1 ኑን ኦሞደቴዳ ታማነ ላኤንꬆ ላይꬃን፥ ታማነ ላኤንꬆ አግናን፥ ኮይሮ ጋላሳን፥ መꬍና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ ግብጼ ካትያዉ ዝላላ! ሀዋዳን ያጋ፤ ‘ኔን ካዉተꬃቱዋ ግዶን ኔና ጋሙዋ ከሳዳ፤ ሽን ኔን አባ ግዶን ደእያ ጻድያ ማላ። ኔን ሃꬃቱዋፐ ከሳዳ፤ ነ ገደቱዋን ፑርቻካደ፥ ሃꬃ ቡሉቃዳ።

3 “ ‘ኡባ ሞድያ መꬍና ጎዳይ ሀዋዳን ያጌ፤ “ዳሮ አሳይ ሺቅያ ዎደ፥ ታን ታ ግትያን ኔና ኦይቃና፤ ሄ አሳይ ኔና ጎቺደ፥ ሃꬃፐ ጋጻ ከሳና። 4 ታን ኔና ቢታን ኦላ አጋና፤ ደምባ ቦላካ ምጫና፤ ያታደ ሳሉዋ ካፎቱዋ ኡባይ ነ ቦላ ኡትሳና፤ ቢታ ኡባን ደእያ ባዙዋ ዶአቱዋካ ነ አሹዋ ካልሳና። 5 ታን ነ አሹዋ ደረቱዋ ቦላን ላላና፤ ነ ዎምባቱዋካ ነ አሃን ኩንꬃና። 6 ደረቱዋ ካሚደ፥ ሻፋቱዋ ኩማና ጋካናዉ፥ ነ ሱꬃይ ጉካናዳን ኦꬃና። 7 ታን ኔና ꬋይስያ ዎደ፥ ሳሉዋ ጎዛና፤ ጾልንተቱዋካ ꬉምሳና፤ አዋካ ሻርያን ካማና፤ አግናይካ ባረ ፖኡዋ ድጋና። ኢሳ. 13:10፤ ማቶሳ 24:29፤ ማር. 13:24-25፤ ሉቃሳ 21:25፤ ሳፃ 6:12-13፤ 8:12 8 ኔፐ ቦላና ደእያ ሳሉዋ ፖኦቱዋ ኡባ ꬋይሳደ፥ ነዉ ቢታ ꬉምሳና። ታን ኡባ ሞድያ መꬍና ጎዳይ ሀዋ ኦዳይ።

9 “ ‘ “ታን ነ ቦላ ጋኬዳ ባየꬃ ኦዱዋ ኔን ኤረና ካዉተꬃቱዋ ኡባ ስስያ ዎደ፥ ጮራ አሳ ዎዛናይ ሻቢረታና። 10 ታን ነ ቦላ ጋꬅያዌ ካዉተꬃቱዋ ኡባ ዳጋንꬃና። ታን ታ ማሻ ኡንቱንቱ ስንꬃን ለለስያ ዎደ፥ ካተቱ ያሻን ኮኮራና፤ ኔን ኩንድያ ጋላስ ኡንቱንቱ ኡባይካ ባረንቱ ሸምፖ ሸምፖ ያያና” ያጌ።

11 “ ‘ኡባ ሞድያ መꬍና ጎዳይ ግብጼ ካትያዉ ሀዋዳን ያጌ፤ “ባብሎነ ካትያ ማሻይ ነ ቦላን ያና። 12 ሀራ ካዉተꬃፐ አꬊደ፥ መቀꬃ ኢትያ ኦላንቻቱ ባረንቱ ማሻን ነ ጮራ አሳ ዉርሳናዳን ታን ኦꬃና። ኡንቱንቱ ግብጼ ኦቶሩዋ ꬋይሳና፤ አ ጮራ አሳይካ ዉራና። 13 ዳሮ ሃꬃ ማታን ደእያ መህያ ኡባካ ታን ꬋይሳና፤ ሄዋፐ ጉይያን፥ ሃꬃ ቡሉቂያ አሳ ግድና መህያ ግድና፥ ኡባካ ደኤና። 14 ሄ ዎደ ታን ነ ሃꬃቱዋ ጽልሳና፤ ነ ሻፋቱዋካ ዎፑ ኦꬃደ ጎግሳና። ታን ኡባ ሞድያ መꬍና ጎዳይ ሀዋ ኦዳይ። 15 ታን ግብጼ መላ ከስያ ዎደ፥ አን ደእያዋ ኡባ ቁጫደ ꬋይስያ ዎደነ አን ደእያ አሳ ኡባ ሾጭያ ዎደ፥ ታን መꬍና ጎዳ ግድያዋ ኡንቱንቱ ኤራና።

