1 ሄዋፐ ስሚደ፥ ሄ ብታኒ ታና ጌሻ ጎልያን ደእያ ጌሻ ሳኣ ገልሴዳ። ሄ ጌሻ ሳኣ ጎዳ ኦርዶተꬃ ልክና 6 ዋꬋ ግዴዳ። 2 ፐንግያ ጎምፓይ ቃይ 10 ዋꬋ ግዴዳ። ሀድርሳናነ ኡሸቻና ደእያ ጎዳቱዋ ጎምፓይ እቼሹ እቼሹ ዋꬋ። ቃይ እ ጌሻ ሳኣ ልክና 40 ዋꬋ፥ ጎምፓይካ 20 ዋꬋ ግዴዳ።

3 ሄዋፐ ጉይያን፥ ቆልኦ ገሌዳ። ሄ ገልያ ፐንግያ ጎዳ ኦርዶተꬃ ልክና 2 ዋꬋ ግዴዳ። ፐንግያ ጎምፓይ 6 ዋꬋ ግዴዳ፤ ሀድርሳናነ ኡሸቻና ደእያ ጎዳቱዋ አኮተꬃይ ላፑን ላፑን ዋꬋ። 4 ቃይ እ ቆልኡዋ ልክና አዱሳተꬃይ 20 ዋꬋ፥ ጎምፓይካ 20 ዋꬋ ግዴዳ። ሄዋፐ ጉይያን እ ታና፥ “ሀዌ ኡባፐ አꬍያ ጌሻ ሳኣ” ያጌዳ።

5 ሄ ብታኒ ጌሻ ጎልያ ጎዳ ልክና ኦርዶተꬃይ 6 ዋꬋ ግዴዳ። ሄ ጎዳና ኦይቀቲደ፥ ጌሻ ጎልያ ዩሹዋን ኬጸቴዳ ኦይዱ ኦይዱ ዋꬋ አክያ ዳሮ ክፍለቱ ደኢኖ። 6 ሄ ክፍለቱ እቱ እቱዋ ቦላ ኬጸቴዳ ሄዙ ፖቀ ግድሽና፥ እት እት ፖቅያዉ ሀታሙ ክፍለቱ ደኢኖ። ዞንጎልስ የግያ ምꬃይ ጌሻ ሳኣ ግዶ ገለና ማላ፥ ኮይሮ ጎዳና ኦይሰꬂደ፥ ሀራ ሹቻ ዎꬄድኖ። 7 ሄ ሹቻይ ጋርሳ ዉርሰꬃ ፖቅያን ኦርዴዳ ድራዉነ ፑደ ሺቂደ ሌእያ ድራዉ፥ ክፍለቱካ ፑደ ሺቅያ ዎደ፥ አክ አኪደ ቢኖ። ኮይሮ ዉይግያፐ ግዶ ፖቅያና አꬊደ፥ ክል ዉርሰꬃ ፖቅያ ጋካናዉ አፍያ ደꬃቱ ደኢኖ።

8 ታን ጌሻ ጎልያ ዩሹዋን ꬎቁ ጌዳ ባሱ ደእያዋ በኣድ። አ ዩሹዋን ደእያ ክፍለቱ ሄ ባሱዋ ቦላን ኬጸቴድኖ፤ ሄ ባሱ ግዶ ዳባባፐ 6 ዋꬋ ꬎቄ። 9-11 ሄ ክፍለቱዋ ካረ ባጋ ጎዳ ኦርዶተꬃይ 5 ዋꬋ። ክፍለቱዋ ገልያ ላኡ ፐንገቱ፥ እቱ ሁጲሳ ባጋና፥ እቱ ቃይ ገድሳ ባጋና ደኢኖ፤ ቃይ ሄ ክፍለቱዋ ዩሹዋን ደእያ ባሱዋ አኮተꬃይ 5 ዋꬋ። ጌሻ ጎልያ ባሱዋፐነ ግዶ ዳባባን ደእያ ክፍለቱዋፐ ግዱዋን ደእያ መላ ሳአይ 20 ዋꬋ።

12 ጌሻ ጎልያፐ አዋይ ዉልያ ባጋና ደእያ መላ ሳኣፐ ሄፍንꬃ ባጋና እት ጎሊ ደኤ። ሄ ጎልያ 90 ዋꬋ፤ ጎምፓይካ 70 ዋꬋ። ሄ ጎልያ ጎዳይ 5 ዋꬋ ኦርዳ።

