1 መꬍና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ ጺሮሳ ካፑዋ ሀዋዳን ያጋደ ኦዳ፤ ‘ኡባ ሞድያ መꬍና ጎዳይ ሀዋዳን ያጌ፤ “ነ ዎዛናይ ኦቶረቴዳ ድራዉ፥ ታን ጾሳ፤ ታን አባ ግዶ ግሸቻን፥ ጾሳቱዋ አራታን ኡታድ ያጋዳ። ኔን፥ ታን ጾሳዳን፥ አꬌዳ ኤራንቻ ከሳድ ጋደ ቆፖፐነ፥ ኔን አሳፐ አትና፥ ጾሳ ግዳካ። 3 ኔን ዳኔላፐካ አꬌዳ ኤራንቼ? አይ ጹራይካ ኔፐ ጌመኔ? 4 ቱሙካ ኔን ነ አꬌዳ ኤራንነ ነ አኬካን ዱረ ግዳዳ፤ ብራነ ዎርቃ ነ ዱረታ ምንጅያ ጎልያ ሺሻዳ። 5 ነ ዛልእያ ኤራን ዳሮ ዎꬍያ ደማዳ፤ ነ ዱረታፐ ደንዴዳዋን ነ ዎዛናይ ኦቶረቴዳ” ያጌ።

6 “ ‘ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ “ኔን፥ ታን ጾሳዳን፥ አꬌዳ ኤራንቻ ጋደ ቆፕያ ድራዉ፥ 7 ታን ነ ቦላ ካዉተꬃቱዋ ኡባፐ መቀꬅ ባይና፥ ኢታ ሞርከቱዋ አሀና፤ ኔን ነ አꬌዳ ኤራን ሺሼዳ ማጹዋ ኡባ ኡንቱንቱ ባረንቱ ማሻን ꬋይሳና፤ ነ ቦንቹዋካ ኡንቱንቱ ቱንሳና። 8 ኔና ኡንቱንቱ ዎꬊደ፥ አባ ጪማን ኦላና። 9 ያትና፥ ኔና ዎꬋና ሀንያዋ ስንꬃን ኔን፥ ቱሙ ታን ጾሳ ጋኒ? ኔና ዎꬍያዋንቱ ኩሽያን ኔን አሳፐ አትና፥ ጾሳ ግዳካ። 10 ኔን አላጋቱዋ ኩሽያን አማነና አሳይ ሀይቂያ ሀይቁዋ ሀይቃና። ታን ኡባ ሞድያ መꬍና ጎዳይ ሀዋ ኦዳድ” ያጌ’ ያጋ” ያጊደ ዬዳ።

11 ቃይካ መꬍና ጎዳ ቃላይ ታኮ ሀዋዳን ያጊደ ዬዳ፤ 12 “ላ አሳ ናአዉ፥ ጺሮሳ ካትያዉ ሀዋዳን ያጋደ ዝላላ፤ ‘ኡባ ሞድያ መꬍና ጎዳይ ሀዋዳን ያጌ፤ “ኔን ካሰ አꬌዳ ኤራን ኩሜዳዋ፤ ኔን አሳይ ሌምሲደ ኦድያ አꬌዳ ፑላንቻ ግዳዳ። 13 ኔን ኤደነን፥ ጾሳ ገነትያን ካሰ ደኣዳ፤ ሳርድዮነ፥ ቶጳዝዮነ፥ አልማዘ፥ ብራለ፥ ማርግደ፥ ያስጲደ፥ ሳምፔረነ ባሉራ ጌተትያ አልኦ ሹቻን አሌቀታደ፥ ሎኦ ዎርቃ አሌቁዋ ካሰ ማያዳ፤ ኔን መቴዳ ጋላስ ሀዌ ኡባይ ነዉ ጊጌዳ። 14 ታን ኔና ናግያ ክሩበ ኦꬃደ ሱንꬃድ፤ ያታደ ኔና ኦካድ። ታ ጌሻ ደርያ ቦላን ኔን ደኣዳ፤ ቃይ ታማዳን ጶልያ አልኦ ሹቻቱዋ ግዶን ስመረታዳ።

