1 መꬍና ጎዳ ኩሺ ታ ቦላ ዎꬌዳ፤ እ ታና መꬍና ጎዳ አያናን ከሲደ፥ መቀꬃይ ኩም ኡቴዳ ዎምባን ዎꬄዳ። 2 እ ታና ኡንቱንቱ ግዶን ያነ ሃነ ካለꬄዳ፤ ታንካ ክንችል መሌዳ ዳሮ መቀꬃቱ ኩሜዳዋንታ ዎምባ ግዶን በኣድ። 3 እ ታና፥ “ላ አሳ ናአዉ፥ ሀ መቀꬃቱ ስሚደ፥ ፓጻ ሸምፑዋና ደአናዉ ዳንዳዪኖ?” ያጌዳ።

ታን፥ “ኡባ ሞድያ መꬍና ጎዳዉ፥ ሀዋ ኔን ኤራሳ” ያጋድ።

4 እ ታና ሀዋዳን ያጌዳ፤ “ሀ መቀꬃቶ ሀዋዳን ያጋደ ትምቢትያ ኦዳ፤ ‘ህንተኖ፥ መላ መቀꬃቶ መꬍና ጎዳ ቃላ ስስተ፥ 5 ኡባ ሞድያ መꬍና ጎዳይ ሀ መቀꬃቶ ሀዋዳን ያጌ፤ “ታን ሸምፑዋ ህንተ ግዶ ገልሳና፤ ያቶፐ ህንተ ፓጻ ደአና። 6 ታን ህንተ ቦላ ግልዳይያ (ጻጶቱዋ) ዎꬃደ፥ አሹካ ህንተ ቦላ ስማናዳን ኦꬃደ፥ ህንተና ጋልባ ማይዛና። ህንተ ፓጻ ሸምፑዋና ደአና ማላ፥ ታን ህንተ ግዶ ሸምፑዋ ገልሳና። ሄ ዎደ ህንተ ታን መꬍና ጎዳ ግድያዋ ኤራና” ያጌ’ ያጋ” ያጌዳ።

7 እ ታና አዛዜዳዋዳን ትምቢትያ ኦዳድ፤ ታን ትምቢትያ ኦድሽን፥ ቃልጭቃልጭያ ኮሻይ ስሰቴዳ፤ ቃይ መቀꬃቱ ሺቂደ፥ ባረ ሳኣን ሳኣን ኦይቀቴድኖ። 8 ታን ጼልያ ዎደ፥ ኡንቱንቱ ቦላን ጻጶቱ ደኢኖ፤ አሹካ ኡንቱንቱ ቦላን ስሜዳ፤ ጋልባካ ማዬድኖ፤ ሽን ሸምፑ ኡንቱንቱን ደኤና።

9 ያትና፥ እ ታና ሀዋዳን ያጌዳ፤ “ላ አሳ ናአዉ፥ ጫርኮ ትምቢትያ ሀዋዳን ያጋደ ኦዳ፤ ‘ኡባ ሞድያ መꬍና ጎዳይ ሀዋዳን ያጌ፤ “ኔኖ፥ ጫርኮ፥ ኦይዱ ዞዝያናካ ሃያ፤ ኡንቱንቱ ሸምፑዋና ደአናዳን፥ ሀ ሀይቄዳዋንቱ ግዶ ዛራደ ፑና” ያጌ’ ያጋ” ያጌዳ። 10 እ ታና አዛዜዳዋዳንካ፥ ታን ትምቢትያ ኦዳድ፤ ሸምፑ ኡንቱንቱ ግዶ ገልና ፓጺደ፥ ሎይꬅ ዳሮ ኦላንቻቱዋ ግዲደ ኤቄድኖ። ሳፃ 11:11

11 ሄዋፐ ጉይያን፥ እ ታዉ ሀዋዳን ያጌዳ፤ “ላ አሳ ናአዉ፥ ሀ መቀꬃቱ ኩመንꬃ እስራኤልያ አሳ ሌምሶ፤ እስራኤልያ አሳይካ፥ ‘ኑ መቀꬃቱ መሌድኖ፤ ኑ ስንꬃ ናሸቻይካ ክቼዳ፤ ኑን ኡባና ꬋዬዶ’ ያጊኖ። 12 ሄዋ ድራዉ፥ ኡንቱንቶ ሀዋዳን ያጋደ ትምቢትያ ኦዳ፤ ‘ኡባ ሞድያ መꬍና ጎዳይ ሀዋዳን ያጌ፤ “ህንተኖ፥ ታ አሳቶ፥ ታን ህንተ ዱፉዋ ዶያና፤ ህንተና ሄዋፐ ከሳና፤ ታን ህንተና ዛራደ፥ እስራኤልያ ቢታ አሀና። 13 ታ አሳቶ፥ ታን ህንተ ዱፉዋ ዶይያ ዎደነ ህንተና ከስያ ዎደ፥ ታን መꬍና ጎዳ ግድያዋ ህንተ ኤራና። 14 ታን ታ አያና ህንተ ግዶን ዎꬃና፤ ህንተ ፓጻ ደአና። ቃይ ታን ህንተና ህንተ ቢታን ዎꬃና። ሄ ዎደ ታን መꬍና ጎዳይ ኦድያዋነ ኦዳደ ኦꬄዳዋ ህንተ ኤራና። ታን መꬍና ጎዳይ ሀዋ ኦዳይ” ያጌ’ ያጋ” ያጌዳ።

