1 ቃይካ መꬍና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ ሀዋዳን ያጋደ ትምቢትያ ኦዳ፤ ‘ኡባ ሞድያ መꬍና ጎዳይ ሀዋዳን ያጌ፤ “ሄ ጋላሳዉ፥ አየ አና! ያጊደ ዝላልተ! 3 አያዉ ጎፐ፥ ሄ ጋላሳይ ማቴዳ! መꬍና ጎዳ ጋላሳይ ጋኬዳ! ሄ ጋላሳይ ሻሪ ስኬዳ ጋላሳነ ካዉተꬃቱዋ ኡባዉ መቶ ጋላሳ ግዳናዋ። 4 ግብጼ ቦላ ኦላይ ያና፤ ቶጵያ ቦላንካ ቱጋይ ያና። ዳሮቱ ግብጼ ቢታን ሀይቃና፤ ሄ ቢታ ዱረተꬃይ ቦንቀታና፤ አ ባሱካ ባያና። 5 ሄ ኦላይ ቶጵያ፥ ሊድያ፥ ሊብያ፥ አራባነ ታ ጫቆ ቢታ አሳ ኡባ ግብጼና ጋꬂደ ዉርሳና” ያጌ።

6 “ ‘መꬍና ጎዳይ ሀዋዳን ያጌ፤ “ግብጼ ማድያዋንቱ ኩንዳና፤ አ ኦቶረትያ ዎልቃይ ዉራና። ምግዶላፐ ቢደ አስዋነ ጋካናዉ፥ ኡንቱንቱ ማሻን ሀይቃና። ታን ኡባ ሞድያ መꬍና ጎዳይ ሀዋ ኦዳይ። 7 ግብጼ ቢታይ ቢታ ኡባፐ አꬌዳ መላ ቢታ ግዳናዋ፤ አ ካታማቱካ ሀራ ኮለቴዳ ካታማ ኡባፐ አꬉዋ ኮለቲደ ደአና። 8 ታን ግብጼ ታማን ኦይꬅያ ዎደነ አ ማድያዋንቱ ኡባይ ሀይቂ ዉርያ ዎደ፥ ታን መꬍና ጎዳ ግድያዋ ኡንቱንቱ ኤራና።

9 “ ‘ “ሄ ጋላስ ታን ሳሮ ደእያ ቶጵያ አሳ ዳጋንꬃናዉ አሳቱዋ ማርካብያን ኪታና። ግብጼ ሙረትያ ጋላስ ቶጵያ አሳ ቦላ ቱጋይ ያና። በእተ፥ ሄ ጋላሳይ ጋኬዳ!” ያጌ።

10 “ ‘ኡባ ሞድያ መꬍና ጎዳይ ሀዋዳን ያጌ፤ “ባብሎነ ካትያ ናቡካዳናጾራ ኩሽያን ታን ግብጼ ዱረተꬃ ꬋይሳና። 11 ካዉተꬃቱዋ ኡባፐ አꬊደ፥ መቀꬃ ኢትያ ኦላንቻቱዋ ካለꬂደ ዪደ፥ እ ቢታ ꬋይሳና፤ ኡንቱንቱ ግብጼ አሳ ቦላን ማሻ ሾዲደ፥ ቢታን አሃ ኩንꬃና። 12 ናይለ ሻፋ ታን መልሳና፤ ታን ግብጼ ኢታ አሳቱዋ ኩሽያን አꬃደ እማና፤ ኡንቱንታ፥ ሄ ቢታነ አን ደእያዋ ኡባ አላጋቱዋ ኩሽያን ꬋይሳና። ታን መꬍና ጎዳይ ሀዋ ኦዳድ” ያጌ።

