1 መꬍና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ እስራኤልያ ሄንꬃንቻቱዋ ቦላን ሀዋዳን ያጋደ ትምቢትያ ኦዳ፤ ‘ኡባ ሞድያ መꬍና ጎዳይ ሀዋዳን ያጌ፤ “ህንተኖ፥ ህንተና ሄምያ እስራኤልያ ሄንꬃንቻቶ፥ ህንተዉ አየ አና! ህንተ ዉድያ ሄማናዉ በሰኔ? 3 ኡንቱንቱ ማꬃ ኡሺታ፤ ኡንቱንቱ እስክያፐ ዳደቴዳ ሱፍያ ማዪታ፤ ኡንቱንቱፐ ሞꬌዳዋንታ ሹኪደ ሚታ፤ ሽን ዉድያ ሱረ ሄምክታ። 4 ዳቡሬዳዋንታ ምንስበይክታ፤ ሀርጌዳዋንታ ፓꬅበይክታ፤ መኤዳዋንታ ኮልበይክታ፤ ዎራ ቤዳዋንታ ዛርበይክታ፤ ባዬዳዋንታ ኮይበይክታ። ህንተ ኡንቱንታ ዎልቃን መቀꬃ ኢቲደ ሞዴድታ። 5 ዉዲ ኡባይ ሄምያዌ ꬋይና ላለቴድኖ፤ ባዙዋ ዶአቶ ኡባዉ ቁማ ግዴድኖ። ፓይ. 27:17፤ 1 ካታ. 22:17፤ ማቶሳ 9:36፤ ማር. 6:34 6 ታ ዉደቱ ላለቴድኖ፤ ኡንቱንቱ ዞዘቱዋ ኡባ ቦላነ ꬎቃ ደረቱዋ ኡባ ቦላ ብቻሬድኖ። ቢታ ኡባ ጋጻ ጋካናዉ ላለቴድኖ፤ ሽን ኡንቱንታ ጾሞስያዌ ዎይ ኮይያዌ ባዋ” ያጌ።

7 “ ‘ሄዋ ድራዉ፥ ህንተኖ፥ ሄንꬃንቻቶ፥ መꬍና ጎዳ ቃላ ስስተ! 8 ኡባ ሞድያ መꬍና ጎዳይ ሀዋዳን ያጌ፤ “ታን ታ ደኡዋን ጫቃይ: ታ ዉድያ ሄምያዌ ꬋይና፥ ታ ዶርሳቱ ኦይቀቲደ፥ ባዙዋ ዶአቶ ኡባዉ ቁማ ግዴድኖ። ታ ሄንꬃንቻቱ ታ ዉደቱዋ ኮይቤና ድራዉነ ኡንቱንቱ ታ ዉደቱዋ ሄመናን አጊደ፥ ባረንታ ሄሜዳ ድራዉ፥ 9 ህንተኖ፥ ሄንꬃንቻቶ፥ መꬍና ጎዳ ቃላ ስስተ! 10 ታን ህንተ ሄንꬃንቻቶ ሞርከ፤ ታ ዉደቱዋ ታን ህንተፐ አካና፤ ታን ህንተና ላኤንꬆ ኡንቱንቶ ሄንꬃንቻ ከስከ። ሀዋፐ ስንꬃዉ ህንተ ህንተ ጻላላ ሄሚደ ደእክታ። ታ ዉደቱዋ ታን ህንተፐ ዎꬃ አካና፤ ሀዋፐ ስንꬃን ኡንቱንቱ ህንተዉ ቁማ ከስክኖ። ታን ኡባ ሞድያ መꬍና ጎዳይ ሀዋ ኦዳይ” ያጌ።

11 “ ‘አያዉ ጎፐ፥ ኡባ ሞድያ መꬍና ጎዳይ ሀዋዳን ያጌ፤ “ታን ታ ሁጲያን ታ ዉደቱዋ ጾሞሳናነ ኮያና። 12 ሄንꬃንቻይ ባረ ዉደቱዋፐ ባይና ኮይያዋዳን፥ ታንካ ታ ዉደቱዋ ኮያና፤ ሻሪ ጎዜዳነ ꬉማይ ስኬዳ ጋላስ ኡንቱንቱ ላለቴዳ ሳኣ ኡባፐ ታን ኡንቱንታ ሺሻና። 13 ቃይ ታን ካዉተꬃቱዋ ግዶፐነ ሀራ ቢታ ኡባፐ ከሳደ ሺሻና፤ ኡንቱንቱ ቢታ አሀና። እስራኤልያ ደረቱዋን፥ ፑልቶቱዋንነ አሳይ ደእያ ሳአቱዋ ኡባን ታን ኡንቱንታ ሄማና። 14 ታን ኡንቱንታ ሎኦ ቆሩዋን ሄማና፤ ቃይ እስራኤልያ ꬎቃ ደረቱ ኡንቱንቱ ሄመትያ ሳኣ ግዳናዋ። ሄዋን ኡንቱንቱ ሎኦ ቆሩ ደእያ እስራኤልያ ዞዘቱዋ ቦላ ሄመታናነ አላጻና። 15 ታን ታ ሁጲያን ታ ዉደቱዋ ሄማናነ አላጽሳና። ታን ኡባ ሞድያ መꬍና ጎዳይ ሀዋ ኦዳይ። 16 ባዬዳዋ ኮያና፤ ዎራ ቤዳዋ ዛራና፤ መኤዳዋ ኮላና፤ ሀርጌዳዋካ ፓꬃና። ሽን ሞꬌዳዋነ ምኔዳዋ ꬋይሳና፤ አያዉ ጎፐ፥ ታን ሱረ ፕርድያ ሄንꬃንቻ” ያጌ።

