1 “ላ አሳ ናአዉ፥ እስራኤልያ ደረቶ ትምቢትያ ሀዋዳን ያጋደ ኦዳ፤ ‘ህንተኖ፥ እስራኤልያ ደረቶ፥ መꬍና ጎዳ ቃላ ስስተ! 2-3 ኡባ ሞድያ መꬍና ጎዳይ ህንተ ሞርከቱ፥ ሀሹ! “በን ꬎቃ ደረቱ ኡባይ ኑዉ ላታ ግዴድኖ!” ያጌድኖ። ሄዋ ድራዉ ያግ ትምቢትያ ኦድተ፥ ኡንቱንቱ ህንተና ኡባ ሳኣና መንሬꬂደ መላ ኦꬄዳ ድራዉ፥ ህንተ ጮራ ካዉተꬃቱዋን ሞደታናዳን ኦꬄዳ ድራዉ፥ ህንተ ዳሮ ቦረትያባነ ቅሊጨትያባ ኦሰቴድታ ያጌ ኡባ ሞድያ መꬍና ጎዳይ። 4 መꬍና ጎዳ ቃላ ስስተ! ኡባ ሞድያ መꬍና ጎዳይ ደረቶነ ዞዘቶ፥ ዛንጋራቶነ ዎምባቶ፥ ዩሹዋን ደእያ ሀራ ካዉተꬃቱ ኦይቄዳነ ቅሊጬዳ ሳአቶነ ባዬዳነ መላ ግዴዳ ካታማቶ ሀዋዳን ያጌ። 5 ኡባ ሞድያ መꬍና ጎዳይ ቱሙዋፐ ሀዋዳን ያጌ፤ “ታን ታ ኤጽያ ሀንቁዋን ሀራ ካዉተꬃቱዋ ቦላነ ኤዶማ ኡባ ቦላ ሃሳያድ። ኡንቱንቱ ዎዛናፐ ናሸቲደነ ካꬊደ፥ ታ ቢታ ባረንቶ አኬድኖ፤ ሄንꬃ ጋደቱዋካ ላቴድኖ። 6 ሄዋ ድራዉ፥ እስራኤልያ ቢታባ ትምቢትያ ኦዳ። ካዉተꬃቱዋ ቦርያ ድራዉ፥ ኡባ ሞድያ መꬍና ጎዳይ ሀንቁዋን ምሸታደ ግያዋ ኡባ ደረቶ ዞዘቶ፥ ዛንጋራቶነ ዎምባቶ ኦዳ። 7 ዩሹዋን ደእያ ካዉተꬃቱ ኡባይ ቦረታናዋ ታን ኡባ ሞድያ መꬍና ጎዳይ ቱሙዋፐ ጫቃደ ኦዳይ።

8 “ ‘ “ሽን ህንተኖ፥ እስራኤልያ ደረቶ፥ ህንተ ዳሻና፤ ታ አሳዉ እስራኤልያዉ አይፋና። አያዉ ጎፐ፥ ኡንቱንቱ ኤለካ ባረንቱ ቢታ ስማና። 9 ታን ህንተናና ደአይ፤ ታን ህንተኮ ስማና፤ ህንተ ቢታይ ጎሸታናነ ዘረታና። 10 ታን እስራኤልያ አሳ ፓይዱዋ ሀ ቢታን ዳርሳና፤ ካታማቱዋን አሳይ ደአና፤ ላለቴዳ ሳአቱ ስሚደ ግምበታና። 11 ታን አሳካ መህያካ ህንተ ቦላ ዳርሳና፤ ኡንቱንቱ የለታናነ ጮራታና። በንዋዳንካ ህንተ ቦላ አሳይ ደአናዳን ታን ኦꬃና። ታን ህንተዉ ካሰዋፐ አꬍያ ሎኦባ ኦꬃና። ታን መꬍና ጎዳ ግድያዋ ህንተ ሄዋን ኤራና። 12 ታን ታ አሳይ እስራኤሊ ህንተ ቦላን ዛር ደአናዳን ኦꬃና። ላኤንꬆ ሄ ቢታይ ህንተ ናናቱዋ ꬋይሰና። ኡንቱንቱ ህንተና ላታና፤ ህንተካ ኡንቱንቶ ላታ ግዳና” ያጌ።