16 “ ‘ “ሄዌ ኡባይ ኡንቱንቶ ዝላልያ ዝላሳ ግዳናዋ። ካዉተꬃቱዋ ማጫ አሳቱ ግብጼስነ አ ጮራ አሳዉ ዝላላና። ታን ኡባ ሞድያ መꬍና ጎዳይ ሀዋ ኦዳይ” ያጌ’ ያጋ” ያጊደ ዬዳ።

17 ኑን ኦሞደቴዳ ታማነ ላኤንꬆ ላይꬃን፥ ሄ አግናን፥ ታማነ እቼሸንꬆ ጋላሳን፥ መꬍና ጎዳ ቃላይ ታኮ ሀዋዳን ያጊደ ዬዳ፤ 18 “ላ አሳ ናአዉ፥ ግብጼ ጮራ ኦላንቻቱዋ ድራዉ ዬካ! ግብጼነ ዎልቃማ ካዉተꬃቱዋ ማጫ ናናቱዋ፥ ሀራ ሀይቂደ ዱፉዋን ገሌዳዋንቱና እትፐ ስኦልያ ሞይዛ። 19 ኡንቱንቱ፥ ‘ህንተኖ ግብጼቶ፥ ህንተ ሀራቱዋፐ አꬍ ሎኢቴ? ህንተ ስኦልያን ገላና፤ ሄዋን ህንተ ጾሳ አማንቤናዋንቱና እትፐ ሞገታና።’

20 “ግብጼ ቢታዉ ማሻይ ሾደት ኡቴዳ ድራዉ፥ ኡንቱንቱ ማሻን ሀይቄዳዋንቱ ግዶ ኩንዳና፤ ግብጼ ባረ ጮራ አሳ ኡባና ዱገ ጎሸታና። 21 ስኦልያን ደእያ ዎልቃማ ካፓቱ ግብጼባነ ግብጼ ማዴዳዋንቱባ ሃሳዪደ፥ ‘ኡንቱንቱ ሃ ዱገ ዬድኖ፤ ጾሳ አማነናን፥ ማሻን ሀይቄዳዋንቱና ኡንቱንቱ ግሴድኖ’ ያጊኖ።

22 “አሶረ ስኦልያን ደኤ። ኦላን ሀይቄዳ አሶረ ኦላንቻቱዋ ዱፎቱ አ ዩሹዋን ዶድ ኡቴድኖ። 23 ሄ ዱፎቱ ጪማ ኦላቱዋፐ ዉርሰꬃን ደኢኖ። አ ኦላንቻቱ፥ ካሰ ካዉተꬃቱዋ ኡባ ያሻን ኮኮርሴዳዋንቱ፥ ሀእ አ ኦላንቻቱ ዱፉዋ ዩሹዋን ሺቄድኖ። ደኡዋን ደእያዋንቱ ቢታን ሻብረꬃ መꬌዳዋንቱ ኡባቱ ማሻን ዉሬድኖ።

