1 መꬍና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ ነ ቢታ አሳዉ ሀዋዳን ያጋደ ኦዳ፤ ‘ታን እት ቢታ ቦላን ኦላ አህያ ዎደ፥ ሄ ቢታ አሳይ ባረንቱ ቦላ ይያዋ ዎችያ አሳ ዶሮ። 3 ሄ ዎችያዌ ሞርኪ ይያዋ በእነ አሳይ ናገታናዳን፥ ማላካታ ፑኖፐ፤ 4 አይ አሳይነ ሄ ማላካታ ኮሻ ስሲደ፥ ናገተናን እጽና፥ ኦላይ ዪደ አ ዎꬎፐ፥ ሱꬃ አጩ አዋ። 5 እ ማላካታ ኮሻ ስሲደ፥ ናገተናን እጼዳ ድራዉ፥ አ ሱꬃ አጩ አ ቦላና። እ ስሲደ ናገቴደንቶ፥ ሀይቁዋፐ አትያዋ ሽን! 6 ሽን ሄ ዎችያዌ ሞርኪ ይያዋ በኢደ፥ ማላካታ ፑነናን አጎፐነ አሳ ኤርሳና ꬋዮፐ፥ ኦላይካ ዪደ፥ ሄ አሳፐ እት ኡራ ዎꬎፐ፥ ሄ ኡራይ ባረ ናጋራን ሀይቄ፤ ሽን ታን አ ሱꬃ ዎችያዋ አቻና’ ያጋ።

7 “ላ አሳ ናአዉ፥ ታን ኔና እስራኤልያ አሳዉ ዎችያዋ ኦꬃድ፤ ታን ነዉ ኦድያዋ ስሳደ አሳካ ኤርሳ። 8 እት ኢታ አሳ ታን፥ ‘ላ ኔን ቱሙ ሀይቃና’ ያግያ ዎደ፥ እ ባረ ናጋራፐ ስማና ማላ፥ ኔን አዉ ኦዳና ꬋዮፐ፥ ሄ ናጋራንቻይ ባረ ናጋራን ሀይቄ፤ ሽን ታን አ ሱꬃ ኔፐ ጭገታና። 9 ሽን ናጋራንቻይ ባረ ናጋራፐ ስማናዳን ኔን ኦድና፥ እ እጾፐ፥ ባረ ናጋራን ሀይቄ፤ ሽን ኔን ነ ሸምፑዋ አሻዳ።

10 “ላ አሳ ናአዉ፥ እስራኤልያ አሳዉ ሀዋዳን ያጋ፤ ‘ህንተ፥ “ኑን ኦꬄዳ ናጋራይነ ናቁ ኑ ቦላ ደኤ፤ ሄዋፐ ደንዴዳዋን ኑን ግልቂ ዉሬዶ። ያትና፥ ኑን ዋኒደ ፓጻ ደአናዉ ዳንዳዬቶ?” ያጊታ። 11 ታን መꬍና ጎዳይ ደኡዋን ሀዋዳን ያጋደ ጫቃይ፤ “ናጋራንቻይ ባረ ናጋራ አጊደ፥ ፓጻ ደአና ማላ ኮያይፐ አትና፥ ናጋራንቻ ሀይቁዋን ናሸትከ። ታን ኡባ ሞድያ መꬍና ጎዳይ ሀዋ ኦዳይ። ህንተኖ፥ እስራኤልያ አሳዉ፥ ስምተ፤ ህንተ ኢታ ኦሱዋፐ ጉየ ስምተ! አያዉ ሀይቃናዉ ኮዪቴ?” ያጋይ’ ያጋ።