15 ዛሪደካ መꬍና ጎዳ ቃላይ ታኮ ሀዋዳን ያጊደ ዬዳ፤ 16 “ላ አሳ ናአዉ፥ እት ምꬃ ጻምኣ አካደ፥ አ ቦላ፥ ‘ሀዌ ይሁዳዋነ አናና ደእያ እስራኤልያ አሳዋ’ ያግያዋ ጻፋ። ቃይ ሀራ ጻምኣ አካደ፥ አ ቦላ፥ ‘ሀዌ ኤፍሬማዋ፤ እካ ቃይ ዮሴፎዋነ አናና ደእያ እስራኤልያ አሳዋ’ ያግያዋ ጻፋ። 17 ሄዋፐ ጉይያን፥ ኡንቱንቱ ነ ኩሽያን እት ጋትማ ግዳናዳን፥ ኡንቱንቱ ላኡዋ እትፐ ጋꬃ።

18 “ነ ቢታ አሳይ ኔና፥ ‘ሀዌ ኔን ኦꬅያዌ አዬ? ኑዉ ብለꬃ ኦዳ’ ያጊደ ኦችያ ዎደ፥ 19 ኡንቱንቶ ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ “ታን ኤፍሬማ ኩሽያን ደእያ ዮሴፎ ጋትማነ አናና ደእያ እስራኤልያ ዛራቱዋ አካናዉ ሀናይ፤ አካደ ኡንቱንቱ ላኡዋ እት ጋትማ ኦꬃናዉ፥ ይሁዳ ጋትማና ጋꬃና። ያቶፐ ኡንቱንቱ ላኡ ታ ኩሽያን እቱዋ ግዳና” ያጌ’ ያጋ።

20 “ሄ ኔን ኡንቱንቱ ቦላ ጻፌዳ ላኡ ጋትማቱዋ ኡንቱንቱ ስንꬃን ኦይቃደ፥ 21 ኡንቱንታ ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ “እስራኤልያ አሳ ኡንቱንቱ ቤዳ ካዉተꬃቱዋ ግዶፐ ከሳና፤ ታን ኡንቱንታ ኡባ ሳፐ ሺሻደ፥ ኡንቱንቱ ቢታ ዛራደ አሀና። 22 እስራኤልያ ደረቱዋ ቦላ፥ ኡንቱንቱ ቢታን ታን ኡንቱንታ እት ካዉተꬃ ኦꬃና፤ ኡንቱንቱ ኡባ ቦላ እት ካቲ ካተታና። ቃይ ኡንቱንቱ ላኤንꬆ ላኡ ቢታ ከስክኖ፤ ዎይ ላኡ ካዉተꬃ ግዲደ ሻከትክኖ። 23 ሄዋፐ ጉይያን፥ ኡንቱንቱ ባረንቱ ኤቃቱዋንነ ባረንቱ ሸነይያባቱዋን፥ ዎይ ባረንቱ ናቁዋን ባረንታ ቱንስክኖ። ዋኒደ ጎፐ፥ ታን ኡንቱንታ ኡንቱንቱ ጉየ ስሜዳ ናጋራ ኡባፐ አሻና፤ ቃይ ታን ኡንቱንታ ጌሻና። ኡንቱንቱ ታ አሳ ግዳና፤ ታንካ ኡንቱንቱ ጾሳ ግዳና።

24 “ ‘ “ታ ቆማይ ዳውት ኡንቱንቶ ካትያ ግዳና፤ ኡንቱንቶ ኡባዉ እት ሄንꬃንቻ ጻላላይ ደአና። ኡንቱንቱ ታ ህግያ ካላና፤ ታ ዎጋካ ምንሲደ ናጋና። ህዝ. 34:24 25 ታን ታ ቆማ ያቆባዉ እሜዳነ ህንተ ማይዛ አዎቱ ደኤዳ ቢታን ኡንቱንቱ ደአና። ሄ ቢታን ኡንቱንቱ፥ ኡንቱንቱ ናናቱነ ኡንቱንቱ ናናቱዋ ናናቱ መꬍናዉ ደአና፤ ታ ቆማይ ዳውት ኡንቱንቱ ቦላን መꬍናዉ ካፑዋ ግዳና። 26 ታን ኡንቱንቱና ሳሮተꬃ ጫቁዋ ጫቀታና፤ ሄ ጫቁካ ኡንቱንቱና መꬍና ጫቁዋ ግዳናዋ። ታን ኡንቱንታ ምንሳደ ኤሳና፤ ኡንቱንቱ ፓይዱዋካ ጮርሳና፤ ታ ጌሻ ጎልያካ መꬍናዉ ኡንቱንቱ ግዶን ዎꬃና። 27 ያታደ ታን ሄዋን ኡንቱንቱና ደአና። ታን ኡንቱንቱ ጾሳ ግዳና፤ ኡንቱንቱካ ታ አሳ ግዳና። 2 ቆሮ. 6:16፤ ሳፃ 21:3 28 ታ ጌሻ ጎሊ ኡንቱንቱ ግዶን መꬍናዉ ደእያ ዎደ፥ እስራኤላቱዋ ጌሽያዌ ታና፥ መꬍና ጎዳ ግድያዋ ካዉተꬃቱ ኤራና” ያጌ’ ያጋ” ያጊደ ዬዳ።