15 “ ‘ “ኔን መቴዳ ጋላሳፐ ዶማደ፥ ኢታባይ ነ ቦላ ቤቴዳ ጋላሳይ ጋካናዉ፥ ነ ኦግያ ኡባን ቶሺ ባይናን ደኣዳ። 16 ነ ዳሮ ዛልእያፐ ደንዴዳዋን፥ ማካላን ኩማደ፥ ናጋራ ኦꬃዳ። ሄዋ ድራዉ፥ ታ ጌሻ ደርያፐ ቱናባዳን፥ ኔና ዎልቃን ከሳድ። ኔኖ፥ ናግያ ክሩብያዉ፥ ሄ ታማዳን ጶልያ አልኦ ሹቻቱዋ ግዶፐ ታን ኔና የደርሳድ። 17 ኔን ፑላንቻ ግድያ ድራዉ፥ ዳሮ ኦቶረታዳ፤ ነ ቦንቹዋ ጋሱዋን፥ ነ አꬌዳ ኤራ ቱንሳዳ። ሄዋ ድራዉ፥ ታን ኔና ሳኣን ኦላድ፤ ሀራ ካተቱ ኔና በኢደ ሴረታናዳን ኦꬃድ። 18 ነ ናጋራ ዳሩዋንነ ነ ጭሙዋ ዛልእያን፥ ነ ጎይንያ ሳአቱዋ ኡባ ቱንሳዳ። ሄዋ ድራዉ፥ ታን ታማይ ነ ግዶፐ ከሳናዳን ኦꬃድ፤ እካ ኔና ሜዳ። ኡባቱ ጼልሽን፥ ታን ኔና ሳኣ ቦላን ብድንꬃ ከሳድ። 19 ኔና ካሰ ኤርያ ካዉተꬃቱ ኡባይ ነባን ዳጋሜድኖ። ነ ዉርሰꬃይ ያሽያዋ ግዴዳ፤ ኔን ላኤንꬆ ኡባካ ደአካ” ያጌ’ ያጋደ ዝላላ” ያጊደ ዬዳ።

20 መꬍና ጎዳ ቃላይ ታኮ ሀዋዳን ያጊደ ዬዳ፤ ኢዩ. 3:4-8፤ ዛካ. 9:1-2፤ ማቶሳ 11:21-22፤ ሉቃሳ 10:13-14 21 “ላ አሳ ናአዉ፥ ነ ሶምኡዋ ሲዶና ካታማኮ ዛራደ፥ አ ቦላ ትምቢትያ ኦዳ። 22 ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ “ኔኖ፥ ሲዶና፥ ታን ነዉ ሞርከ! ነ ቦላ ኦꬅያዋን ታ ቦንቹ ቆንጫና። ነ ግዶን ደእያዋንታ ፕርድያዋን ታን ታ ጌሻተꬃ በስያ ዎደ፥ ታን መꬍና ጎዳ ግድያዋ ኡንቱንቱ ኡባይ ኤራና። 23 ታን ነ ግዶን ኢታ ሀርግያ የዳና፤ ነ ኦግያን ሱꬃይ ጉካናዳን ኦꬃና። ኡባ ባጋና ይያ ኦላ ጋሱዋን ነ አሳይ ማሻን ሀይቃና። ታን መꬍና ጎዳ ግድያዋ ኡንቱንቱ ሄዋን ኤራና።

24 “ ‘ “ሀዋፐ ስንꬃናዉ እስራኤልያ ዩሹዋን ደእያ፥ አ ካꬊደ ጼልያ ቢታ ኡባፐ፥ አጉንꬃ ማላነ ካሽያ ማላ ግዲደ ቆህያባይ ኦንነ ደኤና። ታን ኡባ ሞድያ መꬍና ጎዳ ግድያዋ ኡንቱንቱ ሄዋን ኤራና” ያጌ’ ያጋ” ያጊደ ዬዳ።

25 ኡባ ሞድያ መꬍና ጎዳይ ሀዋዳን ያጌ፤ “እስራኤልያ አሳ ኡንቱንቱ ላለቴዳ ካዉተꬃ ኡባፐ ሺሻደ፥ ታን አህያ ዎደነ ኡንቱንቱ ሄ ካዉተꬃቱዋ ኡባ ስንꬃን ታን ታ ጌሻተꬃ በስያ ዎደ፥ ታን ታ ቆማ ያቆባዉ እሜዳ ባረንቱ ቢታን ኡንቱንቱ ደአና። 26 ሄዋን ኡንቱንቱ ሳሩዋን ደአና፤ ጎልያ ኬጻና፤ ዎይንያ ቱራካ ቶካና። ኡንቱንታ ካꬊደ ጼልያ ኡንቱንቱ ሾሮቱዋ ኡባካ ታን ፕርድያ ዎደ፥ እስራኤልያ አሳይ ሳሩዋን ደአና። ሄ ዎደ ታን መꬍና ጎዳይ ኡንቱንቱ ጾሳ ግድያዋ ኡንቱንቱ ሄዋን ኤራና” ያጌ።