12 “ላ አሳ ናአዉ፥ ነ ቢታ አሳዉ ሀዋዳን ያጋደ ኦዳ፤ ‘ጽሎ አሳይ ናጋራ ኦꬆፐ፥ አ ጽሎተꬃይ አ አሸና፤ ቃይ ናጋራንቻይ ባረ ናጋራፐ ስም ክቾፐ፥ ካሰ ናጋራን እ ሙሬተና። ጽሎ አሳይካ ናጋራ ኦꬆፐ፥ ካሰ ጽሎተꬃ ድራዉ ደኡዋን ደአናዉ ዳንዳየና። 13 ታን ጽሎ አሳ፥ “ኔን ቱሙ ፓጻ ደአና” ያጌዳ ዎደ፥ እ ባረ ጽሎተꬃን አማነቲደ ናጋራ ኦꬆፐ፥ ባረ ኦꬄዳ ናጋራን እ ሀይቃናፐ አትና፥ ካሰ ጽሎተꬃይ አዉ ቆፈተና። 14 ቃይ ታን ናጋራንቻ አሳ፥ “ኔን ቱማ ሀይቃና” ያጌዳ ዎደ፥ እ ባረ ናጋራፐ ስሚደ፥ ፕርዳነ ሱረ ኦሱዋ ኦꬆፐ፥ 15 ሚሻ ታልአናዉ ኦይꬄዳዋ ዛሮፐ፥ ዉኤዳባካ ጉየ ዛሮፐ፥ ናጋራ ኦꬅያዋ አጊደ፥ ደኡዋ እምያ ህግያ ካሎፐ፥ ያቶፐ፥ እ ቱማ ፓጻ ደአናፐ አትና ሀይቀና። 16 እ ካሰ ኦꬄዳ ናጋራይ እቱነ ቆፈተና፤ ሀእ ፕርዳነ ሱረ ኦሱዋ ኦꬄዳ ድራዉ፥ እ ቱማ ፓጻ ደአና።

17 “ ‘ሽን ነ ቢታ አሳይ፥ “ጎዳ ኦጊ ልከ ግደና” ያጊኖ፤ ሽን ልከ ግደናዌ ኡንቱንቱ ኦግያ። 18 ጽሎ አሳይ ባረ ጽሎተꬃ አጊደ፥ ናጋራ ኦꬆፐ፥ እ ባረ ናጋራን ሀይቃና። 19 ቃይ ናጋራንቻ አሳይ ባረ ናጋራፐ ስሚደ፥ ፕርዳነ ሱረ ኦሱዋ ኦꬆፐ፥ ሄ ኦሱዋን እ ፓጻ ደአና። 20 ሽን ህንተ፥ “ጎዳ ኦጊ ልከ ግደና” ያጊታ። እስራኤልያ አሳዉ፥ ታን እቱዋ እቱዋ ቦላ ህንተ ኦሱዋዳን ኦሱዋዳን ፕርዳና’ ያጋ” ያጊደ ዬዳ።

21 ኑን ኦሞደቲደ ታማነ ላኤንꬆ ላይꬃን፥ ታማንꬆ አግናን፥ እቼሸንꬆ ጋላሳን፥ የሩሳላመፐ ከስ አክ ዬዳ እት አሳይ ካታማይ ኩንዴዳዋ ታዉ ኦዴዳ። 2 ካታ. 25:3-10፤ ኤር. 39:2-8፤ 52:4-14 22 ሄ ብታኒ ያናፐ እት ጋላሳ ካሰቲደ ደእያ ኦማርስ መꬍና ጎዳ ኩሺ ታ ቦላን ሸምፔዳ፤ ታ ዶናይካ ዶየቴዳ፤ ዎንተꬃ ጋላስ ሄ ብታኒ ታኮ ጋካናፐ ካሰታደ፥ ታንካ ሃሳያናዉ ዳንዳያድ።

23 ያትና፥ መꬍና ጎዳ ቃላይ ታኮ ሀዋዳን ያጊደ ዬዳ፤ 24 “ላ አሳ ናአዉ፥ እስራኤልያ ቢታን ኮለቴዳ ካታማቱዋን ደእያ አሳቱ ሀዋዳን ያጊኖ፤ ‘አብራሃመ ባረካ ደእያ እት አሳ፤ ሀ ቢታ ላቴዳ፤ ሽን ኑን ጮራ፤ ቢታይካ ቱማ ኑዉ ላታ ጋድያ ግዲደ እመቴዳ’ ያጊኖ።