13 ሄ ብታኒ ጌሻ ጎልያ ካረ ባጋ ልክና አዱሳተꬃይ 100 ዋꬋ። ጌሻ ጎልያ ዞክሳፐ ቢደ፥ ህን አዋይ ዉልያ ባጋ ጎልያ ዞክሳ ጋካናዉ ሳኣ ልክና፥ 100 ዋꬋ ግዴዳ። 14 አዋይ ዶልያ ባጋና ደእያ ጌሻ ጎልያ ጎምፓይ ላኡ መላ ሳአቱዋ ጉጂደ ልክና፥ 100 ዋꬋ አኬ። 15 ላኡ ባጋናካ ደእያ አꬍያ ሳአቱዋ ጉጂደ፥ አዋይ ዉልያ ባጋና ደእያ ጎልያ ልክና 100 ዋꬋ ግዴዳ።

ጌሻ ጎልያ ጌሻ ሳአይ፥ አ ቆልኡነ አ ባራንዳይ 16 ዉይግያፐ ቢደ፥ ማስኮተቱዋ ጋካናዉ፥ ምꬃን ሌጸት ኡቴዳ፤ ማስኮተቱካ ምꬃን ሌጸት ኡቴድኖ። 17-18 ጌሻ ጎልያዉ ሶ ባጋ ክፍለቱዋ ጎዳይ ፐንገቱዋፐ ቦላዉ አꬋና ጋካናዉ፥ ዛምባቱዋነ ክሩበቱዋ ምስለቱዋን አሌቀት ኡቴዳ፤ ክፍልያን ዩይ አꬋናዉካ ዛምባ ምስሊነ ክሩብያ ምስሊ ዋላካን መት ኡቴዳ። ክሩበቶ ኡባዉ ላኡ ላኡ ሶምኢ ደኤ። 19 እት ባጋና አሳ ሶምኡዋ ማላትያዌ ዛምባ ምስልያኮ ጼሌ፤ ቃይ ሀራ ባጋና ጋሙዋ ሶምኡዋ ማላትያዌ ዛምባ ምስልያኮ ጼሌ። 20 ዉይግያፐ ደንድ ቢደ፥ ፐንገቱዋፐ ቦላ ባጋን ደእያ ሳኣ ጋካናዉ፥ ጎዳ ዩሹዋ ኡባይ ሄዋዳን አሌቀቴዳ። 21 ጌሻ ጎልያ ፐንገ ቆስለꬃቱ ኡባይ ኦይዱ ማረ ግዲደ ማሰቴዳዋንታ፤ ኡንቱንቱ ኡባይካ እት ልከ።

ኡባፐ አꬌዳ ጌሻ ሳኣ ገልያሳ ስንꬃን 22 ምꬃፐ መቴዳ ያርሽያ ሳ ማላትያዌ ቤቴ። እካ ኦይዱ ማረ ግዲደ፥ አዱሳተꬃይ ጎምፓይካ ቃራ፤ ኡንቱንቱ ላኡካ ላኡ ላኡ ዋꬋ፤ አዉ ጌሳይ ቃይ ሄዙ ዋꬋ። ማዛናቱዋ ቱሳቱ፥ ገደቱነ ምይያና ደእያ ሳንቃቱ ኡባይካ ምꬃፐ ኦሰቴዳዋንታ። ሄ ብታኒ ታና፥ “ሀዌ መꬍና ጎዳ ስንꬃን ደእያ ጻርጴዛ” ያጌዳ።

23 ጌሻ ሳአዉ እት ፐንጊ ደኤ፤ ቃይ ኡባፐ አꬌዳ ጌሻ ሳአዉ እት ፐንጊ ደኤ። 24 እት እት ፐንግያዉ ግዱዋን ዳኮቲደ ዶየትያ ላኡ ሳንቃቱ ደኢኖ። 25 ጌሻ ሳኣ ጎዳቱዋ ቦላ መቴዳዋዳን፥ ፐንገቱዋ ሳንቃቱዋ ቦላካ ክሩበቱዋነ ዛምባቱዋ ምስሊ መት ኡቴዳ። ባራንዳፐ ቦላ ባጋና ስንꬃና ደእያ ሳንቃ ካራይ ምꬃፐ ኦሰቴዳዋ። 26 ሄ ባራንዳ ጎዳቱዋ ምይያን ማስኮተቱ ደኢኖ። ላኡ ባጋ ጎዳቱካ ዛምባ ምስልያን አሌቀቴድኖ። ሀድርሳ ባጋናነ ኡሸቻ ባጋና ደእያ ደꬃ ክፍለቶ ካሜዳ ካራይ ደኤ።