1 “ኡባ ሞድያ መꬍና ጎዳይ ሀዋዳን ያጌ፤ ‘ላ አሳ ናአዉ፥ ጎገ ቦላ ትምቢትያ ኦዳ። ሀዋዳን ያጋ፤ “መሸካነ ቱባላ አሳዉ ዋና ካፖ ጎጋ፥ ታን ነዉ ሞርከ። 2 ታን ኔና ጉየ ዛራና፤ ሁጲሳ ሃኮ ቢታፐ ጎቻ ከሳደ፥ እስራኤልያ ደረቱዋ ቦላ ታን ኔና አሀና። 3 ሄዋፐ ጉይያን፥ ታን ነ ሀድርሳ ኩሽያፐ ዎንዳፍያ፥ ነ ኡሸቻ ኩሽያፐ ዎንዳፍያ ፖꬃ ሾጫደ ኦልሳና። 4 ኔን፥ ነ ኦላንቻቱነ ኔናና ደእያ ካዉተꬃቱ ኡባይ እስራኤልያ ደርያ ቦላን ኩንድ አታና። ታን ህንተ አሹዋ ምያ ካፎቶነ ባዙዋ ዶአቶ ቁማ ኦꬃደ እማና። 5 ታን ኡባ ሞድያ መꬍና ጎዳይ ኦዴዳ ድራዉ፥ ህንተ ምልጽ ጌዳ ደምባን ኩንድ አታና። 6 ማጎጋ ቢታንነ አባ ዶናን፥ ህርግ ባይናን ኡቴዳ አሳ ቦላን ታን ኤጽያ ታማ የዳና። ታን መꬍና ጎዳ ግድያዋ ኡንቱንቱ ሄዋን ኤራና። 7 ታን ታ ጌሻ ሱንꬃይ ታ አሳ እስራኤልያ ግዶን ኤረታናዳን ኦꬃና። ሀዋፐ ስንꬃናዉ ታ ጌሻ ሱንꬃይ ሸቀተና። ሄዋፐ ጉይያን፥ ካዉተꬃቱ ታን መꬍና ጎዳ፥ እስራኤልያ ጌሻ ግድያዋ ኤራና” ያጋ’ ያጌ።

8 “ኡባ ሞድያ መꬍና ጎዳይ ሀዋዳን ያጌ፤ ‘ “ሄ ጋላሳይ ያና፤ አተና” ያጋደ ታን ኦዴዳ ጋላሳይ ሀዋ። 9 ሄ ዎደ እስራኤልያ ካታማቱዋን ደእያ አሳይ ከሲደ፥ ኦላ ሚሻቱዋ ኡባ ታማን ኤꬃና፤ ሄዋንቱካ ዎልቃማነ ጉꬃ ጎንዳለቱዋ፥ ዎንዳፈቱዋነ ማሻቱዋ፥ ቶራቱዋነ ዱላቱዋ። ላፑን ላይꬃ ኩመንꬃ ኡንቱንቱ ሄዋንታ ኤꬅያ ምꬃ ከሲደ ጎኤታና። 10 ኡንቱንቱ ምꬃ ምጻናዉ ዎይ ዎራፐ ኤꬅያ ምꬃ ቃንጻናዉ ኮሸና። አያዉ ጎፐ፥ ኡንቱንቱ ሺሼዳ ኦላ ሚሻቱዋ ኤꬅያ ምꬃ ኦꬂደ ጎኤታና። ባረንታ ቦንቄዳዋንታ ኡንቱንቱ ቦንቃና፤ ባረንቱባ አኬዳዋንቱፐ ኡንቱንቱዋ አካና። ታን ኡባ ሞድያ መꬍና ጎዳይ ሀዋ ኦዳይ።

11 “ ‘ሄ ጋላስ ጎግ ሞገትያ ሳኣ ታን አዉ እስራኤልያ ቢታን እማና። ሄ ሳአይ አባፐ አዋይ ዶልያ ባጋና ደእያ ኦግያ አሳቱዋ ዎምባ ግያ ዎምባ ግዶና ግዳናዋ። ጎግነ አ ኦላንቻቱ ኡባይ ሄዋን ሞገትያ ድራዉ፥ ኡንቱንቱ ዱፉ ሄዋና ሀመትያ አሳዉ ኦግያ ጎርዳና። ሄ ሳአይካ ቃይ፥ “ጎጋ ኦላንቻቱዋ ዎምባ” ጌተቲደ ጼገታና። 12 ሄዋፐ ጉይያን፥ እስራኤልያ አሳይ ቢታ ጌሻናዉ፥ ላፑን አግና ኩመንꬃ ሄ አሃ ሞጊደ ጋምአና። 13 ሄ ቢታን ደእያ አሳይ ኡባይ አሃ ሞግያዋን ማደታና፤ ሄዋ ድራዉ፥ ታን ታ ቦንቹዋ ቆንጭስያ ዎደ ኡንቱንቶ ቦንቾ ሱንꬃ ግዳናዋ። ታን ኡባ ሞድያ መꬍና ጎዳይ ሀዋ ኦዳይ። 14 ላፑን አግናፐ ጉይያን፥ አቴዳ አሃይ ደኦፐ፥ ቢታይ ጌያናዳን፥ ዩይ ዩዪደ አቴዳ አሃ ኮይ ሞጋናዉ፥ አሳይ ዶረታና። 15 ኡንቱንቱ ቢታን ዩይሽና፥ አሳ መቀꬃይ ቤቶፐ፥ ሄ መቀꬃ ምይያን ማላታ ዎꬃና። ሞግያዋንቱ ዪደ፥ ጎጋ ኦላንቻቱዋ ዎምባን ሞጋና። 16 ሄዋዳን ኦꬅና ቢታይ ስሚደ ጌያና። ሄዋ ሄራን፥ “ኦላንቻቱዋ ካታማ” ጌተት ጼገትያ ካታማይ ደአና’ ያጌ።

