ዎꬄድታ። 42 ህርግ ባይና አሳ ኮሻይ ህንተ ማታን ስሰቴ፤ ማꬆቴዳዋንቱካ ማራይ ባይና አሳና ባዙዋፐ ዬድኖ። ህንተ ኩሽያን ሳጋየቱዋ ዎꬄድኖ፤ ቃይ ሎእያ ካላቻቱዋካ ህንተ ሁጲያን ዎꬄድኖ።

43 “ታን ታ ዎዛናን፥ ‘ሀዋንቱ አቱማ አሳቱ ሀ ቦላይ ሻርሙጻን ዉር ክቼዳ ማጫ አሳቱዋና ደኡካ አ ግዴዳዋንቱና ሻርሙጻና ጊደ ሀኒኖ?’ ያጋድ። 44 አቱማ አሳይ ሻርሙጻትና ሻርሙጽያዋዳን፥ ኡንቱንቱ ኡንቱንቱና ሻርሙጼድኖ። ኤ፥ ኡንቱንቱ ሄ ሻርሙጻናዉ ቃቃትያ ኦሆሊናነ ኦሆሊብና ሻርሙጼድኖ። 45 ኡንቱንቱ ሻርሙጻ ግድያ ድራዉነ ሸምፑዋ ዎꬍያ ድራዉ፥ ጽሎ አሳቱ ሻርሙጻቱዋ ቦላነ ሸምፑዋ ዎꬍያዋንቱ ቦላ ፕርድያ ፕርዳ ኡንቱንቱ ቦላ ፕርዲኖ” ያጌዳ።

46 ኡባ ሞድያ መꬍና ጎዳይ ሀዋዳን ያጌ፤ “ኡንቱንቱ ቦላ ዳሮ አሳቱዋ ደንꬃ አካደ ያ። ኡንቱንታ ሻቢርስያነ ኡንቱንታ ቦንቂያ አሳቶ አꬃደ እማ። 47 ሀ ሻቢርያ አሳቱ ዪደ፥ ኡንቱንታ ሹቻን ጫድኖነ ማሻን ቡሳክኖ፤ ኡንቱንቱ ኡንቱንቱ አቱማነ ማጫ ናናቱዋ ዎꬋና፤ ኡንቱንቱ ጎልያካ ታማን ጹግኖ። 48 ማጫ አሳይ ኡባይ ህንተና ቁለናዳን ዱꬃናዉ፥ ታን ቢታ ኡባፐ ሻርሙጻተꬃ ኤሳና። 49 ህንተ ላኡ ምቼቱ ህንተ ሻርሙጻተꬃ ሙሩዋነ ኤቃቶ ህንተ ጎይኔዳ ናጋራ ጋትያ አካና። ሄ ዎደ ታን ኡባ ሞድያ መꬍና ጎዳ ግድያዋ ህንተ ሄዋን ኤራና” ያጌ።