1 ኑን ኦሞደቴዳ ታማነ እተንꬃ ላይꬃን፥ ሄዘንꬃ አግናን፥ ኮይሮ ጋላሳን፥ መꬍና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ ግብጼ ካትያዉነ አሳ ኡባዉ ሀዋዳን ያጋደ ኦዳ፤ ‘ነ ግታተꬃን ኔና ታን ኦናና ልኮ?

3 “ ‘ኔን ሎኦ ዳሻ ኩዋይ ደእያ ሊባኖሳ ዝጋ ማላ። እ አዱቂደ ድጬዳ፤ አ ጼራይካ ሻርያ ጋኬዳ። 4 ሄዋን አ ድችያ ሃꬃይ ደኤ፤ ጪሙዋፐ ከስያ ፑልቶቱካ እ ቶከቴዳ ሳኣን ዩሹዋን ኡባን ጎጊኖ፤ ሄ ፑልቶቱ ምꬃይ ሞክያሳ ኡባ ጋኪደ ኡሺኖ። 5 ሄ ምꬃይ ሃꬃይ ዳሬዳ ድራዉ፥ ዎራን ደእያ ሀራ ምꬃ ኡባፐ ጌሳ አዱቄ፤ አ ዳሻቱካ ኦርደነ አዱሳ። 6 ሳሉዋ ካፎቱ ኡባይ አ ዳሻን ባረንቱ ጎልያ ኬጼድኖ፤ ባዙዋ ዶአቱካ አ ዳሻ ጋርሳን ማራ የሌድኖ፤ ዎልቃማ ካዉተꬃቱ ኡባይ አ ኩዋን ኡቲኖ። 7 ሄ ምꬃይ ባረ ግታተꬃናነ ባረ ዳሻ አዱሳተꬃና አያ ሎኢ! ባረ ጻጱዋካ ሃꬃ ጪማዉ ዱገ የድ ዎꬄዳ። 8 ሀራይ አቶ ጾሳ ጋናትያንካ ሄ ዝጋና ልከትያ ዝግ ባዋ፤ ዶመꬃ 2:2-9 አዋ ማላ ዳሻይ ደእያ ጺዳይካ ባዋ፤ ሄዋ ማላ ቦእያ ምꬅካ ባዋ። ጾሳ ጋናትያንካ ሄዋ ማላ ሎኦ ምꬃይ ባዋ።

9 “ ‘ታን አ ዳሮ ዳሻን ፑላንቻ ኦꬃድ። ኤደነ ግያ ጾሳ ገነትያን ደእያ ምꬃቱ ኡባይ አ ቃናቴድኖ።

10 “ ‘ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ “ሄ ምꬃይ አዱቂደ ድጬዳ ድራዉ፥ አ ጼራይካ ሻርያ ጋኬዳ ድራዉነ እ ባረ ጌሳን ኦቶረቴዳ ድራዉ፥ 11 ታን አ አጋ አጋድ፤ ያታደ ዎልቃማ፥ አላጋ ካዉተꬃዉ አꬃደ እማድ። ሄ ካዉተꬃይ አዉ አ ኢታተꬃዳን ኦꬃና። 12 መቀꬃ ኢታ አላጋቱ ሄ ምꬃ ቃንጽ ኦላና፤ ቃንጼዳ ታሸቱ ደረቱዋን፥ ዎምባቱዋንነ ዛንጋራቱዋን ኦለት አታና። አ ኩዋን ኡትያ ሀራ ካዉተꬃቱ ኡባይ ሄ ሳኣ አጊደ ባና። 13 ሳሉዋ ካፎቱ ዪደ ኩንዴዳ ምꬃ ቦላ ኡታና፤ ባዙዋ ዶአቱካ አ ታሸቱዋ የꬋና። 14 ሃꬃ ማታን ድጭያ ምꬃቱ ግዶን አዋዳን አዱቂደ፥ ጼራይ ሻርያ ጋክያ ምꬃይ ደኤና። ሀይቂያ አሳ ቦላ ጋክያ ሀይቁዋ ፕርዳይ ሄ ምꬃ ቦላ ጋካናዋ፤ ሄ ፕርዳይ እ ሀይቂደ፥ ዱፉዋን ገልያዋንቱና ስኦልያን ገላናሳ” ያጌ።

15 “ ‘ኡባ ሞድያ መꬍና ጎዳይ ሀዋዳን ያጌ፤ “ሄ ምꬃይ ስኦልያን ገልያ ጋላስ ጪሙዋፐ ከስያ ፑልቶቱ አዉ ካዮታናዳን ታን ኦꬃና፤ ሄ ፑልቶቱዋ ሃꬃይ ጎገናዳን ታን ኦꬃና፤ ሊባኖስካ አ ድራዉ ካዮታናዳን ኦꬃና። ቃይ ዎራ ምꬃይ ኡባይ ሹላና። 16 ታን ሄ ምꬃ ስኦልያን ኦልያ ዎደ፥ አ ኩንደꬃ ኮሻን ካዉተꬃይ ኡባይ ቃጻና። ኩንዲደ ስኦልያን ገሌዳ ኤደነ ምꬃቱነ ሃꬃ ኡሽያ ዶረቴዳነ ሎኦ ሊባኖሳ ምꬃቱ ኡባይ አ ኩንደꬃን ምነታና። 17 ካዉተꬃቱዋ ግዶን አናና ማደቴዳነ አ ኩዋን ኡቴዳ ኡባይ ካሰ ማሻን ሀይቄዳዋንቱና ጋከታናዉ አናና እትፐ ስኦልያን ገላና። 18 ኤደነ ጋናትያ ግዶ ምꬃቱዋንካ ሄዋ ኬሻ ግታይነ ሎኡ ባዋ፤ ሽን ሀእ ኤደነ ምꬃቱዋዳን፥ እካ ሀይቂ ስኦልያን ገሌ፤ ሄዋን እ ማሻን ሀይቄዳ አማንቤናዋንቱ ኡባን ጋከታና።

“ ‘ “ሄ ምꬃይ ግብጼ ካትያነ አ አሳ ኡባ ሌምሶ። ታን ኡባ ሞድያ መꬍና ጎዳይ ሀዋ ኦዳይ” ያጌ’ ያጋ” ያጊደ ዬዳ።