1 ሄዋፐ ጉይያን፥ ሄ ብታኒ ታና ጉየ ዛሪደ፥ ጌሻ ጎልያዉ አዋይ ዶልያ ባጋና ደእያ ካረ ባጋ ድርሳ ፐንግያኮ አህያ ዎደ፥ ድርሳ ፐንጊ ጎርደት ኡቴዳ። 2 መꬍና ጎዳይ ታና ሀዋዳን ያጌዳ፤ “ሀ ፐንጊ ጎርዱዋን ደእ ባሻናፐ አትና፥ ላኤንꬆ ዶየተና። አሳይካ አናና ገለና፤ አያዉ ጎፐ፥ መꬍና ጎዳይ እስራኤልያ ጾሳይ አናና ገሌዳ። ሄዋ ድራዉ፥ ሄ ፐንጊ ጎርዱዋን ደአና። 3 ግዶፐነ፥ እስራኤልያ ቄስያ ጻላላይ መꬍና ጎዳ ስንꬃን ኡክꬃ ማናዉ ሄዋን ኡታና ዳንዳዬ። ፐንግያ ባራንዳና እ ገላናዉነ ከሳናዉ ዳንዳዬ” ያጌዳ።

4 ሄዋፐ ጉይያን፥ ሄ ብታኒ ታና ሁጲሳ ፐንግያኮ አፍያ ኦግያና አፊደ፥ ጌሻ ጎልያ ስንꬃ ባጋ ጋꬄዳ። ሄዋን ታን ጼልያ ዎደ፥ መꬍና ጎዳ ቦንቹ መꬍና ጎዳ ጎልያ ኩም ኡቴዳዋ በኣድ፤ ሄኮ፥ ታ ሶምኡዋ ቢታ ጋꬃደ ጉፋናድ።

5 ያትና፥ መꬍና ጎዳይ ታና ሀዋዳን ያጌዳ፤ “ላ አሳ ናአዉ፥ መꬍና ጎዳ ጌሻ ጎልያ ዎጋቱዋ ኡባነ አ ህገቱዋ ኡባ ጼልያዋን ታን ነዉ ኦድያዋ ነ ሀይꬃን ሎይꬃደ ስሳ፤ ነ አይፍያንካ ሎይꬃደ ጼላ። ጌሻ ጎልያ ገላናዉነ ከሳናዉ በስያ አሳቱነ በሰና አሳቱ ሀቃዋንተንቶ ሎይꬃደ አኬካ። 6 ማካላንቻ እስራኤልያ አሳዉ ሀዋዳን ያጋደ ኦዳ፤ ‘ኡባ ሞድያ መꬍና ጎዳይ ሀዋዳን ያጌ፤ “ህንተኖ፥ እስራኤልያ አሳቶ፥ ህንተ ኦꬅያ ቱና ኦሱ ኤቆ። 7 ህንተ ታዉ ታ ቁማ፥ ሞꬉዋነ ሱꬃ ያርሹዋ ኦꬂደ ሺሽያ ዎደ፥ ዎዛናይነ አሹ ቃጻረትቤና አላጋ አሳቱዋ ታ ጌሻ ጎልያ ገልሲደ፥ ኡንቱንቱ አ ቱንሳናዳን ኦꬄድታ። ህንተ ቱናተꬃ ኡባ ቦላንካ ጉጂደ፥ ታ ቃላ ጫቁዋ ኮሌድታ። 8 ቃይ ታ ጌሻ ሚሻቱዋ ቦላ አዎተናን እጺደ፥ ታ ጌሻ ጎልያን አላጋቱዋ አዎዬድታ” ያጌ።

9 “ ‘ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ “እስራኤልያ አሳ ግዶን ደእያ አላጋ አሳይ፥ ባረ ዎዛናንነ ባረ አሹዋን ቃጻረትቤናዌ፥ ኦንነ ታ ጌሻ ጎልያ ገሎፖ።

