1 ኑን ኦሞደቴዳ ታማንꬃ ላይꬃን፥ ታማንꬃ አግናን፥ ታማነ ላኤንꬃ ጋላሳን፥ መꬍና ጎዳ ቃላይ ታኮ ሀዋዳን ያጊደ ዬዳ፤ ኢሳ. 19:1-25፤ ኤር. 46:2-26 2 “ላ አሳ ናአዉ፥ ነ ሶምኡዋ ግብጼ ካትያኮ ዛራደ፥ አ ቦላነ ግብጼ ቢታ ኡባ ቦላ ትምቢትያ ኦዳ። 3 ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ “ኔኖ፥ ፓርኦና፤ ናይለ ሻፋ ግዶን ግሴዳ፥ ሎይꬃ ዎልቃማነ ያሽያ ዶአዉ፥ ናይለ ሻፋይ ታዋ፤ አ መꬌዳዌ ታና ያግያ ግብጼ ካትያዉ፥ ታን ነዉ ሞርከ! 4 ታን ነ ጎጎጩዋን ህንግꬃ ገልሳና፤ ነ ሻፋን ደእያ ሞለቱ ነ ጋልባ ፖቁዋና ኦይቀታናዳን ኦꬃና፤ ሞለቱ ነ ጋልባና ኦይቀት ኡት ደእሽን፥ ታን ኔና ሃꬃቱዋፐ ጎቻደ ጋጻ ከሳና። 5 ታን ኔናነ ነ ሻፋን ደእያ ሞለቱዋ ኡባ መላ ቢታን ኦላና፤ ነ አሃይ ደምባን ኦለት አታናዋ፤ ነ አሃ ሺሺደ ሞግያዌ ꬋያና። ታን ኔና ሳሉዋ ካፎቶነ ሳኣ ዶአቶ ቁማ ኦꬃና። 6 ግብጼን ደእያ አሳይ ኡባይ ታን መꬍና ጎዳ ግድያዋ ሄዋን ኤራና። ኢሳ. 36:6

“ ‘ “ኔን እስራኤልያ አሳዉ ማቃ ጉፍያ ግዳዳ፤ 7 ኡንቱንቱ ኔና ኦይቄዳ ዎደ መአደ፥ ኡንቱንቱ ሀሽያ ጫዳዳ፤ ኡንቱንቱ ኔናን ዘምፔዳ ዎደ መአደ፥ ኡንቱንቱ ዞክያ ዱꬃዳ። 8 ሄዋ ድራዉ፥ ታን ኡባ ሞድያ መꬍና ጎዳይ ነ ቦላን ማሻ ደንꬅያዋንታ አሀና፤ ኡንቱንቱ ነ አሳነ ነ መህያ ኡባ ዉርሳና። 9 ግብጼ ቢታይ አሳይ ባይና መላነ ኦና ቢታ ግዳና። ታን መꬍና ጎዳ ግድያዋ ኡንቱንቱ ሄዋን ኤራና።

“ ‘ “ሄዌካ ኔን፥ ናይለ ሻፋይ ታዋ፤ አ መꬌዳዌ ታና ያጌዳ ድራዉ፥ 10 ታን ነ ቦላነ ነ ሻፋ ቦላ ደንዳድ። ታን ሁጲሳ ባጋና ምግዶላፐ ዶማደ፥ ገድሳ ባጋና አስዋነ ካታማ፥ ሄዋፐካ ቶጵያ ዛዋ ጋካናዉ ግብጼ ኡባ አሳይ ባይና መላነ ኦና ሳኣ ከሳና። 11 አሳ ግድና መህያ ግድና፥ ሄዋና አና፤ ኦይታሙ ላይꬃይ ዉራና ጋካናዉ፥ አያይነ ሄዋን ደኤና። 12 ታን ግብጼ ቢታይ ቢታ ኡባፐ አꬌዳ መላነ ኦና ቢታ ኦꬃና፤ አ ካታማቱካ ኦይታሙ ላይꬃይ ዉራናዉ፥ ሀራ ኮለቴዳ ካታማ ኡባፐ አꬉዋ ኮለቲደ ደአና። ግብጼ አሳ ታን ካዉተꬃቱዋ ግዶንነ ሀራ አሳ ግዶን ላላና” ያጌ።

