1 ሄዋፐ ጉይያን፥ ሄ ብታኒ ታና ሁጲሳ ባጋ ፐንግያና ካረ ዳባባ ካለꬂደ ጌሻ ጎልያ ግዶ ዳባባ ግምቢያና ኦይቀቴዳ ጎልያኮ፥ ታና አሄዳ። 2 ሄ ጎልያ ፐንጊ ፑደ ባጋ ስሚደ፥ ሄ ጎሊ 100 ዋꬋ አዱሳነ 50 ዋꬋ አኮ። 3 ግዶ ዳባባፐ ላታሙ ዋꬋ ሃኪደ፥ ቃይ ስንꬃ ባጋና ካረ ዳባባን ደእያ ሂጸቴዳ ሹቻፐ ስንꬃ ባጋና እቱ እቱዋና ጼለትያ ሄዙ ደꬃይ ደእያ ፖቂ ደኤ። 4 ሄ ክፍለቱዋ ፐንገቱ ሁጲሳ ጼሊኖ። ኡንቱንቱፐ ስንꬃ ባጋና 10 ዋꬋ አኮነ 100 ዋꬋ አዱሳ ግዴዳ፥ ግዱዋና አꬅያ ኦጊ ደኤ። 5 ሄ ጎልያ ቦላ ሄዘንꬆ ፖቂ ላኤንꬁዋፐ ጹሜ፤ ላኤንꬁ ቃይ ኮይሩዋፐ ጹሜ። ጋሶታይካ ኡንቱንቱ እቱ እቱዋፐ ጉየ ሺቅ ሺቂደ ግምበቴዳ ድራሳ። 6 ቃይ ኡንቱንቱ ሄዙ ፖቅያን ደእያ ክፍለቱ ቆሞዋንቱፐ ጋርሳዋንቱነ ግዶ ዛዋን ደእያ ክፍለቱ ጹምያ ድራዉ ካረ ዳባባን ደእያ ሀራ ጎለቱዋዳን፥ ኡንቱንቶ ቱሳይ ባዋ። 7 ሄ ክፍለቱዋፐ ስንꬃ ባጋና፥ 50 ዋꬋ አዱቂያ ካረ ዳባባ ባጋና ደእያ እት ግምቢ ደኤ። 8 ካረ ዳባባ ባጋና ደእያ ክፍለቱዋ አዱሳተꬃይ 50 ዋꬋ አዱቂያዋ ግድሽን ጌሻ ጎልያ ስንꬃን ደእያ ክፍልያ አዱሳተꬃይ 100 ዋꬋ። 9 ካረ ዳባባፐ ሶ ገልያ ዎደ አዋይ ዶልያ ባጋና ጋርሳ ክፍለቱዋ ገልያ ፐንጊ ደኤ።

10 ሄዋዳንካ፥ ጌሻ ጎልያፐ ገድሳ ባጋና ካረ ዳባባ ግምቢያ ካሊደ ጌሻ ጎልያ ዳባባና ኦይቀቴዳነ ካረ ዳባባኮ ጼልያ ሀራ ክፍለቱ ደኢኖ። 11 ሄ ጎልያ ክፍለቱዋ ስንꬃን አሳይ ሀመትያ ኦጊ ደኤ። ሄ ጎሊ ሁጲሳ ባጋን ደእያ ጎልያና እት ማላ፤ አዱሳተꬃይ፥ አኮተꬃይ፥ ክፍለቱነ ፐንገቱ ኡባይ እት ማላ። 12 ድርሳ ግምቢ ዉርያ አዋይ ዶልያ ባጋ ጋጻፐ ዶሚደ ግምቢ ዶምያ ገድሳ ባጋና ደእያ ክፍለቱዋ ገልያ ፐንጊ ደኤ።

13 ሄዋፐ ጉይያን፥ ሄ ብታኒ ታና ሀዋዳን ያጌዳ፤ “ሀዋንቱ ክፍለቱ፥ ሁጲሳናነ ገድሳና ጌሻ ጎልያ ካረ ዳባባኮ ጼልያዋንቱ ቄሳቱ ዋ ክፍለቱዋ። ኡንቱንቱ ግዶን መꬍና ጎዳ ስንꬃን ኦꬅያ ቄሳቱ ኡባፐ አꬌዳ ጌሻ ቁማ ማና። ሄ ክፍለቱ ጌሻ ግዴዳ ድራዉ፥ ኡባፐ አꬌዳ ጌሻ እሞታ፥ ሄዋንቱነ ካꬃ ያርሹዋ፥ ናጋራ ያርሹዋነ ናቁዋ ያርሹዋ ኡባ፥ ኡንቱንቱ ሄዋን ዎꬃና። 14 ጌሻ ጎልያ ገሌዳ ቄሳቱ ካረ ዳባባ ከስያ ዎደ፥ ጾሳዉ ኦꬅያ ዎደ ማዬዳ ጌሻ ማዩዋ ከሲደ፥ ሄ ክፍለቱዋን ዎናን ከስክኖ። አያዉ ጎፐ፥ ማዮቱ ጌሻ። ኡንቱንቱ ካረ አሳኮ ከሲደ፥ ካሰ ማይያ ሀራ ማዮቱዋ ማዪደ ከሳናዉ ኮሼ” ያጌዳ።

15 ሄ ብታኒ ጌሻ ጎልያ ጋርሳ ዳባባን ደእያ ኬꬃቱዋ ልኪ ዉርሲደ፥ አዋይ ዶልያ ባጋ ጼልያ ድርሳ ፐንግያና ታና ካረ ከሴዳ። ጌሻ ጎልያ ዩሽ አꬂደ ልኬዳ። 16 ጻምኣ አኪደ፥ አዋይ ዶልያ ባጋ ልክና፥ 500 ዋꬋ ግዴዳ። 17 ስሚደ ሁጲሳ ባጋ ሄ ጋትማን ልክና 500 ዋꬋ ግዴዳ። 18 ስሚደ ገድሳ ባጋ ልክና 500 ዋꬋ ግዴዳ። 19 ስሚደካ አዋይ ዉልያ ባጋ ልኬዳ፤ እካ 500 ዋꬋ ግዴዳ። 20 ሄዋዳን ኦꬂደ፥ እ ኦይዱ ባጋቱዋካ ልኬዳ። አ ዩሹዋን 500 ዋꬋ አዱቂደ፥ 500 ዋꬋ አክያ ድርሳ ግምቢ ደኤ። ሄ ግምቢ ጌሻ ሳኣ የንኮ ጮ ሳኣፐ ሻካናሳ።