1 መꬍና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ ማጎጋ ቢታን ደእያ ጎጋኮ፥ መሸካነ ቱባላ አሳዉ ዋና ካፑዋኮ ስማደ፥ አ ቦላ ትምቢትያ ኦዳ። ሳፃ 20:8 3 ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ ላ ጎጋ፥ መሸካነ ቱባላ አሳዉ ዋና ካፖ፥ ታን ነዉ ሞርከ። 4 ታን ኔና ጉየ ዛራና፤ ነ ጎጎጩዋን ማጋ ገልሳደ፥ ኔና ነ ኩመንꬃ ኦላንቻቱዋና፥ ነ ፓራቱዋና፥ ኩመንꬃ ኦላ ሚሻ ማዬዳ ነ ፓራ አሳቱዋናነ ባረንቱ ማሻ ለለስያ፥ ዎልቃማነ ጉꬃ ጎንዳልያ ኦይቄዳ ጉይተ አሳና ኔና ጎቻደ ከሳና። 5 ፓርሰፐ፥ ቶጵያፐነ ሊብያፐ ዬዳ አሳይ ጎንዳልያ ኦይቂደ፥ ሁጲያን ብራታ ቆብያ ዎꬂደ፥ ኡንቱንቱና ግዳና። *ሊብያፐ፦ እብራዌꬁዋን ሄ ቢታይ “ፑጻ” ጌተቴ። 6 ቃይ ጎመርነ አ ኦላንቻቱ ኡባይ፥ ሁጲሳ ጋጻን ቤት-ቶጋርምነ አ ኦላንቻቱ ጉይቲ፥ ሄ ጮራ አሳቱ ኔናና ግዳና።

7 “ ‘ኔንነ ኔኮ ሺቄዳ አሳይ ኡባይ ጊግተ፤ ህንተና ማክተ። ያታደ ኔን ኡንቱንታ አዛዝያዋ ግዳ። 8 ዳሮ ዎድያፐ ጉይያን፥ ኔን ኮየታና፤ ስንꬃፐ ያና ላይꬃቱዋን ኔን ዳሮ ዎድያ መላ ግዲደ ደኤዳ ቢታ፥ ኦላፐ ሸምፔዳ ቢታ፥ አን አሳይ ዳሮ ካዉተꬃቱዋፐ እስራኤልያ ደረቱዋኮ ሺቄዳ ቢታ ገሌዳ። ኡንቱንቱ ዳሮ ካዉተꬃቱዋፐ ሺቄዳዋንታነ ኡባይካ ሀእ ሳሩዋን ደእያዋንታ። 9 ኔን፥ ነ ኦላንቻቱነ ኔናና ደእያ ዳሮ ካዉተꬃቱ ጎትያዳን ደንዳና፤ ህንተ ሻርያዳን፥ ቢታ ካማና’ ” ያጌ።

10 ኡባ ሞድያ መꬍና ጎዳይ ሀዋዳን ያጌ፤ “ሄ ዎደ ቆፋይ ነ ዎዛና ግዶ ዪና፥ ኔን ኢታባ ሀልቻና። 11 ኔን ሀዋዳን ያጋና፤ ‘ታን ሄ ድረትቤና ቄር ካታማቱ ደእያ ቢታ ገላደ፤ ሄ ዎፑ ጊደ፥ ህርግ ባይናን ደእያ አሳቱዋ፥ ኡንቱንቶ ኡባዉካ ድርሳ፥ ፐንጊ ዎይ ኩሉቡ ባይናዋንታ ታን ኦላና። 12 ታን ኡንቱንታ ኦሞዳናነ ቦንቃና፤ ካሰ መላ ግዴዳ ቢታ ስሚደ ኡቴዳ፥ ካዉተꬃቱዋ ግዶፐ ሺቄዳ፥ ሚዛነ ሚሻ ሞዴዳ፥ ቢታዉ ጉልአን ኡቴዳ አሳ ቦላን ታ ኩሽያ ደንꬃና ያጋና። 13 ሳባ አሳይ፥ ዳዳና አሳይነ ታርሴሰ ካታማቱዋ ዛልአንቻቱ ያላጋ ኦላንቻቱ ኡባይ፥ ኔን ቦንቃናዉ ያድ? ኔን ነ ኦላንቻቱዋ ኦሞዱዋ ቶሳናዉ፥ ብራነ ዎርቃ አፍሳናዉ፥ ሚዛነ ሚሻ አካናዉነ ሎይꬅ ዳሮ ኦሞዱዋ ኦይቃናዉ ሺሻዲ? ያጋና’ ያጌ” ያጋ።

