1 ኑን ኦሞደቴዳ ኡዱፑንꬃ ላይꬃን፥ ታማንꬃ አግናን፥ ታማንꬃ ጋላሳን፥ መꬍና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ ሀዋ ሀች ጋላሳ ማዝጎብያን ጻፋ። አያዉ ጎፐ፥ ባብሎነ ካቲ የሩሳላመ ዶዴዳዌ ሀቻ። 2 ካታ. 25:1፤ ኤር. 52:4 3 ሀ ማካላንቻ አሳዉ ሀ ሌምሱዋ ኦዳ፤ ‘ኡባ ሞድያ መꬍና ጎዳይ ሀዋዳን ያጌ፤ “ማዳብያ ድስትያ ታማን ዎꬃደ፥ ሃꬃ አን ትጋ። 4 ያታደ ገድያነ አንጎሱዋ ማላትያ ሎኦ አሹዋ ኡባ ሙጻደ፥ አን የጋ፤ ሎኦ መቀꬃካ ቃንጸሬꬃደ፥ አን ኩንꬃ። 5 ሄዎ ኔን አካና ዶርሳይነ ዴሻይ ዉድያፐ ዶረቴዳዋ ግዶ። ምꬃ ድስትያፐ ጋርሳና ማራደ፥ አሹዋካ መቀꬃካ ካአና ጋካናዉ ዶይሳ” ያጌ’ ያጋደ ኦዳ።

6 “ኡባ ሞድያ መꬍና ጎዳይ ሀዋዳን ያጌ፤ ‘ሱꬃ ጉስያዋንቱ ካታማትዉ አየ አና! ሽኢደ ኡባካ ጌየናን እጼዳ ማዳብያ ድስትያ ማላ እዛ ግዳዱ። እ ግዶን ደእያ ሙጸቴዳ አሹዋ ኡባ ሳማ የገናን ኩሽያን ጋከቴዳዋ፥ እቱዋ እቱዋ ከሳደ አካ።

7 “ ‘አያዉ ጎፐ፥ ሄ ካታማታ ዎꬌዳ አሳ ሱꬃይ ሀኖ ጋካናስካ ኢናን ደኤ፤ ሱꬃ ጉሳደ፥ ባናን ካማናዉ ቢታን ጉሰናን፥ አያይነ ካመና ዛላ ቦላን ጉሳዱ። 8 ሀሉዋ ከሳናዉ፥ ታ ሀንቁዋ ደንꬃናዳን፥ እ ካመተና ማላ፥ እዛ ጉሴዳ ሱꬃ ታን ዛላ ቦላን ዎꬃድ’ ያጌ።

9 “ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ ‘ሱꬃ ጉስያ ካታማትዉ አየ አና! ታንካ ምꬃ ሎይꬃ ጉፓና። 10 ሄዋ ድራዉ፥ ዳሮ ምꬃ ዎꬃ፤ ታማካ ኤꬃ። አሹዋ ሎይꬃደ ዶይሳ፤ ጫባካ ማልኤꬃ፤ መቀꬃይ ጹገቶ። 11 እ ሱሊደ ፐንትና፥ አ ቦላን ደእያ ማዳቢካ ቦንቂና፥ አ ቦላን ደእያ ቅታይ ሴራናዳንነ አ ቦላን ደእያ ሽአይ ጹገት ꬋያናዳን፥ መላ ድስትያ ታማ ቦንቁዋ ቦላ ዎꬃ። 12 ሄ ዳቡራይ ኡባይ ጮ መላ ግዴዳ፤ አ ቦላን ደእያ ዳሮ ሽአይ ሀራይ አቶ፥ ታማንካ ክችቤና። 13 ሀነ የሩሳላመ፥ ኔን ቱኔዳዌ ነ ኢታ ኦሱዋና። ታን ኔና ጌሻናዉ ዳቡርናካ፥ ኔን ነ ቱናተꬃፐነ ነ ኢታ ኦሱዋፐ ጌየናን እጼዳ ድራዉ፥ ነ ቦላን ታ ሀንቁ ዉራና ጋካናዉ፥ ኔን ላኤንꬆ ጌያካ። 14 ታን መꬍና ጎዳይ ሀዋ ኦዳድ፤ ሀዌ ሀናና። ታን ጉየ ስምከ፤ ቃረትከ፤ ታ ቆፋ ላምከ። ነ ኦግያዳንነ ነ ኦሱዋዳን፥ ታን ኔና ፕርዳና። ታን ኡባ ሞድያ መꬍና ጎዳይ ሀዋ ኦዳይ’ ያጌ” ያጊደ ዬዳ።