17 “ኡባ ሞድያ መꬍና ጎዳይ ሀዋዳን ያጌ፤ ‘ላ አሳ ናአዉ፥ ካፉዋ ዛረ ኡባነ ሳኣ ዶአቱዋ ኡባ ሀዋዳን ያጋደ ጼሳ፤ “ታን ህንተዉ እስራኤልያ ደረቱዋ ሁጲያን ጊግሴዳ ዎልቃማ ያርሹዋ ኡባ ሳፐ ሺቂደ፥ እትፐ ሃይተ። ሄዋን ህንተ አሹዋ ማና፤ ሱꬃካ ኡሻና። ሳፃ 19:17-18 18 ህንተ ምኖ አሳቱዋ አሹዋ ማና፤ ቢታ ካፖቱዋ ሱꬃካ ኡሻና። ኡንቱንቱ ህንተዉ ዶርሳ ጋልሳ፥ አንቃራ ዶርሳ፥ ዴሻ ኮልያነ ኦርዶ ቦራ ማላ ግዳና። ኡንቱንቱ ኡባይካ ꬊከቴዳ ባሳነ መሄቱዋ ማላ። 19 ታን ህንተዉ ጊግስያ ያርሹዋፐ ካላና ጋካናዉ፥ ሞꬉዋ ህንተ ማና፤ ቃይ ማꬆታና ጋካናዉ፥ ሱꬃ ህንተ ኡሻና። 20 ታን ህንተዉ አꬅያ ማዳፐ ፓራቱዋ፥ ፓራ አሳቱዋ፥ ምኖ አሳቱዋነ ዱማ ዱማ ቆሞ ዎታዳራቱዋ ህንተ ጋንጂ ካላና ጋካናዉ ህንተ ማና” ያጋደ ጼሳ። ኡባ ሞድያ መꬍና ጎዳይ ሀዋ ኦዳይ።

21 “ ‘ታን ካዉተꬃቱዋ ግዶን ታ ቦንቹዋ ቆንጭሳና። ቃይ ታን ሙርያ ሙሩዋነ ታን ኡንቱንቱ ቦላን ደንꬄዳ ታ ኩሽያ ካዉተꬃቱ ኡባይ በአና። 22 ሄ ጋላሳፐ ዶሚደ፥ እስራኤልያ አሳይ ታን መꬍና ጎዳ ኡንቱንቱ ጾሳ ግድያዋ ኤራና። 23 ቃይ እስራኤልያ አሳይ ኦሞዱዋን ቤዳዌ ባረንቱ ናጋራ ጋሱዋና ግድያዋ ሀራ ካዉተꬃቱ ኤራና። ኡንቱንቱ ታዉ አማነተናን እጼዳ ድራዉ፥ ታን ታ ሶምኡዋ ኡንቱንቱፐ ገንꬃደ፥ ኡንቱንታ ኡንቱንቱ ሞርከቶ አꬃደ እማድ፤ ኡንቱንቱ ኡባይካ ኦላን ሀይቂ ዉሬድኖ። 24 ኡንቱንቱ ቱናተꬃነ ኡንቱንቱ ኢታተꬃ ኬሻ ኡንቱንቶ በስያ ሙሩዋ ሙራድ፤ ታ ሶምኡዋካ ኡንቱንቱፐ ገንꬃድ’ ያጌ።

25 “ኡባ ሞድያ መꬍና ጎዳይ ሀዋዳን ያጌ፤ ‘ሀእ ታን ያቆባ ዛራቱዋ ኦሞዱዋፐ ዛራደ ዱረያና፤ ቃይ እስራኤልያ አሳ ኡባዉ ቃረታና። ታን ታ ጌሻ ሱንꬃይ ሸቀተናዳን ኦꬃና። 26 ኡንቱንቱ ኡንቱንታ ያሽያዌ እቱነ ባይና ሳን፥ ባረንቱ ቢታን ሳሮ ደኡሳ ዶምያ ዎደ፥ ካሰ ባረንቱ ዬላነ ታዉ ኡንቱንቱ አማነተናን እጼዳዋ ዶጋና። 27 ታን ኡንቱንቱ ካዉተꬃቱዋ ኡባ ግዶፐ ዛራደ አሀና፤ ቃይ ኡንቱንቱ ሞርከቱዋ ቢታፐካ ኡንቱንታ ሺሻና። ሄዋዳን ኦꬃደ፥ ታን ጌሻ ግድያዋ ኡንቱንቱ ባጋና ካዉተꬃቱዋ ኡባ በሳና። 28 ታን ኡንቱንቱ ካዉተꬃቱዋ ግዶ ኦሞዶ የዴዳ ድራዉነ ኡንቱንታ ሺሻደ፥ ኡንቱንቱ ቢታ ዛሬዳ ድራዉ፥ ታን መꬍና ጎዳ ኡንቱንቱ ጾሳ ግድያዋ ኡንቱንቱ ኤራና። ታን ኡንቱንቱፐ እቱዋነ ካዉተꬃቱዋ ግዶን አግከ። 29 ታን ታ አያና እስራኤልያ አሳ ቦላ ጉሳና፤ ላኤንꬆ ታ ሶምኡዋ ኡንቱንቱፐ ኡባካ ገንꬅከ። ታን ኡባ ሞድያ መꬍና ጎዳይ ሀዋ ኦዳይ’ ያጌ” ያጊደ ዬዳ።