17 “ ‘ህንተኖ፥ ታ ዉድያ ዶርሳቶ፥ ህንተባ ግዶፐ፥ ኡባ ሞድያ መꬍና ጎዳይ ሀዋዳን ያጌ፤ “ህንተና ኡባካ ታን ፕርዳና፤ ኬካ ኢታፐ፥ ዶርሳ ዴሻፐ ታን ሻካና። 18 ህንተ ሎኦ ቆሩዋን ሄመትያዌ ግዳና ꬋይኔ፥ አቴዳ ማታ ህንተ ገድያን የሬꬅያዌ? ቃይ ህንተ ጽሎ ሃꬃ ኡሽያዌ ግዳና ꬋይኔ፥ አቴዳ ሃꬃ ገድያን ቡሉቂያዌ? 19 ታ ዉደቱ ህንተ ህንተ ገድያን የሬꬄዳ ማታ ማናዉነ ህንተ ህንተ ገድያን ቡሉቆየዳ ሃꬃ ኡሻናዉ በሲ?” ያጌ።

20 “ ‘ሄዋ ድራዉ፥ ኡንቱንቶ፥ ኡባ ሞድያ መꬍና ጎዳይ ሀዋዳን ያጌ፤ “በእተ፥ ሞꬎ መህያ ግዶነ ግልቃ መህያ ግዱዋን ታን ታ ሁጲያዉ ፕርዳና። 21 ላፋቱዋ ህንተ ህንተ ምይያንነ ህንተ ሞርግያን ሱግያ ድራዉነ ጋጻ ከሳና ጋካናዉ፥ ህንተ ኡንቱንታ ህንተ ካጭያን ቃይጭያ ድራዉ፥ 22 ታን ታ ዉደቱዋ አሻና። ሀዋፐ ስንꬃዉ ኦንነ ኡንቱንታ ኦይቀና፤ ታ ኬካ መህያፐነ ታ ኢታ መሄቱዋፐ ግዱዋን ታን ፕርዳና። 23 ታን ኡንቱንቱ ቦላን እት ሄንꬃንቻ፥ ታ ቆማ ዳዊታ ሱንꬃና፤ እ ኡንቱንታ ሄማናነ ኡንቱንቶ ሄንꬃንቻ ግዳናዋ። ሳፃ 7:17 24 ሄዋፐ ስንꬃን ታን መꬍና ጎዳይ ኡንቱንቱ ጾሳ ግዳና፤ ታ ቆማይ ዳውት ኡንቱንቱ ግዶን ካፑዋ ግዳና። ታን መꬍና ጎዳይ ሀዋ ኦዳድ። ህዝ. 37:24

25 “ ‘ “ታን ኡንቱንቱና ሳሮተꬃ ጫቁዋ ጫቀታና፤ ኢታ ዶአቱዋካ ታን ቢታፐ ድጋና፤ ያቶፐ ታ ዉዲ ባዙዋን ሳሮ ደአና፤ ዎራ ጋርሳንካ ህርግ ባይናን አላጻና። 26 ኡንቱንታነ ታ ደርያ ዩሹዋን ደእያ ሳአቱዋ አንጃና። ኡንቱንቶ ኮሽያ እራካ ዎድያን እማና፤ ሄ እራይ ኡንቱንቶ አንጆ ግዳና። 27 ጋደን ደእያ ምꬃቱ አይፋና፤ ቢታይካ ካꬃ ሞካና። አሳይ ኡባይ ባረንቱ ቢታን ሳሮ ደአና። ታን ኡንቱንቱ ሞርገ ምꬃ መንꬃደ፥ ኡንቱንታ አይለዬዳዋንቱ ኩሽያፐ ከስያ ዎደ፥ ታን መꬍና ጎዳ ግድያዋ ኡንቱንቱ ኤራና። 28 ሄዋፐ ጉይያን፥ ኡንቱንቱ ሀራ ካዉተꬃቶ ቦንቂያባ ግድክኖ፤ ቢታን ደእያ ዶአቱካ ኡንቱንታ ሚክኖ። አያይነ ዳጋንናን፥ ኡንቱንቱ ሳሮ ደአና። 29 ታን ኡንቱንቶ አራዳ ጋድያ እማና፤ ኡንቱንቱ ላኤንꬆ ኮሻን ዉርክኖ፤ ዎይ ቃይ ሀራ ካዉተꬃቶ ሸቂያባ ከስክኖ። 30 ሄ ዎደ ኡንቱንቱ ታን መꬍና ጎዳይ፥ ኡንቱንቱ ጾሳይ ኡንቱንቱና ደእያዋነ እስራኤልያ አሳይ ታ አሳ ግድያዋ ኤራና። ኡባ ሞድያ ጾሳይ ሀዋ ኦዳይ። 31 ህንተኖ፥ እስራኤልያ አሳቶ፥ ህንተ ታ ዉደቱዋ፤ ታ ቆሩዋን ምያ ዉደቱዋ፤ ህንተ ታ አሳ፤ ታንካ ህንተ ጾሳ። ታን ኡባ ሞድያ መꬍና ጎዳይ ሀዋ ኦዳይ” ያጌ’ ያጋ” ያጊደ ዬዳ።