13 “ ‘ኡባ ሞድያ መꬍና ጎዳይ ሀዋዳን ያጌ፤ አሳይ ሄ ቢታ፥ ህንተ ካዉተꬃይካ ናአይ ባይናዋ ኦꬄዳ ህንተ ቢታይካ አሳ ምያዋ ያግያዌ ቱማ። 14 ሄዋ ድራዉ፥ ሀዋፐ ስንꬃናዉ ሀ ቢታቱ አሳ ሚክታነ ህንተ ካዉተꬃ ናአይ ባይናዋ ከስክታ። ታን ኡባ ሞድያ መꬍና ጎዳይ ሀዋ ኦዳይ። 15 ቃይ ካዉተꬃቱዋ ቦርያ ሀዋፐ ስንꬃናዉ ታን ህንተና ስስከ፤ ህንተ አሳ ዬላካ ሀዋፐ ስንꬃናዉ ቶክክታ፤ ቃይ ሄ ቢታይ ህንተዉ ꬉበ ግዳና። ኡባ ሞድያ መꬍና ጎዳይ ሀዋ ኦዳይ ያጌ’ ያጋ” ያጊደ ዬዳ።

16 ቃይካ መꬍና ጎዳ ቃላይ ታኮ ሀዋዳን ያጊደ ዬዳ፤ 17 “ላ አሳ ናአዉ፥ እስራኤልያ አሳቱ ባረንቱ ቢታን ደእያ ዎደ፥ ኡንቱንቱ ባረንቱ ኦግያንነ ባረንቱ ኦሱዋን ቢታ ቱንሴድኖ፤ ታ ስንꬃን ኡንቱንቱ ኤሻይ ማጫ አሳ ፒላ ቱናተꬃ ማላ። 18 ኡንቱንቱ ቢታን ሱꬃ ጉሴዳ ድራዉነ ባረንቱ ኤቃን ቢታ ቱንሴዳ ድራዉ፥ ታ ሀንቁዋ ኡንቱንቱ ቦላን ጉሳድ። 19 ታን ኡንቱንታ ካዉተꬃቱዋ ግዶን ላላድ፤ ኡንቱንቱካ ቢታ ኡባን ላለቴድኖ። ታን ኡንቱንታ ኡንቱንቱ ኤሻዳንነ ኡንቱንቱ ኦሱዋዳን ፕርዳድ። 20 ኡንቱንቱ ቤዳ ሳኣ ኡባን አሳይ ኡንቱንታ፥ ‘ሀዋንቱ መꬍና ጎዳ አሳቱዋ፤ ሽን ኡንቱንቱ አ ቢታፐ ከሴዳዋንታ’ ያጌ፤ ሄዋን ኡንቱንቱ ታ ጌሻ ሱንꬃ ቱንሴድኖ። 21 ሽን እስራኤልያ አሳይ ቤዳ ካዉተꬃቱዋ ኡባ ግዶን ቱንሴዳ ታ ጌሻ ሱንꬃባይ ታና ምቼ።

22 “ሄዋ ድራዉ፥ ኔን እስራኤልያ አሳዉ ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ “ህንተኖ፥ እስራኤልያ አሳቶ፥ ታን ሀዋ ኦꬅያዌ፥ ህንተ ቤዳ ካዉተꬃቱዋ ኡባ ግዶን ቱንሴዳ ታ ጌሻ ሱንꬃ ድራሳፐ አትና፥ ህንተ ድራሳ ግደና። 23 ህንተ ቱንስና፥ ካዉተꬃቱዋ ግዶን ቱኔዳ ታ ዎልቃማ ሱንꬃ ጌሻተꬃ ታን በሳና። ኡንቱንቱ ጼልሽን፥ ህንተ ባጋና ታን ታ ጌሻተꬃ በስያ ዎደ፥ ታን መꬍና ጎዳ ግድያዋ ኡንቱንቱ ኤራና። ታን ኡባ ሞድያ መꬍና ጎዳይ ሀዋ ኦዳይ።

24 “ ‘ “አያዉ ጎፐ፥ ታን ህንተና ካዉተꬃቱዋ ግዶፐ ከሳና፤ ቢታ ኡባፐካ ሺሻና። ህንተ ቢታ ዛራደ አሀና። 25 ታን ህንተና ጽሎ ሃꬃን ፑሻካና፤ ህንተካ ጌያና፤ ያታደ ህንተና ህንተ ቱናተꬃ ኡባፐነ ህንተ ኤቃ ኡባፐ ጌሻና።