15 መꬍና ጎዳ ቃላይ ቃይካ ታኮ ሀዋዳን ያጊደ ዬዳ፤ 16 “ላ አሳ ናአዉ፥ ኔን ሲቅያነ ነ አይፍያዉ ሎእያ ነ ማቻቶ ታን እት ኩꬃን ዎꬋ አጋና። ሄዋን ካዮቶፓ፥ ዬኮፓነ አፎጾፓ። 17 ኦላ፥ ሽን ነ ኦልያ አሳይ ስሶፖ፤ ሀይቄዳዎ ካዮቶፓ። ኔን ነ ሁጲያን ጻጽያዋ ጻጻ፤ ነ ገድያንካ ጫማ ዎꬃ። ነ ዶና ካሞፓ፤ ሾቻካ ሞፓ” ያጊደ ዬዳ።

18 ዎንታ ታን አሳዉ ኦዳድ፤ ሄ ጋላስ ኦማርስ ታ ማቻታ ሀይቃዱ። ዎንተꬃ ጋላስ ዎንታ ጾሳይ ታና አዛዜዳዋዳን ኦꬃድ። 19 ያትና፥ አሳይ ታና፥ “ሀ ኔን ኦꬅያዎ ብለꬃይ አየንቶ ኑዉ አያዉ ኦድኪ?” ያጊደ ኦቼዳ።

20 ታን ኡንቱንቶ ሀዋዳን ያጋደ ዛራድ፤ “መꬍና ጎዳ ቃላይ ታኮ ሀዋዳን ያጊደ ዬዳ፤ 21 ‘እስራኤልያ አሳ ሀዋዳን ያጋ፤ ኡባ ሞድያ መꬍና ጎዳይ ሀዋዳን ያጌ፤ ህንተ ጬቀትያ፥ ህንተ አይፍያዉ ሎእያነ ህንተ ሸምፑ አሞትያ ታ ጌሻ ጎልያ ታን ቱንሳና ሀናይ። ህንተ ጉየ አሼዳ ህንተ አቱማ ናናቱነ ህንተ ማጫ ናናቱ ማሻን ዉራና። 22 ሄ ዎደ ታን ኦꬄዳዋዳን፥ ህንተካ ኦꬃና። ህንተ ዶና ካምክታ፤ ሾቻካ ሚክታ። 23 ህንተ ሁጲያ ጻጺታ፤ ህንተ ገድያን ጫማ ዎꬂታ። ካዮትክታ ዎይ ዬክክታ። ሽን ህንተ ህንተ ናጋራ ጋሱዋን ግልቃናነ እቱ እቶ ኦላና። 24 ሄ ዎድያን ህዝቄል ህንተዉ ማላታ ግዳናዋ፤ ኡባባካ እ ኦꬄዳዋዳን፥ ህንተ ኦꬃና። ሀዌ ሀንያ ዎደ፥ ታን ኡባ ሞድያ መꬍና ጎዳ ግድያዋ ህንተ ኤራና’ ያጌ” ያጋ።

25 ጾሳይ ታና ሀዋዳን ያጌዳ፤ “ላ አሳ ናአዉ፥ ታን ኡንቱንቱ ናሸቻነ ቦንቹዋ፥ ኡንቱንቱ አይፍያዉ ሎእያባነ ኡንቱንቱ ዎዛናይ አሞትያባ፥ ቃይ ምኖ ግዴዳ ጌሻ ጎልያ፥ ኡንቱንቱ አቱማ ናናቱዋነ ኡንቱንቱ ማጫ ናናቱዋ ኡንቱንቱፐ ዎꬃ አካና። 26 ሄ ጋላስ ነዉ ዎርያ ኦዳናዉ እት ከስ አኪደ አቴዳ አሳይ ያና። 27 ሄ ጋላስ ነ ዶናይ ዶየታና፤ ኔንካ አናና ሃሳያና፤ ላኤንꬆ ዱደ ከሳካ። ሄዋዳን ሀናደ፥ ኔን አሳዉ ማላታ ግዳናሳ። ታን መꬍና ጎዳ ግድያዋ ኡንቱንቱ ሄዋን ኤራና ያጌዳ ያጊደ ዬዳ” ያጋድ።