14 ሄዋ ድራዉ፥ “አሳ ናአዉ፥ ጎጋ ቦላ ትምቢትያ ኦዳ። ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ ሄ ዎደ፥ ታ አሳይ እስራኤሊ ህርግ ባይናን ደእያ ዎደ፥ ኔን አኬካና። 15 ኔን ደእያ ሁጲሳ ጋጻ ቢታፐ ያና። ኔንነ ኔናና ጮራ ካዉተꬃቱ ፓራ ቶጊደ፥ ምኖ ኦላንቻ ግዲደ፥ ጉይቲ ያና። 16 ቢታ ካምያ ሻርያዳን፥ ኔን ታ አሳ እስራኤልያ ቦላ ኦላና። ላ ጎጋ፥ ስንꬃፐ ያና ዎደ፥ ታን ኔና ታ ቢታ ቦላ ዎራጅሳና። ሄዋ ታን ኦꬅያዌ ካዉተꬃቱ ታና ኤራናሳነ ታን ነ ባጋና ኦꬅያዋን ታ ጌሻተꬃይ ኡንቱንቱ ስንꬃን ቤታናሳ’ ” ያጌ።

17 ኡባ ሞድያ መꬍና ጎዳይ ሀዋዳን ያጌ፤ “ታን ታ ቆማቱዋ ባጋና፥ እስራኤልያን ትምቢትያ ኦድያዋንቱ ባጋና ካሰ አꬌዳ ዎደ ኦዴዳዌ ኔና። ኡንቱንቱ ሄ ዎደ ዳሮ ላይꬃ ታን ኔና ኡንቱንቱ ቦላ አሀናዋ ኦዴድኖ” ያጌ።

18 ኡባ ሞድያ መꬍና ጎዳይ ሀዋዳን ያጌ፤ “ጎግ እስራኤልያ ቦላ ገልያ ዎደ፥ ታ ሀንቁ ሱላና። 19 ሄ ዎደ እስራኤልያ ቢታን ዎልቃማ ቢታ ቃꬃይ ሀናና፤ ሄዋ ታን ታ ምሹዋንነ ታ ኤጽያ ሀንቁዋን አዋያይ። 20 አባ ሞሊ፥ ሳሉዋ ካፉ፥ ደርያን ደእያ መሂነ ዶአይ፥ ሳኣ ቦላን ዎጽ ቃጽያ መታ ኡባይነ ሳኣን ደእያ አሳይ ኡባይ ታ ስንꬃን ኮኮራና። ደረቱ ኩንዳና፤ አፎቱካ ዎዳና፤ ቃይ ድርሳ ግምቢ ኡባይካ ኮለተና። 21 ታን ታ ደረቱዋ ኡባን ጎጋ ቦላ ማሻይ ደንዳናዳን ኦꬃና፤ ኦላንቻቱ ባረንቱ ማሻ ባረንቱ ቦላ ዛሪደ፥ እቱ እቱዋ ሲፋና። ታን ኡባ ሞድያ መꬍና ጎዳይ ሀዋ ኦዳይ። 22 ታን ኢታ ሀርግያንነ ሀይቁዋን አ ሙራና፤ ቃይ ዎልቃማ እራ፥ ሻቻ፥ ኤጽያ ዲንያ ታን አ ቦላ፥ አ ኦላንቻቱዋ ቦላነ አናና ደእያ ጮራ ካዉተꬃቱዋ ቦላ ቡክሳና። 23 ሄዋዳን ኦꬃደ፥ ታን ታ ግታተꬃነ ታ ጌሻተꬃ በሳና። ቃይ ዳሮ ካዉተꬃቱዋ ታን ታናተꬃ ኤርሳና። ታን መꬍና ጎዳ ግድያዋ ኡንቱንቱ ሄዋን ኤራና” ያጌ ያጋ።