25 “ሄዋ ድራዉ፥ ኡንቱንቶ ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ “ህንተ ሀእካ ሹኪደ፥ ሱꬃይ ከስቤና አሹዋ ሚታ፤ ቃይ ኤቃዉ ጎይኒታ፤ ሸምፑዋ ዎꬊታ። ሀዋ ኡባ ኦꬂደ፥ ቱሙ ህንተ ቢታ ላቲቴ? 26 ህንተ ህንተ ማሻን አማነቲታ፤ ህንተ ቱና ኦሱዋ ኦꬂታ፤ ህንተ ኡባይካ ህንተ ሾሩዋ ሾሩዋ ማጫ አሳ ቱንሲታ። ሄዋ ኡባ ኦꬂደ፥ ቱሙ ህንተ ቢታ ላቲቴ?” ያጌ’ ያጋ።

27 “ኡንቱንቶ ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ “ታን ታ ደኡዋን ጫቃይ: ኮለቴዳ ካታማቱዋን ደእያ አሳቱ ማሻን ሀይቃና፤ ካታማፐ ጋጻን ደእያ አሳቱዋ ታን ባዙዋ ዶአዉ ቁማ ኦꬃደ እማና፤ ደረቱዋ ቦላ ጎንጎሎቱዋን ደእያ አሳቱ ኢታ ሀርግያን ሀይቃና። 28 ታን ሄ ቢታ ባዬዳነ መላ ቢታ ከሳና፤ ኡንቱንቱ ኦቶረትያ ዎልቃይ ዉራና፤ እስራኤልያ ደረቱ አይ አሳይነ አና መላ ሳኣ ግዳና። 29 ኡንቱንቱ ኦꬄዳ ቱናባ ጋሱዋን ታን ቢታ ባዬዳነ መላ ቢታ ከስያ ዎደ፥ ታን መꬍና ጎዳ ግድያዋ ኡንቱንቱ ኤራና” ያጌ’ ያጋ።

30 “ላ አሳ ናአዉ፥ አሳይ ካታማ ድርሳ ምይያንነ ባረንቱ ጎለቱዋ ፐንግያን ኤቂደ፥ እቱ እቱዋና ሀዋዳን ያጊደ፥ ነባ ሃሳዬ፤ ‘ሃይተ፤ መꬍና ጎዳ ማታፐ ዬዳ ቃላይ አየንቶ አነ ስሴቶ’ ያጊኖ። 31 ኡንቱንቱ ካሰ አሳይ ይያዋዳን ኔኮ ዪኖ፤ ታ አሳዳን ነ ስንꬃን ኡቲኖ፤ ኔን ኦድያዋካ ስሲኖ፤ ሽን ኦꬅክኖ። ኡንቱንቱ ሲቁዋባ ሃሳዪኖ፤ ሽን ኡንቱንቱ ዎዛናይ ጎኣ ጻላላዉ ያረቴ። 32 በአ፥ ኔን ኡንቱንቶ እት ሲቁዋ ማዛሙርያ ሎኦ ኮሻን የጽያነ ዲꬃ ሎይꬂደ ዲጽያ አሳ ማላ። አያዉ ጎፐ፥ ኡንቱንቱ ኔን ኦድያዋ ስሲኖ፤ ሽን እቱዋካ ኦꬅክኖ።

33 “ሽን ኔን ኦዴዳዌ ቱሙ ፖለታና፤ ፖለትያ ዎደ፥ ትምቢትያ ኦድያዌ ኡንቱንቱ ግዶን ደእያዋ ኡንቱንቱ ኤራና” ያጊደ ዬዳ።