10 “ ‘ “ታፐ ሃኬዳ ሌዋቱ፥ እስራኤልያ አሳይ ታና አጊደ ዎራ ስምና፥ ባረንቱ ኤቃቶ ጎይናናዉ ዎራ ስሜዳዋንቱ፥ ባረንቱ ሙሩዋ አክኖ። 11 ግዶፐነ፥ ኡንቱንቱ ታ ጌሻ ጎልያን ኦሳንቻ ግድኖ፤ ታ ጌሻ ጎልያ ድርሳ ፐንገቱዋ ናግኖ፤ ጌሻ ጎልያ ኦሱዋካ ኦꬅኖ። ኡንቱንቱ ጹግያ ያርሹዋነ አሳይ አህያ ሀራ ያርሹዋ ሹክኖ፤ ቃይ አሳዉ ኦꬃናዉ፥ ኡንቱንቱ አሳኮ ሺቅኖ። 12 ሽን ኡንቱንቱ ካሰ እስራኤልያ አሳ ኤቃቶ ጎይንሴዳ ድራዉነ አሳ ናጋራን ኩንድስያ ꬉበ ግዴዳ ድራዉ፥ ኡንቱንቱ ባረንቱ ናጋራ ሙሩዋ አካናዳን፥ ታን ኩሽያ ደንꬃደ ጫቃድ። ታን ኡባ ሞድያ መꬍና ጎዳይ ሀዋ ኦዳይ። 13 ኡንቱንቱ ቄስያ ግዲደ ኦꬃናዉ ታኮ ሺቆፕኖ፤ ዎይ ታዉ ዱማቴዳ ጌሻባኮነ ኡባፐ አꬌዳ ጌሻባኮ ሺቆፕኖ። ኡንቱንቱ ባረንቱ ኦꬄዳ ቱና ኦሱዋ ድራዉ፥ ዬላ ማይኖ። 14 ግዶፐነ፥ ኡንቱንቱ ጌሻ ጎልያን አዎታናዳንነ አ ግዶን ኦꬃናዉ ደእያ ኦሱዋ ኡባካ ኦꬃናዳን፥ ታን ኡንቱንታ ሱንꬃና።

15 “ ‘ “ሽን እስራኤልያ አሳይ ታና አጊደ፥ ዎራ ስሜዳ ዎደ፥ ታ ጌሻ ጎልያ ዎጋ አማነቲደ ፖሌዳ፥ ሌዊያ ዛረ ቄሳቱ፥ ጻዶቃ ያራቱ፥ ኡንቱንቱ ታዉ ኦꬃናዉ ታኮ ሺቅኖ። ሞꬉዋነ ሱꬃ ሺሺደ፥ ኡንቱንቱ ታ ስንꬃን ኦꬅኖ። ታን ኡባ ሞድያ መꬍና ጎዳይ ሀዋ ኦዳይ። 16 ታ ጌሻ ጎልያ ኡንቱንቱ ገልኖ፤ ታዉ ኦꬃናዉ ታ ያርሽያ ሳ ኡንቱንቱ ሺቅኖ፤ አዎተꬃካ ኡንቱንቱ ኦይቂኖ። 17 ኡንቱንቱ ጌሻ ጎልያዉ ግዶ ዳባባ ገልያ ዎደ፥ ሊኑዋፐ ዳደቴዳ ማዩዋ ማይኖ፤ ግዶ ዳባባ ፐንገን ዎይ ጌሻ ጎልያ ግዶን ኦꬅያ ዎደ፥ ሱፍያ ማዩዋ ማዮፕኖ። ከሳ 28:39-43፤ ዎጋ 16:4 18 ኡንቱንቱ ባረንቱ ሁጲያን ላይኑዋ ሻሽያ ጻጽኖ፤ ባረንቱ ጼሳንካ ላይኑዋ ቃንꬃ ሱርያ ዳንጭኖ። ባረንታ ጫዋይያዋ አያነ ማዮፕኖ። 19 አሳይ ደእያ ካረ ዳባባ ኡንቱንቱ ከስያ ዎደ፥ ጌሻ ጎልያን ኦꬂደ ማዬዳ ማዩዋ ቃሪደ፥ ጌሻ ክፍለቱዋን ዎꬅኖ። ሄዌ ꬋዮፐ፥ ኡንቱንቱ ባረንቱ ጌሻ ማዩዋን አሳ ጾሳዉ ጌሻና። ዎጋ 16:23