13 “ ‘ኡባ ሞድያ መꬍና ጎዳይ ሀዋዳን ያጌ፤ “መምፒሳ ካታማን ደእያ ኤቃቱዋነ ምስለቱዋ ኡባ ታን ꬋይሳና፤ ግብጼ ቢታን ላኤንꬆ ካፖ ግድያዌ ደኤና፤ ቢታ ኡባ ታን ያሽሳና። 14 ታን ፓትሮሳ ግያ ገድሳ ባጋ ግብጼ መላ ከሳና፤ ሁጲሳ ባጋና ደእያ ጾኣነ ካታማን ታማ የዳና፤ ቴብሳ ካታማካ ሙራና። 15 ግብጼዉ ጌሶ ግዴዳ ፐሉስያማን ታ ሀንቁዋ ጉሳና፤ ቴብሳ አሳ ኡባ ዉርሳና። 16 ታን ግብጼን ታማ ኦይꬃና፤ ፐሉስያምካ ሎይꬅ ቱጋታና፤ ቴብሳ ድርሳ ግምቢ ኮለታና፤ መምፒሳ ካታማን ዱጸና መቱ ጋካናዋ። 17 ኦና ካታማ ያላጋ አሳቱነ ብባስታ ካታማን ደእያ ያላጋይ ኡባይ ማሻን ዉራና፤ ሄ ካታማቱካ ኦሞደቲደ ባና። 18 ግብጼ ዎልቃ ታን መንሬꬅያ ዎደ፥ ጻፍናሳን ጋላሳይ ቃማና፤ እ ኦቶረትያ ዎልቃይ ዉራና፤ ግብጻ ሻሪ ካማና፤ ጻፍናሳ ዩሹዋን ደእያ ካታማቱዋ ኡባን ደእያ አሳይ ኦሞዱዋን ባና። 19 ታን ግብጻ ሄዋዳን ሙራና። ሄ ዎደ ታን መꬍና ጎዳ ግድያዋ ኡንቱንቱ ሄዋን ኤራና” ያጌ’ ያጋ” ያጊደ ዬዳ።

20 ኑን ኦሞደተዳ ታማነ እተንꬃ ላይꬃን፥ ኮይሮ አግናን፥ ላፑንꬃ ጋላሳን፥ መꬍና ጎዳ ቃላይ ታኮ ሀዋዳን ያጊደ ዬዳ፤ 21 “ላ አሳ ናአዉ፥ ታን ግብጼ ካትያ ቀስያ መንꬃድ፤ አ ዎሻንነ ጩርቃን ጻጽ ኮሊደ ፓꬅያ ሂላይካ ባዋ፤ ሀዋፐ ስንꬃናዉ እ ምኖተꬃ አሂደ፥ ማሻ ኦይቃናዉ ዳንዳየና። 22 ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ ‘ታን ግብጼ ካትያዉ ሞርከ። አዉ ካሰ መኦ ቀስያነ ፓጻ ደእያ ቀስያ ላኡዋካ ታን መንꬃና፤ አ ማሻይካ አ ኩሽያፐ ሳኣን ዎꬋናዳን ኦꬃና። 23 ግብጼቱዋ ካዉተꬃቱዋ ግዶንነ ሀራ ቢታቱዋን ላላና።

24 “ ‘ታን ባብሎነ ካትያ ላኡ ቀስያ ምንሳደ፥ ታ ማሻ አ ኦይꬃና። ሽን ግብጼ ካትያ ቀስያ መንꬃና፤ ባረ ሞርክያ ስንꬃን እ ሀይቃና ሀንያዌ ኦልያዋዳን ኦላና። 25 ኤ፥ ታን ግብጼ ካትያ ላኡ ቀስያ ዳቡርሳደ፥ ባብሎነ ካትያ ቀስያ ምንꬃና። ታን ባብሎነ ካትያ ታ ማሻ ኦይꬅያ ዎደነ እ ግብጼ ቦላ አ ደንꬅያ ዎደ፥ ግብጼቱ ታን መꬍና ጎዳ ግድያዋ ኤራና። 26 ግብጼቱዋ ታን ካዉተꬃቱዋ ግዶንነ ቢታ ኡባን ላላና። ሄ ዎደ ታን መꬍና ጎዳ ግድያዋ ኡንቱንቱ ሄዋን ኤራና’ ያጌ” ያጊደ ዬዳ።