24 “ኤላምካ ስኦልያን ደኤ። ኤላማ ኦላንቻቱ ኡባይ አ ዱፉዋ ዩሹዋን ዶድ ኡቴድኖ። ኡባቱ ሹከቴድኖ፥ ማሻን ኩንዴድኖ፤ ደኡዋን ደእያ አሳ ቢታን ሻባርሳ ደንꬄዳ ኡባይ አማነናዋንታ ግዲደ ዬላን ቢታ ጋርሳ አꬌድኖ፤ ዱፉዋ ጋርሳ ገሊደ ግሴድኖ። 25 ሀይቄዳዋንቱ ግዱዋን ኤላማዉ ሳአይ ጊግ ኡቴዳ። ኤላማ ኦላንቻቱዋ ኡባ ዱፎቱ አ ዩሹዋን ደኢኖ፤ ኡንቱንቱ ኡባይካ ማሻን ሀይቄድኖ። ኡንቱንቱ ኡባይካ ጾሳ አማንቤናዋንታ። ኡንቱንቱ ደኡዋን ደእያዋንቱ ግዶን ሻብረꬃ ደንꬄዳ ድራዉ ዱፉዋ ገሌዳዋንቱና እትፐ ግሴድኖ።

26 “መሸክነ ቱባል ኦላንቻቱዋ አሳቱዋ ዱፉ እትፐ ሄዋን ደኢኖ፤ ኡንቱንቱ ካሰ ደኡዋን ደእያዋንቱ ቢታን ካዉተꬃቱዋ ኡባ ያሻን ሻባርሴዳዋንታ ግዶፐካ፥ ኡንቱንቱ ኡባይካ ማሻን ሀይቄድኖ። ኡንቱንቱ ኡባይካ ጾሳ አማነናዋንታ። 27 ካሰ ኦላንቻቱ ሞገትያዌ ባረንቱ ኩመንꬃ ኦላ ሚሻና፤ ኡንቱንቱ ጎንዳለቱዋ ኡንቱንቱ ትራን ዎꬅና፥ ኡንቱንቱ ማሻቱዋ ኡንቱንቱ ሁጲሳን ዎꬅና፥ ሞገቴድኖ። ሽን ሀዋንቱ ሄዋ ማላ ኩመንꬃ ቦንቹ እመትና ሞገትበይክኖ። ኡንቱንቱ ካሰ ደኡዋን ደእያዋንቱ ካዉተꬃቱዋ ሻባርሴድኖ።

28 “ህንተ ግብጼ አሳቱካ ጾነታናነ ማሻን ሀይቄዳ፥ አማነና አሳቱዋና እትፐ ግሳና።

29 “ኤዶም ባረ ካተቱዋናነ ባረ ሞድያዋንቱና እትፐ ስኦልያን ደኤ፤ ኡንቱንቱካ ካሰ ምኖ ኦላንቻቱዋ፤ ሽን ሀእ ኦላን ሀይቄዳ፥ አማነና አሳቱዋና ጪማ ኦላን ገሌድኖ።

30 “ሁጲሳ ባጋ ካፓቱነ ሲዶና አሳቱ ኡባይ ዱፉዋን ደኢኖ። ኡንቱንቱ ካሰ ባረንቱ ዎልቃን አሳ ያሽሴድኖ፤ ሽን ሀእ ኡንቱንቱካ ሹከቴዳዋንቱና ባረንቱ ዬላና ያ ገሌድኖ። ጾሳ አማነናዋንታ ግዲደ፥ ማሻን ሀይቄዳ አሳቱዋና እትፐ ጋከቲደ፥ ዬላቲደ ዱፉዋ ገሊኖ።

31 “ግብጼ ካዉነ አ ኦላንቻቱ ማሻን ሀይቄዳ ኦላንቻቱዋ ያን በኢደ ምነታና። ታን ኡባ ሞድያ መꬍና ጎዳይ ሀዋ ኦዳይ። 32 ታን ሀዋፐ ካሰ ካዉተꬃቱ ኡባይ ግብጼ ካትያዉ ደኡዋን ደእያዋንቱ ቢታን ያያናዳን ኦꬄዳዋ ግዶፐካ፥ እነ አ ኦላንቻቱ ጾሳ አማነናን፥ ማሻን ሀይቄዳ አሳቱዋና እትፐ ግሳና። ታን ኡባ ሞድያ መꬍና ጎዳይ ሀዋ ኦዳይ” ያጌዳ።