13 “ ‘ኡባ ሞድያ መꬍና ጎዳይ ሀዋዳን ያጌ፤ “ኦይታሙ ላይꬃፐ ጉይያን፥ ታን ግብጼቱዋ ላሌዳ ካዉተꬃቱዋ ግዶፐ ሺሻና። 14 ታን ኡንቱንታ ዛራደ እሻልሳና፤ ኡንቱንቱ የለቴዳ ገድሳ ግብጼን ደእያ ፓትሮሳ ቢታ ዛራና፤ ሄዋን ኡንቱንቱ ላፋ ካዉተꬃ ግዲደ ደአና። 15 ግብጼ ሀራ ካዉተꬃቱዋ ኡባፐ አꬌዳ ላፋ ካዉተꬃ ግዳና። ላኤንꬆ ሀራ ካዉተꬃቱዋ ቦላ ባረና ꬎቁ ꬎቁ ኦና። ላኤንꬆ እ ሀራ ካዉተꬃ ሞደናዳን፥ ታን እዞ ጉꬃና። 16 እስራኤልያ አሳይ ላኤንꬆ ማዱዋ ደማናዉ ኡንቱንቱን አማነተና፤ ግብጼን አማነቴዳዌ አይ ኬሻ ባይዘንቶ እስራኤልያ አሳይ አኬካና። ኡባ ሞድያ መꬍና ጎዳ ግድያዋ ኡንቱንቱ ሄዋን ኤራና” ያጌ’ ያጋ” ያጊደ ዬዳ።

17 ኑን ኦሞደተዳ ላታማነ ላፑንꬃ ላይꬃን፥ ኮይሮ አግናን፥ ኮይሮ ጋላሳን፥ መꬍና ጎዳ ቃላይ ታኮ ሀዋዳን ያጊደ ዬዳ፤ 18 “ላ አሳ ናአዉ፥ ባብሎነ ካቲ ናቡካዳናጾር ጺሮሳ ቦላ ኦላ ደንꬃናዉ ጊጌዳ፤ ኡንቱንቶ ሁጲ ቦአታና ጋካናስነ ሀሺካ ማዱጻና ጋካናዉ፥ ኦላንቻቱ ዴጾ ቶኩዋ ቶካናዳን ኦꬄድኖ፤ ግዶ ሽን፥ ካዉካ ኦላንቻቱካ ሀ ዳቡራ ኡባን ኡንቱንቱ ጺሮሳፐ ደሜዳዌ ባዋ። 19 ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ ‘ታን ግብጼ ቢታ ባብሎነ ካትያ ናቡካዳናጾራዉ አꬃደ እማና፤ እካ ባረ ኦላንቻቱዋ ድርጉዋ ግዳና ማላ፥ ኦሞዱዋንነ ቦንቂያን አኬዳዋ ኡባ አኪደ ባና። 20 እነ አ ኦላንቻቱ ታዉ ኦꬄዳ ድራዉ፥ ታን አዉ ግብጼ ቢታ ኡንቱንቱ ዳቡራዉ ድርጉዋ ኦꬃደ እማና። ታን ኡባ ሞድያ መꬍና ጎዳይ ሀዋ ኦዳይ’ ያጌ።

21 “ሄ ጋላስ ታን እስራኤልያ አሳ ምንꬃና። ህዝቄላ፥ ኔንካ አሳዉ ኦዳናዳን፥ ታን ኔና ምንꬃና። ታን መꬍና ጎዳ ግድያዋ ኡንቱንቱ ሄዋን ኤራና” ያጊደ ዬዳ።