26 “ ‘ “ታን ህንተዉ ኦራꬃ ዎዛና እማና፤ ኦራꬃ አያናካ ህንተ ግዶን ዎꬃና፤ ቃይ ሹቻ ዎዛና ህንተፐ ከሳደ፥ አሹዋ ዎዛና እማና። ህዝ. 11:19-20 27 ታን ታ አያና ህንተ ግዶን ዎꬃና፤ ያታደ ህንተ ታ ዎጋ ካላናዳንነ ታ ህግያ ምንሲደ ናጋናዳን ኦꬃና። 28 ታን ህንተ ማይዛ አዋቶ እሜዳ ቢታን ህንተ ደአና፤ ህንተ ታ አሳ ግዳና፤ ታንካ ህንተ ጾሳ ግዳና። 29 ህንተ ቱናተꬃ ኡባፐ ታን ህንተና አሻና፤ ካꬃይ ህንተዉ ዳራናዳን ኦꬃና፤ ኮሻካ ላኤንꬆ ህንተ ቦላ አህከ። 30 ኮሻ ጋሱዋን ህንተ ካዉተꬃቱዋ ግዶን ካዉሸናዳን፥ ታን ህንተ ምꬃ አይፍያነ ህንተ ሾይቃ ካꬃ ዳርሳና። 31 ሄ ዎደ ህንተ ህንተ ኢታ ኦግያነ ህንተ ሎኦ ግደና ኦሱዋ ሀሳያና፤ ህንተ ናጋራነ ህንተ ቱና ኦሱዋ ድራዉ፥ ህንተ ህንተና ሸነታና። 32 ታን ሀዋ ኡባ ኦꬅያዌ ህንተ ድራሳ ግደናዋ ኤርተ። ህንተኖ፥ እስራኤልያ አሳቶ፥ ህንተ ህንተ ሀኖታን ዬላትተነ ካዉሽተ። ታን ኡባ ሞድያ መꬍና ጎዳይ ሀዋ ኦዳይ” ያጌ።

33 “ ‘ኡባ ሞድያ መꬍና ጎዳይ ሀዋዳን ያጌ፤ “ታን ህንተና ህንተ ናጋራ ኡባፐ ጌሽያ ጋላስ፥ ህንተ ካታማቱዋን ዛረꬂደ አሳይ ደአናዳን ኦꬃና፤ ኮለቴዳዋንቱካ ስሚደ ግምበታና። 34 አ ማታና አꬍያ አሳ ስንꬃን መላ ግዲደ ደእያ ቢታይ መላ ግድያዋ አጊደ ጎሸታና። 35 አሳይ ሃሳዪደ፥ ሀዌ ካሰ መላ ግዴዳ ቢታይ ሀእ ኤደነ ገነትያ ማላ ግዴዳ፤ ካሰ ኮለቴዳ፥ አሳይ ደኤናነ መላ ካታማቱካ ሀእ ዩሹ ግምበቴዳነ አሳይ ደእያ ካታማቱዋ ግዴድኖ ያጋና። 36 ሄ ዎደ ህንተ ዩሹዋን ደእያ አቴዳ ካዉተꬃቱ፥ ታን መꬍና ጎዳይ ኮለቴዳ ካታማቱዋ ዛራደ ኬጼዳዋነ መላ ቢታይ ስሚደ ካꬃ ሞካናዳን ኦꬄዳዋ ኤራና። ታን መꬍና ጎዳይ ሀዋ ኦዳድ፤ ታን ኦዴዳዋ ታንካ ኦꬃና” ያጌ።

37 “ ‘ኡባ ሞድያ መꬍና ጎዳይ ሀዋዳን ያጌ፤ “እስራኤልያ አሳይ ቃይካ እት ገደነ ታና ማዱዋ ኦቻናዳን ኦꬃና፤ ያታደ ኡንቱንቱ ፓይዱዋ ዉድያዳን ጮርሳና። 38 ያርሽያ መህያ ዉድያዳን፥ የሩሳላመን ባላ ጋላሳን ያርሾ ሺሼዳ ዉድያዳን፥ ኡንቱንቱ ኮለቴዳ ካታማቱዋን አሳ ዉዲ ኩማና። ታን መꬍና ጎዳ ግድያዋ ኡንቱንቱ ሄ ዎደ ኤራና” ያጌዳ’ ያጋ” ያጊደ ዬዳ።