1 መꬍና ጎዳ ቃላይ ታኮ ሀዋዳን ያጊደ ዬዳ፤ ኢሳ. 34:5-17፤ 63:1-6፤ ኤር. 49:7-22፤ ህዝ. 25:12-14፤ አሞጻ 1:11-12፤ አብድ. 1-14፤ ሚልክ. 1:2-5 2 “ላ አሳ ናአዉ፥ ኤዶማ ቢታን ደእያ ሰኢራ ደርያ ቦላ ነ ሶምእያ ዛራደ ትምቢትያ ኦዳ። 3 ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ ኔኖ፥ ሰኢራ ደርያዉ፥ ታን ነዉ ሞርከ፤ ታን ታ ኩሽያ ነ ቦላ የዳደ፥ ኔና ባዬዳነ መላ ሳኣ ከሳና። 4 ታን ነ ካታማቱዋ ኮላና፤ ኔንካ መላ ግዳና። ታን መꬍና ጎዳ ግድያዋ ኔን ሄዋን ኤራና።

5 “ ‘ነዉ እስራኤልያና ዉረና ሞርከተꬃይ ደእያ ድራዉ፥ ኡንቱንቱ መቱዋ ዎደ፥ ኡንቱንቱ ዉርሰꬃ ሙሩዋ ዎደ፥ ኡንቱንታ ኔን ማሻዉ አꬃደ እሜዳ ድራዉ፥ 6 ታን ኡባ ሞድያ መꬍና ጎዳይ ታ ደኡዋን ጫቃይ፤ ታን ኔና ሀይቁዋን ሙራና፤ ኔን ሀይቁዋፐ ከሳ አካናዉ ኡባካ ዳንዳያካ! ኔን አሳ ዎꬍያዋ እጸና ድራዉ፥ ኔና ዎꬍያ አሳይ ኔና ካላና! 7 ታን ሰኢራ ደርያ ባዬዳ መላ ከሳና፤ ቃይ ሄዋና ያነ ሃነ አꬍያ ኡባካ ድጋና። 8 ታን ነ ደረቱዋ ኡባ አሃን ኩንꬃና፤ ነ ዞዝያ፥ ነ ዎምባቱነ ነ ዛንጋራቱ ማሻን ሀይቄዳዋንቱ አሃን ካመታና። 9 ታን ኔና መꬍናዉ መላ ኦꬃና፤ ነ ካታማቱ ኦና ግዳና። ታን መꬍና ጎዳ ግድያዋ ህንተ ሄ ዎደ ኤራና።

10 “ ‘ታን መꬍና ጎዳይ እስራኤልያነ ይሁዳ ቢታቱዋን ደእሺና ህንተ፥ ሀ ላኡ ካዉተꬃቱዋነ ሀ ላኡ ቢታቱዋ ኑን ኦይቃና፤ ኡንቱንቱ ኑሳ ግዳና ጌዳ ድራዉ፥ 11 ታን ኡባ ሞድያ መꬍና ጎዳይ ታ ደኡዋን ጫቃይ፤ ህንተ ኡንቱንታ ሞርኪደ፥ ኡንቱንቱ ቦላ ይሎተዳ ይሉዋዳንነ ቃናቴዳ ቃናትያዳን፥ ታን ህንተዉ ዛራና። ታን ህንተና ፕርድያ ዎደ፥ ታን ታናተꬃ ህንተና ኤርሳና። 12 ቃይ ህንተ፥ እስራኤልያ ደረቱ መላ አቴድኖ፤ ኑን ኡንቱንታ ማና ማላ፥ ኑዉ እመቴድኖ’ ጊደ፥ ሃሳዬዳ ቦርያ ኡባ ታን መꬍና ጎዳይ ስሴዳዋ ህንተ ሄ ዎደ ኤራና። 13 ኔን ታ ቦላ ኦቶረታዳነ ዳርሳደ ሃሳያዳ፤ ታንካ ሄዋ ስሳድ” ያጌ።

14 ኡባ ሞድያ መꬍና ጎዳይ ሀዋዳን ያጌ፤ “ቢታይ ሳአይ ናሸታና ማላ፥ ታን ህንተና መላ ከሳና። 15 እስራኤልያ አሳ ላታይ መላ ግዴዳዋን ህንተ ናሸቴዳ ድራዉ፥ ሰኢራ ደርያነ ኤዶማ ቢታ ኡባ ታን መላ ኦꬃና። ታን መꬍና ጎዳ ግድያዋ ህንተ ሄዋን ኤራና ያጌ ያጋ።”