20 “ ‘ “ቄሳቱ ባረንቱ ሁጲያ ሜደቶፕኖ፥ ዎይ ባረንቱ ብናና አዱሶፕኖ፤ ባረንቱ ሁጲያ ልክያን ቃንጽስኖ። ዎጋ 21:5 21 አይ ቄሲነ ግዶ ዳባባ ገልያ ዎደ፥ ዎይንያ ኤሳ ኡሾፖ። ዎጋ 10:9 22 ኡንቱንቱ አስናይ ሀይቄዳ፥ ዎይ የደቴዳ ማጫ አሳ አኮፕኖ። እስራኤልያ አሳፐ ጌላያቶ አክኖ፤ ዎይ አስናይ ቄስያ ግዲደ ደኢድ ሀይቄዳ ማጫ አሳ አክኖ። ዎጋ 21:7፣ 13-14

23 “ ‘ “ቄሳቱ ጾሳዉ ዱማቴዳዋፐነ ዱማተናን ጮ ደእያዋፐ ግዱዋን ደእያ ዱማተꬃ ታ አሳ ታማርስኖ። ቃይ ጌሻፐነ ቱናፐ ግዱዋን ደእያ ዱማተꬃ ኡንቱንቱ በስኖ። ሳፃ 10:10 24 አይ ሞቱ ደንዶፐካ፥ ቄሳቱ ታ ህጊ ኦድያዋዳን ፕርድኖ። ታ ህግያነ ታ ዎጋ ናጊደ፥ ታ ባላቱዋ ቦንችኖ፤ ታ ሳምባታካ ዱማዪደ ቦንችኖ።

25 “ ‘ “ቄሲ ሀይቄዳ አሃኮ ሺቂደ፥ ባረና ቱንሶፖ። ግዶፐነ፥ ሀይቄዳዌ አዉዋ፥ ዎይ አቶ፥ ዎይ የሌዳ አቱማ ናኣ፥ ዎይ ማጫ ናኣ፥ ዎይ እሻ፥ ዎይ አስና ገላቤና ምቻቶ ግዶፐ፥ አሃ ቦቻናዉ ዳንዳዬ። ዎጋ 21:1-4 26 እ ባረ ቱናተꬃፐ ጌዬዳዋፐ ጉይያን፥ ላፑን ጋላሳ ፓይዲደ ታኮ። ሄዋፐ ጉይያን፥ እ ጌሻ ግዳና። 27 ሄዋፐ ስሚደ፥ ጌሻ ሳኣን ኦꬃናዉ ግዶ ዳባባ ብያ ጋላስ፥ ባረ ናጋራ ያርሹዋ ሺሾ። ታን ኡባ ሞድያ መꬍና ጎዳይ ሀዋ ኦዳይ።

28 “ ‘ “ቄሳቶ ላታይ ባዋ፤ ታን ኡንቱንቶ ላታ። እስራኤልያ ቢታን ኡንቱንቶ አይ ላታነ እሞፕተ፤ ኡንቱንቱ ላታይ ታና። ፓይ. 18:20 29 ኡንቱንቱ ካꬃ ያርሹዋ፥ ናጋራ ያርሹዋነ ናቁዋ ያርሹዋ ሚኖ። እስራኤልያ ቢታን መꬍና ጎዳዉ ዱማዬዳዌ ኡባይ ኡንቱንቱሳ። ፓይ. 18:8-19 30 ኮይሮ ጋክያ ዱማ ዱማ ካꬃዉ ኮይሮ አይፊነ ህንተ ጾሳዉ እምያ እሞታ ኡባይ ቄሳቱ ዋሳ። ህንተ ጎልያን አንጁ ሸምፓና ማላ፥ ህንተ ꬊልያፐ ኮይሮ ኩሽያ ኡንቱንቶ እምተ። 31 ቄሳቱ ባኩቴዳዋ ዎይ ዶአይ ዎꬌዳዋ ካፉዋ አሹዋ ግድና፥ መህያ አሹዋ ግድና፥ አያነ ሞፕኖ። ዎጋ 22:8